དེ་རིང་ཨི་རན་དང་རྒྱལ་སྤྱིའི་སྟོབས་ཆེན་རྒྱལ་ཁབ་ཁག་གི་བར་ཨི་རན་གྱི་རྡུལ་མཚོན་བཟོ་སྐྲུན་སྔོན་འགོག་སྐོར་ལ་གྲོས་མཐུན་བཞག་ཡོད་འདུག
དེ་རིང་ཨོ་སི་ཊོ་ལི་ཡའི་རྒྱལ་ས་ཝེན་ཎཱ་ (Vienna) ནང་། འདས་པའི་ཉིན་ ༡༨ རིང་ཨི་རན་དང་འཛམ་གླིང་སྟོབས་ཆེན་རྒྱལ་ཁབ་ཨ་རི། དབྱིན་ཡུལ། རྒྱ་ནག ཧྥ་རན་སི། ཨུ་རུ་སུ། འཇར་མན་བཅས་ཀྱི་ཕྱི་སྲིད་བློན་ཆེན་བར་ཨི་རན་གྱི་རྡུལ་ཕྲན་མཚོན་ཆ་བཟོ་སྐྲུན་སྔོན་འགོག་ཐད་གྲོས་མོལ་བྱས་པ་བརྒྱུད། ཚོགས་ཐོག་ཏུ་དེ་སྔོན་མཉམ་འབྲེལ་རྒྱལ་ཚོགས་དང་ཨ་རི། ཡུ་རོབ་མཐུན་ཚོགས་བཅས་ཀྱིས་ཨི་རན་ལ་དཔལ་འབྱོར་ཉེས་ཆད་བཏང་བ་ཁག་ཆག་ཡང་གཏོང་རྒྱུ་དང་། མ་འོངས་པར་ཨི་རན་གྱིས་རྡུལ་ཕྲན་མཚོན་ཆ་བཟོ་སྐྲུན་མཚམས་འཇོག་དང་། ཨི་རན་གྱི་རྡུལ་ཕྲན་ཐོན་སྐྱེད་རིགས་ལ་རྒྱལ་སྤྱིའི་རྡུལ་ཕྲན་ཞིབ་དཔྱོད་ཚོགས་པ་ (IAEA) ཡིས་རྟོག་ཞིབ་བྱ་རྒྱུ་སོགས་ཀྱི་གྲོས་མཐུན་ཁག་ཅིག་བཞག་ཡོད་འདུག
ཉིན་རྒྱབ་ཡུ་རོབ་མཐུན་ཚོགས་ཀྱི་ཕྱི་སྲིད་འགན་འཛིན་ལྕམ་ཕེ་ཌི་རེ་ཁཱ་ (Federica Mogherini) མཆོག་གིས་གསར་འགོད་ལྷན་ཚོགས་ཐོག ད་ཐེངས་ཀྱི་ཐག་གཅོད་འདིས་རྒྱལ་སྤྱིའི་འབྲེལ་ལམ་གྱི་སློབ་མགོ་གསར་པ་ཞིག་ཕྱེ་ཐུབ་ཡོད་པ་མ་ཟད། རྒྱལ་ཁབ་ཕན་ཚུན་བར་གྱི་ལོ་བཅུ་ཕྲག་ཁ་ཤས་ཀྱི་དཀའ་རྙོག་དག་ལ་གདོང་ལེན་བྱས་ཏེ་འབྲེལ་ལམ་འཕེལ་རྒྱས་འགྲོ་བཞིན་ཡོད་པ་ར་འཕྲོད་བྱས་པ་རེད། ཅེས་དང་། ཨི་རན་གྱི་ཕྱི་སྲིད་བློན་ཆེན་ཇཱ་ཝ་ཌི་ཛཱ་རེབ་ (Mohammad Javad Zarif) ཀྱིས། གྲོས་མཐུན་འདི་ཡང་དག་ཅིག་མིན་ཡང་ལོ་རྒྱུས་ཀྱི་འགུལ་བསྐྱོད་ཆེན་པོ་ཞིག་ཆགས་ཡོད་སྟབས། མ་འོངས་པར་རྒྱལ་ཁབ་ཕན་ཚུན་བར་མཉམ་ལས་ཀྱི་ནུས་པ་གོང་འཕེལ་གཏོང་ཐུབ་པ་བྱས་ཏེ། ད་ལྟ་འཛམ་གླིང་རྒྱལ་ཁབ་ཁག་གིས་ཨི་རན་ལ་ངན་ཕྱོགས་ཀྱི་ལྟ་སྟངས་འཛིན་བཞིན་ཡོད་པ་དེར་བཟང་ཕྱོགས་ཀྱི་འགྱུར་བ་ཞིག་འཐོན་རྒྱུར་ཡིད་ཆེས་བྱེད་བཞིན་ཡོད་པ་མ་ཟད། ང་ཚོ་བར་གྱི་མཉམ་ལས་འབྲེལ་ལམ་སྔར་བས་ཡག་ཏུ་འགྲོ་རྒྱུའི་ཆོད་སེམས་བཅང་ཡོད། ད་ཐེངས་ཀྱི་གྲུབ་འབྲས་འདི་ནི་ང་ཚོ་ཚང་མས་དཀའ་ལས་བརྒྱབ་པ་ལས་བྱུང་བ་ཞིག་ཆགས་ཡོད། ཅེས་བརྗོད་འདུག
ནེའུ་ཡོག་དུས་བབ་དང་ (The Wall Street Journal) སོགས་ཀྱི་ཐོག་གནས་ཚུལ་ཐོན་པར། ༢༠༠༣ ལོར་ཡུ་རོབ་མཐུན་ཚོགས་ཀྱིས་ཨི་རན་དང་གྲོས་མོལ་བྱས་ཏེ། ཨི་རན་གྱིས་རྡུལ་ཕྲན་མཚོན་ཆ་བཟོ་ཆེད་ཡུ་རེ་ནི་ཡམ་བཅུད་སྦྱོར་མ་ལག་འཕྲུལ་འཁོར་ ༣༠༠༠ ཙམ་ཉུང་དུ་མ་བཏང་ཚེ། དཔལ་འབྱོར་ཉེས་ཆད་གཅོད་རྒྱུ་ཡིན་པའི་ཉེན་བརྡ་བཏང་ཡོད་སྟབས། ༢༠༠༥ ལོའི་བར་ཨི་རན་གཞུང་གིས་རྡུལ་ཕྲན་མཚོན་ཆ་བཟོ་རྒྱུ་མཚམས་འཇོག་བྱས་ཡོད་ཀྱང་། དེའི་རྗེས་སླར་ཡང་བཟོ་མགོ་བཙུགས་ཡོད། ༢༠༠༦ ནས་ ༢༠༡༢ ལོ་བར་མཉམ་འབྲེལ་རྒྱལ་ཚོགས་བདེ་འཇགས་ལྷན་ཚོགས་ཀྱི་ཚོགས་མིའི་རྒྱལ་ཁབ་ཁག་གིས་ཨི་རན་གཞུང་དང་གྲོས་མོལ་བྱས་ཏེ། རྡུལ་ཕྲན་མཚོན་ཆ་བཟོ་སྐྲུན་འགོག་ཐབས་བྱས་ཡོད་ཀྱང་མཇུག་འབྲས་གང་ཡང་ཐོན་མེད་སྟབས། ཨ་རི་དང་ཡུ་རོབ་མཐུན་ཚོགས་ཀྱིས་དཔལ་འབྱོར་ཉེས་ཆད་བཏང་ཡོད།
༢༠༡༣ ལོའི་ཟླ་ ༡༡ ནང་ཨ་རིའི་ཕྱི་སྲིད་དྲུང་ཆེ་ཇོན་ཁེ་རི་དང་ཨི་རན་གྱི་ཕྱི་སྲིད་བློན་ཆེན་ཇཱ་ཝ་ཌི་ཛཱ་རེབ་རྣམ་གཉིས་ཀྱིས་རྡུལ་ཕྲན་མཚོན་ཆའི་གནད་དོན་སྐོར་ལ་བར་བརྒལ་གྲོས་ཆོད་ཅིག་བཞག་སྟེ། ཨི་རན་གྱིས་རྡུལ་ཕྲན་མཚོན་ཆའི་རྒྱུ་ཆ་ཡུ་རེ་ནི་ཡམ་བརྒྱ་ཆ་ ༢༠ ཉུང་དུ་གཏོང་རྒྱུ་དང་། གསོག་འཇོག་བྱས་པའི་ཡུ་རེ་ནི་ཡམ་དག་རྩ་མེད་བཟོས་ཚེ། ཨ་རི་དང་རྒྱལ་སྤྱིའི་རྒྱལ་ཁབ་ཁག་གིས་ཨ་སྒོར་ས་ཡ་ ༧༠༠ ལྷག་གི་གུན་གསབ་སྤྲོད་རྒྱུ་དང་། ༢༠༡༤ ལོའི་ཟླ་༧ ནང་གནད་དོན་དེའི་ཐོག་ཁྱབ་རྒྱ་ཆེ་བའི་གྲོས་ཆོད་ཅིག་འཇོག་རྒྱུ་བྱས་ཡོད་ཀྱང་། གྲོས་ཆོད་དེ་ད་བར་འཇོག་ཐུབ་མེད་སྟབས། ༢༠༡༥ ལོའི་ཟླ་ ༤ ཚེས་ ༣ ཉིན་སུད་སིའི་གྲོང་ཁྱེར་ལུ་སན་ཎེ་ནང་དུ། ཨི་རན་དང་སྟོབས་ཆེན་རྒྱལ་ཁབ་ཁག་བར་རྡུལ་ཕྲན་སྔོན་འགོག་གི་སྒྲོམ་གཞི་ཞིག་གཏན་འབེབས་དང་འབྲེལ། ཟླ་སྔོན་མའི་ཚེས་ ༣༠ ཉིན་གྲོས་ཆོད་འཇོག་རྒྱུའི་ཐག་གཅོད་བྱས་ཡོད་སྟབས། ཟླ་སྔོན་མའི་ཟླ་མཇུག་ནས་ད་བར་ཕྱོགས་གཉིས་ཀྱི་ཕྱི་སྲིད་བློན་ཆེན་བར་ཨོ་སི་ཊོ་ལི་ཡའི་རྒྱལ་ས་ཝེན་ཎཱ་ (Vienna) ནང་འཛོམས་ནས་གྲོས་མོལ་བྱས་པ་བརྒྱུད། ཨི་རན་གཞུང་གིས་རྡུལ་ཕྲན་མཚོན་ཆ་བཟོ་སྐྲུན་མཚམས་འཇོག་བྱ་རྒྱུ་ཁས་ལེན་གྱི་གྲོས་མཐུན་ལ་མིང་རྟགས་བཀོད་ཡོད་ཅེས་སོགས་བཀོད་འདུག
རོའུ་ཌར་གསར་ལམ་སྟེང་ལྷན་ཚོགས་ནང་བཞུགས་མཁན་ནུབ་ཕྱོགས་རྒྱལ་ཁབ་ཀྱི་སྐུ་ཚབ་ཞིག་གིས། གྲོས་མཐུན་ནང་ཨི་རན་གཞུང་གིས་གྲོས་འཆམ་བྱུང་བའི་གྲོས་མཐུན་ལ་རྡོག་རོལ་གཏང་ཚེ། ཉིན་གྲངས་ ༦༥ ནང་ཚུད་དུ་དཔལ་འབྱོར་ཉེས་ཆད་ཁག་ཅིག་བསྐྱར་གསོ་བྱ་རྒྱུ་གཙོས། མཉམ་འབྲེལ་རྒྱལ་ཚོགས་ཀྱིས་ལོ་ ༥ རིང་ཨི་རན་གཞུང་གིས་རྒྱལ་ཁབ་གཞན་དང་མཚོན་ཆའི་ཚོང་ལས་བཀག་འགོག་དང་ལོ་ ༨ རིང་མེ་ཤུགས་འཕུར་མདའི་བཟོ་ལས་རིག་རྩལ་ཉོ་རྒྱུ་བཀག་སྡོམ་བྱ་རྒྱུ་སོགས་བཀོད་པ་རེད། ཅེས་དང་། རྒྱལ་སྤྱིའི་རྡུལ་ཕྲན་ཞིབ་དཔྱོད་ཚོགས་པའི་འགན་འཛིན་ཡུ་ཀེ་ཡཱ་ཨ་མཱ་ཎོ་ (Yukiya Amano) ཡིས། ངས་ཨི་རན་གཞུང་དང་ཨི་རན་གྱི་འདས་ད་མ་འོངས་བཅས་ཀྱི་རྡུལ་ཕྲན་མཚོན་ཆའི་གནད་དོན་གཙང་སེལ་ཐུབ་རྒྱུའི་གྲོས་མཐུན་འཇོག་ཐུབ་པ་དེ་ནི། རྒྱལ་ཁབ་ཕན་ཚུན་བར་གྱི་དོགས་སློང་སེལ་རྒྱུའི་གོམ་སྟབས་གལ་ཆེན་ཞིག་ཆགས་ཡོད། ཅེས་བརྗོད་འདུག
ཨི་རན་གྱི་སྲིད་འཛིན་ཧཱ་སན་ (Hassan Rouhani) མཆོག་གིས་སྤྱི་ཚོགས་དྲ་རྒྱ་ཀྲའུ་ཌར་བརྒྱུད་བརྗོད་དོན། གྲོས་མཐུན་འདིས་རྒྱལ་ཁབ་ཕན་ཚུན་བར་གྱི་འབྲེལ་ལམ་གྱི་སྒོ་མོ་གསར་པ་ཞིག་ཕྱེ་པ་མ་ཟད། མཉམ་ལས་ཀྱི་ནུས་སྟོབས་གོང་འཕེལ་བཏང་བ་ཞིག་ཀྱང་ཡིན་སྟབས། ང་ཚོས་མཐའ་གཅིག་ཏུ་མོས་མཐུན་བྱ་རྒྱུ་ཡིན། ཞེས་དང་། ཨ་རིའི་སྲིད་འཛིན་ཨོ་བྷ་མས། ཨི་རན་དང་གྲོས་འཆམ་བྱུང་བའི་ཁྱབ་རྒྱ་ཆེ་ཞིང་དུས་ཡུན་རིང་བའི་གྲོས་མཐུན་འདིས། ཨི་རན་གྱིས་རྡུལ་ཕྲན་མཚོན་ཆ་བདག་བཟུང་བྱ་རྒྱུར་ཚོད་འཛིན་བྱས་པ་ཞིག་ཆགས་ཡོད་སྟབས། མ་འོངས་པར་རྒྱལ་སྤྱིའི་བདེ་འཇགས་ལ་ཉེན་ཁ་ཉུང་དུ་འགྲོ་རྒྱུ་མ་ཟད། ཨི་རག་དང་རྒྱལ་སྤྱིའི་རྒྱལ་ཁབ་བར་གྱི་འབྲེལ་ལམ་ཡག་ཏུ་འགྲོ་རྒྱུ་རེད། ཅེས་བརྗོད་ཡོད་སྟབས། ཨི་ཛ་རལ་གྱི་ཕྱི་སྲིད་བློན་ཆེན་གཞོན་པ་ཌི་ཛི་པི་ (Tzipi Hotovely) ཡིས། གྲོས་མཐུན་འདི་ནི་ནུབ་ཕྱོགས་རྒྱལ་ཁབ་ཀྱིས་ཨི་རན་ལ་མགོ་བཏགས་ཞུས་པ་ཞིག་རང་ཡིན་སྟབས། མ་འོངས་པར་ཨི་ཛ་རལ་དང་རྒྱལ་སྤྱིའི་བདེ་འཇགས་ལ་ཉེན་ཁ་འཕྲད་རྒྱུ་ཡིན་པ་མ་ཟད། འདི་ནི་རང་མེད་མི་མེད་བཟོ་མཁན་གྱི་གྲོས་མཐུན་ཞིག་ཀྱང་ཆགས་ཡོད། ཅེས་སྐྱོན་བརྗོད་བྱས་འདུག
གསར་འགོད་པ། དོན་གྲུབ།
