སྲིད་སྐྱོང་བློ་བཟང་སེང་གེ་མཆོག་གིས་རྒྱ་བལ་གཉིས་ནས་ཕེབས་པའི་བོད་རིགས་མཐོ་རིམ་སློབ་མ་ཚོར་མ་འོངས་མགོ་འཁྲིད་གནང་ཕྱོགས་དང་འབྲེལ་མོལ་སྐོར་ལ་གཏམ་བཤད་གནང་སོང་།
ཟླ་འདིའི་ཚེས་ ༢༥ ཉིན་ནས་ཕྱི་ཚེས་ ༣༠ བར་ཉིན་ལྔའི་རིང་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག་བལ་ཡུལ་དང་རྒྱ་གར་བཅས་ཀྱི་མཐོ་སློབ་ཁག་ ༣༢ ནས་སློབ་ཕྲུག་ ༩༥ ཙམ་ལ་མགོ་ཁྲིད་ཀྱི་ཟབ་སྦྱོང་ཞིག་གནང་གི་ཡོད་པ་དང་། དེ་རིང་ཉིན་རྒྱབ་ཀྱི་ཆུ་ཚོད་ ༢།༠༠ ཐོག་གངས་སྐྱིད་གཉའ་ཁྲི་ཚོགས་ཁང་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་མགོ་ཁྲིད་དང་འབྲེལ་མོལ་ཞེས་པའི་བརྗོད་གཞིའི་ཐོག་གཏམ་བཤད་གནང་སོང་།
སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་མགོ་ཁྲིད་ཞེས་པ་དེ་དབྱིན་ཇིའི་ནང་ལ་ Leader ཞེས་པ་དེར་འགྲེལ་བཤད་མང་པོ་ཡོད་ཀྱང་སྔོན་མ་ནས་འགྲེལ་བཤད་གཅིག་ནི་ ‘To go forward and die’ མདུན་དུ་སྐྱོད་པ་དང་ཤི་ཐུབ་པ་ཟེར་བ་དེ་འགྲེལ་བཤད་རྙིང་པ་རེད། སྔོན་མ་ལུས་ཀྱི་ནུས་སྟོབས་ལ་བརྟན་ནས་མགོ་ཁྲིད་ཆགས་དགོས་སྟབས། དམག་རྒྱག་ཐུབ་མཁན་དང་ཕར་ཕྱོགས་ཀྱི་ས་དང་ཆུ་འཕྲོག་ཐུབ་མཁན། གྲོང་གསེབ་དང་སྟོན་ཐོག་འཕྲོག་ཐུབ་མཁན་དང་། མདུན་དུ་ཕྱིན་ནས་སོ་སོ་བློས་གཏོང་ཐུབ་མཁན་ཞིག་ལ་ཟེར་གྱི་ཡོད་རེད།
རྗེས་སུ་མགོ་ཁྲིད་ལ་འགྲེལ་བཤད་མང་པོ་ཡོང་ཡོད། (Activist Leader)ལས་འགུལ་བའི་མགོ་ཁྲིད་དང་། (Creative Leader)གསར་གཏོད་ཅན་གྱི་མགོ་ཁྲིད། (Authoritative Leader)དབང་འཛིན་ཅན་གྱི་མགོ་ཁྲིད། (Transformational Leader)བཅོས་སྒྱུར་ཅན་གྱི་མགོ་ཁྲིད། (Transactional Leader)ལས་དོན་ཐག་གཅོད་ཀྱི་མགོ་ཁྲིད་སོགས་ཡོད། མགོ་ཁྲིད་ཟེར་དུས་མདུན་དུ་སྐྱོད་མཁན་ཞིག་ཡིན་ཡང་། དམག་རྒྱག་སྐབས་དམག་སྤྱི་མགོ་ཁྲིད་ཡིན་ཡང་། དམག་གི་མདུན་ལ་རྒྱུག་དགོས་པའི་ངེས་པ་མེད། མདུན་དུ་བསྡད་ནས་མགོ་ཁྲིད་མཁན་དང་རྒྱབ་ལ་བསྡད་ནས་མགོ་ཁྲིད་མཁན། ཟུར་དང་དཀྱིལ་སོགས་སུ་བསྡད་ནས་མགོ་ཁྲིད་མཁན་ཡོད་སྟབས། མགོ་ཁྲིད་ཟེར་བ་དེ་མགོ་མ་རེད། ཁྲིད་ཐུབ་མཁན་གྱི་མི་དེ་རེད། དབྱིན་ཇིའི་ཚིག་གི་ (Leader) ཞེས་པ་དང་བོད་པའི་ཚིག་གི་མགོ་ཁྲིད་ཟེར་བ་གཉིས་སྡུར་ན་བོད་པའི་ཐ་སྙད་དེ་ཡག་པོ་འདུག དབྱིན་ཇིའི་ཐ་སྙད་ནང་ལ་ (Lead )སྣེ་ཁྲིད་ཟེར་བ་དེ་ངེས་པར་དུ་མདུན་ལ་འགྲོ་དགོས་པ་ཞིག་གོ་ཡོང་གིན་འདུག
མདུན་དུ་རྒྱུག་ནས་སྐད་རྒྱག་མཁན་ལས་རྗེས་ལ་འགྲོ་མཁན་མེད་པ་ཡིན་ན། མི་ཚང་མས་སྨྱོན་པ་རེད་ཟེར་གི་རེད། དེར་བརྟེན། ཁ་རྒྱག་པ་བཤད་མཁན་དང་སྐད་ཆ་རྫིག་པོ་བཤད་མཁན་རྣམས་མགོ་ཁྲིད་རེད་དམ་ཞེས་ན་མ་རེད། སྐད་ཆ་སྙན་པོ་བཤད་ཙམ་གྱིས་མགོ་ཁྲིད་ཡིན་པའི་ཁྱབ་ཀྱི་མ་རེད་ལ། རྫིག་པོ་ཡིན་པ་ཙམ་གྱི་མགོ་ཁྲིད་ཡིན་པའི་ཁྱབ་ཀྱི་མ་རེད། མགོ་ཁྲིད་ཟེར་པ་དེ་མི་སུ་ཡིན་རུང་ཡོང་ཆོག་པ་ཞིག་རེད། ཅེས་གསུངས་སོང་།
མགོ་ཁྲིད་ལ་ཆ་རྐྱེན་གཙོ་བོ་ག་རེ་ཡིན་མིན་སྐོར་ལ་ཁོང་གིས། མགོ་ཁྲིད་ལ་དགོས་པའི་ཆ་རྐྱེན་མང་པོ་ཡོད་པ་རེད། དཔེར་ན། འཆར་སྣང་དང་སྙིང་སྟོབས་སོགས་ཡོད་ཀྱང་དེ་དག་ལས་ཆེས་གལ་ཆེ་ཤོས་དེ་སྙིང་རྗེ་རེད། ཡིན་ནའང་དཀའ་ངལ་ལ་འཕྲད་མཁན་ཞིག་མཐོང་ན་སྙིང་རྗེ་དང་། ལམ་འགྲམ་གྱི་སྤྲང་པོ་མཐོང་དུས་སྙིང་རྗེ་ཟེར་བ་དེ་མ་རེད། དེ་ལ་དབྱིན་ཇིའི་སྐད་ནས་ (empathize)གཞན་གྱི་ཚོར་བ་རྟོག་ཐུབ་པ་ཟེར་གྱི་ཡོད་རེད། གཏིང་ཟབ་མོ་ཡོད་པའི་སྙིང་རྗེ་དེ་ལ་ཟེར་གྱི་ཡོད་པ་རེད། དབྱིན་ཇིའི་ནང་ལ་ (empathy) དང་ (compassion) སྙིང་རྗེ་ཟེར་བ་གཉིས་ཡོད་པ་དང་། སྙིང་རྗེ་ཞེས་པ་ནི་ལག་བསྟར་ཞིག་ཡིན་སྟབས་དེ་ནི་སྙིང་སྟོབས་ཀྱི་རྩ་བ་རེད། ཅེས་གསུངས་སོང་།
ཁོང་གིས་མུ་མཐུད་དུ་འབྲེལ་ལམ་གཏམ་བཤད་གནང་སྟངས་སྐོར་གསུངས་དོན། མགོ་ཁྲིད་ཀྱི་གཏམ་བཤད་དེ་ཡང་གལ་ཆེན་པོ་ཡིན་སྟབས། ཚོགས་འདུ་ལ་དཔག་པའི་གཏམ་བཤད་གནང་དགོས། དཔེར་ན། ཁོར་ཡུག་གི་ཚོགས་འདུ་ཞིག་ཡིན་ན་ཁོར་ཡུག་སྐོར་དང་། ཆབ་སྲིད་ཀྱི་སྡངས་ཆའི་ཐོག་ནས་ཆབ་སྲིད་བཤད་དགོས། དེ་བཞིན་མིའི་མཉམ་དུ་བཤད་ཐུབ་དགོས་པ་དང་། མིའི་སེམས་འགུག་ཐུབ་པ་ཞིག་ཡིན་དགོས། གཏམ་བཤད་སྐབས་དང་པོ་རང་ཉིད་ངོ་སྤྲོད་བྱས་པ་ནས་མགོ་བཙུགས་དགོས་པ་དང་། དེ་ནས་ང་ཚོ་ཚོང་མ་གཅིག་པ་ཡིན་པ་ཚོར་དགོས་པ་ཞིག་བཤད་དགོས། དེ་ནས་གནས་ཚུལ་ཛ་དྲག་ཡིན་པ་ཞིག་བཤད་དགོས། དེ་ནས་ག་རེ་བྱས་ནས་ལག་བསྟར་བྱ་དགོས་མིན་ཞིག་བཤད་དགོས། དེ་ལ་ང་དང་ང་ཚོ། ཛ་དྲག ལག་བསྟར་ཞེས་བརྗོད། ཨ་རིའི་སྲིད་འཛིན་ཨོ་བྷ་མས་བཤད་སྟངས་འདི་ལག་བསྟར་བྱས་ཏེ་གཏམ་བཤད་བྱས་ཏེ་སྐད་གྲགས་ཆགས་ཡོད་པ་རེད། ཅེས་སོགས་གསུངས་སོང་།
སྲིད་སྐྱོང་མཆོག་གི་གཏམ་བཤད་གྲུབ་རྗེས་སློབ་ཕྲུག་ཚོ་དང་ཆུ་ཚོད་གཅིག་རིང་དྲི་བ་དྲིས་ལན་གནང་སོང་། དེའི་རྗེས་སྲིད་སྐྱོང་མཆོག་དང་ལྷན་དུ་སྐུ་པར་བསྒྲོན་སོང་།
གསར་འགོད་པ། འཇིགས་མེད་རྒྱ་མཚོ།
