རྒྱ་རིགས་སློབ་མ་ཚོས་དྲུག་བཞིའི་དོན་རྐྱེན་གླེང་སློང་བྱས།

ཕྱི་ཟླ་ ༦ པའི་ཚེས་ ༤ ཉིན་ཏེ། པེ་ཅིན་གནམ་བདེ་སྒོ་མོ་ཆེའི་ཐང་ཆེན་གྱི་དྲུག་བཞིའི་དོན་རྐྱེན་གྱི་དུས་ཚིགས་བསླེབ་ལ་ཉེ་བ་དང་བསྟུན་ཏེ། ཕྱི་སྡོད་རྒྱ་རིགས་སློབ་མ་ཚོས་རྒྱ་ནག་གཞུང་ལ་དོན་རྐྱེན་དེའི་དངོས་ཡོད་གནས་ཚུལ་གསང་རྒྱ་བྱས་མི་ཆོག་པའི་རེ་སྐུལ་ཞུ་ཡིག་ཅིག་ཕུལ་ཡོད་འདུག

གཟའ་པ་སངས་ཉིན། དབྱིན་ཡིག་གི་གསར་ཁང་ལྟ་སྲུང་ (the guardian)ཞེས་པའི་ཐོག་གནས་ཚུལ་སྤེལ་བ་ལྟར་ན། ཉིན་དེར་ནུབ་གླིང་རྒྱལ་ཁབ་ཁག་ནང་སྡོད་པའི་རྒྱ་རིགས་སློབ་མ་ཚོས་རྒྱ་ནག་གཞུང་ལ་གནམ་བདེ་སྒོ་མོ་ཆེའི་ཐང་ཆེན་དུ་བྱུང་བའི་མི་མང་དམར་གསོད་ཀྱི་དོན་རྐྱེན་ཏེ། ‘༨༩ ལོའི་དམངས་གཙོའི་ལས་འགུལ།’ ཡང་ན་ ‘དྲུག་བཞིའི་དོན་རྐྱེན’ གྱི་དོན་དངོས་གནས་ཚུལ་དག་གསང་རྒྱ་མི་བྱེད་པར། རྒྱལ་སྤྱི་དང་རྒྱ་ནག་མི་མང་ལ་གསལ་བཤད་བྱེད་དགོས་པའི་རེ་སྐུལ་ཞུ་ཡིག་ཅིག་ཕུལ་ཡོད་འདུག

ཨ་རི་དང་ཡུ་རོབ། ཨོ་སི་ཁྲུ་ལེ་ཡ་གཙོས་ནུབ་གླིང་རྒྱལ་ཁབ་ཁག་ནང་སྡོད་པའི་རྒྱ་རིགས་སློབ་མ་ ༡༡ གིས་མིང་རྟགས་བཀོད་པའི་རེ་སྐུལ་ཞུ་ཡིག་དེ་ནི། དེང་གི་རྒྱ་ནག་ནང་གི་དམངས་གཙོ་དོན་གཉེར་བ་དང་ཁེ་དབང་རྩོད་ལེན་པ། འགྲོ་བ་མིའི་ཐོབ་ཐང་དོན་གཉེར་བའི་ཁྲིམས་རྩོད་པ། བུད་མེད་ཀྱི་ཁེ་དབང་རྩོད་ལེན་པ། དེ་བཞིན། རང་དབང་གི་རྩོམ་པ་པོ་བཅས་ལ་རྒྱ་ནག་གཞུང་གིས་བཀག་བསྐྱིལ་དམ་དྲག་གི་སྲིད་ཇུས་ལག་བསྟར་བྱེད་ཀྱི་ཡོད་པའི་ཆབ་སྲིད་ཀྱི་ཉེན་བརྡ་ཞིག་ཡིན་པ་དང་། ཞུ་ཡིག་དེ་ལ་ ༼ གོ་ལའི་དུས་བབ།༽ དུ་འབོད་པའི་རྒྱ་ནག་རྒྱལ་ཞེན་རིང་ལུགས་ཀྱི་གསར་ཤོག་སྟེང་ “ཕྱིའི་དགྲ་བོའི་བཙན་སྐུལ” དང་། “སྤྱི་ཚོགས་ཕུང་དཀྲུག་གཏོང་མཁན’ ཞེས་ཁོང་ཁྲོའི་ཁ་རྡུང་དྲག་པོ་བཏང་ཡོད་འདུག

གནས་ཚུལ་དེའི་ནང་མུ་མཐུད་དུ་བཀོད་པར། རེ་སྐུལ་ཞུ་འཕྲིན་དེ་ལ་མིང་རྟགས་འགོད་མཁན་རྗོར་རྗེ་ཡ་གཙུག་ལག་སློབ་ཆེན་(University of Georgia) གྱི་རྒྱ་རིགས་སློབ་མ་གུ་ཡེ་ (Gu Yi) ཟེར་བ་ཞིག་གིས “ ཕྱི་སྡོད་རྒྱ་རིགས་སློབ་མ་ཚོའི་སེམས་ལ། ཁོ་ཚོ་རང་གི་མེས་རྒྱལ་དང་ཁ་བྲལ་བའི་སྔ་རྗེས་གང་རུང་དུ་ཕྲད་ཅིང་མྱངས་པའི་རྐྱེན་ངན་བར་ཆད་མང་པོ་ཞིག་གི་དངོས་ཡོད་གནས་ཚུལ་དེ་ཁོ་ཚོས་རང་གི་མེས་རྒྱལ་ནང་བརྒྱུད་སྒྲོག་དང་གསལ་བཤད་བྱེད་པའི་ཀུན་སློང་གི་འགན་འཁྲི་ཞིག་ཅི་ནས་ཀྱང་ཡོད་པར་སེམས” ཞེས་བརྗོད་ཡོད་འདུག

༡༩༨༩ ལོའི་ ༦ ཚེས་ ༤ ཉིན་གནམ་བདེ་སྒོ་མོ་ཆེའི་ཐང་ཆེན་དུ་མི་མང་གིས་ངོ་རྒོལ་སྐད་འབོད་ལ་སྲིད་གཞུང་གིས་ཁྲག་དྲི་བྲོ་བའི་དྲག་གནོན་བྱས་པའི་གནས་ཚུལ་ཡིན་འདུག་ལ། གུ་ཡེ་མཐུད་བརྗོད་དོན། “ང་རང་རྒྱ་རིགས་ཤིག་ཡིན་པའི་ཆ་ནས་། ངས་ཕྱི་ཕྱོགས་ཀྱི་དངོས་ཡོད་གནས་ཚུལ་དེ་རང་གི་ཡུལ་མི་ཚོར་བཤད་དགོས་པའི་འོས་འགན་ཞིག་ཡོད་པར་འདོད་དེ། ད་བར་ང་ཚོས་འཇིགས་སྐྲག་གི་ལོ་ཟླ་མང་པོ་ཕར་བསྐྱལ་བ་ཡིན། ད་ནི་ང་ཚོས་འཇིག་ཉེན་འདི་དག་ལ་ཕྱིར་རྒོལ་བྱས་ན་ནི། ང་ཚོ་གཞི་ནས་རང་དབང་གིས་འཚོ་ཐུབ”ཅེས་བརྗོད་ཡོད་འདུག

ཞུ་ཡིག་དེ་ལ་ཕྱི་སྡོད་རྒྱ་རིགས་སློབ་མ་ ༥༠ ལྷག་གིས་མོས་མཐུན་དང་རྒྱབ་སྐྱོར་གྱི་མིང་རྟགས་བཀོད་དེ། རྒྱལ་སྤྱིའི་བརྒྱུད་ལམ་དུ་སྤེལ་ཡོད་པ་དང་། གུ་ཡེ་ཁོ་རང་གིས་བློ་སྤོབས་ཆེར་བསྐྱེད་ཀྱིས། གནས་ཚུལ་དེ་རྒྱ་ནག་ནང་གི་སློབ་ཆེན་མ་ཞིག་ལ་འགྲེལ་བརྗོད་བྱས་ཡོད་པ་མ་ཟད། རང་གི་ཕ་མ་གཉིས་སེམས་ཁུར་ལ་མི་གཏད་པའི་ཆེད་དུ། གནས་ཚུལ་དེ་ཁོང་ཚོར་མི་བཤད་པའི་ཁ་དན་ཡང་བྱས་ཡོད་འདུག

གུ་ཡེས་ལགས་ཀྱིས་རྒྱ་ནག་གི་༼གོ་ལའི་དུས་བབ་༽ གསར་ཁང་གི་ཆེས་གདུག་རྩུབ་ཆེ་བའི་ཁ་རྡུང་ལ་མ་བལྟས་པར། “ངས་ནི་གསར་ཁང་འདིས་ཕྱི་སྡོད་སློབ་མ་བཅུ་གཅིག་གིས་སྤྲེངས་པའི་ཞུ་ཡིག་འདི་ལ་དོ་སྣང་བྱས་པར་ཧ་ཅང་དགའ་བོ་བྱུང་། དེ་མིན་ཚེ། གནས་ཚུལ་འདི་གོ་མེད་ཚོར་མེད་ངང་མུན་ནག་གི་ཀློང་དུ་ལྷག་ཡོད་པ་རེད། ༼གོ་ལའི་དུས་བབ་༽ གསར་ཁང་གི་ཁ་རྡུང་བཏང་བར་བརྟེན། ང་ཚོའི་ཞུ་ཡིག་འདི་ཁྱབ་བརྡལ་དུ་ཕྱིན་པ་རེད། ང་ཚོའི་བསམ་པར། ཁོང་ཚོས་ཞུ་འཕྲིན་འདི་ལམ་སང་ཕྱིར་བསྡུ་དང་བཀག་སྡོམ་བྱེད་ཚུལ་ལ་བལྟས་ན། ཁོང་ཚོས་དེ་ལ་དྲིས་ལན་ཁ་གསལ་ཞིག་མ་རྙེད་པ་དང་། བརྡ་འཕྲིན་འདིས་རྒྱ་ནག་སྐམ་ས་ཆེན་མོར་གཡོ་འཁྱོམ་མི་ཉུང་བ་ཞིག་ཐེབས་ཡོད་སྙམ་བྱུང”ཅེས་བརྗོད་ཡོད་འདུག

སྤྱིར་བཏང་ ༡༩༨༩ ལོའི་ཟླ་ ༥ ནས་ ༦ བར་གནས་ཚུལ་ཅི་བྱུང་ཡོད་མེད་ནི་སྐབས་དེའི་རྒྱ་ནང་གི་སློབ་མ་ཚོས་འགྲེལ་བརྗོད་བྱས་པ་ལྟར་ཡིན་ནའང་། ད་རེབ་ཀྱི་རེ་སྐུལ་ཞུ་ཡིག་དེའི་ནང་། རྒྱ་ནག་གཞུང་གིས་བརྒྱུད་ལམ་ཁག་སྟངས་འཛིན་བཀག་སྡོམ་བྱས་པར་སྐྱོན་བརྗོད་དང་བཅས་བརྗོད་དོན། “ ལ་ཤས་ཤིག་གིས་རྒྱ་ནག་དམར་ཤོག་ཚོགས་པས་དྲུག་བཞིའི་དོན་རྐྱེན་གྱི་རྩོད་གླེང་ཉུང་དུ་བཏང་ཡོད་སྟབས། ང་ཚོས་མུ་མཐུད་དུ་དོན་རྐྱེན་དེ་གླེང་དགོས་དོན་མི་འདུག་ཟེར་མོད། དོན་དངོས་སུ་རྒྱ་ནག་གཞུང་གིས་དྲུག་བཞིའི་དོན་རྐྱེན་གྱི་དངོས་ཡོད་གནས་ཚུལ་ནག་གསུབ་དང་སྐབས་དེར་སྡུག་སྦྱོང་རེག་མཁན་ཚོར་དུས་ད་ལྟ་ད་དུང་ཡང་དམའ་འབེབ་དང་ཁྱད་གསོད་གཏོང་གི་འདུག”ཅེས་དང་། ཡང་རྒྱ་ནག་གཞུང་གིས་དེང་གི་དཔལ་འབྱོར་འཕེལ་རྒྱས་ལ་གཏད་པའི་དམིགས་བྱ་དང་། སྲིད་འཛིན་ཞི་ཅིན་ཕིན་གྱི་རེ་འབོད་དེ་ ‘རྒྱ་ནག་གི་རྨི་ལམ’ མགོ་མཇུག་སློག་དགོས་པའི་སྐོར་ནས “ང་ཚོའི་སེམས་ནའང་རྒྱ་ནག་གི་འབྱུང་འགྱུར་དང་ཁད་ཧ་ཅང་ཉེ་བའི་རྨི་ལམ་རེ་ཡོད། དེ་ནི་དྲང་བདེན་སྒོས། དངོས་བྱུང་ལོ་རྒྱུས་གཞིར་བཞག་སྟེང་། སྤྱི་དམངས་ཚང་མ་འཇིགས་སྐྲག་ལས་ཐར་བའི་རང་དབང་གི་འཇིག་རྟེན་ཞིག་ཏུ་འཚོ་ཞིང་གནས་ཐུབ་རྒྱུ་དེ་ཡིན་ལ། ང་ཚོ་ཕྱི་སྡོད་རྒྱ་རིགས་སློབ་མར་མཚོན་ན། འདི་ནི་ང་ཚོའི་རྨི་ལམ་ཡིན”ཞེས་བྲིས་ཡོད་འདུག

རེ་སྐུལ་ཞུ་ཡིག་དེའི་ཐད་ལ། རྒྱ་ནག་གི་རང་དབང་རྩོམ་པ་པོ་དང་ལོ་རྒྱུས་སྨྲ་བ། སྲིད་དོན་དཔྱད་བརྗོད་པ་ཀྲུང་ལེ་ཧྥན་ (Zhang Lifan) ཟེར་བ་ཞིག་གིས་ “འབྱུང་འགྱུར་ཁོ་ཚོ་ཕྱིར་རྒྱ་ནག་ནང་དུ་ལོག་ནས་ལས་གནས་ཤིག་འཚོལ་དགོས་བྱུང་ཚེ། དེ་དུས་ཁོ་ཚོ་དཀའ་ཁག་ལ་འཕྲད་ངེས་རེད་ལ། ཐ་ན་ཁོ་ཚོའི་ཁྱིམ་མི་ཚོ་ཡང་དཀའ་སྡུག་ལ་འཕྲད་ཉེན་ཆེ” ཅེས་བརྗོད་ཡོད་འདུག

ལྟ་སྲུང་གསར་ལམ་གྱིས་ ༡༩༨༩ ལོའི་དྲུག་བཞིའི་དོན་རྐྱེན་ནི། རྒྱ་ནག་ནང་གི་གསང་རྒྱ་ཆེན་པོའི་གྲས་ཀྱི་གཅིག་ཡིན་ཞིང་། རྒྱ་ནག་གཞུང་གིས་དངོན་སུམ་འཛེམ་མེད་ལ་བརྒྱུད་ལམ་ཁག་བཀག་སྡོམ་བྱས་ནས། གཞུང་འབྲེལ་བརྒྱུད་ལམ་དུ་ཉིན་མོ་དེའི་མི་གསོད་ཁྲག་སྦྱོར་གྱི་དོན་རྐྱེན་དེ་ནི་ཆེས་སྤྱིར་བཏང་གི་དོན་རྐྱེན་འབའ་ཞིག་ཏུ་འགྲེལ་བརྗོད་བྱས་ཡོད་པ་དང་། དྲུག་བཞིའི་དོན་རྐྱེན་སྐབས་སུ། མི་མང་གིས་ངོ་རྒོལ་དང་སྲིད་གཞུང་གིས་དྲག་གནོན། དེའི་རྗེས་ཀྱི་ཡ་ང་བའི་སྐྱོ་གར་བཅས་དང་འབྲེལ་བའི་བརྩམས་ཆོས་༼ མི་དམངས་སྤྱི་མཐུན་རྒྱལ་ཁབ་ཀྱི་རྗེས་དྲན་༽ རྩོམ་པ་པོ་ལོ་ཡེ་སི་ལེམ་ (Louisa Lim) ལགས་ཀྱིས “ཞུ་འཕྲིན་འདི་ནི་ཇི་འདྲའི་ཉེན་ཁ་ཆེན་པོ་ཞིག་མ་ཡིན་ནམ། བྱེ་ཐང་གི་རྐང་རྗེ་འདྲ་བའི་ཆབ་སྲིད་ཀྱི་ཚོར་འདུས་ཡོངས་སུ་གཏམས་པའི་རེ་སྐུལ་ཞུ་འཕྲིན་འདི་ལ་ཨ་ལན་འདེབས་རྒྱུ་ནི་མི་སྲིད་པ་ཞིག་རེད། ལྷག་པར་དུ་ན་ནིང་དྲུག་བཞིའི་དུས་དྲན་ཐེངས་ ༢༥ རྗེས་ནས་བཟུང་། དོན་རྐྱེན་འདི་གླེང་ཕྱོགས་ཐད་ལ་བགྲོ་གླེང་གྲོས་མོལ་གནང་བའི་གནས་བབ་སྡུག་རུ་ཕྱིན་ཡོད” ཅེས་དང་། “སྔོན་ཆད། རང་ཁྱིམ་གྱི་རྒྱ་སྒོའི་ནང་ལོག་ནས་རྗེས་དྲན་ཞུ་མཁན་གང་ཟག་སྒེར་བ་ཚོར་བཟོད་བསྲན་གུ་ཡངས་བྱས་ཀྱང་། ན་ནིང་ཁོང་ཚོ་དམིགས་འབེན་དུ་བཟུང་འདུག་པར་གཞིག་ན། མི་མང་གི་མངོན་འདོད་ཇི་ལྟར་ཡང་། རྒྱ་ནག་གཞུང་གིས་དྲུག་བཞིའི་དོན་རྐྱེན་ལ་བགྲོ་གླེང་གྲོས་མཐུན་དང་རྗེས་དྲན་སྲུང་བརྩི་གང་ཡང་གནང་འདོད་མེད་ཤག་རེད་ལ། དུས་རབས་གཅིག་གི་ཡར་སྔོན་ནས་རྒྱ་ནག་གཞུང་གིས་དྲུག་བཞིའི་དོན་རྐྱེན་གསང་རྒྱ་བྱེད་པའི་དམིགས་བྱ་དོན་སྨིན་བྱུང་ཡོད” ཅེས་བརྗོད་ཡོད་སྐོར་བཀོད་འདུག

རྒྱ་རིགས་སློབ་མ་ལེམ་ལགས་ཀྱིས་མུ་མཐུད་དུ་རྒྱ་ནག་གཞུང་གིས་མི་དམངས་མང་ཚོགས་ཀྱིས་མི་མཐོང་མི་ཐོས་པའི་ཆེད་དུ། ཕྱི་ཕྱོགས་དང་འབྲེལ་བའི་གསར་གནས་བརྒྱུད་ལམ་ཁག་བཀག་སྡོམ་དང་སྟངས་འཛིན་ནན་མོ་བྱས་ཡོད་པའི་སྐོར་ལ་ “བརྡ་འཕྲིན་འབྲི་མཁན་སློབ་མ་འདི་ཚོས་བཤད་པ་དངོས་ཡོད་གནས་ཚུལ་རེད། སྐབས་དེའི་ཁོ་ཚོའི་སློབ་གྲོགས་མང་པོ་ཞིག་གིས་དྲུག་བཞིའི་དོན་རྐྱེན་གྱི་གནས་ཚུལ་གསལ་བོ་ཞིག་མི་ཤེས་པ་མ་ཟད། ཐ་ན་དྲུག་བཞིའི་དོན་རྐྱེན་སྐབས་སུ། ལག་ན་མཚོན་ཆ་མེད་པའི་མི་སེར་ཞིག་གིས་ཁྲབ་ལྡན་འཁོར་ལོ་མང་པོའི་མདུན་བཀག་པའི་འདྲ་པར་དེའི་ངོས་ཀྱི་མི་དེ་ནི། གང་ཟག་ངོ་མ་ཞིག་མ་ཡིན་པར། དེ་ནི་འཕྲུལ་ཆས་ཀྱི་མི་ཞིག་ཡིན་པར་རྒྱ་མི་ཚང་མས་ཡིད་ཆེས་བྱེད་ཀྱི་འདུག”ཅེས་དང་། “ཉེ་ལམ་ངས་༼ མི་དམངས་སྤྱི་མཐུན་རྒྱལ་ཁབ་ཀྱི་རྗེས་དྲན་༽ ཞེས་པའི་དཔེ་དེབ་འབྲི་སྐབས། ངས་འདྲ་པར་དེའི་སྐོར་ལ་པེ་ཅིན་གྲོང་ཁྱེར་གྱི་སློན་ཆེན་སློབ་མ་ ༡༠༠ ལྷག་ལ་བཅར་འདྲི་ཞུས་པ་ཡིན། སྐབས་དེར་ངས་ཁོ་ཚོར་འདྲ་པར་འདི་ལྷོ་ཀོ་རུ་ཡ་ (South Korea) ནས་རེད་དམ། ཡང་ན་ཡུ་རོབ་ལྷོ་ཤར་གྱི་སྤྱི་མཐུན་རྒྱལ་ཁབ་ཁོ་སོ་བོ་ (Kosovo) ནས་ཡིན་མིན་འདྲི་དུས། སློབ་མ་བརྒྱ་ཆའི་ ༨༥ འདྲ་པར་དེས་གོ་དོན་ཅི་ཞིག་མཚོན་མིན་ལ་གསལ་ཁ་ཅི་ཡང་འདུག འདི་ནི་སྤྱི་ཚོགས་བརྒྱུད་ལམ་ཁག་བཀག་སྡོམ་དང་སྟངས་འཛིན་ནན་མོ་བྱས་པའི་མཇུག་འབྲས་རེད། དེར་བརྟེན། པེ་ཅིན་གྲོང་ཁྱེར་གྱི་ཕྱི་རོལ་དང་གཙུག་ལག་སློབ་ཆེན་ཁག་གི་ཕྱི་ལོག་ནའང་། དྲུག་བཞིའི་དོན་རྐྱེན་སྣང་མེད་རྒྱ་ཡན་དུ་བཏང་བའི་མི་འབོར་ནི་བགྲང་གིས་མི་ཟིན་པར་ངས་ཡིད་ཆེས་བྱེད་ཀྱི་ཡོད”ཅེས་སོགས་བརྗོད་ཡོད་འདུག

གནས་ཚུལ་དེའི་ནང་༼གོ་ལའི་དུས་བབ་༽ གསར་ཁང་གིས “གནམ་བདེ་སྒོ་མོ་ཆེའི་ཐང་ཆེན་གྱི་དོན་རྐྱེན་དེ་ནི་མི་མང་རང་ངོས་ནས་རྩོད་གླེང་མ་བྱས་བ་མ་གཏོགས། སྲིད་གཞུང་གིས་དེ་ལ་གསང་རྒྱ་དང་བཀག་སྡོམ་བྱས་མེད་པ་མ་ཟད། ད་དུང་དེའི་སྐོར་གྱི་གནས་ཚུལ་ཤེས་འདོད་ཡོད་མཁན་ཚོས་ཕྱི་སྡོད་རྒྱ་རིགས་ཚོའི་གསར་གནས་བརྒྱུད་ལམ་ནས་ཕན་ཚུན་ལ་བརྒྱུད་སྤྲོད་དང་ཕབ་ལེན་བྱས་ཆོག་གི་རེད”ཅེས་ཟེར་མོད། འོན་ཀྱང་ཕྱི་སྡོད་རྒྱ་རིགས་ཚོས“རྒྱ་ནག་གི་སྤྱི་ཚོགས་ཁོར་ཡུག་ནང་དྲུག་བཞིའི་དོན་རྐྱེན་གླེང་སློང་མི་བྱེད་པར་མོས་མཐུན་བྱས་ཡོད་པ་དང་། རྒྱ་ནག་གཞུང་གིས་རྩ་དོན་དེ་རྒྱུན་སྐྱོང་བྱེད་པའི་སྐབས་འདིར། ཕྱི་ནང་གི་རྒྱ་རིགས་སུ་ཞིག་གིས་སྐབས་དེའི་བྱུང་རབས་ལོ་རྒྱུས་ངོ་མ་གླེང་ཚེ། ཁོ་ཚོ་སྤྱི་ཚོགས་ནང་དཀྲུག་ཤིང་སློང་མཁན་གྱི་ཉེས་མིང་འདོགས་རྐྱང་བྱེད་པ་ནི། ངོ་མ་ཚུལ་མིན་ལུགས་ལྡོག་གི་བསམ་སྦྱོར་འབའ་ཞིག་རེད”ཅེས་བརྗོད་ཡོད་སྐོར་བཀོད་འདུག

ཕྱི་སྡོད་རྒྱ་རིགས་སློབ་མ་ཚོས་སྤྲིངས་པའི་རེ་སྐུལ་ཞུ་འཕྲིན་དེ་ནི་ཐོག་མར་རྒྱ་ནག་གཞུལ་འབྲེལ་བརྒྱུད་ལམ་ཁག་ཏུ་སྤེལ་བ་དང་། རེས་གཟའ་མིག་དམར་ཉིན་གྱི་གསར་གནས་རྩོམ་སྒྲིག་པས། གཞན་སུས་ཀྱང་སྣང་འཇོག་མ་བྱུང་བའི་ཞུ་ཡིག་དེ་ལ་དོ་སྣང་ཆེན་པོ་བྱས་འདུག་ལ། ཕྱིས་སུ་རྒྱ་ནང་གི་བརྒྱུད་ལམ་ཁག་ཏུ་ཞུ་ཡིག་དེ་ཕྱིར་བསྡུ་དང་བཀག་སྡོམ་བྱས་ཡོད་ནའང་། གཞུང་འབྲེལ་དང་གཞུང་འབྲེལ་མ་ཡིན་པའི་བརྒྱུད་ལམ་ཁག་གཞན་པར་དེ་སྔོན་ནས་ཁྱབ་བརྡལ་དུ་ཕྱིན་ཡོད་འདུག