ཞི་ཅིན་ཕིན་གྱི་སྐོར་སྐྱོད་རྩིས་མེད་གཏོང་རོཊ།

ཕོ་བྲང་དཀར་པོའི་སྙན་ཞུ་དྲ་བ་བརྒྱུད་ཞི་ཅིན་ཕིན་གྱི་ཨ་རིའི་ནང་གི་རྒྱལ་དོན་སྐོར་སྐྱོད་རྩིས་མེད་གཏོང་དགོས་པའི་འབོད་སྐུལ་བྱེད་བཞིན་འདུག

རྒྱ་ནག་གི་སྲིད་འཛིན་ཞི་ཅིན་ཕིན་འདི་ལོའི་ཕྱི་ཟླ་ ༩ པའི་ནང་ཨ་རིར་རྒྱལ་དོན་སྐོར་སྐྱོད་དུ་འགྲོ་འཆར་ཡོད་པ་ལྟར། འགྲོ་བ་མིའི་ཐོབ་ཐང་དོན་གཉེར་བ་ཚོས་སྣེ་ཁྲིད་དེ་ཕོ་བྲང་དཀར་པོའི་སྙན་ཞུ་དྲ་བའི་ཐོག འདས་པའི་ཉིན་ཤས་ནང་རྒྱ་ནག་གཞུང་གིས་འགྲོ་བ་མིའི་ཐོབ་ཐང་གི་ཁྲིམས་རྩོད་པ་དང་སྤྱི་མང་ཐོབ་ཐང་དོན་གཉེར་བ་ ༡༠༠ ལྷག་བཀག་ཉར་དང་འདྲི་གཅོད། དེ་བཞིན་གར་སོང་ཆ་མེད་བཟོས་ཡོད་པར་བརྟེན། ཨ་རིའི་སྲིད་འཛིན་ཨོ་བྷ་མ་མཆོག་དང་ཨ་རིའི་གཞུང་གིས་འགྲོ་བ་མིའི་ཐོབ་ཐང་ལ་བརྩི་མཐོང་བྱས་ཏེ། སྲིད་འཛིན་ཞི་ཅིན་ཕིན་གྱིས་ཨ་རིའི་ནང་སྐོར་སྐྱོད་བྱ་རྒྱུ་རྩིས་མེད་གཏོང་དགོས་པའི་འབོད་སྐུལ་གྱི་སྙན་ཞུ་ཕུལ་ཏེ་མཚན་རྟགས་བསྡུ་རུབ་བྱེད་བཞིན་འདུག

འབོད་སྐུལ་སྙན་ཞུ་དེའི་ནང་། ཞི་ཅིན་ཕིན་གྱིས་སྲིད་འཛིན་གྱི་ལས་འགན་འཁུར་ནས་ད་ལྟའི་བར་དུ། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་མ་ཟད། ཉུང་མཐར་སྲིད་གཞུང་གི་ལངས་ཕྱོགས་དང་མི་མཐུན་པའི་ལྟ་བ་འཛིན་མཁན་ ༡༠༠༠ ལྷག་བཀག་ཉར་བྱས་ཡོད་སྟབས། ང་ཚོས་སྲིད་འཛིན་ཨོ་བྷ་མ་མཆོག་དང་ཨ་རིའི་གཞུང་གིས། འཕྲལ་དུ་རྒྱ་ནག་ནང་བྱུང་བའི་འགྲོ་བ་མིའི་ཐོབ་ཐང་གི་ཁྲིམས་རྩོད་པ་མང་པོ་ཁྲིམས་འགལ་གྱིས་འཛིན་བཟུང་བྱས་པའི་མི་ཆོས་རིང་ལུགས་ཀྱི་གནོད་འཚེ་འདི་ལ་ཐུགས་ཁུར་གནང་དགོས་པའི་འབོད་སྐུལ་བྱེད་བཞིན་ཡོད་ལ། མི་ཆོས་རིང་ལུགས་ཀྱི་ཐོག་ནས་འཕྲལ་དུ་ཕན་ནུས་ལྡན་པའི་སྔོན་འགོག་བྱེད་ཐབས་དགོས་པ་མ་ཟད། འདི་ལོའི་ཕྱི་ཟླ་ ༩ པའི་ནང་རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་ཨ་རིའི་ནང་རྒྱལ་དོན་སྐོར་སྐྱོད་བྱ་འཆར་ཡོད་པ་དེ་རྩིས་མེད་གཏོང་དགོས། ཛ་དྲག་གི་གནས་སྟངས་མཇུག་མ་བསྡུས་བར་དུ་གཞུང་འབྲེལ་གྱིས་རྒྱ་ནག་གཞུང་དང་འབྲེལ་འདྲིས་བྱ་རྒྱུ་མཚམས་འཇོག་གནང་དགོས། ཞེས་བཀོད་འདུག

གནས་ཚུལ་ཐད་སྤྱི་མང་ནུས་ཤུགས་ཡར་སྐུལ་ཚོགས་པའི་འགན་འཛིན་རྒྱ་རིགས་འབུམ་རམས་པ་ཡཱང་ཅན་ལི་ལགས་ཀྱིས། ད་རེས་ཨ་རིའི་གཞུང་ལ་ཞི་ཅིན་ཕིན་གྱི་སྐོར་སྐྱོད་རྩིས་མེད་གཏོང་དགོས་པའི་འབོད་སྐུལ་བྱས་པ་དེ་དོན་འཁྱོལ་ཡོང་རྒྱུ་ཁག་པོ་ཡིན་ཡང་། ལས་འགུལ་འདི་འདྲ་སྤེལ་རྒྱུ་ཧ་ཅང་གལ་ཆེན་པོ་རེད། གང་ཡིན་ཟེར་ན། རེ་སྐུལ་གྱི་གྲངས་འབོར་མང་པོས་བསམ་བློ་དང་བསམ་གཞིག་གི་ལམ་ཀ་བརྒྱུད་བསྒྲགས་བྱས་ཏེ། རྒྱལ་སྤྱིའི་སྤྱི་ཚོགས་ཀྱིས་རྒྱ་གཞུང་གིས་འགྲོ་བ་མིའི་ཐོབ་ཐང་གི་ཁྲིམས་རྩོད་པ་དང་། སྤྱི་མང་གི་ཐོབ་ཐང་དོན་གཉེར་བ་རྣམས་ལ་བཙན་གནོན་བྱེད་བཞིན་པའི་བྱ་སྤྱོད་ཤེས་རྟོགས་བྱུང་དུ་འཇུག་ཐུབ་པས། རྒྱལ་སྤྱིའི་སྤྱི་ཚོགས་ཀྱིས་རྒྱ་གཞུང་གི་བྱེད་སྟངས་དེར་དང་ལེན་བྱེད་ངེས་མ་རེད། ཨ་རིའི་གཞུང་གིས་འབོད་སྐུལ་འདི་དང་ལེན་གནང་དང་མ་གནང་གང་ཡིན་ཡང་ཧ་ཅང་གལ་ཆེ་ཞིང་དོན་སྙིང་ཆེན་པོ་ལྡན་ཡོད་པ་རེད། ཅེས་བརྗོད་འདུག

ཁ་སང་རྒྱ་ནག་ཀང་ཀྲུའུ་རུ་ཡོད་པའི་རང་དབང་རྩོམ་པ་པོ་ཡེ་ཏུའུ་ལགས་ཀྱིས། ཉེ་བའི་ཉིན་ཤས་ཀྱི་ནང་རྒྱ་ནག་གཞུང་གིས་འགྲོ་བ་མིའི་ཐོབ་ཐང་གི་ཁྲིམས་རྩོད་པ་ཚོར་བཙན་གནོན་བྱེད་བཞིན་པ་དེས་ཤུགས་རྐྱེན་ཆེན་པོ་བཟོ་ཡི་ཡོད་ལ། གནས་ཚུལ་དེ་ཝེ་པའོ་དང་སྐད་འཕྲིན་ཐོག་བརྒྱུད་བསྒྲགས་ཤུགས་ཆེན་པོ་སོང་ཡོད་པ་རེད། རྒྱ་ནག་གཞུང་གི་བཙན་གནོན་གྱི་ལས་འགུལ་ད་ལྟའང་ལྷོད་འཇགས་སུ་ཕྱིན་མེད་པར་དེ་རིང་ཡང་ཀང་ཀྲུའུ་རུ་མི་རེ་འགའ་འབོད་འགུག་བྱེད་ཀྱི་འདུག གྲོགས་པོ་མང་པོས་སྐད་འཕྲིན་ནང་དུ་ཞི་ཅིན་ཕིན་གྱི་སྐོར་སྐྱོད་རྩིས་མེད་གཏོང་དགོས་པའི་འབོད་སྐུལ་དེ་བརྒྱུད་བསྒྲགས་བྱེད་ཀྱི་འདུག ཅེས་བརྗོད་འདུག

ཕོ་བྲང་དཀར་པོའི་སྙན་ཞུ་དྲ་བའི་ https://petitions.whitehouse.gov/petitions ཐོག་གི་སྙན་ཞུ་དེར། ཁ་སང་ཕྱི་ཚེས་ ༡༤ ཉིན་གྱི་ཕྱི་དྲོའི་བར་དུ་མི་གྲངས་ ༡༧༦༠ ལྷག་གིས་རྒྱབ་སྐྱོར་གྱི་མཚན་རྟགས་བརྒྱབ་ཡོད་པ་དང་། མཚན་རྟགས་བསྡུ་རུབ་དེ་འདི་ལོའི་ཕྱི་ཟླ་ ༨ ཚེས་ ༡༠ ཉིན་བར་དུ་སྤེལ་རྒྱུ་ཡིན་ལ། གལ་སྲིད་འབོད་སྐུལ་བའི་གྲངས་འབོར་ཁྲི་ ༡༠ ལས་བརྒལ་བ་ཡིན་ན། ཨ་རིའི་གཞུང་གིས་དངོས་སུ་གཟིགས་ཞིབ་གནང་སྟེ་ཞི་ཅིན་ཕིན་གྱི་སྐོར་སྐྱོད་དེ་རྩིས་མེད་གཏོང་རྒྱུ་ཡིན་མིན་ཐད་བརྡ་ལན་གནང་རྒྱུ་ཡིན་འདུག

གསར་འགོད་པ། པདྨ་མཚོ།