ང་རྒྱུ་མཚན་གསུམ་གྱི་ཐོག་ནས་སྲིད་སྐྱོང་གི་འོས་མིར་ལངས་པ་ཡིན།

དེ་རིང་སྔ་དྲོའི་ཆུ་ཚོད་ ༩།༠༠ ཐོག་མེག་གྷན་བོད་ཀྱི་གསོལ་མགྲོན་ཁང་གི་ཚོགས་ཁང་དུ་རྒྱལ་སྤྱིའི་ན་གཞོན་ཚོགས་པ་ཟེར་བའི་མགོ་ཁྲིད་འོག བཀྲ་ཤིས་དབང་འདུས་ལགས་ཀྱིས་ ༢༠༡༦ ལོའི་སྲིད་སྐྱོང་གི་འོས་མིར་ལངས་རྒྱུ་ཡིན་པའི་གསར་འགོད་གསལ་བསྒྲགས་ཤིག་སྤེལ་སོང་།

རྒྱལ་སྤྱིའི་ན་གཞོན་ཚོགས་པའི་ཚོགས་མི་དཀོན་མཆོག་རིན་ཆེན་ལགས་ཀྱིས་བཀྲ་ཤིས་དབང་འདུས་ལགས་སུ་རྒྱབ་སྐྱོར་གནང་དགོས་དོན་སྐོར་བརྗོད་དོན། ང་ཚོ་ན་གཞོན་ཚོགས་པས་བཀྲ་ཤིས་དབང་འདུས་ལགས་སུ་རྒྱབ་སྐྱོར་ཞུ་དགོས་དོན་ནི། མི་གཞན་གྱི་གནོན་ཤུགས་སྤྲད་པ་དང་ཆོལ་ཁ་ཆོས་ལུགས་ཀྱི་ཞེན་ཁོག་བྱས་པ་མ་ཡིན་པར། ང་ཚོས་དང་བླངས་ཐོག་ནས་སོ་སོའི་རིག་པའི་རྩལ་དཔྱད་ནས་དེ་རིང་ཁོང་ལ་རྒྱབ་སྐྱོར་ཞུ་གི་ཡོད། ཁོང་ནི་དེང་དུས་ཤེས་ཡོན་གྱི་ཆུ་ཚད་ལྡན་པ་མ་ཟད། བོད་མི་རིགས་ཀྱི་སྐད་དང་རིག་གཞུང་ལ་གདུང་བ་ཟབ་པ་དང་། དགུང་ལོ་ཆུང་ཆུང་ནས་བཟུང་བོད་པའི་སྤྱི་ཚོགས་ནང་མི་ལོ་ ༢༠ ལྷག་ཞབས་ཕྱི་ཞུས་པའི་ཉམས་མྱོང་ཡོད་སྟབས་ང་ཚོས་རྒྱབ་སྐྱོར་ཞུ་བཞིན་ཡོད། ཅེས་སོགས་བརྗོད་སོང་།

དེའི་རྗེས་བཀྲ་ཤིས་དབང་འདུས་ལགས་ཀྱིས་སྲིད་སྐྱོང་གི་འོས་མིར་ལངས་དགོས་དོན་གང་ཡིན་སྐོར་བརྗོད་དོན། དང་པོ། ༧གོང་ས་མཆོག་གི་བླ་ན་མེད་པའི་དབུ་ཁྲིད་འོག་འགན་འཁུར་རྒྱུའི་གོ་སྐབས་ཤིག་བྱུང་ན། ༧གོང་ས་མཆོག་གི་བཀའ་དགོངས་བཞིན་བཀའ་སྲུང་ཅི་སྒྲུབ་ཐོག་ནས་བོད་དོན་བདེན་མཐའ་མྱུར་དུ་གསལ་ཐབས་ལ་འབད་བརྩོན་བྱ་རྒྱུ་བསྐལ་བ་བཟང་པོ་ཡིན་བསམ་གྱི་ཡོད། གཉིས་པ། བར་ལམ་ཞིག་ནས་རང་རེའི་སྤྱི་ཚོགས་ནང་ལ་བོད་སྤྱི་པའི་དོན་ལ་ལྷག་བསམ་སེམས་ཁུར་ཡོད་མཁན་ཁག་གཅིག་གིས་གུས་པ་སྲིད་སྐྱོང་ལ་ལངས་དགོས་པའི་དགོས་འདུན་བཏོན་པ་དང་། ང་རང་ཡིན་ཡང་མི་ལོ་ ༢༠ ཙམ་རིང་ལ་ཕྱི་རྒྱལ་སྐུ་ཚབ་དོན་གཅོད་ཁང་དང་གཞིས་ཆགས་ཆེ་ཁག་གི་ས་གནས་མགོ་འཛིན་རེད། འདས་པའི་ལོ་བཞི་རིང་བོད་མིའི་སྤྱི་མཐུན་མཉམ་འབྲེལ་ནང་ཚོང་འབྲེལ་གྱི་འགན་འཁྱེར་ཏེ། ཉམས་མྱོང་བསགས་བསྡད་པར་བརྟེན་ནས་ད་ཆ་སྲིད་སྐྱོང་གི་འོས་མིར་ལངས་རྒྱུའི་གདེང་ཚོད་དང་སྤོབས་པ་ཡོད་པའི་ཐོག་ནས་ལངས་ཀྱི་ཡོད།

གསུམ་པ། ང་ཚོ་སྐྱབས་བཅོལ་ལ་བསླེབས་ནས་ལས་འགན་བསྒྲུབས་དགོས་པ་ཆེ་ཤོས་དེ་བོད་དོན་བདེན་མཐའ་གསལ་ཐབས་བྱ་རྒྱུ་འདི་ཡིན་པ་རེད། འདི་སེལ་བ་ལ་ངས་བོད་མི་ཚོས་ཚང་མ་མཐོང་ཐུབ་དགོས་པའི་དོན་ཚན་བཞི་བརྩི་གི་ཡོད། བོད་དོན་བདེན་མཐའ་སེལ་ཐབས་ཀྱི་ཐབས་ལམ་དེ་བོད་རྒྱ་འབྲེལ་མོལ་གྱི་ཐོག་ནས་གསལ་རྒྱུ་ཡིན། བོད་རྒྱ་འབྲེལ་མོལ་ཐོག་བོད་དོན་བདེན་མཐའ་སེལ་མཁན་དེ་བོད་མིའི་སྒྲིག་འཛུགས་ཆགས་ཡོད་སྟབས། འདི་རྒྱུན་གནས་ཐུབ་རྒྱུ་དང་སྲ་བརྟན་དགོས་རྒྱུ་དེ་གལ་ཆེན་པོ་འདུག དེ་འདྲ་སོང་ཙང་སྒྲིག་འཛུགས་སྲ་བརྟན་བཟོ་དགོས་པ་ཆགས་ཡོད། ནང་དོན་གསུམ་པ་དེ་བོད་དོན་བདེན་མཐའ་སེལ་ཐབས་ཆེད་དུ་དེ་རྒྱུན་གནས་ཐུབ་པར་གཞོན་སྐྱེས་ཚོར་ཤེས་ཡོན་དང་། སྤྱི་ཚོགས་ནང་དཔལ་འབྱོར་ཡར་རྒྱས་གཏོང་དགོས་འདུག ངས་དོན་དག་བསྡུས་ན་བཤད་ན་དབྱིན་ཡིག་ནང་ལ་ང་ཚོ་བོད་མི་ཡོད་དོ་ཅོག་གི་མཐོང་ཐུབ་དགོས་པ་སྟེ་ (SEEN) ཞེས་པ་དེ་ཆགས་ཡོད། དེ་ཡང་“S” ཞེས་པས་དབྱིན་ཡིག་ནང་ (Sustainable) ཞེས་པ་དང་བོད་ཡིག་ནང་རྒྱུན་གནས་ཐུབ་པ་མཚོན་པ་དང་། “E” ཞེས་པས་ (Economy) དཔལ་འབྱོར་དང་ (Education) ཤེས་ཡོན།  “N”ཞེས་པས་ (Negotiation) འབྲེལ་མོལ་བཅས་ཀྱི་གནད་དོན་བཞི་འདི་བོད་མི་ཚང་མས་མཐོང་དགོས་ཀྱི་འདུག འདི་དང་འབྲེལ་བའི་ཛ་དྲག་གི་ལས་གཞི་མང་པོ་ཞིག་བྱེད་དགོས་ཡོད་སྟབས། དེ་རིང་ངས་སྲིད་སྐྱོང་གི་འོས་མིར་ལངས་བ་ཡིན། ཞེས་བརྗོད་སོང་།

གསར་འགོད་པ་ཞིག་གིས་བཀྲ་ཤིས་དབང་འདུས་ལགས་སུ་ཁྱེད་རང་ད་ལྟའི་བོད་མིའི་སྒྲིག་འཛུགས་ཀྱི་གནང་ཕྱོགས་ལ་འདོད་པ་མ་ཁེངས་པར་བརྟེན་ད་ཐེངས་སྲིད་སྐྱོང་གི་འོས་མིར་ལངས་བ་ཞིག་ཡིན་ནམ་ཞེས་དྲིས་པར་ཁོང་གིས། ངས་འདི་ནི་འདོད་པ་འཚིམ་མ་འཚིམ་ལ་རག་ལུས་ཡོད་རེད་བསམ་གྱི་མི་འདུག ངས་སྲིད་སྐྱོང་གི་འོས་མིར་ལངས་དགོས་དོན་ནི་ངར་དམིགས་ཡུལ་དང་ཕུགས་བསམ་ཡོད་པར་བརྟེན་ནས་ལངས་པ་ཡིན། ངས་ང་ཚོའི་བོད་དོན་དཀའ་རྙོག་གསལ་རྒྱུ་དེ་གལ་འགངས་ཆེ་ཤོས་ཤིག་ལ་ངོས་འཛིན་བྱེད་ཀྱི་ཡོད། འདས་པའི་ལོ་བཞི་ཙམ་རིང་ང་ཚོས་བོད་དོན་འབྲེལ་མོལ་བསྐྱར་གསོ་བྱེད་ཐུབ་མེད་པར་བརྟེན། ངས་ང་ཚོས་ད་དུང་ལོ་ལྔ་ཙམ་སྒུག་རྒྱུའི་དུས་ཚོད་མེད་སྟབས།  གང་མགྱོགས་བོད་རྒྱ་འབྲེལ་མོལ་ཐུབ་པར་བྱས་ནས་བོད་དོན་དཀའ་རྙོག་སེལ་ཆེད་སྲིད་སྐྱོང་གི་འོས་མིར་ལངས་བ་ཡིན། ཞེས་བརྗོད་བྱུང་།

གསར་འགོད་པས་བཀྲ་ཤིས་དབང་འདུད་ལགས་སུ་ཁྱེད་རང་གིས་དབུ་མའི་ལམ་དང་རང་བཙན་གཉིས་ལས་གང་ལ་རྒྱབ་སྐྱོར་བྱེད་ཀྱི་ཡོད་དྲིས་པར་ཁོང་གིས། ང་ཚོར་ཆབ་སྲིད་ཀྱི་ལངས་ཕྱོགས་དང་སྲིད་ཇུས་ཤིག་ཡོད་སྟབས། ངས་༧གོང་ས་མཆོག་གིས་བཏོན་གནང་མཛད་པའི་དབུ་མའི་ལམ་ལ་རྒྱབ་སྐྱོར་བྱེད་ཀྱི་ཡོད་པ་མ་ཟད། ཁོང་གིས་ལམ་སྟོན་མཛད་པ་དག་ལ་ཤར་སྐྱོར་བྱ་རྒྱུའི་ཆོད་སེམས་བརྟན་པོ་ཡོད། ཅེས་བརྗོད་བྱུང་།

མཇུག་ཏུ་གསར་འགོད་པ་ཞིག་གིས་ཁྱེད་ཀྱིས་བོད་ཀྱི་བདེན་མཐའ་གསལ་ཐབས་དེ་བོད་རྒྱ་གྲོས་མོལ་ཡིན་སྐོར་བརྗོད་སོང་བས། གྲོས་མོལ་ཡོང་ཐབས་ཀྱི་ཐབས་ལམ་ག་རེ་དགོས་པ་རེད་དྲན་གི་འདུག་ཅེས་དྲིས་པར། ཁོང་གིས། བོད་དོན་དཀའ་ངལ་སེལ་ཐབས་ཡག་ཤོས་དེ་༧སྐྱབས་མགོན་རིན་པོ་ཆེ་དབུ་བཞུགས་ཐོག་སེལ་ཐུབ་པ་ཡིན་ན། རྒྱ་ནག་གཞུང་ལ་ལས་སླ་ཤོས་དང་། བསྐལ་བ་བཟང་ཤོས་ཤིག་རེད་བསམ་གྱི་འདུག ༧སྐྱབས་མགོན་པོ་ཆེའི་དེའི་ཐོག་བཀའ་སློབ་ག་རེ་ཡོད་དང་། ལངས་ཕྱོགས་ག་རེ་ཡིན་པ་དེ་རྒྱ་ནག་གི་དབུ་ཁྲིད་ཚོར་ཁ་གསལ་དོན་རྟོགས་ཐུབ་པ་ཞིག་བཟོ་དགོས་པ་གལ་ཆེན་པོ་རེད་བསམ་གྱི་འདུག སྤྱིར་བཏང་འཛམ་གླིང་གི་འཕོ་འགྱུར་ལ་བལྟས་ན་འགྱུར་བ་དེ་ཁྱད་མཚར་འགྲོ་ཡི་ཡོད་རེད། ལྷོ་ཨ་ཧྥི་རི་ཀའི་ནང་གཞུང་ལ་ཤུགས་རྐྱེན་ཞེ་དྲག་ཡོད་རེད། འཛམ་གླིང་གི་སུ་གཅིག་གིས་འགྱུར་བ་དེ་འདྲ་འགྲོ་ཡི་རེད་བསམ་ཡོད་པ་མ་རེད།

ཡིན་ཡང་དཔོན་རིགས་གསར་པ་ཞིག་སླེབས་ཡོང་སྐབས། ཟླ་བ་ཁ་ཤས་ནང་ལུང་པར་རང་དབང་ཐོབ་པའི་འགྱུར་བ་ཕྱིན་ཡོད་པ་མ་ཟད། དེ་བཞིན་ཨུ་རུ་སུ་སྟོབས་ཆེན་རྒྱལ་ཁབ་དེ་ལུང་པ་མང་པོ་ཞིག་ལ་ཁ་གྱེས་ནས་རྒྱལ་ཁབ་མང་པོ་ཆགས་རྒྱུ་རེད་བསམ་མེད་ལ། སྔོན་མ་ཤར་ནུབ་འཇར་མན་གཉིས་མ་འཆམ་པར་ཕན་ཚུན་འཁྲུག་རྩོད་མང་པོ་ཡོང་གི་ཡོད་ཀྱང་། ཕྱིས་སུ་རྡོག་རྩ་གཅིག་སྒྲིལ་ཆགས་ནས་རྒྱལ་ཁབ་ཅིག་ལ་འགྱུར་ཡོད་སྟབས། བོད་དོན་དཀའ་རྙོག་དེ་གསལ་ཐབས་མེད་པར་ངོས་འཛིན་བྱེད་ཀྱི་མེད།  ཕྱོགས་གཞན་ཞིག་ནས་རྒྱ་ནག་ནང་དམ་དྲག་འོག་ཐར་ཐབས་བྱེད་མཁན་གྱི་དམངས་གཙོ་དོན་གཉེར་བ་ཚོས་ཤུགས་རྒྱག་གི་ཡོད་སྟབས། རྒྱ་ནག་ནང་དུ་ཡང་འགྱུར་བ་འགྲོ་སྲིད་པ་སོགས་ཀྱི་གནས་སྟངས་འོག་བོད་ཀྱི་དཀའ་ངལ་སེལ་རྒྱུའི་རེ་བ་དང་ཐབས་ལམ་ཡོད་རེད་བསམ་གྱི་ཡོད། ཅེས་བརྗོད་བྱུང་།

གསར་འགོད་པ། དོན་གྲུབ།