དེ་རིང་བཞུགས་སྒར་དྷ་རམ་ས་ལར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྒྱའི་བཙོན་འོག་ནས་སྐུ་གཤེགས་པར་དཔྱད་གླེང་ཚོགས་འདུ་ཞིག་བསྡུས་པའི་སྟེང་། རིན་པོ་ཆེ་སྐུ་གཤེགས་སྟངས་ལ་དོགས་པ་ཡོད་ཚུལ་གྱི་གླེང་སློང་བྱུང་སོང་།
དེ་རིང་ཉིན་རྒྱབ་ཆུ་ཚོད་ ༣།༥༠ སྟེང་། དྷ་སྟེང་ཉིན་མོའི་སློབ་གྲྭའི་ཚོགས་ཁང་དུ་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་གོ་སྒྲིག་འོག་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱའི་བཙོན་འོག་ཏུ་སྐུ་གཤེགས་པར་ན་ཟུག་དང་སེམས་གདུང་དྲགས་པོས་དཔྱད་གླེང་ཞེས་པ་ཞིག་ཚོགས་སོང་། གདན་ཞུའི་དཔྱད་གླེང་བ་དག་ནི་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་དང་། རྣམ་རྒྱལ་གྲྭ་ཚང་གི་དཔེ་ཁྲིད་རྒན་དང་སྤྲུལ་སྐུ་ཁོང་གི་ཚ་བོ་དགེ་བཤེས་ཉི་མ་ལགས། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་གསུམ་རེད།
དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ཨ་ཚོགས་ཀླུ་མཁར་བྱམས་ལགས་ཀྱིས་བོད་ཡིག་ཐོག་གསར་འགོད་བསྒྲགས་གཏམ་སྤེལ་བའི་ནང་། སྤྲུལ་སྐུ་བསྟན་འཛིན་བདེ་ལེགས་ནི་སྟོང་ལོ་གསར་བའི་ནང་རྒྱ་གཞུང་གིས་ཉེས་མེད་ཉེས་འགེལ་གྱི་ཁྲིམས་ཐག་བཅད་པའི་བོད་བརྒྱུད་ནང་བསྟན་གྱི་སྤྲུལ་སྐུ་ཐོག་མའི་གྲས་ཤིག་ཆགས་ཡོད་པ་མ་ཟད། ཁྲིམས་ཐག་ལྗིད་ཤོས་དང་། དུས་ཡུན་རིང་ཤོས། བཀའ་ཆད་ལྗིད་ཤོས་འཁུར་མཁན་གྱི་ངེས་མེད་ཀྱི་བཙོན་པ་ཞིག་ཀྱང་ཆགས་ཡོད།
བོད་ཁུལ་སྤྱི་ཚོགས་ཁྱོན་ཡོངས་ནས་བརྩི་བཀུར་དང་དད་གུས་བྱེད་པའི་ཡང་རྩེར་སོན་པ་དང་ཁོང་གི་སློབ་གསོའི་ཤུགས་རྐྱེན་དང་ནུས་པར་བརྟེན་ཏེ། ས་གནས་བདེ་འཇགས་དང་མི་དམངས་མཐུན་ལམ། སྤྱི་ཚོགས་འཆམ་མཐུན་སོགས་ཀྱི་ཐད་ནུས་པ་ཆེན་པོ་ཐོན་ཡོད་སྟབས། རྒྱ་ནག་གཞུང་གི་བསམ་པར་སྤྲུལ་སྐུའི་མཚན་སྙན་དང་ནུས་པ་དེ་མུ་མཐུད་གནས་པ་ཡིན་ན་ནམ་ཞིག་རྒྱ་གཞུང་གི་མཚན་སྙན་དང་ནུས་པའང་ཉམས་རྒུད་དུ་འགྲོ་རྒྱུར་དངངས་སྐྲག་དང་རྣམ་རྟོགས་ཀྱིས་མ་བཟོད་པར། རྒྱ་གཞུང་གིས་རྩ་མེད་བཟོ་རྒྱུའི་ཐད་ལྐོག་ཇུས་བཤམས་སྟབས། འཛིན་བཟུང་བཙོན་འཇུག་དང་། ཁྲིམས་ཐག་བཅད་པ་ཚང་མ་ཉེས་མེད་བཙན་འགེལ་བྱས་པ་དང་། ཁོང་སྐུ་གྲོངས་པ་དེ་ཡང་རྒྱུན་ལྡན་རང་བཞིན་གྱི་དགོངས་པ་རྫོགས་པ་མ་ཡིན་པར། རྒྱ་གཞུང་གིས་བསམ་བཞིན་དུ་སྐུ་བཀྲོངས་པར་ངོས་འཛིན་བྱེད་ཀྱི་ཡོད། ཅེས་བསྒྲགས་སོང་།
དགེ་བཤེས་ཉི་མ་ལགས་ཀྱིས་གསུངས་དོན། པཎ་ཆེན་རིན་པོ་ཆེ་བླ་བྲང་བཀྲ་ཤིས་འཁྱིལ་དུ་ཐོག་མར་ཕེབས་སྐབས། རིན་པོ་ཆེ་མཆོག་མཇལ་ཁ་བཅར་ཏེ་རིག་གནས་གསར་བརྗེ་སྐབས་ཀྱི་གནས་ཚུལ་ཆ་ཚང་པཎ་ཆེན་རིན་པོ་ཆེར་ཞུས་ཡོད་པ་དང་། པཎ་ཆེན་རིན་པོ་ཆེ་མཆོག་གིས་ཀྱང་རིག་གནས་གསར་བརྗེ་སྐབས་བོད་ས་ཡོངས་ཀྱིས་དཀའ་སྡུག་ཚད་མེད་མྱངས་པ་རེད། ང་ཡང་བཙོན་ཁང་དུ་བཅུག་ནས་ལྕགས་ཀྱིས་བརྡུངས་ནས་འདི་འདྲ་བྱས་སོང་ཞེས་སྐུ་གཟུགས་སྟེང་གི་རྨ་ཁ་རྣམས་བསྟན་སོང་ཞེས་གསུང་གི་འདུག ཡིན་ན་ཡང་ད་ལྟ་སྔོན་མ་དང་འདྲ་གི་མ་རེད། མ་འོངས་པར་སོ་སོའི་ལུང་པར་ཆོས་སྒོ་འབྱེད་རྒྱུ་དང་ཆོས་ལུགས་བྱེད་རྒྱུ་སོགས་ལ་རྒྱལ་ཁབ་ཀྱིས་རྩ་ཁྲིམས་གཏན་ཁེལ་བྱས་ཡོད་པ་རེད། དེའི་ཐད་མུ་མཐུད་དུ་ཤུགས་རྒྱོབས་ཤོག་ཅེས་ནས་བཀའ་གནང་ཡོད་སྟབས། ཁོང་ལི་ཐང་ལ་ཚུར་ཕེབས་ནས་ཆོས་སྒོ་འབྱེད་དགོས་པ་དང་། རིག་གནས་གསར་བརྗེ་སྐབས་ཞྭ་མོ་གཡོག་ཡོད་པ་དེ་ཚོ་རྒྱལ་ཁབ་ཀྱི་རྩ་ཁྲིམས་ཀྱིས་དཀར་འདོན་བྱ་དགོས་པའི་དུས་ལ་བསླེབས་ཡོད་ཅེས་རྫོང་རིམ་པར་ཞུ་གཏུགས་མང་པོ་བྱས་ཏེ་རྒྱ་གཞུང་མགོ་ཁྲིད་ཚོར་ངོ་རྒོལ་བྱས་ཡོད་སྟབས། སྐབས་དེ་རིན་པོ་ཆེའི་མཚན་ལ་ཨ་ང་བཀྲ་ཤིས་ཞུ་བཞིན་ཡོད་པ་དང་། མི་རྒན་གཞོན་སུ་ཡིན་རུང་ཁོང་ངོ་མི་ཤེས་མཁན་ཡོད་པ་མ་རེད།
༡༩༨༠ ལོར་རྒྱ་ནག་གི་སྲིད་ཇུས་ཏོག་ཙམ་གུ་ཡངས་ཕྱིན་པ་དང་དགོན་པ་བསྐྱར་གསོ་བྱེད་རྒྱུ་མགོ་མ་བཙུགས་པའི་སྔོན་ཏག་ཏག་ལ། གལ་སྲིད་དགོན་པ་བསྐྱར་གསོ་བྱེད་པ་ཡིན་ན་དགོན་པའི་ནང་སྡོད་མཁན་གྱི་གྲྭ་བ་དགོས་པར་རིན་པོ་ཆེས་དགོངས་པ་བཞེས་ཏེ་ལི་ཐང་དགོན་གྱི་གྲྭ་བ་རྒན་པ་དེ་ཚོ་རུབ་རུབ་བྱས་ནས་གྲྭ་བ་ཚོར་དགེ་ཚུལ་སྒྲུབ་མགོ་བཙུགས་པ་དང་། དགེ་ཚུལ་སྒྲུབ་སྐབས་རེ་རེར་གྲྭ་བ་ ༡༣༠ ཡས་མས་བསྒྲུབས་ཡོད་པ་རེད། ༡༩༨༡ ལོའི་བོད་ཟླ་ ༤ བའི་ནང་ལི་ཐང་ལ་ཆོས་སྒོ་འབྱེད་སྐབས་རིན་པོ་ཆེ་མཆོག་གིས་དམིགས་བསལ་འགན་དེ་འདྲ་འཁུར་མེད་ཀྱང་སྔོན་མ་ཞུ་གཏུགས་རིམ་པར་བྱས་པར་བརྟེན་ཏེ་རིན་པོ་ཆེ་འཛིན་བཟུང་བྱ་རྒྱུའི་འཆར་གཞི་ཡོད་སྟབས། ༡༩༨༢ ལོར་ཆོས་ཐོག་ཕེབས་པའི་བཟོད་བྱས་ནས་ལྷ་སར་ཕེབས་ཏེ་གློ་སྨོན་ཐང་བརྒྱུད་ནས་རྒྱ་གར་ལ་ཕེབས་ཡོད་པ་རེད། ཅེས་སོགས་གསུངས་སོང་།
དགེ་བཤེས་མཆོག་གིས་མུ་མཐུད་དུ་གསུངས་དོན། རིན་པོ་ཆེ་མཆོག་ཐོག་མ་ ༡༩༨༢ ལོར་ཆོས་ཐོག་ཏུ་ཕེབས་པའི་བཟོད་བྱས་ནས་ལྷ་སར་ཕེབས་པ་དང་། དེ་ནས་གློ་སྨོན་ཐང་བརྒྱུད་ནས་རྒྱ་གར་ལ་ཕེབས་ཏེ་འབྲས་སྤུངས་སྒོ་མང་གྲྭ་ཚང་དུ་ཞུགས་ཡོད་པ་དང་ ༡༩༨༧ ལོར་ཕྱིར་བོད་ནང་ཕེབས་ཏེ། ཕ་ཡུལ་གྱི་དགོན་གྲོང་གཉིས་ཀྱི་ནང་ཆོས་སློབ་གཉེར་དང་། ཤེས་ཡོན་རིག་གནས་ཐོག་ཕྱག་ལས་གནང་མགོ་བཙུགས་པ་རེད། རིན་པོ་ཆེ་མཆོག་ལི་ཐང་དགོན་ཆེན་དུ་བཞུགས་རིང་། དགེ་འདུན་པ་ཚོར་དོལ་རྒྱལ་བསྟན་ན་ཡག་པོ་མེད་པའི་སྐོར་ལ་བཀའ་སློབ་དང་ཕྱག་ལས་མང་པོ་ཞིག་གནང་བར་བརྟེན་ཏེ། རྒྱ་གཞུང་གི་སུན་གཙེར་ཡང་ཡང་བྱས་ཏེ། ཁོང་བཞུགས་མ་ཐུབ་པར་ཨོ་ཐོག་ཏུ་ཕེབས་ཡོད་པ་དང་། དེ་གར་ས་ཆ་ཅུང་ཆེ་ཙམ་བླངས་ཏེ་རིམ་པས་དགོན་པ་ཆུང་ཆུང་ཞིག་རྒྱག་རྒྱུའི་འཆར་གཞི་ཡོད་ཀྱང་། རྒྱ་ནག་གཞུང་གིས་དགོན་པ་རྒྱག་ཆོག་གི་མེད་པའི་བཙན་བཀའ་བཏང་ཡོད་སྟབས། རིན་པོ་ཆེ་དང་ངེད་གཉིས་རྒྱ་ནག་པེ་ཅིན་དུ་པཎ་ཆེན་རིན་པོ་ཆེར་མཇལ་བར་བསྐྱོད་པ་ཡིན། སྐབས་དེར་པཎ་ཆེན་རིན་པོ་ཆེ་མཆོག་གིས་ཁྱོད་རང་ངས་ངོ་གསལ་བོ་ཤེས་ཀྱི་ཡོད། ཁྱོད་རང་རྒྱ་གར་ནས་སློབ་སྦྱོང་བྱས་ཏེ་མི་སྡོད་པར་ཅིའི་ཕྱིར་བོད་ནང་ཕྱིར་ཡོང་བ་ཡིན་ཞེས་གསུངས་སོང་། དེ་ནས་རིན་པོ་ཆེ་མཆོག་གིས་ཕྱིར་བོད་ནང་ལོག་དགོས་པའི་རྒྱུ་མཚན་དང་། རྒྱ་ནག་གཞུང་གིས་ཨོ་ཐོག་ཏུ་དགོན་པ་རྒྱག་གི་མ་བཅུག་ཚུལ་སོགས་ཞུས་སྐབས། སོ་སོའི་ཆོས་ད་རིག་གཞུང་བསྐྱར་གསོ་གནང་བ་དེ་དཔེ་ཡག་པོ་རེད། ད་ལྟར་ཆོས་ལུགས་དད་མོས་རང་དབང་རེད། དགོན་པ་དང་སློབ་གྲྭ་རྒྱག་ཐུབ་ན་རྒྱག་དགོས་པ་རེད། ཅེས་གསུངས་ཏེ། པཎ་ཆེན་རིན་པོ་ཆེ་ཡིས་དགོན་པའི་མཚན་ལ་ཁམས་ན་ལནྜ་ཐེག་ཆེན་བྱང་ཆུབ་ཆོས་གླིང་ཞེས་མཚན་གནང་སོང་། ད་དུང་དགོན་པའི་བསྟན་སྐལ་དུ་པཎ་ཆེན་རིན་པོ་ཆེ་ཁོང་གི་སྐུ་པར་ཆེན་པོ་ཞིག་ཀྱང་གནང་སོང་།
རིམ་གྱིས་དགོན་པ་དེ་ཡག་པོ་ཆགས་དུས་རྒྱ་གཞུང་གིས་དངོས་ཤུགས་རྒྱུ་གསུམ་ནས་གནོད་ཤུགས་སྤྲད་ཡོད་སྟབས། རིན་པོ་ཆེ་ཡིས་གྲྭ་བཙུན་མང་པོ་ཞིག་རྒྱ་གར་ལ་གཏོང་རྒྱུ་མགོ་བཙུགས་ཏེ། སྔ་ཕྱིར་གྲྭ་བཙུན་ཉིས་བརྒྱ་སུམ་བརྒྱ་ཞིག་བཏང་ཡོད་པ་རེད། ང་རང་ ༡༩༨༩ ལོར་བཏང་པ་རེད། དེའི་རྗེས་ ༡༩༩༠ ལོ་དང་ ༡༩༩༡ ལོར་གྲྭ་བ་གསུམ་བརྒྱ་ཙམ་དང་བཙུན་མ་ ༥༠ ཙམ་བཏང་ཡོད་པ་རེད། ད་ལྟའི་བར་དུ་རིན་པོ་ཆེ་ཡིས་བཏང་བའི་གྲྭ་བའི་ནང་ལ་དགེ་བཤེས་ལྷ་རིམ་པ་རྐྱང་རྐྱང་ ༥༠ ལྷག་ཡོད་པ་རེད། དེ་བཞིན། སྔོན་ཆད་ལི་ཐང་དུ་བཙུན་དགོན་མེད་སྟབས། ལི་ཐང་དུ་བཙུན་དགོན་གསར་བཞུངས་བྱས་ཡོད་པ་དང་། ༢༠༡༣ ལོར་ང་བོད་ལ་འགྲོ་དུས་བཙུན་དགོན་དེའི་ནང་བཙུན་མ་ ༧༢ ཡོད་གསུང་གི་འདུག བཙུན་དགོན་དེའི་ནང་ལ་མཚན་ཉིད་དང་རིག་གནས། རྒྱ་ཡིག་སོགས་སྦྱོང་རྒྱུ་ཡོད་པ་རེད། ཅེས་སོགས་གསུངས་སོང་།
སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས་གསུངས་དོན། སྤྲུལ་སྐུ་བསྟན་འཛིན་བདེ་ལེགས་ལ་ནག་ཉེས་མང་པོ་བཙུགས་ཡོད་ཀྱང་མཐའ་མ་དེར་ཁྲིན་ཏུའུ་ལ་འབར་རྫས་བཞག་པའི་ནག་ཉེས་དེ་བཀལ་ཡོད་ཀྱང་ད་ལྟ་བར་དུ་དེ་ལ་ཁུངས་སྐྱེལ་དབང་རྟགས་གང་ཡང་བྱུང་ཡོད་པ་མ་རེད། ༢༠༠༢ ལོའི་ཟླ་ ༤ ཚེས་ ༧ ཉིན་རིན་པོ་ཆེ་འཛིན་བཟུང་བྱས་པ་དང་ལོ་དེའི་ཕྱི་ཟླ་ ༡༢ ཚེས་ ༢ ཉིན་ལ་རིན་པོ་ཆེར་ལོ་གཉིས་ཀྱི་རྗེས་ལ་སྲོག་ཁྲིམས་གཏོང་རྒྱུའི་ཁྲིམས་ཐག་བཅད་པ་དང་། ཁོང་གི་སྐུ་འཁོར་བློ་བཟང་དོན་གྲུབ་སྲོག་ཐོག་ཏུ་གཏོང་རྒྱུའི་ཁྲིམས་ཐག་བཅད་པ་རེད། ཁྲིམས་ཐག་བཅད་རྗེས་ཉི་མ་ ༡༥ ཡི་ནང་ལ་གོང་ལ་ཞུ་གཏུགས་བྱ་ཆོག་སྟབས། རིན་པོ་ཆེ་ཡིས་ཞུ་གཏུགས་བྱས་ཡོད་ཀྱང་བློ་བཟང་དོན་གྲུབ་ཀྱིས་ཞུ་གཏུགས་བྱས་ཡོད་པ་མ་རེད།
རྒྱ་ནག་གི་རྩོམ་པ་པོ་གྲགས་ཅན་ཝང་ལི་ཞོན་གྱིས་རྒྱ་ནག་གི་ཁྲིམས་རྩོད་པ་ཀྲང་སི་ཀྲི་ (Zhang Sizhi) ལ་འབྲེལ་བ་བྱས་པ་རེད། རྒྱ་ནག་གིས་དང་པོ་ཡིག་ཆ་ཚང་མར་ལྟ་རྒྱུར་ངོས་ལེན་བྱས་ཡོད་ཀྱང་། གློ་བར་དུ་འགྱུར་བ་བཏང་སྟེ་ཁོང་ལ་ཁྲིམས་རྩོད་བྱེད་མ་བཅུག་པར་མཐའ་མར་ ༢༠༠༣ ཟླ་ ༡ ཚེས་ ༦ ཉིན་སྤྲུལ་སྐུ་བསྟན་འཛིན་བདེ་ལེགས་ཀྱིས་ཁྲིམས་རྩོད་པ་ཞིག་གླས་སོང་ཟེར་ནས་སྔོན་མའི་ཁྲིམས་ཐག་རང་ལ་བཞག་པ་དང་། བློ་བཟང་དོན་གྲུབ་སྲོག་ཐོག་ལ་བཏང་ནས་དབང་རྟགས་གཅིག་ཀྱང་མེད་པར་བཟོས་པ་རེད། དེའི་སྐབས་ལ་ཀྲང་སི་ཀྲི་གཙོས་བའི་ཝང་ལི་ཞོན་སོགས་ཤེས་ཡོན་ཅན་མི་ ༢༤ ཡིས་མཚན་རྟགས་བརྒྱབ་སྟེ་རྒྱ་ནག་མི་དམངས་འཐུས་མི་ཚོགས་ཆེན་དང་ཆེས་མཐོའི་མི་དམངས་ཁྲིམས་ཁང་ལ་དོན་ཚན་གསུམ་ཅན་གྱི་ཡི་གེ་ཞིག་བཏང་ཡོད་ཀྱང་དེར་རྒྱ་གཞུང་གིས་ཁེས་ལེན་བྱས་ཡོད་པ་མ་རེད།
དེ་བཞིན། རིན་པོ་ཆེར་ཁྲིམས་ཐག་མ་བཅད་པའི་ཟླ་ ༤ སྔོན་ལ་དཀར་མཛེས་ཀྱི་ཚགས་པར་སྟེང་། གཞུང་གི་ལས་བྱེད་ཚང་མ་ཚོགས་ཏེ་ཨ་ང་བཀྲ་ཤེས་དེ་ཁམས་ལྷོ་ཕྱོགས་ཀྱི་ཏཱ་ལའི་ཁ་བྲལ་རང་ལུགས་ཀྱི་རང་བཙན་ཚོགས་པ་ཆེ་ཤོས་དང་དེའི་ཚོགས་གཙོ་ཡིན་པ་སོགས་གཏན་འབེབས་བྱས་ཡོད་པ་རེད། རྒྱ་གཞུང་གི་ཁྲིམས་ལུགས་ནང་ལ་ཁྲིམས་ཁང་གིས་ཐག་གཅོད་མ་བྱས་སྔོན་ལ་ཏཱ་ལའི་ཁ་བྲལ་གྱི་ཚོགས་གཙོ་ཡིན་མིན་སོགས་གསལ་བསྒྲགས་བྱེད་ཆོག་གི་ཡོད་པ་མ་རེད། དེར་རྒྱ་ནག་གི་ཁྲིམས་རྩོད་པ་དང་ཤེས་ཡོན་ཅན་ཚོས་དོགས་སློང་དོན་ཚན་ ༨ ཅན་ཞིག་བཏོན་ཡོད་པ་རེད། ཅེས་བརྗོད་སོང་།
འགན་འཛིན་ཚེ་རིང་མཚོ་མོ་ལགས་ཀྱིས་གསུང་བཤད་གནང་དོན། དེ་རིང་གི་ཉིན་མོ་འདི་ནི་བློ་ཕམ་པའི་གནས་ཚུལ་ཞིག་ཆགས་ཡོད་པ་དང་། སྤྱིར་བཏང་ང་ཚོ་དམངས་གཙོ་འཕེལ་རྒྱས་ལྟེ་གནས་ཁང་གིས་རིན་པོ་ཆེར་མ་ཉེས་ཁ་གཡོག་ཐེབས་ཡོད་པ་དང་། དྲང་བདེན་མིན་པ་སོགས་ཀྱི་སྐོར་ལོ་མང་པོར་ཞུ་གཏུག་བྱས་ཡོད། དེའི་རྗེས་ནས་བོད་རང་བཙན་སློབ་ཕྲུག་ཚོགས་པ་སོགས་ཀྱིས་ལས་འགུལ་སྤེལ་ཡོད་ཀྱང་། དེ་རིང་ཁོང་གི་སྐུ་ཕུང་དེ་ཕྱིར་ང་ཚོར་རྩིས་སྤྲོད་རོགས་ཟེར་དགོས་ཐུག་པ་དེ་ཧ་ཅང་བློ་ཕམ་གྱི་གནས་ཚུལ་ཞིག་རེད། ཡིན་ན་ཡང་འཐབ་རྩོད་ཟེར་བ་དེར་སེམས་ཤུགས་ཆགས་རྒྱུ་ཡོད་པ་མ་རེད། ཅེས་སོགས་བརྗོད་སོང་།
གསར་འགོད་པ། འཇིགས་མེད་རྒྱ་མཚོ།
