དེ་རིང་དབུས་འོས་བསྡུ་ལྷན་ཁང་གིས་སྲིད་སྐྱོང་དང་སྤྱི་འཐུས་སྐབས་ ༡༦ པའི་འོས་བསྡུའི་བརྒྱུད་རིམ་ནང་འོས་གཞི་དང་ཕྱོགས་གཏོགས་པས་འོས་བསྡུའི་སྒྲིག་གཞི་དང་འགལ་འཛོལ་བྱུང་རིགས་དངོས་ར་འཕྲོད་བྱུང་ཚེ་ཉེས་ཆད་ཁག་ཅིག་འགེལ་རྒྱུ་ཡིན་པའི་གསལ་བསྒྲགས་གནང་སོང་།
དེ་རིང་སྔ་དྲོའི་ཆུ་ཚོད་ ༡༠ པ་ཐོག གངས་སྐྱིད་ལྷག་པ་ཚེ་རིང་དྲན་རྟེན་ཚོགས་ཁང་དུ། དབུས་འོས་བསྡུའི་སྤྱི་ཁྱབ་འགན་འཛིན་ཤོ་ཟུར་བསོད་ནམས་ཆོས་འཕེལ་མཆོག་གིས་དབུས་འོས་བསྡུའི་འགན་འཛིན་ལས་འཕར་དགེ་བཤེས་བསྟན་པ་བཀྲ་ཤིས་དང་། བསྟན་འཛིན་ཆོས་འཕེལ་སོགས་ལྷན་བཞུགས་ཐོག བཀའ་ཤག་སྐབས་བཅོ་ལྔ་པའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྐབས་བཅུ་དྲུག་པའི་བོད་མི་མང་སྤྱི་འཐུས་འོས་བསྡུའི་བརྒྱུད་རིམ་ནང་འོས་གཞིའམ་ཕྱོགས་གཏོགས་བྱེད་མི་གཙོས། སྐྱེ་བོ་སུ་རུང་དང་འོས་བསྡུའི་ལས་བྱེད། སྲིད་དོན་ཚོགས་པ་དང་ཚོགས་སྐྱིད་བཅས་ནས་བཙན་བྱོལ་བོད་མིའི་འོས་བསྡུའི་སྒྲིག་གཞི་དང་དེའི་ལམ་སྟོན་བཅས་ལ་འགལ་འཛོལ་བྱུང་ཚེ། སྒྲིག་གཞི་དོན་ཚན་ ༢༥ པའི་དགོངས་དོན་ལྟར་ཉེས་ཆད་ཁག་ཅིག་གཅོད་རྒྱུ་ཡིན་པའི་གསལ་བསྒྲགས་གནང་སོང་།
དབུས་འོས་བསྡུའི་སྤྱི་ཁྱབ་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་ཀྱིས་གསུངས་དོན། འོས་བསྡུའི་སྒྲིག་གཞིའི་དགོངས་དོན་ལག་ལེན་བསྟར་སྐབས་གནད་དོན་ཞིག་ལྷག་པ་དང་། དེར་འོས་བསྡུ་ལས་ཁང་གིས་བརྩད་ཞིབ་བྱས་ཏེ་ཉེས་ཆད་གཏོང་དགོས་པའི་བཀའ་ཕབ་པ་ཡིན་ན། སྐབས་འཕྲལ་མི་ལ་བལྟས་ནས་ཐག་གཅོད་བྱེད་པ་ལྟ་བུ་ཞིག་ཆགས་ཀྱི་ཡོད་སྟབས། གནད་དོན་དེ་ཚོ་གང་ཟག་གི་དབང་སྒྱུར་ནས་ཁྲིམས་ཀྱི་དབང་སྒྱུར་འོག་འགྲོ་རྒྱུར་དམིགས་ཏེ། འོས་བསྡུའི་སྒྲིག་གཞི་དོན་ཚན་ ༢༤ པའི་ནང་ཚན་དོན་ཚན་ ༩ ཙམ་ཞིག་ལུང་དྲངས་ཡོད་པ་མ་ཟད། དོན་ཚན་ ༢༥ ཡི་ནང་གསལ་ཉེས་ཆད་གཅོད་དགོས་པ་དེ་ཚོ་གཏན་འབེབས་གནང་ཡོད་སྟབས། ད་ཐེངས་ང་ཚོས་དོན་ཚན་ ༢༤ པའི་ནང་ཚན་དོན་ཚན་རེ་རེའི་ཐོག་ལ་འགལ་བ་དང་ནོར་བ་འཁྲུལ་བ་རིགས་བྱུང་ན། ཉེས་ཆད་འདི་འདྲ་ཡིན་ཟེར་བ་དང་། དེ་བཞིན། ཉེ་ཆར་དོན་ཚན་ ༩ པའི་ཆ་རྐྱེན་གྱི་འོག་ང་ཚོས་མང་ཚོགས་ལ་གང་ལ་གང་འཚམ་གྱི་ལམ་སྟོན་གཏན་འབེབས་ཞུས་ཡོད་སྟབས། དེ་ཚོར་འགལ་བ་ཡིན་ཡང་འགལ་བ་ལ་དཔག་པའི་ཉེས་ཆད་འདི་འདྲ་ཡིན་ཟེར་ནས་གཏན་འབེབས་བྱས་པ་དག་མ་གོ་མ་ཐོས་པ་མེད་པར་གསལ་བསྒྲགས་མཐིལ་ཕྱིན་ཡོང་ཆེད་གསར་འགོད་གསལ་བསྒྲགས་འདི་སྤེལ་བ་ཡིན། ཞེས་གསུངས་སོང་།
དེའི་རྗེས་ཁོང་གིས་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༤ པའི་ནང་གསེས་ཁག་དང་འགལ་འཛོལ་བྱུང་ཚེ་སྒྲིག་གཞི་དོན་ཚན་ ༢༥ ཡི་དགོངས་དོན་ཉེས་ཆད་གཏན་འབེབས་གང་ཡིན་སྒྲོག་སྦྱངས་གནང་བའི་ནང་། གཅིག འོས་གཞིའི་སྐྱེ་བོའམ་དེའི་ཕྱོགས་གཏོགས་བྱེད་མི། གཞན་ཡང་སྐྱེ་བོ་སུ་རུང་ནས་དངུལ་དངོས་སོགས་ལྐོག་རྔན་སྤྲོད་ལེན་ནམ། སྤྲོད་དོན་བྱེད་རྒྱུར་ཁས་ལེན་ཀྱིས་སྐྱེ་བོ་གང་ཞིག ཀ༽ འོས་གཞིར་འཛུལ་ཞུགས་བྱེད་དུ་འཇུག་པ་དང་། བྱེད་དུ་མི་འཇུག་པ། དེ་བཞིན་འོས་གཞིར་ཞུགས་པ་ནས་ཕྱིར་འཐེན་བྱེད་དུ་འཇུག་པ་དང་། བྱེད་དུ་མི་འཇུག་པ་བཅས་ལ་ཐབས་ཤེས་བརྒྱུད་སྐུལ་བྱེད་པ། ཁ༽ ཕྱོགས་མཚུངས་འོས་འཕེན་པ་ཞིག་ནས་འོས་ཤོག་འཕེན་དུ་འཇུག་པ་དང་། འཕེན་དུ་མི་འཇུག་པ་བཅས་ལ་ཐབས་ཤེས་བརྒྱུད་སྐུལ་བྱེད་པ་སོགས་ཀྱི་འགལ་འཛོལ་དངོས་ར་འཕྲོད་བྱུང་ཚེ། འགལ་ཚབས་ཆེ་བར་ངོས་འཛིན་གྱིས་འོས་གཞི་སྐྱེ་བོ་དེའི་འོས་ཤོག་ཆ་ཚང་རྩིས་མེད་ཐོག་ལོ་ ༡༠ རིང་གཞུང་འབྲེལ་འོས་གཞི་དང་འོས་འཕེན་ཐོབ་ཐང་འཕྲོག་རྒྱུ།
གཉིས། ཡང་ན་འོས་གཞིའམ་འོས་འཕེན་པ་ཞིག་ལ་དྲག་ཤུགས་ཀྱི་ཐོག་ནས་འཇིགས་སྣང་སྐུལ་བའམ། སྐྱེ་བོ་གང་དག་འོས་གཞིར་འཛུལ་འཐེན་བྱེད་པ་དང་། འོས་བསྡུ་བྱེད་དང་མི་བྱེད་པ་བཅས་འོས་བསྡུའི་རང་དབང་ལ་ཐེ་བྱུས་དང་འགལ་རྐྱེན་བྱེད་ཚེ། སྐྱེ་བོ་དེར་ལོ་ ༡༠ རིང་གཞུང་འབྲེལ་འོས་འཕེན་ཐོབ་ཐང་འཕྲོག་རྒྱུ། གསུམ། འོས་གཞིའི་སྐྱེ་བོ་གཞན་ཞིག་གམ། དེའི་ཕྱོགས་གཏོགས། གཞན་ཡང་སྐྱེ་བོ་སུ་རུང་ནས་སྐྱེ་བོ་གཞན་ཞིག་ལ་འོས་བསྡུའི་རྒྱལ་ཁ་མ་ཐོབ་པའི་བསམ་སྦྱོར་ངན་པས་ཀུན་ནས་བསླངས་ཏེ་གཞི་མེད་སྒྲོ་བཏགས་ཀྱིས་སྐྱོན་བརྗོད་དམའ་འབེབས་བྱེད་པ་དང་། ལུང་ཚན་དང་ཆོས་བརྒྱུད། སྤྱི་ཚོགས་བཅས་ཀྱི་དབར་དབྱེན་སྦྱོར་གྱིས་ཕན་ཚུན་འཁོན་འཁྲུག་འབྱུང་གཞིའི་རྐྱེན་སློང་བྱེད་ཚེ། འགལ་ཚབས་ཆེ་བར་ངོས་འཛིན་གྱིས་འོས་གཞིའི་སྐྱེ་བོ་དེའི་འོས་ཤོག་ཆ་ཚང་རྩིས་མེད་དང་། དེའི་ཕྱོགས་གཏོགས་དང་། གཞན་ཡང་སྐྱེ་བོ་སུ་རུང་དེར་ལོ་ ༡༠ རིང་གཞུང་འབྲེལ་སྡེ་ཚན་གང་དུ་ཡང་འོས་འཕེན་ཐོབ་ཐང་འཕྲོག་རྒྱུ།
བཞི། འོས་གཞིའམ་ཕྱོགས་གཏོགས་བྱེད་མི། གཞན་ཡང་སྐྱེ་བོ་སུ་རུང་ནས་འོས་བསྡུའི་ལས་དོན་ལ་ཕན་གནོད་འབྲེལ་བའི་རྒྱབ་སྐྱོར་རོགས་རམ་དགོས་པའི་འབོད་བསྐུལ་དང་། སྐྱབས་འཚོལ་བྱུང་རིགས་ལ་གཞུང་འབྲེལ་ལས་བྱེད་སྤྱི་དང་། ལྷག་པར་འོས་བསྡུའི་ལས་བྱ་སུ་ཐད་ནས་གོ་དབང་བེད་སྤྱོད་བྱེད་ཚེ། སྐབས་འཕྲལ་གནས་སྤོའི་རྒྱབ་གཉེར་དང་། འོས་བསྡུའི་ལས་འགན་ནས་གནས་དབྱུང་གཏོང་རྒྱུ། ལྔ། འོས་གཞི་སུ་ནས་འོས་བསྡུའི་ལས་དོན་སྐོར་མི་མང་བསྐོང་ཚོགས་ཀྱིས་དྲང་བདེན་མིན་པའི་གནས་ཚུལ་གསལ་བསྒྲགས་བྱེད་པ་དང་ཡིག་ཆ་འགྲེམས་སྤེལ་བྱེད་ཚེ། འོས་གཞི་མི་འགྲོ་དེའི་འོས་ཐོབ་ཆ་ཚང་རྩིས་མེད་གཏོང་རྒྱུ།
དྲུག དབུས་འོས་བསྡུ་ལས་ཁང་དང་། ས་གནས་འོས་བསྡུའི་ལས་བྱེད་ཡོངས་རྫོགས་ནས་འོས་བསྡུའི་གསང་རྒྱ་དགོས་རིགས་ཕྱི་གྲགས་མ་སོང་བར་གནས་པ་དང་། གནས་པའི་ཐབས་ལམ་བསྟེན་དགོས་པ་ལས་ཤེས་བཞིན་རང་ཉིད་ཀྱི་བློ་ཉེ་མཛའ་གྲོགས་དང་། རང་ཁོངས་ཆོལ་ཁ་ཆོས་བརྒྱུད་ཚོགས་པ་བཅས་ལ་ཕྱི་བསྒྲགས་བྱེད་པའམ་ཡིག་རིགས་ཁག་གང་བྱུང་སྣང་མེད་ཕྱི་གྱར་དུ་འགྲོ་གཞིའི་རིགས་བྱེད་ཚེ། འོས་བསྡུའི་ལས་འགན་ནས་གནས་དབྱུང་གཏོང་རྒྱུ།
བདུན། འོན་ཀྱང་འོས་བསྡུའི་སྒྲིག་སྲོལ་དང་མཐུན་པའི་ཐོབ་ཐང་ཁག་འགལ་མེད་བེད་སྤྱོད་ཀྱིས་མང་ཚོགས་འདུ་འཛོམས་སར་འོས་གཞི་རང་ཉིད་ནས་ཆབ་སྲིད་ཀྱི་ལྟ་བ་འཁྱེར་སྟངས་དང་། མི་མང་ལ་ལས་དོན་ཁས་ལེན་གྱི་གསལ་བསྒྲགས། ཡིག་ཆ་འགྲེམས་སྤེལ། འོས་གཞི་སོ་སོའི་ཆོལ་ཁ་དང་ཆོས་བརྒྱུད། ཚོགས་སྐྱིད་དང་སྤྱི་སྒེར་སུ་ཐད་ནས་རྒྱབ་གཉེར་གསལ་བསྒྲགས། སྐྱེ་བོ་གང་དག་སྤྱི་འཐུས་སུ་འོས་པའི་མི་འགྲོ་དམིགས་འཛུགས་ཀྱི་བསམ་འཆར་ཡིག་ངག་གཉིས་ཐོག་ནས་གསལ་བསྒྲགས་བྱེད་པ་བཅས་གོང་གསལ་དོན་ཚན་ཁག་གི་བརྗོད་དོན་དང་འབྲེལ་བའི་རིགས་ལ་ཁྲིམས་འགལ་དུ་ངོས་འཛིན་བྱ་རྒྱུ་མིན་རུང་། འོས་བསྡུའི་དུས་ཚེས་ཀྱི་ཉིན་གྲངས་གཉིས་གོང་ནས་འོས་བསྡུ་མ་ཟིན་བར་རྒྱབ་གཉེར་གསལ་བསྒྲགས་བྱེད་མཚམས་མ་བཞག་ཚེ། འོས་གཞིའི་སྐྱེ་བོ་དེར་ས་གནས་དེའི་འོས་ཐོབ་ཆ་ཚང་རྩིས་མེད་གཏོང་རྒྱུ་མ་ཟད། ཚོགས་སྐྱིད་གང་དེའི་འགན་འཛིན་དང་། སྐྱེ་བོ་སུ་རུང་དེར་ལོ་ལྔ་རིང་གཞུང་འབྲེལ་སྡེ་ཚན་གང་དུ་ཡང་འོས་འཕེན་ཐོབ་ཐང་འཕྲོག་རྒྱུ། བརྒྱད། འོས་བསྡུའི་ལས་རིམ་གསལ་བསྒྲགས་ཟིན་པའི་ཉིན་མོ་ནས་སྲིད་སྐྱོང་དང་། བཀའ་བློན། སྤྱི་འཐུས་བཅས་འབྲེལ་ཡོད་འོས་གཞིའི་ནང་ཞུགས་བློ་ཡོད་ཚེ། སྒྲིག་འཛུགས་དང་གཞུང་འབྲེལ་མིན་པའི་ཚོགས་པ་ཁག་གིས་འོས་བསྡུ་དང་འབྲེལ་བའི་བགྲོ་གླེང་ཚོགས་འདུ་གོ་སྒྲིག་བྱུང་རིགས་ལའང་གཞུང་འབྲེལ་གྱི་ངོ་བོར་ཚོགས་བཅར་མི་ཆོག་པ་མ་ཟད། བོད་མིའི་སྒྲིག་འཛུགས་ཀྱི་ལས་བྱེད་དང་། དངུལ་དངོས་གང་ཡང་བེད་སྤྱོད་མི་ཆོག གཞུང་འབྲེལ་ཕྱོགས་སྐྱོད་སྐབས་སུ་ཡང་འོས་བསྡུ་དང་འབྲེལ་བའི་གཏམ་བཤད་རིགས་ བྱེད་ཚེ། འོས་གཞི་དེར་ས་གནས་དེའི་འོས་ཐོབ་ཆ་ཚང་རྩིས་མེད་གཏོང་རྒྱུ།
དགུ། སྲིད་སྐྱོང་དང་སྤྱི་འཐུས་ཀྱི་འོས་བསྡུ་ནམ་ཡིན་ལ་དབུས་འོས་བསྡུ་ལས་ཁང་ནས་འོས་གཞིར་ཞུགས་མི་དང་། དེའི་རྒྱབ་སྐྱོར་བས་འོས་བསྡུ་དང་འབྲེལ་བའི་དྲིལ་བསྒྲགས་ཀྱི་འགྲོ་གྲོན་ཚད་གཞི་གཏན་འབེབས་དང་། རྩིས་ཁྲ་འབུལ་ཕྱོགས། དྲིལ་བསྒྲགས་བྱེད་ཕྱོགས་བཅས་ཀྱི་ལམ་སྟོན་ཁ་གསལ་བྱེད་དགོས་ཞེས་གསལ་བའི་འོག་དོན་ཚན་༩ ཅན་གཏན་འབེབས་གནང་བ་ཁག་ལ་འགལ་འཛོལ་བྱུང་རིགས་ཉེས་ཆད་ཁག་ནི། ཀ༽ སྲིད་སྐྱོང་དང་། སྤྱི་འཐུས་ཀྱི་འོས་གཞིར་ཞུགས་མི་དང་། དེའི་ཕྱོགས་གཏོགས་ཀྱིས་འོས་བསྡུའི་རྒྱལ་ཁ་ཐོབ་ཆེད་བཙན་བྱོལ་བོད་མིའི་སྤྱི་ཚོགས་ནང་དྲིལ་བསྒྲགས་བྱ་ཡུལ་གསར་ཤོག་ཁག་ནང་བསམ་ཚུལ་དཔར་འགྲེམས་བྱེད་རྒྱུ་དང་། སྦྱར་ཡིག་འདྲ་མིན་བཟོ་རྒྱུ། དེབ་ཆུང་དང་སྒྲ་འཛིན་འཁོར་ཐག་བཟོ་རྒྱུ། མི་མང་འདུ་འཛོམས་སྐབས་སོ་སོའི་བསམ་ཚུལ་གཏམ་བཤད་བྱ་རྒྱུ། དྲ་རྒྱ། སྤྱི་ཚོགས་དྲ་ལམ་སོགས་བརྒྱུད་གསལ་བསྒྲགས་སྤེལ་རྒྱུ་བཅས་འོས་གཞིར་ཞུགས་མི་སོ་སོའི་དྲིལ་བསྒྲགས་ཐོག་དངུལ་གྲོན་གཏོང་རྒྱུའི་གཏན་འབེབས་ཚད་གཞི་ནི། སྲིད་སྐྱོང་ལ་ཧིན་སྒོར་འབུམ་ ༨ དང་། སྤྱི་འཐུས་བྱེ་བྲག་པར་ཧིན་སྒོར་འབུམ་ ༣ ལས་མ་བརྒལ་བ་གཏོང་ཆོག་ཀྱང་། གཏན་འབེབས་དངུལ་འབོར་ཚད་གཞི་ལས་འགལ་བ་དང་། དངུལ་འབོར་ཁྲིམས་མཐུན་མ་ཡིན་པ་དངོས་ར་འཕྲོད་བྱུང་ཚེ། སྒོར་ཆིག་ཁྲི་དང་འོས་ཐོབ་གྲངས་ ༢༥ རེ་རྩིས་མེད་གཏོང་རྒྱུ། ཁྲིམས་མཐུན་མིན་ཚེ་འོས་ཐོབ་ཆ་ཚང་རྩིས་མེད་གཏོང་རྒྱུ། ཁ༽ གཞུང་འབྲེལ་ངོས་ལེན་ཡོད་པའི་ཚོགས་པ་ཁག་ཕུད་སྤྱི་སྒེར་སུ་ཐད་ནས་སྲིད་སྐྱོང་ངམ་སྤྱི་འཐུས་འོས་གཞིའི་སྐྱེ་བོ་དེའི་ཡིག་ཐོག་ཆོག་མཆན་མེད་པར་ས་གནས་གང་དུ་ཡང་རྒྱབ་གཉེར་གསལ་བསྒྲགས་དང་དེ་འབྲེལ་འགྲོ་སོང་གཏོང་མི་ཆོག ཆོག་མཆན་ཡོད་པའི་འགྲོ་སོང་ཁག་འོས་གཞིར་ཡོད་པའི་སྐྱེ་བོ་དེའི་འོས་བསྡུ་དང་འབྲེལ་བའི་འགྲོ་གྲོན་རྩིས་ཁྲའི་ཁོངས་སུ་བརྩི་དགོས། གལ་སྲིད་འགལ་འཛོལ་དངོས་ར་འཕྲོད་བྱུང་ཚེ། སྒྲིག་དོན་ལོ་ ༥ རིང་གཞུང་འབྲེལ་འོས་འཕེན་ཐོབ་ཐང་འཕྲོག་རྒྱུ་ཡིན་ཡང་། འགྲོ་གྲོན་མེད་པའི་རྒྱབ་གཉེར་གསལ་བསྒྲགས་རིགས་དོན་ཚན་འདི་དང་བསྟུན་མི་དགོས། ག༽ འོས་གཞིའི་སྐྱེ་བོ་སོ་སོའི་འོས་བསྡུའི་དྲིལ་བསྒྲགས་དང་འབྲེལ་བའི་བྱུང་སོང་རྩིས་ཁྲ་མཐའ་དག་དངོས་གཞིའི་འོས་བསྡུའི་གྲུབ་འབྲས་གསལ་བསྒྲགས་མ་ཟིན་གོང་འོས་མི་ཡོང་ཁུངས་སོ་སོའི་ས་གནས་འོས་བསྡུ་ལས་ཁང་དུ་ཆ་ལག་ཚང་བ་ཁམས་གཙང་དུས་ཐོག་མ་ཕུལ་བ་ཡིན་ན། འོས་གཞི་སྐྱེ་བོ་གང་དེའི་འོས་ཐོབ་ཀྱི་བརྒྱ་ཆ་ ༡༠ གཅོག་རྒྱུ། ང་།༽ སྲིད་སྐྱོང་དང་ཡང་ན་སྤྱི་འཐུས་སུ་འོས་པའི་མི་འགྲོ་དམིགས་འཛུགས་ཀྱིས་རྒྱབ་གཉེར་གསལ་བསྒྲགས་ཡིག་ཆ་དང་། ལྟེབ་ཤོག་འགྲེམས་སྤེལ། གྱང་སྦྱོར་པར་རིས་གསལ་བསྒྲགས་སོགས་ཀྱི་ནང་འགྲེམས་སྤེལ་དང་པར་སྐྲུན་བྱེད་མཁན་གཉིས་ཀྱི་མིང་བྱང་ངེས་གསལ་མ་སྤྲད་ཚེ། ལོ་ལྔ་རིང་གཞུང་འབྲེལ་སྡེ་ཚན་གང་དུ་ཡང་འོས་འཕེན་ཐོབ་ཐང་འཕྲོག་རྒྱུ། ཅ༽ འོས་གཞིར་ཞུགས་མཁན་སུ་ཐད་ནས་ཀྱང་སྐབས་དོན་སོ་སོར་འོས་བསྡུའི་རྒྱལ་ཁ་ཐོབ་ཆེད་དུ་དྲིལ་བསྒྲགས་ཡིག་ཆའི་ཐོག ༧གོང་ས་མཆོག་གི་སྐུ་པར་དང་། བོད་མིའི་སྒྲིག་འཛུགས་ཀྱི་ལས་རྟགས། དེ་བཞིན་མཚོན་རྟགས་ཚུལ་དུ་བོད་རྒྱལ་ཁབ་ཀྱི་རྒྱལ་དར་དང་བོད་ཀྱི་ས་བཀྲ་སོགས་གང་དུ་ཡང་བེད་སྤྱོད་བྱས་ཚེ། འོས་གཞི་སྐྱེ་བོ་དེའི་འོས་ཐོབ་ཀྱི་བརྒྱ་ཆ་ ༥ རྩིས་མེད་གཏོང་རྒྱུ།
ཆ༽ སྲིད་སྐྱོང་དང་། སྤྱི་འཐུས་ཀྱི་འོས་མིར་ཞུགས་མཁན་དང་། དེའི་ཕྱོགས་གཏོགས་རྒྱབ་སྐྱོར་བ་རྣམས་ནས་འོས་བསྡུ་དང་འབྲེལ་བའི་དྲིལ་བསྒྲགས་སྔོན་འགྲོ་དང་དངོས་གཞིའི་འོས་བསྡུ་ཆེན་མོ་གཉིས་ཀར་བྱ་འཐུས་ཀྱང་། འོས་བསྡུའི་སྒྲིག་གཞི་དོན་ཚན་ ༢༤ ཆ་ཚང་ཚུལ་བཞིན་ཐུགས་སྣང་གིས་ཉམས་ལེན་མ་འཛོལ་བར་སྒྲིག་སྲུང་དགོས། ལྷག་པར་དུ་ནང་གསེས་ ༧ པའི་ནང་༼འོས་བསྡུའི་དུས་ཚེས་ཀྱི་ཉིན་གྲངས་གཉིས་གོང་ནས་འོས་བསྡུ་མ་ཟིན་པར་རྒྱབ་གཉེར་གསལ་བསྒྲགས་བྱེད་མཚམས་འཇོག་དགོས། ༽ཞེས་གསལ་བ་ལྟར་དང་། འོས་བླུགས་པའི་ཉིན་མོ་དེར་འོས་འཕེན་པར་བརྒྱུད་སྐུལ་ཤོག་རྫར་འགྲེམས་སྤེལ་སོགས་དངོས་ཤུགས་བརྒྱུད་གསུམ་ཐོག་ནས་བྱས་ཚེ། དོན་ཚན་ ༢༤ ནང་གསེས་ ༧ ནང་གསལ་ཉེས་ཆད་དང་ལོ་ ༥ རིང་གཞུང་འབྲེལ་སྡེ་ཚན་གང་དུ་ཡང་འོས་འཕེན་ཐོབ་ཐང་འཕྲོག་རྒྱུ། ཇ༽ འོས་བསྡུ་དང་འབྲེལ་བའི་དྲིལ་བསྒྲགས་བྱེད་སྒོ་ཁག་གནས་ཡུལ་རྒྱལ་ཁབ་སོ་སོའི་ཡུལ་ཁྲིམས་དང་མ་འགལ་བ་བྱེད་དགོས་ཐོག ཆབ་སྲིད་ཀྱི་གནས་སྟངས་དཀའ་ངལ་ཅན་གྱི་ས་ཁུལ་ཁག་ཏུ་འོས་གཞིར་ཞུགས་མཁན་མི་འགྲོའི་འདྲ་པར་དང་གསལ་བསྒྲགས་ཡིག་ཆ་སོགས་སྦྱོར་འགྲེམས་བྱས་ཚེ། འོས་གཞི་དེར་ལོ་ ༥ རིང་འོས་གཞིར་ཞུགས་རྒྱུའི་ཐོབ་ཐང་དང་། གཞན་སྐྱེ་བོ་སུ་རུང་ལ་ལོ་ ༥ རིང་གཞུང་འབྲེལ་སྡེ་ཚན་གང་དུ་ཡང་འོས་འཕེན་ཐོབ་ཐང་འཕྲོག་རྒྱུ། ཉ༽ འོས་གཞིར་ཞུགས་མི་དང་། དེའི་ཕྱོགས་གཏོགས་རྒྱབ་སྐྱོར་བ་སུ་ཐད་ནས་འོས་བསྡུ་དང་འབྲེལ་བའི་དྲིལ་བསྒྲགས་སྤེལ་རྒྱུ་དང་། གསར་འགོད་གསལ་བསྒྲགས། དེ་བཞིན་གསལ་བསྒྲགས་ཡིག་འགྲེམས་སོགས་བྱ་དགོས་རིགས་ས་གནས་དེ་གའི་འོས་བསྡུ་ལས་ཁང་ལ་མཁྱེན་རྟོགས་སླད་སྙན་གསན་ཞུ་དགོས། དེ་ལྟའི་སྙན་གསན་མ་ཞུས་ཚེ། ས་གནས་འོས་བསྡུ་ལས་ཁང་ནས་དོ་བདག་དེའི་འོས་བསྡུ་དང་འབྲེལ་བའི་དྲིལ་བསྒྲགས་བཀག་འགོག་བྱ་རྒྱུ་བཅས་ཀྱི་ཉེས་ཆད་འགེལ་རྒྱུ་ཡིན། ཞེས་བཀོད་འདུག
མཇུག་ཏུ་གསར་འགོད་པས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་ལགས་སུ་འོས་བསྡུའི་སྒྲིག་གཞི་དོན་ཚན་ ༢༥ ནང་གསལ་བའི་འོས་བསྡུའི་ལས་དོན་ལ་འགལ་རྐྱེན་བྱེད་པོར་ཉེས་ཆད་ཅེས་པའི་འོག་གི་ ༼སྲིད་དོན་ཚོགས་པ༽ཟེར་བ་དེ་བཅའ་ཁྲིམས་ནང་གསལ་ཡོད་མེད་དང་། གལ་ཏེ་གསལ་མེད་ན་འདིར་སྣོན་འཇུག་གནང་དགོས་དོན་གང་ཡིན་དྲིས་པར་ཁོང་གིས། ད་ལྟའི་ཆར་ང་ཚོ་བོད་མིའི་སྒྲིག་འཛུགས་ནང་སྲིད་དོན་ཚོགས་པ་འདི་རེད་ཟེར་བ་དམིགས་བསལ་གང་ཡང་ཡོད་པ་མ་རེད། ཡིན་ཡང་མ་འོངས་པར་དེ་འདྲའི་རིགས་བྱུང་བ་ཡིན་ན། དེ་དང་བསྟུན་ནས་ལག་ལེན་བསྟར་དགོས་པའི་གནད་དོན་ཡོང་གི་ཡོད་པའི་རྒྱུ་མཚན་གྱི་ཐོག་ནས་དོན་ཚན་དེའི་ནང་བཅུག་པ་ཞིག་རེད་ལབ་ཀྱང་ཕལ་ཆེར་མ་འགྲིག་པ་གང་ཡང་ཡོད་མ་རེད་བསམ་གྱི་འདུག ཡིན་ཡང་ངས་སྐབས་དེའི་སྒྲིག་གཞིའི་རྒྱབ་ལྗོངས་འདི་རེད་ཅེས་ཐག་གཅོད་ནས་ཞུ་ཐུབ་ཀྱི་མེད་ཀྱང་། དགོངས་པ་བཞེས་ཕྱོགས་དེ་རང་ཡིན་པར་ངོས་འཛིན་ཞུ་བཞིན་ཡོད། ཅེས་གསུངས་བྱུང་།
གསར་འགོད་གསལ་བསྒྲགས་ནང་འོས་མི་གང་ཞིག་རྒྱལ་ཁབ་གཉིས་ཀྱི་མི་སེར་ཡིན་ཚེ་འོས་ནང་བཞུགས་ཆོག་དང་མི་ཆོག་སྐོར་ཅི་ཡང་གསུངས་མིན་འདུག ནམ་རྒྱུན་མི་མང་ལ་རྒྱལ་ཁབ་གཉིས་ཀྱི་མི་སེར་ཡོད་ཚེ་ཁྲིམས་འགལ་ཡིན་ཁྲིམས་ལུག་དུ་མ་ཞིག་དྲངས་ཀྱང་ང་ཚོའི་འོས་བསྡུའི་སྐབས་གསལ་ཁ་ཅི་ཡང་མེད་པ་དེ་གང་ཡིན་ནམ།
འོ་ད་ང་ཚོ་མང་གཙོའི་གོ་རྟོགས་ལེགས་པོ་ཞིག་སྤེལ་ནས་འོས་འཕེན་གནང་དགོས་པ་རེད། དེ་མིན་ས་གནས་ཀྱི་སྐྱིད་སྡུག་འགོ་པ་ཁག་ཞིག་གི་རྒྱ་མིའི་རྒྱུག་ཁྱི་གཅིག་འོས་སྦྱོར་བྱས་དེ་ལ་ཤེས་ཚད་ཀྱི་གོ་རྟོགས་དམན་པས་མི་མང་གི་ལམ་སེང་འོས་འཕེན་ན་ཧ་ཅང་ཉེན་ཁའི་རང་བཞིན་རེད་ལ། གྲོད་པ་ནང་ལ་གཏད་ནས་སྙིང་དོན་ཕྱི་ལ་སྒྲུབ་མཁན་ཞིག་་ཡོང་གི་རེད། དེ་ཚོར་ལྷ་སྲུང་གིས་དཀའ་ཆད་ག་ལེར་གནང་གི་ཡོད་ཀྱང་ཁོས་ཡན་ལག་འཕེལ་ན་འགྲིག་ལེ་མ་རེད། བོད་མི་ཡོད་དོ་ཅོག་ནས་དོ་སྣང་དགོས་པ་འདུག་།།།