ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་དམར་ཤོག་དྲུང་ཆེ་ཨཱ་ལི་མུ་ཅང་གིས་ཁྲིམས་འགལ་ཚབས་ཆེན་བྱས་པའི་ནག་ཉེས་འོག་ཞིབ་བཤེར་བྱེད་བཞིན་ཡོད་འདུག
ཁ་སང་ཤིན་ཅང་ཡུ་གུར་མི་རིགས་རང་སྐྱོང་ཁུལ་སྒྲིག་ཁྲིམས་ཞིབ་བཤེར་ཁང་གིས། ཡུ་གུར་མི་རིགས་རང་སྐྱོང་ཁུལ་སྲིད་གཞུང་གི་དམར་ཤོག་དྲུང་ཆེ་དང་། གཞུང་སྒྲུབ་ཁང་ཏང་གི་སྒྲིག་འཛུགས་ཀྱི་མགོ་ཁྲིད་ཨཱ་ལི་མུ་ཅང་(阿力木江·买买提明)གིས། ཁྲིམས་འགལ་ཚབས་ཆེན་བྱས་པའི་ནག་ཉེས་འོག་ཞིབ་བཤེར་བྱེད་བཞིན་ཡོད་སྐོར་བསྒྲགས་ཡོད་ཀྱང་། ད་ལྟའི་ཆར་ཁྲིམས་འགལ་གྱི་ནག་ཉེས་ག་རེ་བྱས་ཡོད་གསལ་བོ་བརྗོད་མེད་པ་རེད།
འདི་ལོ་ཕྱི་ཟླ་ ༣ ཚེས་ ༡༡ ཉིན། ཡུ་གུར་མི་རིགས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་རྒྱུན་ལས་ལྷན་ཁང་གི་མགོ་ཁྲིད་གཞོན་པ་ཟུར་པ་ལི་ཀྲི་ཡིས། ཁྲིམས་འགལ་ཚབས་ཆེན་བྱས་པའི་ནག་ཉེས་འོག་ཞིབ་བཤེར་བྱས་ཡོད་པ་མ་ཟད། ཁོ་བོ་ཤིན་ཅང་ཡུ་གུར་མི་རིགས་རང་སྐྱོང་ཁུལ་ནས་འཛིན་བཟུང་བྱས་པའི་སྟག་རྒན་ཐོག་མ་དེ་ཡིན་ལུགས་བསྒྲགས་ཡོད་པ་དང་། ད་ལྟའི་བར་དུ་ཤིན་ཅང་ཉིན་རེའི་ཚགས་པར་ཁང་གི་སྤྱི་ཁྱབ་རྩོམ་སྒྲིག་པ་ཀྲོ་ཤིན་ཝེ་དང་ཤིན་ཅང་སྨན་རྩིས་སློབ་ཆེན་གྱི་སློབ་གཙོ་གཞོན་པ་ལི་པིན། ཤིན་ཅང་མང་སྲིད་ཁང་གི་མགོ་ཁྲིད་གཞོན་པ་མའོ་ཅན། ཤིན་ཅང་ཉེན་རྟོག་སློབ་གླིང་གི་ཏང་ཨུའི་མགོ་ཁྲིད་ལི་ཡན་མེན་སོགས་ཡུ་གུར་མི་རིགས་རང་སྐྱོང་ཁུལ་གྱི་གྲོང་ཁྱེར་དང་རྫོང་རིམ་པའི་ཏང་ཡོན་དཔོན་རིགས་ ༢༠ ཡས་མས་ལ་ཞིབ་བཤེར་བྱས་པ་བརྒྱུད་གོ་གནས་ནས་ཕབ་ཡོད་འདུག
ཨ་རིར་གནས་སྡོད་སྐབས་དོན་དཔྱད་ཞིབ་པ་ལོའུ་ལན་ཁྲིན་ལགས་ཀྱིས། ལྐོག་ཟ་རུལ་སུངས་ལ་རྒོལ་རྡུང་གཏོང་བའི་ལས་འགུལ་དེ་དབུས་སྒྲིག་ཁྲིམས་ཨུ་ཡོན་ལྷན་ཁང་གིས་ལག་བསྟར་བྱེད་ཀྱི་ཡོད་པ་ལས། ཁྲིམས་འཛིན་གྱི་རྒྱུན་ལྡན་གོ་རིམ་བརྒྱུད་ཀྱི་མེད་སྟབས། དབུས་སྒྲིག་ཁྲིམས་ཨུ་ཡོན་ལྷན་ཁང་རྒྱལ་ཁབ་ཀྱི་ཁྲིམས་འཛིན་མ་ལག་ལས་བརྒལ་རྒྱུ་ཡོད་པ་མ་རེད། སྲིད་འཛིན་ཞི་ཅིན་ཕིན་གྱི་སྟག་དང་སྦྲང་མ་མཉམ་རྡུང་གི་བྱ་འགུལ་དེར་ཕྱི་ངོས་ ནས་བལྟས་ན་གཅིག་གྱུར་ལྟ་བུ་ཞིག་ཡིན་ཡང་། དོན་དངོས་ཐོག་གདམ་ག་རང་བཞིན་ཅན་ཞིག་རེད། དམར་ཤོག་ཚོགས་པའི་མཐོ་རིམ་དཔོན་རིགས་ཀྱི་བུ་དང་བུ་མོ་ཚོར་ཕ་མའི་གོ་གནས་ མཐོན་བོ་ངེས་ཅན་ཡོད་ཚེ། ལྐོག་ཟ་རུལ་སུངས་ཀྱི་ཞིབ་བཤེར་དེ་ཁོ་ཚོའི་ཐོག་སླེབ་ཀྱི་མེད། འོན་ཀྱང་། ཞིབ་བཤེར་བྱས་པ་མང་ཆེ་བ་ཁྱིམ་བརྒྱུད་ཀྱི་གནས་བབ་ཞན་པའི་དཔོན་རིགས་ཚོ་ཡིན་ལ། གདམ་ག་རང་བཞིན་གྱི་ལས་འགུལ་འདི་ཚད་ངེས་ཅན་གྱི་ཐོག་ནས་ཆབ་སྲིད་ཀྱི་དབང་ཆ་འཐབ་རྩོད་ཅིག་དང་། ཆབ་སྲིད་ཀྱི་ལྟ་བ་མི་མཐུན་མཁན་ཚོ་མེད་པར་བཟོ་བྱེད་ཀྱི་ལག་ཆ་ཞིག་ཏུ་གྱུར་ཡོད་པ་རེད། ཅེས་བརྗོད་འདུག
གསར་འགོད་པ། པདྨ་མཚོ།
