གཟའ་མིག་དམར་ཉིན་རང་ལུས་མེར་བསྲེགས་གནང་མཁན་སངས་རྒྱས་མཆོ་ལགས་ཀྱི་སྤུན་ཉེ་གྲྭ་བ་ཞིག་ཚེས་ ༢༨ ཉིན་རྒྱ་གཞུང་གིས་འཛིན་བཟུང་བྱས་ཡོད་པ་དང་། སངས་རྒྱས་མཆོ་ལགས་ཀྱིས་རང་ལུས་མེར་བསྲེགས་གནང་མཁར་ “ ༧རྒྱལ་དབང་རིན་པོ་ཆེ་སྐུ་ཚེ་ཁྲི་ལོ་བརྟན་པར་ཤོག པཎ་ཆེན་རིན་པོ་ཆེ་གང་དུ་ཡོད། བོད་མིར་འགྲོ་བ་མིའི་ཐོབ་ཐང་དགོས། ” ཞེས་བྲིས་འདུག
དེ་རིང་སླར་ཡང་གནས་ཚུལ་འབྱོར་བར། ཚེས་ ༢༧ ཉིན་གྱི་ཐོ་རངས་ལ། ཀན་ལྷོ་ཁུལ་ཅོ་ནེ་རྫོང་ཆས་བུ་གཤིས་བཀྲ་ཤིས་ཆོས་འཁོར་གླིང་དགོན་འདབས་ཀྱི་རྒྱ་ནག་ཉེན་རྟོག་ཁང་སྒོ་མཁར་རང་ལུས་མེར་བསྲེགས་གནང་མཁན་སངས་རྒྱས་མཚོ་ལགས་ཀྱིས་མཚན་མོ་དེར་རང་ཁྱིམ་ནས་༧གོང་ས་མཆོག་གི་སྐུ་པར་ཆེན་པོ་ཞིག་དང་། སྤོས་ཤོག་ཐུམ་གཅིག་བཅས་འཁྱེར་ནས་ཉེན་རྟོག་ཁང་དེའི་སྒོ་ཁར་སོང་སྟེ། ༧གོང་ས་མཆོག་གི་སྐུ་པར་ཉེན་རྟོག་ཁང་གི་རྩིག་ངོས་སུ་སྦྱར་ཞིང་། དེའི་མདུན་དུ་སྤོས་རྣམས་བསྒྲོན་ཏེ། སྐུ་པར་གྱི་འོག་ཏུ་ “ ༧རྒྱལ་དབང་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག པཎ་ཆེན་རིན་པོ་ཆེ་གང་དུ་ཡོད། བོད་མིར་འགྲོ་བ་མིའི་ཐོབ་ཐང་དགོས། ” ཞེས་སོགས་བྲིས་ཡོད་འདུག
མཚན་དེའི་ཐོ་རངས་ལ་ས་གནས་དེའི་རྒན་རྒོན་ཚོ་དགོན་པར་གླིང་སྐོར་དུ་འགྲོ་སྐབས། ཉེན་རྟོག་ཁང་དེའི་སྒོ་ཁར་མེ་ཆེན་པོ་ཞིག་འབར་བཞིན་ཡོད་པ་མཐོང་ཡོད་ཀྱང་། གད་སྙིགས་བསྲེགས་པའི་མེ་ཡིན་ཤག་གིས་དོ་སྣང་བྱས་མི་འདུག སྐོར་བ་དང་པོའི་སྐབས་སུ་མེ་འབར་བཞིན་པ་མཐོང་བ་དང་། སྐོར་བ་གཉིས་པའི་སྐབས་སུ་མི་ཞིག་གིས་རང་ལུས་མེར་བསྲེགས་བཏང་གསལ་བོར་ཤེས་ཡོད་ཀྱང་། མེར་འཚིག་པ་ཧ་ཅང་ཚབས་ཆེ་བས་མི་སུ་ཡིན་ངོ་མི་ཤེས་པ་ཆགས་ཡོད་འདུག སྐོར་བ་གསུམ་པའི་སྐབས་སུ་ཉེན་རྟོག་ཁང་གི་མི་སྣས་སྐུ་ཕུང་འཁྱེར་ཏེ་ཤུལ་དུ་གང་ཡང་མེད་པ་མ་ཟད། ལས་ཁུངས་དེའི་སྒོའི་གཡས་གཡོན་དུ་དྲག་ཆས་ཉེན་རྟོག་པས་ལག་ཏུ་མེ་མདའ་བཟུང་ནས་བསྡད་འདུག་ཟེར།
ཉིན་དེ་རང་ལ་སྐུ་ཕུང་གཙོད་གྲོང་ཁྱེར་ལ་འཁྱེར་ནས་མེར་བསྲེགས་བཏང་ཡོད་པ་མ་ཟད། ནང་མི་ཚོར་ཉིན་དེར་ཆོས་ཀྱི་བྱེད་སྒོ་གང་ཡང་སྤེལ་མི་ཆོག་པའི་བཙན་བཀའ་བཏང་ཡོད་འདུག་ལ། སངས་རྒྱས་མཆོའི་གཅེན་པོའི་བུ་བཀྲ་ཤིས་ཆོས་གླིང་དགོན་དུ་གྲྭ་བ་བྱས་ཡོད་པའི་བསྟན་འཛིན་བཟོད་པ་ཞུ་བ་ཚེས་ ༢༨ ཉིན་རྒྱ་གཞུང་ཉེན་རྟོག་པས་འཛིན་བཟུང་བྱས་ཡོད་འདུག ནང་མི་གཉེན་འབྲེལ་དག་ལའང་འཇིགས་སྐུལ་བྱས་ཏེ་སངས་རྒྱས་མཚོས་རང་སྲེག་བྱས་པ་རྩ་བ་ནས་ཕྱི་ལོགས་སུ་བཤད་མི་ཆོག་པ་མ་ཟད། ཁོ་མོར་རྒྱུན་ལྡན་གྱི་ནད་ཚ་ཞིག་གི་དབང་གིས་གྲོངས་ཚུལ་བརྗོད་དགོས་སྐོར་ལབ་ཡོད་འདུག
སངས་རྒྱས་མཚོ་ལགས་ ༢༠༠༣ ལོར་ལྷ་སར་ཕྱིན་ཡོད་པ་དང་། ༢༠༠༤ ལོར་མོ་རང་གི་ད་ལྟའི་ཁྱོ་ག་རྟ་མགྲིན་དབང་རྒྱལ་དང་ཉེན་སྒྲིག་བྱས་ཡོད་ཅིང་། ༢༠༠༦ ཡས་མས་ཤིག་ལ་ཁོང་བཟའ་མི་གཉིས་ཕྱིར་ཕ་ཡུལ་དུ་ལོག་སྟེ། ཀན་ལྷོ་ཁུལ་འོག་གི་མེན་ཞཱན་ལུའུ་ཅི་ཞིང་ཐོག་ཏུ་ཟ་ཁང་དང་ཚོང་ཁང་། མགྲོན་ཁང་སོགས་གཉེར་ཡོད་ཀྱང་། ཁ་ཆེ་ཚོང་པ་ཁག་ཅིག་དང་རྙོག་འཛིང་ཞིག་བྱུང་སྟབས། རྗེས་སུ་ཕྱིར་ནག་ཆུར་སོང་སྟེ་ཚོང་ལས་གཉེར་ཏེ་ཡོད་ཅིང་། ད་ཆར་ཁོང་བཟའ་མི་གཉིས་དཔལ་འབྱོར་ཐད་ནས་གང་འཚམ་ཡག་པོ་ཆགས་ཏེ། ཕ་ཡུལ་དུ་ཁང་པ་གཉིས་ཡོད་པ་དང་བླ་བྲང་དུའང་ཚོང་ཁང་ཞིག་ཉོས་ཡོད་འདུག
ཁོང་བཟའ་མི་གཉིས་ཀྱི་བྱིས་པ་གཉིས་ད་ཆར་གཅོད་གྲོང་ཁྱེར་དུ་ཁོང་མོའི་ཁྱོ་གའི་ཨ་ཕས་སློབ་གྲྭར་གཏོང་བཞིན་ཡོད་འདུག མོ་རང་ཉིན་འགའི་སྔོན་ཙམ་ལ་ནག་ཆུ་ནས་ཕ་ཡུལ་དུ་ཡོང་མ་ཐག་ཡིན་འདུག
བྱིས་པ་དེ་གཉིས་མཐོང་ན་སེམས་ནང་ལ་ཅིག་ཆགས་འགྲོ་གི་འདུག་་་ངོ་མ་ཡིད་སྐྱོ་བ་ལ་་་་་