དེ་རིང་དྷ་སྟེང་བོད་ཁྱིམ་དུ་རྒྱལ་ཡུམ་ཆེན་མོའི་རྐང་རྩེད་སྤོ་ལོ་འགྲན་བསྡུར་མགོ་འཛུགས་གནང་ཡོད་ཅིང་། དབུ་འཛུགས་མཛད་སྒོའི་སྟེང་སྤྱི་འཐུས་ཚོགས་གཙོ་མཆོག་གིས་རྩེད་མོའི་ཞོར་དུ་བོད་དོན་ཁྱབ་བསྒྲགས་ཀྱི་ལས་འགན་ཡོད་སྐོར་གསུངས་སོང་།
དེ་རིང་ཉིན་རྒྱབ་ཆུ་ཚོད་ ༡།༣༠ ཐོག དྷ་སྟེང་བོད་ཁྱིམ་སློབ་གྲྭའི་རྐང་རྩེད་སྤོ་ལོ་རྩེད་ཐང་དུ། བོད་རྒྱལ་ཡོངས་རྩེད་རིག་ཚོགས་པའི་གོ་སྒྲིག་གནང་བའི་རྒྱལ་ཡུམ་ཆེན་མོའི་རྗེས་དྲན་གསེར་གྱི་གཟེངས་རྟགས་རྐང་སྤོལ་འགྲན་བསྡུར་ཐེངས་ ༢༡ པ་དེ་མགོ་འདུགས་གནས་སོང་། དབུ་འབྱེད་མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་པ་མཆོག་ཕེབས་འདུག
མཛད་སྒོའི་ཐོག་མར་དྷ་སྟེང་བོད་ཁྱིམ་རིག་རྩེད་རུ་ཁག་གིས་རྔ་རོལ་གྱིས་རུ་སྣེ་དྲངས་ཏེ། འགྲན་ཞུགས་རུ་ཁག་རྣམས་རྩེད་ཐང་དུ་རུ་སྒྲིག་གནང་རྗེས། ལྟད་མོ་བ་ཡོངས་སྐུ་བཞེངས་ཐོག་རྒྱ་གར་དང་བོད་རྒྱལ་ཁབ་ཆེན་མོའི་རྒྱལ་གླུ་བཏང་རྗེས། བོད་པའི་རང་དབང་འཐབ་རྩོད་ཆེད་ཚེ་སྲོག་ཤོར་བ་དག་ལ་མྱ་ངན་དང་བདེན་ཚིག་སྨོན་ལམ་སྐྱོར་རྗེས། བོད་རྒྱལ་ཡོངས་རྩེད་རིགས་ཚོགས་པའི་དྲུང་ཆེ་སྐལ་བཟང་དོན་གྲུབ་ལགས་ཀྱིས་ཐེངས་འདིའི་རྐང་སྤོལ་རྩེད་འགྲན་དབུ་འཛུགས་ཀྱི་གསུང་བཤད་གནང་རྗེས། བོད་མི་མང་སྤྱི་འཐུས་སྤེན་པ་ཚེ་རིང་མཆོག་གིས་གསུང་བཤད་གནང་སོང་།
རྩེད་རིགས་ཚོགས་པའི་དྲུང་ཆེ་སྐལ་བཟང་དོན་གྲུབ་ལགས་ཀྱིས་ངོ་སྤྲོད་གནང་བ་ལྟར་ན། ད་ལོ་དེབ་སྐྱེལ་བྱས་པའི་རུ་ཁག་ ༣༨ ཡོད་པ་ལས་ནང་ཁུལ་འགྲན་བསྡུར་བྱས་མཐར་རུ་ཁག་ ༢༨ འདེམ་སྒྲུག་བྱས་ཡོད་པ་དང་། ཕྱི་རྒྱལ་ཁག་ནས་ཨ་རི་ནས་རུ་ཁག་ ༡ དང་། ཁེ་ན་ཌ་ནས་རུ་ཁག་ ༡། ཡུ་རོབ་ནས་རུ་ཁག་ ༡ བཅས་ཡོད་འདུག་ལ། བལ་ཡུལ་ནས་རུ་ཁག་ ༣ དང་། རྒྱ་གར་གྱི་མངའ་སྡེ་བཅུ་གསུམ་ནས་རུ་ཁག་ ༢༢ བཅས་ཁྱོན་རུ་ཁག་ ༢༨ བྱུང་ཡོད་འདུག
བོད་ཀྱི་རྩེད་རིགས་ཚོགས་ཆུང་དེ་ཕྱི་ལོ་ ༢༠༠༢ ལོ་ནས་མགོ་བཙུགས་པ་དང་། ཚོགས་ཆུང་དེའི་ལས་འགན་གཙོ་བོ་བོད་པའི་རྐང་རྩེ་སྤོ་ལོའི་རུ་ཁག་འདེམས་སྒྲུག་བྱ་རྒྱུ་དང་། ༢༠༠༣ ལོ་ནས་ད་བར་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་ཐེངས་ ༡༢ ཙམ་འགྲོ་བཞིན་ཡོད་པ། བོད་པའི་བུ་ཕྲུ་ཚོར་སྦྱོང་བརྡར་ཆེད་སློབ་ཕྲུག་སྡེ་ཚན་ཞིག་བཙུགས་ཡོད་པ། ད་ལྟ་རྩེད་མོ་རྩེ་མཁན་ ༤༤༨ ཡོད་པ་དང་། དེ་སྔོན་གྱི་འཛུལ་ཞུགས་བྱེད་མཁན་ཚང་མ་སྡོམ་ན་གཞོན་སྐྱེས་ ༦༠༠ ལྷག་འཛུལ་ཞུགས་བྱས་ཡོད་འདུག
སྐལ་བཟང་དོན་འགྲུབ་ལགས་ཀྱིས་བརྗོད་དོན། ད་ལོ་དམིགས་བསལ་༧གོང་ས་མཆོག་དགུང་གྲངས་བརྒྱད་བཅུར་ཕེབས་པར་ང་ཚོས་འཁྲུངས་སྐར་སྲུང་གཙི་བྱེད་བཞིན་ཡོད་པ་དང་། མང་ཚོགས་ཀྱིས་སྐད་རྒྱག་པའི་སྐབས་སུ་བཟང་སྤྱོད་ཐོག་མ་གཏོགས་ཚིག་ནག་པོ་དང་ཁོང་ཁྲོ་ཟ་བའི་ཚིག་རྩ་བ་ནས་མ་གནང་རོགས་ཞུ་རྒྱུ་དང་། རྩེད་འགྲན་ཟུར་དཔང་རྒྱ་གར་བ་རྣམས་ལ་ཚིག་ནག་པོ་རྩ་བ་ནས་མ་གསུངས་རོགས་གནང་ཞུ་རྒྱུ་ཡིན། མཇུག་མཐར་དགའ་ལྡན་ཕོ་བྲང་དང་བོད་ཁྱིམ་གཉིས་ཀྱིས་དུས་རྟག་ཏུ་རྒྱབ་སྐྱོར་བྱེད་པར་ཐུགས་རྗེ་ཆེ་ཞུ་རྒྱུ་ཡིན། ཅེས་སོགས་བརྗོད་སོང་།
སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། ལོ་རྟག་པར་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་རྩེད་སྤོ་ལོ་འགྲན་སྡུར་དེ་གོ་སྒྲིག་གནང་གི་ཡོད། སྐབས་དེར་རྒྱལ་ཡུམ་ཆེན་མོར་བཀའ་དྲིན་རྗེས་དྲན་བྱེད་དགོས་པ་དེ་གལ་ཆེན་པོ་རེད། ལྷག་པར་དུ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དགུང་གྲངས་ལ་ ༨༠ ཕེབས་བཞིན་ཡོད་པའི་དུས་དྲན་སྲུང་གཙི་མང་པོ་ཞིག་བྱེད་བཞིན་ཡོད་པ་ལྟར། རྣམ་པ་ཚོས་དེར་དམིགས་ཡོད་པ་དང་། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་བཀའ་དྲིན་བླ་ན་མ་མཆིས་པ་དེ་ག་དུས་ཡིན་ན་ང་རང་ཚོའི་སེམས་ལ་འཆང་དགོས་པ་ཧ་ཅང་གལ་ཆེན་པོ་རེད། ཅེས་གསུངས་སོང་།
ཁོང་གིས་མུ་མཐུད་དུ། རྩེད་མོ་ཟེར་བ་དེ་གཙོ་བོ་སོ་སོའི་གཟུགས་པོར་བདེ་ཐང་ཡོང་བའི་ཆེད་དང་། གཉིས་པ་དེ་གོང་ནས་གསུངས་པ་ལྟར་ཁྱེད་རང་ཚོའི་ནང་ཁུལ་ལ་ཕན་ཚུན་འབྲེལ་བ་ཡོང་རྒྱུ་དང་། ཁྱེད་རང་ཚོའི་ནང་ལ་འཆམ་མཐུན་ཡོང་རྒྱུ་གལ་ཆེན་པོ་ཞིག་རེད། ཁྱེད་རང་ཚོ་རྩེད་མོ་རྩེ་བའི་སྐབས་ལ་རྩེད་མོ་རང་གི་ཐོག་ནས་རྩེད་དགོས་པ་རེད་མ་གཏོགས་ནང་ཁུལ་ལ་དགའ་མ་དགའ་ཡི་གནས་ཚུལ་བྱུང་པ་ཡིན་ན། གོ་སྒྲིག་བྱེད་པའི་དགོས་པ་དེ་ཡང་མཐུན་གྱི་ཡོད་པ་མ་རེད། དེར་བརྟེན་ཚང་མས་དགོངས་པ་བཞེས་དགོས་པ་ཤིག་རེད། དེ་བཞིན་ང་ཚོ་བཙན་བྱོལ་ནང་ལ་ཡོད་སྟབས། རྩེད་མོའི་ལམ་ནས་བོད་པའི་གནད་དོན་ངོ་སྤྲོད་བྱ་རྒྱུའི་ལས་འགན་ཆེན་པོ་ཞིག་ཆགས་ཡོད། དེར་བརྟེན། ཚང་མས་གོང་ནས་རེ་སྐུལ་ཞུས་པ་རྣམས་འགན་འཁུར་བའི་ཐོག་ནས་འགྲོ་དགོས་པ་རེད་མ་གཏོགས་ཞབས་འདྲེན་ཞུས་ན་རྩ་བ་ནས་འགྲིག་གི་མ་རེད། རྩེད་མོ་རྩེ་བའི་སྐབས་སུ་རུ་ཁག་ཅིག་མ་གཏོགས་ཐོབ་ཀྱི་མེད་པ་དེ་འགྲོ་སྟངས་ཡིན་སྟབས། སུ་ཐོབ་པ་ཡིན་ན་དེར་ཚང་མས་དགའ་བསུ་ཞུ་རྒྱུ་གལ་ཆེན་པོ་རེད། དེ་ནས་རྣམ་པ་ཚང་མར་རྩེད་མོ་གང་ཡག་ཡག་ཅིག་དང་། རྩེད་མོ་རྩེ་བའི་དགོས་པ་དང་དམིགས་ཡུལ་མཐུན་པ་ཞིག་རྩེ་རོགས་གནང་ཞུ་རྒྱུ་ཡིན། ཞེས་གསུངས་སོང་།
སྐུ་མགྲོན་གཙོ་བོའི་གསུང་བཤད་གནང་རྗེས་བོད་༧གོང་ས་མཆོག་དགུང་ལོ་ ༨༠ ཕེབས་པའི་འཁྲུངས་སྐར་གྱི་གཞས་གསར་བ་ཞིག་དང་རྒྱལ་ཡུམ་ཆེན་མོའི་གཟེངས་རྟགས་ཀྱི་ཆེད་དུ་གཞས་གསར་བ་ཞིག་བཏང་སོང་།
ད་རེབ་ཀྱི་རུ་ཁག་ ༢༨ ནི། ཡོ་རབ་བོད་མིའི་རུ་ཁག་དང་ནེའུ་ཡོག་བོད་མིའི་རུ་ཁག དོན་གྲུབ་གླིང་རུ་ཁག བྷ་རོ་ཊ་ས་གནས་གཞོན་ནུའི་རུ་ཁག ཀོ་ལེ་གྷལ་དོན་ལྡན་གླིང་རུ་ཁག གྷོ་བ་བོད་མིའི་རུ་ཁག སྦེལ་ཀོབ་གྷོ་ལ་ཐ་ལའི་རུ་ཁག སྦེལ་ཀོབ་བདེ་སྐྱིད་སླར་གསོའི་རུ་ཁག མོན་གྷོ་ཊིའི་རུ་ཁག སྦོག་ར་བཀྲ་ཤིས་གླིང་རུ་ཁག ལྡི་ལིའི་རུ་ཁག སྦོག་ར་བྱམས་པ་གླིང་རུ་ཁག ཨོ་རིས་ཕུན་ཚོགས་གླིང་རུ་ཁག ཀ་ར་ལའི་རུ་ཁག བྷན་དྷ་ར་རུ་ཁག སྒང་ཏོག་རུ་ཁག ཁེ་ན་ཌ་ཊོ་རོན་ཊོན་རུ་ཁག བོད་ཁྱིམ་རུ་ཁག སིམ་ལའི་རུ་ཁག མ་རྡ་ར་སི་སློབ་ཕྲུག་རུ་ཁག སྦིར་གཅིག་སྒྲིལ་རི་རུ་ཁག ཅན་རྡི་གྷར་ས་གནས་གཞོན་ནུའི་རུ་ཁག གྷོ་པ་པུར་རུ་ཁག དྷ་སའི་རུ་ཁག ཀ་ཋ་མན་ཀྲུ་སྐྱིད་གྲོང་རུ་ཁག ཝ་ར་ན་སིའི་རུ་ཁག ས་སྐྱ་སྤུརུ་ཝ་ལའི་རུ་ཁག བདེ་སྐྱིད་གླིང་རུ་ཁག བཅས་ཡིན་འདུག དེ་རིང་ཐོག་མ་ཅན་རྡི་གྷར་ས་གནས་གཞོན་ནུ་དང་སྦོག་ར་བཀྲ་ཤིས་གླིང་རུ་ཁག་གཉིས་ནས་རྩེད་མགོ་བཙུགས་ཡོད་པ་དང་། དེའི་རྗེས་ནེའུ་ཡོག་བོད་མིའི་རུ་ཁག་དང་སྦིར་གཅིག་སྒྲིལ་རུ་ཁག་གཉིས་རྩེ་རྒྱུ་ཡིན་འདུག
