རྒྱལ་བའི་ཞབས་རིམ་དང་ཚེ་ཐར་སྲོག་བསླུ་སོགས་ཀྱི་ལས་དོན་རྒྱ་ཆེན་བསྒྲུབ་རྒྱུ་ཡིན།

དེ་རིང་དྷ་རམ་ས་ལའི་ལྷ་རྒྱ་རི་དང་དྲན་རྟེན་དཔའ་བོའི་རྡོ་རིང་མདུན་བཅས་སུ་དུས་མཉམ་དུ། ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་བཙུགས་ཏེ་ལོ་ངོ་ ༥༧ འཁོར་བའི་དུས་དྲན་སྲུང་གཙི་གནང་སོང་།

དེ་རིང་སྔ་དྲོའི་ཆུ་ཚོད་ ༧།༣༠ ཐོག་ལྷ་རྒྱལ་རིའི་རྟེན་མཁར་མདུན་དུ་དྷ་རམ་ས་ལའི་མདོ་ཁམས་ཆུ་བཞི་སྒང་དྲུག་རྒྱུན་ལས་ཁང་གི་གོ་སྒྲིག་འོག བོད་ཀྱི་བསྟན་སྲུང་དང་བླངས་དམག་ཡར་འབྲོག་གཡུ་མཚོའི་འདབས་རོལ་ལྕགས་ཚ་གྲུ་གུ་ཐང་དུ་བཙུགས་ནས་ལོ་ངོ་ ༥༧ འཁོར་བའི་དུས་དྲན་སྲུང་གཙི་ཞུས་སོང་ལ། སྐུ་མགྲོན་གཙོ་བོར་བོད་མི་མང་སྤྱི་འཐུས་ཀརྨ་ཡེ་ཤེས་ལགས་ཀྱིས་དབུས་སྤྱི་འཐུས་ཁག་གཅིག་དང་། དྷ་ས་ཁུལ་གྱི་ཚོགས་སྐྱིད་ཁག་གི་སྐུ་ཚབ་དང་མི་མང་བཅས་མི་ ༡༠༠ ལྷག་ཙམ་ཞིག་འཛོམས་སོང་།

དུས་དྲན་གྱི་ཐོག་མར་སྐུ་མགྲོན་གཙོ་བོ་དང་སྤྱི་འཐུས་རྣམ་པས་༧གོང་ས་མཆོག་དང་ཛ་སག་ཨ་འབྲུག་མགོན་པོ་བཀྲ་ཤིས་ཀྱི་སྐུ་པར་མཐོང་གྲོལ་རིན་པོ་ཆེར་ཁ་བཏགས་སྒྲོན་པ་དང་སྦྲགས། ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་བ་དང་འབྲེལ་བོད་བསྟན་སྲིད་མི་རིགས་ཆེད་རང་སྲོག་བློས་གཏོང་གནང་མཁན་གྱི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་ངག་བཅད་གུས་འདུད་སྐར་མ་གཅིག་རིང་ཞུས་རྗེས། མདོ་ཁམས་ཆུ་བཞི་སྒང་དྲུག་རྒྱུན་ལས་ཁང་གི་ཟུང་དྲུང་ངག་དབང་ཐར་པ་ལགས་ཀྱིས་དུས་དྲན་དང་འབྲེལ་བའི་བསྒྲགས་གཏམ་སྒྲོགས་སྦྱང་གནང་དོན། ཕྱི་ལོ་ ༡༩༥༨ ལོར་ལྕགས་ཚ་གྲུ་གུ་ཐང་ལ་བསྟན་སྲུང་དང་བླངས་དམག་སྒར་དབུ་བརྙེས་ནས་བྱང་ཁུལ་དུ་དགྲ་ཐེངས་ ༡༨ དང་། ལྷོ་ཁུལ་དུ་དགྲ་ཐེངས་ཆེ་བ་ ༣༤ ཆུང་བ་ ༧༥ ལྷག་བརྒྱབ་ནས་དགྲ་བོ་ལ་རྒོལ་འཛིང་དྲག་པོའི་ཐོག ཨ་རིའི་གསང་བའི་ལས་ཁུངས་སུ་འབྲེལ་བ་རིམ་མཐུད་ཀྱིས་ལི་ཐང་ཨ་ནོར་བུ་དང་། བྱ་རྒོད་སྲས་དོན་ཡོད་སོགས་ལ་གསང་བའི་དམག་སྦྱོང་ཐོབ་ནས་བོད་ཀྱི་ས་ཐོག་ཏུ་གནམ་མཆོང་བརྒྱབ་སྟེ། དགྲ་བོ་ལ་ཕར་རྒོལ་དྲག་པོ་བྱས་པའི་ལོ་རྒྱུས་དག་དེང་སང་དགྲ་བོ་རྒྱ་དམར་གྱི་ཡིག་ཚང་ནང་ཐོན་ཡོང་བཞིན་ཡོད། མཐར་མང་སྣེ་ཉུང་གིས་མ་བརྟན་པར་དཔའ་བོ་ཁྲི་ཕྲག་མང་པོའི་ཚེ་སྲོག་ཤོར་ཏེ་བོད་ས་ཡོངས་སུ་དགྲ་ལག་ཏུ་ཤོར་ཡོད་སྟབས། དེ་རིང་སྡིངས་ཆ་འདི་བརྒྱུད་ནས་མྱ་ངན་གུས་འདུད་ཞུ་བཞིན་ཡོད། ཅེས་བརྗོད་བྱུང་།

ཁོང་གིས་མུ་མཐུད་དུ།  སྔོན་ནས་དམིགས་ཡུལ་རྒྱུན་འཁྱོངས་ཆེད་ལྡེ་ར་རྡུན་དམག་སྒར་ཨང་ ༢༢ པ་དྲག་པོའི་དམག་གི་དཔུང་སྡེ་གསར་འཛུགས་བྱས་ཏེ་ད་ལྟའང་མུ་མཐུད་གནས་ཡོད་ལ། ད་བར་ཤུལ་ལུས་དཔའ་བོ་རྒན་གྲས་ཚོར་ཆེ་མཐོང་དང་གུས་བརྩིའི་ཆེད་དོན་གྲུབ་གླིང་དུ་རྒན་གསོ་ཁང་བརྒྱབ་ཡོད་པས་མ་ཚད། ལོ་ལྟར་རྒན་རབས་ ༡༠༠ ལ་འཚོ་སྣོན་གྱི་རོགས་སྐྱོར་དང་། ༧གོང་ས་མཆོག་གིས་ཀྱང་དུས་དང་དུས་སུ་བཀའ་སློབ་ཕེབས་དོན་ལྟར་མ་འོངས་བོད་ཀྱི་རྩ་དོན་རྒྱུན་སྐྱོང་ཆེད་གཞོན་སྐྱེས་ལོ་ཆུང་ཚོར་ཤེས་ཡོན་ཚད་ལྡན་འབྱོར་ཐབས་སུ་ལོ་ལྟར་སློབ་ཕྲུག་ ༦༧ ལ་སློབ་ཡོན་རོགས་རམ་བྱེད་བཞིན་པ་ཡིན། ཕྱི་ཟླ་ ༧ ཚེས་ ༦ ཉིན་༧གོང་ས་མཆོག་གི་འཁྲུངས་སྐར་སྐབས་ཉིན་བརྒྱ་དུས་གཅིག་ལ་༧རྒྱལ་བའི་ཞབས་རིམ་བསྒྲུབ་རྒྱུ་ཞིག་ཡོད་པ་རེད། ད་ལོ་༧གོང་ས་མཆོག་དགུང་གྲངས་ ༨༠ ལ་ཕེབས་པའི་དམིགས་བསལ་གི་ལོ་ཚིགས་ཤིག་ཆགས་ཡོད་སྟབས། མདོ་ཁམས་ཆུ་བཞི་སྒང་དྲུག་གི་འགན་འཛིན་ལྷན་ཚོགས་ཚོགས་སྐབས་འདི་ལོ་གཞི་རྒྱ་ཆེ་བའི་ཞབས་རིམ་ཞིག་བསྒྲུབ་རྒྱུ་དང་། དེ་ཡང་ཚེ་ཐར་སྲོག་བསླུ་དང་རྩི་ཤིང་འདེབས་འཛུགས། ཁོར་ཡུག་གཙང་བཟོ། དེ་བཞིན་བསྟོད་ཚིག་གི་དེབ་གཅིག་བཅས་ཀྱི་གྲོས་ཆོད་བཞག་ཡོད་པ་ལྟར། ད་ལྟ་ལྷོ་ཕྱོགས་ཁུལ་དུ་ཚོགས་གཙོ་པདྨ་བདེ་ལེགས་ཀྱིས་མགོ་ཁྲིད་དེ་ཚེ་ཐར་སྲོག་བསླུ་དང་རྩི་ཤིང་འདེབས་འཛུགས། ཁོར་ཡུག་གཙང་བཟོ་གནང་གི་ཡོད་པ་དང་། ཧི་མ་ཅལ་ཁུལ་དུ་འཇུ་ཆེན་བཀྲིས་དཔལ་འབྱོར་ལགས་ཀྱིས་མགོ་ཁྲིད་དེ་༧རྒྱལ་བའི་ཞབས་རིམ་བསྒྲུབ་རྒྱུ་དང་། ལྡེ་ར་རྡུན་དུ་གླིང་ཚང་ཚེ་རྡོར་ལགས་དང་དྷ་ས་ཁུལ་དུ་ངས་འགན་འཁུར་རྒྱུ་དང་། རྒྱ་གར་བྱང་ཤར་ཕྱོགས་ལ་དབུས་རྒྱུན་སྦིར་ཚེ་རྡོར་ལགས་དང་ལྡི་ལི་ཁུལ་དུ་དངུལ་གཉེར་གོ་བོ་བློ་བཟང་དཔལ་ལྡན་གྱིས་མགོ་ཁྲིད་ནས་ཞབས་རིམ་བསྒྲུབ་རྒྱུ་དང་། དེ་མིན་དབུས་རྒྱུན་མེད་པའི་ས་གནས་ཁག་ལ་ས་གནས་རྒྱུན་ལས་ཀྱི་མགོ་ཁྲིད་ནས་ལས་འགུལ་སྤེལ་རྒྱུ་ཆགས་ཡོད། ཞེས་སོགས་བརྗོད་སོང་།

དེའི་རྗེས་སྐུ་མགྲོན་གཙོ་བོ་སྤྱི་འཐུས་ཀརྨ་ཡེ་ཤེས་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་གནང་དོན། བསྟན་སྲུང་དང་བླངས་དམག་གི་སྒྲིག་འཛུགས་འདིས་བོད་བསྟན་སྲིད་དང་མི་རིགས་ཀྱི་རང་དབང་ཆེད་དགྲ་བོར་ཕར་རྒོལ་གྱི་ཁ་གཏད་གདོང་ལེན་རིམ་པར་བྱས་ཏེ། ཞབས་འདེགས་ཅི་ཆེ་བསྒྲུབས་ཡོད་པ་དང་། ལྷག་པར་བོད་མི་ཡོངས་ཀྱི་འདི་ཕྱིའི་མགོན་སྐྱབས་བླ་ན་མ་མཆིས་པ་༧གོང་ས་མཆོག་རྒྱ་གར་འཕགས་པའི་ཡུལ་དུ་བཙན་བྱོལ་དུ་མ་ཕེབས་ཐབས་མེད་བྱུང་བའི་སྐབས་སུ་སྐུ་ཕྱྭའི་ཉེན་སྲུང་གི་ཞབས་འདེགས་རླབས་ཆེན་བསྒྲུབས་ཡོད་པ་བཅས་ནི་བོད་མི་རིགས་ཀྱི་ལོ་རྒྱུས་དེབ་ཐེར་ནང་ཇི་སྲིད་བར་གནས་རྒྱུ་མ་ཟད། ད་རེས་དུས་དྲན་སྲུང་གཙིའི་གོ་སྐབས་འདི་བཟུང་ནས་བཀའ་དྲིན་རྗེས་དྲན་དང་སྦྲགས་གུས་འདུད་ཞུ་རྒྱུ་ཡིན། བོད་མིའི་སྒྲིག་འཛུགས་ཀྱི་ལས་དོན་ཞུ་སྒོ་མཐའ་དག་སྤྱི་ནོར་༧གོང་ས་མཆོག་གི་བཞེད་དགོངས་ལྟར་བསྒྲུབ་ཐུབ་པའི་འགན་འཁུར་ཞུ་ཕྱོགས་སྔར་ལྷག་དགོས་གལ་སྨོས་མི་དགོས་པའི་ཐོག རྒྱུན་དུ་རྒྱ་ཆེའི་མང་ཚོགས་དང་ཐད་ཀར་འབྲེལ་ལམ་དམ་ཟབ་ཡོད་པའི་ཚོགས་པ་དང་སྒྲིག་འཛུགས་རྣམས་ཀྱིས་ཕྱར་གྲུ་མཉམ་འདེགས་སམ་ཞོགས་འདེགས་ཀྱི་ནུས་པ་དེ་ཡང་ཤིན་ཏུ་གལ་འགངས་ཆེན་པོ་ཡིན། ཞེས་འཁོད་འདུག

ཁོང་གིས་མུ་མཐུད་དུ། ང་ཚོ་ད་ལྟ་རྒྱ་གར་འཕགས་པའི་ཡུལ་དུ་སྐྱབས་བཅོལ་ཞུས་ཏེ་གནས་བཞིན་པ་ལྟར། རྒྱ་གར་ནི་བོད་མི་རྣམས་ཀྱི་གནས་ཡུལ་གཉིས་པ་ཆགས་ཏེ། རྒྱ་གར་གཞུང་དམངས་གཉིས་ཀས་བོད་མིར་རྒྱབ་སྐྱོར་རོགས་རམ་བོད་མིར་རྒྱབ་སྐྱོར་རོགས་རམ་ཧ་ཅང་རྒྱ་ཆེན་པོ་གནང་བའི་བཀའ་དྲིན་གྱི་བདག་ཉིད་ཅན་ཞིག་ཡིན་པ་ལྟར། རང་རང་གནས་ཡུལ་རྒྱ་གར་ཡུལ་མི་རྣམས་ལ་མཐུན་ལམ་བསྟུན་གནས་གནང་ཕྱོགས་ལ་རང་རེ་ ཚང་མས་ཐུགས་སྣང་མི་ཆུང་བ་གནང་རྒྱུ་ནི་ཡུལ་དུས་གནས་བབ་ཀྱི་ཆ་ནས་ཤིན་ཏུ་གལ་ཆེ་ཡིན་སྟབས། ད་རེས་གོ་སྐབས་འདི་བརྒྱུད་ནས་སླར་ཡང་དྲན་སྐུལ་ནན་ཏན་ཞུ་རྒྱུར་ཚང་མའི་ཐུགས་ལ་ངེས་པར་བཅང་རོགས་གནང་ཞུ་རྒྱུ་ཡིན། ཞེས་སོགས་སྦྲོགས་སྦྱང་གནང་སོང་།

དེ་བཞིན། ཆུ་ཚོད་ ༩ པའི་ཐོག་མདོ་སྟོད་ཆུ་བཞི་སྒང་དྲུག་དབུས་སྤྱི་ཁྱབ་ཁང་གི་གོ་སྒྲིག་འོག དྷ་སའི་གཙུག་ལག་ཁང་གི་དཔའ་བོའི་དྲན་རྟེན་རྡོ་རིང་མདུན་དུ་ཆུ་བཞི་སྒང་དྲུག་བཙུགས་ནས་ལོ་ངོ་ ༥༧ འཁོར་བའི་དུས་དྲན་སྲུང་གཙི་ཞུས་སོང་ལ། སྐབས་དེར་དབུས་རྒྱུན་ཚོགས་གཙོ་ཕུ་པ་དཔོན་ཚེ་རིང་སྟོབས་རྒྱལ་ལགས་ཀྱིས་བསྒྲགས་གཏམ་སྒྲོགས་སྦྱང་གནང་བའི་ནང་འཁོད་དོན། དེ་རིང་གི་ཉིན་མོ་འདིར་ཁོང་ཚོས་བོད་བསྟན་སྲིད་མི་རིགས་རང་དབང་གི་ཆེད་དུ་ཡོངས་རྫོགས་བློས་བཏང་བའི་རྒྱལ་གཅེས་ལྷག་བསམ་གྱི་སྙིང་སྟོབས་དང་མཛད་རྗེས་ལ་གུས་བཀུར་དང་ཡི་རང་ཞུ་རྒྱུ་དང་སྦྲགས་རླབས་ཆེན་ལོ་རྒྱུས་ཀྱི་དོན་སྙིང་ལྡན་པའི་མདོ་ཁམས་ཆ་བཞི་སྒང་དྲུག་བོད་ཀྱི་བསྟན་སྲུང་དྭང་བླངས་དམག་གི་འདས་པའི་ལོ་རྒྱུས་ལ་རྗེས་དྲན་ཞུས་པ་ཙམ་མ་ཡིན་པར་དམ་པ་ཁོང་རྣམས་ཀྱི་བསྒྲུབ་རྒྱུར་ལྷག་ པའི་ཕུགས་བསམ་མངོན་དུ་འགྱུར་ཆེད་ང་ཚོས་འབད་བརྩོན་ཧུར་བསྐྱེད་བྱེད་དགོས་ ཤིང་། ལྷག་པར་དུ་མི་རབས་གསར་པའི་གཞོན་སྐྱེས་རྣམས་ལ་ཆུ་སྒང་བོད་ཀྱི་བསྟན་སྲུང་དྭང་བླངས་དམག་གི་བཤུལ་འཛིན་དགོས་ཤིང་། ལྷག་པར་དུ་མི་རབས་གསར་པའི་གཞོན་སྐྱེས་རྣམས་ལ་ཆུ་སྒང་བོད་ཀྱི་བསྟན་སྲུང་དྭང་བླངས་དམག་གི་བཤུལ་འཛིན་དགོས་པའི་བསླབ་བྱ་ནན་པོ་བྱེད་དགོས་པ་དེ་ནི་ང་ཚོ་མི་ ཐོག་འདིའི་ལོ་རྒྱུས་ཀྱི་འོས་འགན་འབའ་ཞིག་ཡིན། མདོར་ན། སྤྱི་ཁྱབ་དམག་སྤྱི་ཛ་སག་ཨ་འབྲུག་མགོན་པོ་བཀྲ་ཤིས་མཆོག་གི་འདས་ཁའི་ཞལ་ཆེམས་ ལས། ང་ཚོ་ཆུ་སྒང་འགོ་ཁྲིད་ཚོས་༧གོང་ས་༧སྐྱབས་མགོན་ཆེན་པོའི་དབུ་ཁྲིད་འོག་འགོ་ དམངས་ཡོངས་རྫོགས་དམ་ཚིག་རྡོག་རྩ་གཅིག་ཏུ་བསྒྲིལ་ཏེ་ང་ཚོའི་ཕུགས་བསམ་མངོན་ དུ་འགྱུར་བའི་ཆེད་དུ་རང་རིགས་སོན་རྩ་གཞོན་ནུ་རྣམས་ལ་ལས་དོན་རྩིས་སྤྲོད་ བྱེད་དགོས་སོགས་གསུང་བའི་ཞལ་ཆེམས་རྣམས་ང་ཚོའི་བློ་ལ་བརྟན་པོ་ངེས་དགོས་པར་མ་ ཟད། ཁོང་ཚོའི་མཛད་རྗེས་དང་སྒྲིག་འཛུགས་གལ་ཆེ་འདིའི་མཚན་སྙན་རྐང་བརྗེས་ལག་བསུབ་ ཀྱི་ཆུད་ཟོས་སུ་མ་སོང་བར་ང་ཚོའི་མི་རབས་རིམ་བརྒྱུད་ཀྱིས་སྲུང་སྐྱོབས་དང་ རྒྱུན་འཛིན་ངེས་པར་དུ་ཞུ་དགོས། ཞེས་སོགས་བཀོད་འདུག