གཟའ་ཉི་མའི་ཉིན་རྒྱ་ནག་ཧོང་པེ་ཞིང་ཆེན་སུའེ་ཀྲུའུ་གྲོང་ཁྱེར་འགྲིམ་འགྲུལ་ལས་ཁུངས་ཀྱི་འགན་འཛིན་ཚའོ་ཕེན་ཟེར་བ་དེ་ཁོ་རང་གི་སྡོད་ཁང་སྟེང་ནས་མར་མཆོངས་ཏེ་རང་ཤི་བརྒྱབ་ཡོད་འདུག
གཟའ་ཉི་མར་ཅིན་ཁྲའོ་དྲ་བས་གནས་ཚུལ་སྤེལ་བ་ལྟར་ན། གཟའ་ཉི་མའི་ཉིན་རྒྱབ་ཀྱི་ཆུ་ཚོད་ ༣།༠༩ ཡི་སྟེང་ཧོ་པེ་ཞིང་ཆེན་སུའེ་ཀྲུའུ་གྲོང་ཁྱེར་འགྲིམ་འགྲུལ་སྐྱེལ་འདྲེན་ལས་ཁང་གི་འགན་འཛིན་ལོ་ན ༤༨ ཡིན་པའི་ཚའོ་ཕེན་ (Cao Ping)། སུའེ་ཀྲུའུ་གྲོང་ཁྱེར་གྱི་ཁོ་རང་སྡོད་སའི་ཁང་རྩེག་སྟེང་ནས་མར་མཆོངས་ཏེ་རང་ཤི་བརྒྱབ་ཡོད་འདུག དོན་རྐྱེན་དེར་ད་ལྟ་རྟོག་ཞིབ་བྱེད་བཞིན་པའི་སྒང་ཡིན་ཞེས་འཁོད་འདུག
ཁ་སང་ཞིན་ཐང་རིན་གྱི་དྲ་བའི་སྟེང་ཚའོ་ཕེན་གྱིས་རང་ཤི་བརྒྱབ་པའི་གནས་ཚུལ་སྤེལ་བའི་ནང་། ཕྱི་ཟླ་ ༥ བའི་ནང་རྒྱ་ནག་གི་དཔོན་རིགས་ཁ་ཤས་ཀྱིས་རང་ཤི་རྒྱབ་ཡོད་ཅིང་། ཟླ་ ༥ ཚེས་ ༡༤ ཉིན་གྱི་ཞོགས་པ་ཅང་ཞི་ཞིང་ཆེན་ནན་ཁྲང་གྲོང་ཁྱེར་ནན་ཁྲང་རྫོང་སྒྲིག་ཁྲིམས་ཞིབ་བཤེར་ཁང་གི་མགོ་གཙོ་གཞོན་པ་མིན་ཧོན་མཱེ་ (Min Hongmei)ཁོ་རང་གི་ཁང་པའི་སྟེང་ནས་མར་མཆོངས་རང་ཤི་བརྒྱབ་ཡོད་འདུག
ཕྱི་ཟླ་ ༥ ཚེས་ ༥ ཉིན་ཨན་ཧེ་ཞིང་ཆེན་སློབ་གསོ་ཁང་གི་དྲ་བའི་སྟེང་གནས་ཚུལ་སྤེལ་བ་ལྟར་ན། ཟླ་དེའི་ཚེས་ ༤ ཉིན་གྱི་ཕྱི་དྲོར་ལོ་ན་ ༥༨ ཡིན་པའི་སློབ་གསོ་ཁང་གི་མགོ་གཙོ་བུད་མེད་ཀིན་ཙོན་ཧྥང་ (Geng Zunfang)ཁོ་མོའི་གཞུང་སྒྲིབ་ཁང་གི་ཡང་སྟེང་ནས་མར་མཆོངས་ཏེ་རང་ཤི་བརྒྱབ་ཡོད་པ་དང་། ཕྱི་ཟླ་ ༥ ཚེས་ ༢ ཉིན་མཚོ་སྔོན་ཞིང་ཆེན་མཚོ་ནུབ་སོག་རིགས་རང་སྐྱོང་ཁུལ་གྱི་རྒྱུན་ལས་ཨུ་ཡོན་དང་ཆབ་སྲིད་རྒྱུན་ལས་མགོ་གཙོ་ཅེན་ཧེ་ནེན་ (Jin Haining) ཟི་ལིང་དུ་ཡོད་པའི་ཁོ་རང་གི་སྡོད་ཁང་ནས་མཆོངས་ཏེ་རང་ཤི་བརྒྱབ་ཡོད་འདུག
འཇར་མན་གྱི་རྒྱ་རིགས་ཉམས་ཞིབ་པ་སྐུ་ཞབས་ཀྲོན་ཝེ་ཀོང་(Zhong Weiguang)གིས། རྒྱ་ནག་གི་དཔོན་རིགས་ཚོས་རང་ཤི་རྒྱག་བཞིན་པ་དེ་རྒྱུན་ལྡན་ཞིག་ཡིན་པ་དང་། འདི་ནི་གུང་ཁྲན་ཏང་གི་ལམ་ལུགས་དང་ཁྲིམས་མེད་ལུགས་མེད་དབང་བསྒྱུར་སྲིད་ཇུས་ཀྱི་མཇུག་འབྲས་རེད། ཅེས་བརྗོད་འདུག
ཀྲོན་ཝེ་ཀོང་གིས་བལྟས་ན། ད་ལྟའི་རྒྱ་ནག་དམར་ཤོག་སྲིད་གཞུང་གིས་དབང་བསྒྱུར་བྱེད་པའི་སྤྱི་ཚོགས་འདི་ནི་སྔོན་ཆད་བྱུང་མ་མྱོང་པའི་ལྐོག་ཟ་རུལ་སུངས་ཀྱི་ནག་ཁུང་ཞིག་དང་། རྒྱ་ནག་གི་དཔོན་རིགས་ཚོས་རང་ཤི་བརྒྱབ་པའི་གནས་ཚུལ་དེ་ཡང་ལོ་རྒྱུས་གང་ལ་བལྟས་ཀྱང་རང་ཤི་བརྒྱབ་པའི་གྲངས་འབོར་གྱི་ཚད་གཞི་མཐོ་ཤོས་ཟིན་ཡོད་པ། ཕྱི་རྒྱལ་ལ་བྲོས་བྱོལ་ཕྱིན་པ་དང་། ཕན་ཚུན་ནང་དམེ་བྱེད་པ་སོགས་ནི། སྤྱི་ཚོགས་གང་ཞིག་གི་ནང་དུ་གསར་བརྗེ་ལས་འགུལ་བྱུང་བའི་ཁྲོད་དུའང་མཐོང་དཀོན་པའི་ཚབ་ཆེའི་གནས་ཚུལ་ཞིག་ཆགས་ཡོད་པ་མ་ཟད། འབྱུང་འགྱུར་སུ་ཞིག་གི་སྲིད་དབང་ལོ་རྒྱུས་ཁྲོད་དུའང་འབྱུང་མི་སྲིད་པའི་གནད་དོན་ཞིག་ཆགས་ཡོད་སྟབས། ད་ལྟ་སྒང་དུ་སྡོད་མཁན་དཔོན་རིགས་ཁོ་རང་ཚོར་ཡང་ཕུགས་བརྟན་མེད་པའི་ཚོར་པ་ཞིག་བསྐྲུན་ཡོད། ཅེས་བརྗོད་འདུག
རྒྱ་ནག་སྐམ་ས་ཆེན་མོའི་དུས་དོན་དཔྱད་ཞིབ་པ་ཁྲིན་མིན་ཧོའུ་ (Chen Minghui)ཡིས་ཏཱ་ཅི་ཡོན་དྲ་བར། རྒྱ་ནག་ནང་ཁུལ་གྱི་འཐབ་འཛིང་གི་ཚྭ་རླབས་དང་དཔོན་ངན་ཕྱིར་བྲོས་ཀྱི་རླུང་བུ། རང་ཤི་ཡི་མཐོ་རླབས་འདི་དག་ཁྲོད། ངོ་ཚ་ཁྲེལ་མེད་ཀྱི་སྲིད་དབང་ཞིག་ལ་མཚོན་ན། རང་ཁྱིམ་གྱི་སྐྱུག་བྲོ་བའི་བྱ་བ་དེ་གལ་ཆེན་པོ་མ་རེད། དཔོན་རིགས་ཚོའི་ནང་དུ་སྐྱུག་བྲོ་བའི་བྱ་སྤྱོད་མང་པོ་ཡོད་པ་མ་ཟད། རྒྱ་ནག་གི་སྒེར་གཅོད་གདུག་རྩུབ་དང་དྲག་སྤྱོད་ཉེས་གསོག་གི་སྒྲིག་གཞི་དེ་ག་དུས་ཤིག་ལ་རྩ་ཐོར་དུ་འགྲོ་རྒྱུ་ཡིན་པ་སུས་ཀྱང་མི་ཤེས། འོན་ཀྱང་། འདི་ནམ་ཞིག་ལ་རྩ་ཐོར་འགྲོ་རྒྱུ་རེད་ཟེར་ན། ཉེ་བའི་ལོ་ཤས་རིང་གི་རྙོག་འཛིང་གི་གནས་ཚུལ་འདི་དག་གིས་ཉིན་ཞིག་རྒྱ་ནག་གི་གདུག་རྩུབ་ཅན་གྱི་སྲིད་དབང་མཇུག་སྒྲིལ་རྒྱུའི་སྣང་ཚུལ་ཞིག་སྟོན་བཞིན་ཡོད། ཅེས་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
་་་་་་་་་ ད་ལྟ་སྒང་དུ་སྡོད་མཁན་དཔོན་རིགས་ཁོ་རང་ཚོར་ཡང་ཕུགས་བརྟན་མེད་པའི་ཚོར་པ་ཞིག་བསྐྲུན་ཡོད། ་་་་་་་་་