དྲུག་བཞིའི་དོན་རྐྱེན་གྱིས་ཧུའུ་ལི་ཆི་ཡི་མདུན་ལམ་ས་རུ་ཟེགས་ཏེ་གོ་གནས་ཤོར་ཡོད་ཀྱང་ཁོས་ད་དུང་དྲུག་བཞིའི་དོན་རྐྱེན་ལ་དཀར་འདོན་བྱ་དགོས་པའི་སྐོར་ལ་རྒྱ་ནག་གཞུང་ལ་རེ་འདུན་ཞུས་ཡོད་འདུག
ཉེ་ཆར་ཕྱི་སྡོད་རྒྱ་རིགས་ཤེས་ཡོན་ཅན་དང་དམངས་གཙོ་དོན་གཉེར་བ་ཚོས་རྒྱལ་ཁབ་འདྲ་མིན་ནང་དྲུག་བཞིའི་དོན་རྐྱེན་(ཕྱི་ལོ་ ༡༩༨༩ ཟླ་ ༦ ཚེས་ ༤ ཉིན་པེ་ཅིན་གནམ་སྡེ་སྒོ་མོ་ཆེའི་ཐང་ཆེན་གྱི་མཐོ་རམ་སློབ་མའི་དམངས་གཙོའི་ལས་འགུལ་ལ་རྒྱ་གཞུང་གི་དྲག་གནོན་བྱས་པ།)ལ་རྗེས་དྲན་གྱི་ལས་འགུལ་འདྲ་མིན་དང་། བརྒྱུད་ལམ་ཁག་ཏུ་རྩོམ་ཡིག་སྣ་ཚོགས་སྤེལ་བཞིན་ཡོད་པའི་ཁྲོད། དྲུག་བཞིའི་དོན་རྐྱེན་ཁྲོད་རྒྱ་གཞུང་དབུས་ཆབ་སྲིད་ལྷན་ཁང་གི་རྒྱུན་ལས་ཧུའུ་ཆི་ལི་ (Hu Qili) གོ་གནས་ནས་ཕབ་ཡོད་པའི་གནས་ཚུལ་ཞིག་ཧོང་ཀོང་བརྒྱུད་ལམ་ཁག་ཏུ་སྤེལ་འདུག
ཟླ་འདིའི་ཧོང་ཀོང་འཐབ་རྩོད་དུས་དེབ་ཀྱིས་གནས་ཚུལ་སྤེལ་པ་ལྟར་ན། ༡༩༨༩ ལོའི་དྲུག་བཞི་དོན་རྐྱེན་རྗེས་དབུས་ཆབ་སྲིད་ལྷན་ཁང་གི་རྒྱུན་ལས་ཧུའུ་ཆི་ལི་ཡི་གོ་གནས་ནས་ལྷུང་ཡོད་ཀྱང་། ཁོས་ད་ལོའི་ཕྱི་ཟླ་ ༤ པའི་ནང་དབུས་ཆབ་སྲིད་ལྷན་ཁང་དང་མི་དམངས་རྒྱུན་ལས་ཏང་གི་རྩ་འཛུགས། རྒྱལ་སྲིད་སྤྱི་ཁབ་ཁང་ཏང་གི་རྩ་འཛུགས། སྲིད་གྲོས་རྒྱུན་ལས་ཏང་གི་རྩ་འཛུགས་བཅས་ལ་དྲུག་བཞིའི་དོན་རྐྱེན་སྐོར་ལ་བསམ་འཆར་ཡིག་ཆ་དོན་ཚན་ ༤ ཅན་ཞིག་བཏོན་ཡོད་འདུག
ཧུའུ་ཆི་ལི་ཡིས་བསམ་འཆར་དང་པོ་དེ། དྲུག་བཞིའི་དོན་རྐྱེན་བྱུང་པའི་ངོ་བོ་གཏན་ཁེལ་དང་ཐག་གཅོད་བསྐྱར་དུ་བྱ་དགོས་པ། གཉིས་པ། དོན་རྐྱེན་གྱི་མགོ་མཇུག་བར་གསུམ་གྱི་བྱུང་རིམ་སོགས་ཆབ་སྲིད་ཀྱི་སྟེང་ནས་ལོགས་སུ་བཀར་བ་དང་རྩ་འཛུགས་གྱིས་ཐག་གཅོད་བྱ་དགོས་པ། གསུམ་པ། དོན་རྐྱེན་ནང་གི་སློབ་མ་དང་ལས་བཟོ་བ། གཞུང་གི་ལས་འགན་གཙོ་གྲས་དག་ལ་ཆབ་སྲིད་དང་རྩ་ཁྲིམས་ཀྱི་སྟེང་ནས་ཐག་གཅོད་བྱ་དགོས་པ། བཞི་བ། གོང་རིམ་གྱིས་དྲུག་བཞིའི་དོན་རྐྱེན་ཁྲོད་གནོད་སྐྱོན་ཐེབས་པའི་ནང་མི་དང་ཁྱིམ་ཚང་ལ་བདེ་འཇགས་བསྐྲུན་དགོས་པ་མ་ཟད། ལྟ་སྐྱོང་དང་སེམས་གསོ་ལེགས་པོ་བྱ་དགོས་པ་སོགས་བཀོད་ཡོད་འདུག
གནས་ཚུལ་དེའི་ནང་དུ། ཧུའུ་ཆི་ལི་ཡིས་སྔོན་ཆད་ཐེངས་གང་མང་ལ་སྲིད་འཛིན་ཅང་ཙེ་མིན་དང་ཧུའུ་ཅིན་ཐོ་ གཉིས་ཀྱིས་སྲིད་དབང་བཟུང་པའི་སྐབས་ལ། རྒྱ་ནག་དབུས་གཞུང་དང་ཆབ་སྲིད་ལྷན་ཁང་། རྒྱལ་ཡོངས་མི་དམངས་འཐུས་མི་སོགས་ལ་དྲུག་བཞིའི་དོན་རྐྱེན་གྱི་ངོ་བོ་བསྐྱར་བཅོས་བྱ་དགོས་པའི་རེ་འདུན་ཐེངས་མང་ཞུས་ཡོད་འདུག
དེ་རིང་ཀྲུང་གོར་ལྟ་བ་ཞེས་པའི་དྲ་བའི་སྟེང་། ལོ་འདིའི་ཟླ་ ༢ ཟླ་མགོར་ཧུའུ་ཆི་ལི་ཡིས་རྒྱ་ནག་དབུས་རྩ་འཛུགས་ལྷན་ཁང་གི་འགན་འཛིན་ཀྲའོ་ལེ་ཇི་ (Zhao Leji) སོགས་དཔོན་རིགས་རྒན་པ་ཚོར་ལྟ་སྐོར་འཚམས་འདྲིའི་སྐབས། ཉེ་བའི་ལོའི་ནང་ལ་དྲུག་བཞིའི་དོན་རྐྱེན་གྱི་ངོ་བོ་གཏན་ཁེལ་བྱས་ཡོད་པ་དེར་རྗེས་རབས་པས་བློ་ཐག་ཆོད་པོའི་ཐག་གཅོད་བྱས་ཏེ། སྔོན་ཆད་དྲུག་བཞིའི་དོན་རྐྱེན་ནང་འཛུལ་ཞུགས་བྱས་མྱོང་བའི་མི་མང་རྣམས་ཕྱིར་རང་རྒྱལ་དུ་ལོགས་རྒྱུར་དགའ་བསུ་དང་། འཚོ་བ་དང་ལས་ཀ སྡོད་ཁང་སོགས་གོ་སྒྲིག་བྱ་དགོས་པ་སོགས་བརྗོད་ཡོད་འདུག
ཧུའུ་ལི་ཆི་ནི་རྒྱ་ནག་གི་མགོ་ཁྲིད་ཧུའུ་ཡོ་པཱང་དང་ཀྲའོ་ཙི་ཡཱང་སོགས་ཀྱི་ལས་རོགས་རྙིང་པ་ཞིག་ཡིན་འདུག ཁོང་ཕྱི་ལོ་ ༡༩༢༩ ལོའི་ཟླ་ ༡༠ ནས་ཧྲན་ཞི་ཡུ་ལིན་ནས་སྐྱེས་འདུག ༡༩༨༠ ལོར་ཧུའུ་ཡོ་པཱང་སྲིད་འཛིན་སྐབས་ཧུའུ་ལི་ཆི་ལ་ཧུའུ་ཡོ་པཱང་གིས་གདེང་འཇོག་ཆེན་པོ་བྱས་ཏེ། དབུས་གཞུང་སྒྲུབ་ཁང་གི་འགན་འཛིན་དང་དབུས་ཧྲུའུ་ཅུའི་ཁྲུའུ་རྒྱུན་ལས་མགོ་གཙོ་སོགས་ཀྱི་གོ་གནས་སྤྲད་ཡོད་པ་དང་། ༡༩༨༧ ལོ་ནས་ ༡༩༨༩ ལོར་ཧུའུ་ལི་ཆི་ཡི་གོ་གནས་འཕར་ཏེ་ཆབ་སྲིད་རྒྱུན་ལས་མི་ལྔའི་ནང་གི་གནས་རིམ་ཨང་བཞི་བ་ཡིན་པ་དང་། དེ་དང་མཉམ་དུ་དབུས་ཧྲུའུ་ཅུའི་ཁྲུའུ་མགོ་གཙོའམ་གནས་རིམ་ཨང་དང་པོ་དེ་ཆགས་ཡོད་འདུག
སྐབས་དེར་རྒྱལ་ཁབ་གཞན་གྱི་བརྒྱུད་ལམ་ཁག་ཏུ། ཏིན་ཞའོ་ཕིན་གྱིས་ལོ་གཞོན་རིག་སྟོབས་ཀྱི་ཧུའུ་ལི་ཆི་གསོ་སྐྱོང་བྱས་ཏེ་རྒྱ་ནག་མི་རབས་གསུམ་པའི་བརྒྱུད་འཛིན་བྱེད་རྒྱུ་ཡིན་པར་འདོད་ཡོད་ཀྱང་། ༡༩༨༩ ལོར་དྲུག་བཞི་དོན་རྐྱེན་གྱིས་ཧུའུ་ལི་ཆི་ཡི་མདུན་ལམ་ལ་བར་ཆད་བྱུང་ནས་གོ་གནས་ལྷུང་ཡོད་འདུག ལོ་དེའི་ཟླ་ ༦ ཚེས་ ༢༤ ཉིན་རྒྱ་ནག་དབུས་ཚོགས་ཆེན་སྐབས་ ༡༣ བའི་ཚོགས་ཐེངས་ ༤ བའི་སྟེང་། ཧུའུ་ལི་ཆི་དང་ཀྲའོ་ཙི་ཡཱང་གཉིས་མཉམ་དུ་གོ་གནས་ནས་ཕབ་ཡོད་འདུག དེའི་རྗེས་ ༡༩༩༡ ལོར་ཧུའུ་ལི་ཆི་བསྐྱར་ཏུ་གློག་ཆས་བཟོ་ལས་ཀྱི་འགན་འཛིན་གཞོན་པར་བསྐོས་ཡོད་པ་དང་། ༡༩༩༨ ལོའི་ཟླ་ ༣ པ་ནས་རྒྱལ་ཡོངས་སྲིད་གྲོས་འགན་འཛིན་གཞོན་པར་བསྐོས་ཡོད་ཀྱང་ཁོ་ཡོངས་ཁྱབ་ཀྱི་བརྒྱུད་ལམ་ཁག་ཏུ་མཐོང་དཀོན་པོ་ཆགས་ཡོད་འདུག
དྲུག་བཞིའི་དོན་རྐྱེན་ནི་ཀྲུང་ནན་ཧེ་ཡིས་དབང་ཆ་འཐབ་རྩོད་ཁྲོད་ཀྱི་གནད་དོན་གཙོ་བོ་གཅིག་ཡིན་པ་དང་། ༡༩༨༩ ལོའི་ཟླ་ ༦ ཚེས་ ༤ ཉིན་གནམ་བདེ་སྒོ་མོ་ཆེའི་ཐང་ཆེན་དུ་སློབ་ཕྲུག་ཚོའི་དམངས་གཙོའི་ལས་འགུལ་ལ་རྒྱ་གཞུང་གིས་དྲག་གནོན་བྱས་པ་དེ། ཏིན་ཞའོ་ཕིན་གྱིས་སྲིད་ཇུས་ལག་བསྟར་བྱས་རྗེས་ཅང་ཙི་མིན་ནི་དྲུག་བཞིའི་དམར་གསོད་སྟེགས་བུའི་སྟེང་གི་ཁེ་ཕན་ཆེས་ཤོས་ཐོབ་མཁན་དེ་ཡིན་འདུག
རྒྱ་ནག་ཕྱིའི་རྒྱ་ཡིག་བརྒྱུད་ལམ་ཁག་ཏུ་གནས་ཚུལ་སྤེལ་པ་ལྟར་ན། ཅང་ཙི་མིན་གྱིས་ཁོའི་སྲིད་དབང་གོ་གནས་རྩིས་སྤྲོད་བྱས་མེད་པའི་སྔོན་ནས་དབུས་ཆབ་སྲིད་རྒྱུན་ལས་ཁང་དུ་དྲུག་བཞིའི་དོན་རྐྱེན་དེ་ནམ་ཡང་དག་སེལ་བྱ་མི་ཆོག་པ་གཏན་ཁེལ་བྱས་ཡོད་ཀྱང་། ད་ལྟ་ལོ་ན་ ༨༦ ཡིན་པའི་རྒྱ་ནག་གི་སྲིད་བློན་ཟུར་བ་ཐན་ཅི་ཡོན་ (Tian Jiyuan) གྱིས་ ༡༩༩༨ ལོ་ནས་ ༢༠༠༢ ལོའི་བར་དུ་ཐེངས་བཞི་ཙམ་ལ་དྲུག་བཞི་དོན་རྐྱེན་ལ་ཐག་གཅོད་གསར་བ་ཞིག་བྱ་དགོས་སྐོར་བརྗོད་ཡོད་ཀྱང་ཅང་ཙི་མིན་གྱིས་བཀག་འགོག་བྱས་ཡོད་འདུག
རྒྱ་ནག་གི་གནད་དོན་དཔྱད་ཞིབ་པ་ཧྲི་ཧྲི་ (Shi shi) ཡིས་དབྱེ་ཞིབ་བྱས་པ་ལྟར་ན། ཅང་ཙི་མིན་གྱིས་དྲུག་བཞིའི་དོན་རྐྱེན་དཀར་འདོན་མི་བྱེད་པའི་འགག་རྩ་གཉིས་ཡོད། གཅིག ཅང་ཙི་མིན་རང་ཉིད་ཀྱི་གོ་གནས་འཕར་བ་དང་འབྲེལ་བ་ཡོད། གཞན་དེ། རྩ་རླུང་ཆོས་འཁོར་གྱི་གནད་དོན་རེད། རྩ་རླུང་ཆོས་འཁོར་ལ་གནོད་སྐྱོན་བྱེད་མཁན་ཅང་ཙི་མིན་ལ་མཚོན་ན། གལ་སྲིད་དྲུག་བཞིའི་དོན་རྐྱེན་དཀར་འདོན་བྱས་པ་ཡིན་ན་རྩ་རླུང་ཆོས་འཁོར་གྱི་གནད་དོན་ག་རེ་བྱ་དགོས་པ་རེད། ཅེས་བརྗོད་འདུག
ད་ལྟའི་རྒྱ་ནག་གི་མཐོ་རིམ་དཔོན་རིགས་ཚོའི་ནང་ཁུལ་དུ་དྲུག་བཞིའི་དོན་རྐྱེན་ལ་དོ་སྣང་བྱུང་པར། ལོ་སྔོན་མའི་ཟླ་ ༦ ཚེས་ ༣ ཉིན། ཞི་ཅིན་ཕིན་གྱི་དཔུང་ཚོགས་ཀྱི་ནོའུ་ལེ་ (Niu lei) ཡིས་ཕྱིའི་བརྒྱུད་ལམ་ཁག་ཏུ། ཞི་ཡིས་དྲུག་བཞིའི་དོན་རྐྱེན་གྱི་རྡོག་ཁྲེས་འདི་འཁུར་དགོས་དོན་མེད་པ་དང་། ཁོང་གིས་ལོ་རྒྱུས་ཤུལ་བཞག་གི་ཆབ་སྲིད་ཀྱི་ལམ་བུ་དེའི་རྩ་བ་ནས་ཐག་གཅོད་བྱ་རྒྱུའི་ཐབས་ལམ་ཞིག་རྙེད་ཡོད་པ་རེད། ཅེས་བརྗོད་འདུག
ད་ལོ་ཀྲའོ་ཙི་ཡཱང་འདས་གྲོངས་སུ་ཕྱིན་ཏེ་ལོ་ ༡༠ འཁོར་བའི་རྗེས་དྲན་ཉིན་མོར། རྒྱ་ནག་སྤྱི་ཚོགས་ཚན་རིག་ཁང་གི་ཆབ་སྲིད་ཉམས་ཞིབ་འགན་འཛིན་དང་སྤྱི་ཚོགས་ཚན་རིག་པ་སྐུ་ཞབས་ཡཱན་ཅཱ་ཆི་ (Yan Jiaqi) ཡིས། དྲུག་བཞི་དོན་རྐྱེན་དཀར་འདོན་བཀག་འགོག་གི་དབང་ཤུགས་གཙོ་བོ་དེ་རུལ་སུངས་ཚོགས་པའི་རྩ་བ་ཅང་ཙི་མིན་རེད་ཅེས་བརྗོད་འདུག
ཟླ་སྔོན་མའི་ཧོང་ཀོང་འཐབ་རྩོད་དུས་དེབ་ནང་ཀྲང་ཝེ་གོ་ (Zhang Weiguo) ཡི་རྩོམ་ཡིག་ནང་། ཅང་ཙི་མིན་གྱིས་གནད་དོན་གཉིས་ལ་སེམས་ཁྲལ་བྱེད་ཀྱི་ཡོད་པ་དང་། དེ་ནི་དྲུག་བཞི་དཀར་འདོན་མི་བྱ་རྒྱུ་དང་རྩ་རླུང་ཆོས་འཁོར་སྒོམ་སྒྲུབ་པར་དྲག་གནོན་མཚམས་འཇོག་མི་བྱེད་རྒྱུ་གཉིས་རེད། འོན་ཀྱང་། གནད་དོན་འདི་གཉིས་ད་ལྟ་ཁོས་བདག་པོ་རྒྱག་ཐུབ་ཀྱི་ཡོད་མ་རེད། གལ་སྲིད་ད་ལྟའི་སྲིད་གཞུང་གིས་ཁོའི་ཚབ་ཏུ་ནག་ཉེས་འདི་མུ་མཐུད་མ་ཁུར་བ་ཡིན་ན་ཁོ་མཆི་ལམ་མ་གཏོགས་འགྲོ་ས་མི་འདུག་ཅེས་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
