གཅིག་གྱུར་གྱི་འདུ་ཤེས་ཧ་ཅང་གལ་ཆེན་པོ་རེད།

དེ་རིང་༧སྐུའི་གྱ་སྟོན་ཐོག་༧གོང་ས་མཆོག་གིས་བོད་ཀྱི་ཆོས་བརྒྱུད་ཁག་གི་དབུ་ཁྲིད་རྣམ་པ་བཅས་གྱ་སྟོན་ཐོག་ལྷན་བཞུགས་གནང་སྟེ་གཅིག་གྱུར་གྱི་རྣམ་པ་གསལ་བོ་མངོན་ཐུབ་པ་དེ་ཧ་ཅང་ཡག་པོ་བྱུང་སྐོར་གསུངས་སོང་།

དེ་རིང་སྔ་དྲོར་དྷ་ས་ཐེག་ཆེན་གཙུག་ལག་ཁང་དུ། མདོ་སྨད་གྱ་སྟོན་གོ་སྒྲིག་ཚོགས་ཆུང་གིས་༧གོང་ས་མཆོག་དགུང་གྲངས་ ༨༠ ཕེབས་པའི་སྐུའི་གྱ་སྟོན་སྲུང་གཙི་ཞུས་པའི་མཛད་སྒོའི་ཐོག ༧མགོན་པོ་གང་ཉིད་ཀྱིས་སེར་སྐྱ་མི་མང་ལ་བཀའ་སློབ་ལམ་སྟོན་གནང་སྐབས། སོ་སོའི་མེས་པོ་ནས་བརྒྱུད་པའི་རིག་གཞུང་གོམས་གཤིས་རྣམས་སྲུང་སྐྱོབ་བྱེད་དགོས་ཀྱང་། དེང་དུས་ཀྱི་ཤེས་ཡོན་དང་ཁ་མ་བྲལ་བའི་ཐོག་ནས་སྲུང་སྐྱོབ་བྱེད་དགོས་རྒྱུ་གལ་ཆེན་པོ་ཡིན་སྐོར་གསུངས་དོན། གདོད་མིའི་མི་རིགས་ཚོ་དང་ཐུག་འཕྲད་སྐབས་ངས་ནམ་རྒྱུན་འདི་འདྲ་ཤོད་ཀྱི་ཡོད། ཁྱེད་རང་ཚོ་གདོད་མའི་མི་རིགས་ཚོ་ལོ་ངོ་སྟོང་ཕྲག་མང་པོའི་གོང་ནས་ས་ཆ་དེའི་མི་ཡིན་ལ། ཁྱེད་རང་ཚོར་རིག་གཞུང་གོམས་གཤིས་ཤིག་ཡོད་བསྡད་པ་དེ་ས་ཆ་དེའི་གནས་ཚུལ་དང་རན་པ་ཞིག་ཆགས་བསྡད་ཡོད་པ་རེད། ག་རེ་རེད་ཟེར་ན། སྤྱི་ཚོགས་དེའི་གོམས་གཤིས་རྣམས་ས་ཆ་དེའི་ཐོན་ཁུངས་དང་ཚ་གྲང་སོགས་མང་པོ་ཞིག་དང་འབྲེལ་ནས་ཡོང་གི་ཡོད་པ་རེད། དཔེར་ན། ང་རང་ཚོ་བོད་པར་ཆ་བཞག་ན། ཨ་མདོའི་ས་ཁུལ་མང་པོ་ཞིག་གྲང་མོ་ཞེ་དྲགས་ཡིན་པ་དང་། ད་ང་ཚོ་ཚ་བའི་ལུང་པར་བསླེབས་ཚར་དུས་པགས་རྩག་གྱོན་པ་དེའང་ང་རང་ཚོའི་ཡུལ་གྱི་གོམས་གཤིས་དེ་འདྲ་ཞིག་རེད། དེར་བརྟེན་སོ་སོའི་ས་ཁུལ་གྱི་མིའི་རིག་གཞུང་གོམས་གཤིས་ཟེར་བ་དེ་ས་ཁུལ་དེའི་དངོས་ཡོད་གནས་ཚུལ་གྱི་ཐོག་ནས་རིམ་གྱིས་ཆགས་བསྡད་པ་ཞིག་ཡིན་སྟབས། དེར་སྲུང་སྐྱོབ་བྱེད་པ་དེ་ལེགས་པོ་དང་གལ་ཆེན་པོ་ཡིན་ལ། གདོད་མིའི་མི་རིགས་སོ་སོའི་རྣམ་པ་མཚོན་ཐུབ་པར་གལ་ཆེན་པོ་ཆགས་བསྡད་ཡོད་པ་རེད། ཡིན་ནའང་། སྲུང་སྐྱོབ་བྱེད་ཕྱོགས་དེ་རིགས་ཁ་ཤས་ཀྱིས་དུས་རབས་གསར་པའི་སྤྱི་ཚོགས་དང་མ་འདྲིས་པར་སྡོད་པ་ཟེར་བ་དེ་ཕལ་ཆེར་ནོར་འཁྲུལ་རེད། དཔེར་ན། ཉིའུ་ཛི་ལན་ཌི་(New Zealand)ཡི་གདོད་མིའི་མི་རིགས་ཚོའི་ནང་ཁྲིམས་དཔོན་དང་ཆབ་སྲིད་པ། དཔལ་འབྱོར་མཁས་པ། ཚན་རིག་པ་སོགས་རྦད་དེ་འདྲ་འདྲ་རང་བྱས་ནས་ཡོང་གི་ཡོད་པ་དང་། ཁོ་རང་ཚོའི་ཞབས་བྲོ་རྒྱག་པ་སོགས་སོ་སོའི་དེ་ཉར་ཚགས་བྱས་ཏེ། སྤྱི་མཚུངས་ཀྱི་མི་ཞིག་བྱས་ནས་སྡོད་པ་དེ་ཞེ་དྲགས་ཡག་པོ་རེད། ཅེས་དང་།

གཅིག་གྱུར་གྱི་འདུ་ཤེས་འཛིན་པ་དེ་ཧ་ཅང་གལ་ཆེན་པོ་ཡིན་སྐོར་ཁོང་གིས། འཛམ་བུ་གླིང་འདིའི་སྒང་ལ་མི་དུང་ཕྱུར་ ༧༠ ལྷག་ཡོད་པ་དེ་ཚོ་མི་གཅིག་པ་རེད། ང་རང་ཚོ་མི་སྒེར་རེ་རེའི་བདེ་སྡུག་དེ་འཛམ་བུ་གླིང་སྤྱི་དང་འབྲེལ་བ་ཡོད་པ་རེད། ད་ལྟ་སྔ་མོ་དང་འདྲ་ཡི་མ་རེད། སྔ་མོ་ཡིན་ན་གླིང་ཆེན་སོ་སོ་དང་གླིང་ཆེན་རེ་རེའི་ནང་རྒྱལ་ཁབ་སོ་སོ་དང་ས་ཁུལ་སོ་སོར་བསྡད་དེ་རང་ཁ་རང་གསོ་བྱས་ཏེ་གཅིག་གིས་གཅིག་ལ་བརྟེན་གྱི་ཡོད་པ་མ་རེད། དུས་རབས་ཉི་ཤུ་པའི་སྨད་ནས་བཟུང་དེ་རིང་ཁ་སང་དུས་རབས་ཉེར་གཅིག་པའི་ནང་། རང་བཞིན་གྱིས་དཔལ་འབྱོར་དང་ཤེས་ཡོན་སོགས་མང་པོ་ཞིག་གི་ཐོག་ནས་འཛམ་བུ་གླིང་གཅིག་གྱུར་གྱི་རྣམ་པ་དེ་ཞེ་དྲགས་ཆགས་བསྡད་ཡོད་པ་རེད། དང་དུ་བླངས་ནས་བྱས་པ་མིན་ཡང་གཅིག་གྱུར་གྱི་ཚོར་བ་དེ་བསླེབས་བསྡད་ཡོད་པ་རེད། དེར་བརྟེན་ང་ཚོ་བོད་པར་ཆ་བཞག་ནའང་། འཛམ་བུ་གླིང་གི་མི་དུང་ཕྱུར་ ༧༠ ཡི་ཆ་ཤས་ཤིག་ཡིན་ལ། འཛམ་གླིང་གི་མི་དུང་ཕྱུར་ ༧༠ ལ་བདེ་བ་བྱུང་ན་ང་ཚོ་ལའང་ཁེ་བཟང་རག་ངེས་རེད། དཔེར་ན། ཐད་ཀར་ང་ཚོར་འབྲེལ་བ་ཡོད་པའི་རྒྱ་ནག་ནང་ལོགས་སུ་དོན་དམ་གྱིས་མིའི་སེམས་ལ་ཞི་བདེ་ཡོད་པ་ཞིག་བྱུང་བ་ཡིན་ན། ང་ཚོ་བོད་པ་དང་ཤིན་ཅང་སོགས་ཚང་མར་ཕན་ངེས་རེད། རྒྱ་གར་ལའང་ཕན་ངེས་རེད། གང་ལྟར་དེ་རིང་ཁ་སང་འཛམ་བུ་གླིང་འདིའི་སྒང་ལ་འཁྲུག་པ་བརྒྱབ་བསྡད་པ་མང་པ་ཞིག་ང་ཚོ་དང་ཁོང་ཚོ་ཟེར་བའི་ཚིག་དེའི་འོག་ནས་ཡོང་གི་ཡོད་སྟབས། ང་ཚོར་གཅིག་གྱུར་གྱི་འདུ་ཤེས་དེ་དཔེ་གལ་ཆེན་པོ་རེད་འདུག དེའི་ཕྱིར་ངས་གཅིག་གྱུར་གྱི་འདུ་ཤེས་དེ་དགོས་ཀྱི་འདུག་ཅེས་རྟག་པར་ཤོད་ཀྱི་ཡོད། མི་གཞན་པ་དེར་སྐད་ཡིག་མི་འདྲ་བ་དང་ཚོན་མདོག་མི་འདྲ་བ། ཆོས་དད་མི་འདྲ་བ། རྒྱལ་ཁབ་མི་འདྲ་བ་ག་རེ་ཡིན་ནའང་མི་གཅིག་པ་ཡིན་བསམ་པའི་འདུ་ཤེས་དེ་ཡོད་པ་ཡིན་ན། ཐུབ་ཚོད་བྱེད་ངེས་མ་རེད་ལ། གསོད་ངེས་མ་རེད་བཱ་རེད་མ་རེད། ང་ཚོ་དང་ཁྱེད་ཚོ་ཟེར་བའི་བསམ་བློ་དེའི་ཐོག་ནས་མཐར་གཏུག་ཡོང་དུས། ང་ཚོ་ཟེར་བ་ཕྱིས་སུ་རྦད་དེ་བསྡུས་ནས་ང་ང་ང་ཞེས་པ་རང་གི་ཐོག་ཕྱིན་པ་ཡིན་ན། དབུལ་ཕྱུག་གི་ཁྱད་པར་དང་ཐུབ་ཚོད་ཤོད་པ། མགོ་སྐོར་གཏོང་བ། དབང་ཡོད་ཤོད་པ། གསོད་རེས་བྱེད་པ་སོགས་ཀྱི་མཐར་ཐུག་དེ་ང་ང་ཟེར་བ་དེའི་ཐོག་ནས་རྙོག་དྲ་ཚང་མ་བཟོ་ཡི་ཡོད་པ་རེད། དེ་འདྲའི་བསམ་བློ་དེ་ནོར་འཁྲུལ་ཡིན་པ་ངོ་སྤྲོད་བྱེད་པར་ཡིན་གཅིག་མིན་གཅིག་ཆོས་དང་འབྲེལ་བ་ཅི་མི་འདུག དེ་དངོས་གནས་ཚན་རིག་དང་མཐུན་ཞིང་མཐོང་ཆོས་ཀྱི་གནས་ཚུལ་གྱི་ཐོག་ནས་ངོ་སྤྲོད་བྱ་རྒྱུ་ཡོད་པ་རེད། གང་ལྟར་མི་དུང་ཕྱུར་ ༧༠ ཞེས་ཤོད་བསྡད་པའི་ནང་ནས་དངོས་གནས་གདོད་མིའི་མི་རིགས་དམིགས་བསལ་གྱིས་དཀའ་ངལ་འཕྲད་བསྡད་པ་དེ་ཚོར་ང་ཚོས་བསམ་བློ་གཏོང་དགོས་པ་དེ་དཔེ་གལ་ཆེན་པོ་ཆགས་འདུག སྨོན་ལམ་ཞིག་མ་གཏོགས་མེད་པ་ཡིན་ནའང་རྒྱག་དགོས་པ་དེ་གལ་ཆེན་པོ་ཆགས་འདུག ཅེས་གསུངས་སོང་།

ཡང་ཁོང་གིས་མདོ་སྨད་གྱ་སྟོན་སྐོར་ལ། དེ་རིང་མདོ་སྨད་ཀྱི་ངོས་ནས་ང་ལོ་ ༨༠ ཧྲིལ་པོ་ཕྱིན་པའི་གྱ་སྟོན་བྱེད་ཀྱི་ཡོད་པ་རེད། ༧རྒྱལ་བ་རིན་པོ་ཆེ་བོད་སྤྱི་པའི་འགན་འཁུར་མཁན་ཞིག་ཆགས་བསྡད་ཡོད་ལ། ཆེ་ས་ནས་བཤད་ན་འཛམ་བུ་གླིང་འདིའི་མི་དུང་ཕྱུར་ ༧༠ ལ་བསམ་བློ་གཏོང་མཁན་གྱི་མི་ཞིག་ཡིན། ཡིན་ནའང་། སྐྱེས་ས་དེ་བཤད་ཡོང་བ་ཡིན་ན་ཨ་མདོ་ས་ཁུལ་མཚོ་སྔོན་སྐུ་འབུམ་གྱི་ཉེ་འཁྲིས་སུ་སྐྱེས་པ་རེད། དེའི་ཕྱིར་ཨ་མདོ་བ་ཚོས་རྒྱལ་བ་རིན་པོ་ཆེ་ཨ་མདོ་བ་ཡིན་པའི་བསམ་པའི་འདུ་ཤེས་གསལ་བོར་བཟུང་སྟེ། དམིགས་བསལ་གྱིས་དེ་རིང་འདིར་དུས་དྲན་མཛད་སྒོ་གྲ་སྒྲིག་བྱས་ཡོད་པ་དང་། གོང་དུ་ལས་བསྡོམས་ནང་བཤད་པ་ནང་བཞིན་དངོས་གནས་ཁྱེད་རང་ཚོས་ལོ་ཁ་ཤས་རིང་བསམ་བློ་བཏང་སྟེ་འཆར་གཞི་བཀོད། ཞལ་འདེབས་ཡིན་ནའང་མང་ཐག་ཆོད་བྱུང་འདུག་གཱ། དེ་ཚོ་ཁྱེད་རང་ཚོས་ཚགས་ཚུད་ཐག་ཆོད་ཅིག་བྱུང་འདུག་པས་ཐུགས་རྗེ་ཆེ། དེ་རིང་དུས་དྲན་འདིའི་ཐོག་ལ་ང་ཚོའི་ཆོས་བརྒྱུད་ཁག་གི་དབུ་ཁྲིད་ཚོ་དུས་གཅིག་ལ་ཚང་འཛོམས་གནང་སྟེ། ཐུགས་འཁུར་བཞེས་ནས་བཀའ་སློབ་གནང་བ་དེ་དངོས་གནས་ཚང་མ་གཅིག་གྱུར་གྱི་ནུས་པ་འདྲ་བོ་གསལ་བོ་མཚོན་ཐུབ་པ་ཡག་པོ་ཞེ་དྲགས་བྱུང་སོང་བས་ཐུགས་རྗེ་ཆེ་ཞུ། ཞེས་གསུངས་སོང་།

གསར་འགོད་པ། པདྨ་མཚོ།