དཔའ་བོར་བསྔོ་སྨོན་མཆོད་འབུལ།

དྷ་ས་གཙུག་ལག་ཁང་དུ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་དང་རང་ལུས་མེར་བསྲེགས་གནང་མཁན་གྲྭ་བསོད་ནམས་སྟོབས་རྒྱལ་རྣམ་གཉིས་ལ་གཞུང་འབྲེལ་བསྔོ་སྨོན་མཆོད་འབུལ་གནང་སོང་།   

དེ་རིང་ཉིན་རྒྱབ་ཆུ་ཚོད་ ༤།༠༠ སྟེང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཆོས་རིགས་ལས་ཁུངས་ཀྱི་གོ་སྒྲིག་འོག བཀའ་ཟུར་ཀིརྟི་རིན་པོ་ཆེ་མཆོག་དབུ་བཞུགས་ཐོག་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་བོད་མིའི་སྒྲིག་འཛུགས་ཀྱི་སྲིད་ཞུ་ལས་བྱེད་པ་རྣམས། དེ་བཞིན། དྷ་རམ་ས་ལ་ཁུལ་གྱི་གྲྭ་བཙུན་སྔགས་གསུམ་དང་སེར་སྐྱ་མི་མང་བརྒྱ་ཕྲག་ལྷག་འདུ་འཛོམས་གནང་སྟེ། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་ནག་གི་བཙོན་ཁང་དུ་སྐུ་མྱ་ངན་ལས་འདས་པ་དང་། ཉེ་ཆར་ཁམས་ཡུལ་ཤུལ་སྐྱེ་རྒུ་མདོར་དགེ་འདུན་པ་བསོད་ནམས་སྟོབས་རྒྱལ་ལགས་ཀྱིས་བོད་མི་རིགས་ཀྱི་ཆེད་དུ་རང་ལུས་མེ་བསྲེགས་གནང་སྟེ་སྐུ་གྲོངས་པ་བཅས་ལ་བསྔོ་སྨོན་མཆོད་འབུལ་ཞིག་གནང་སོང་།

མཆོད་འབུལ་ཐོག་སྲིད་ཚབ་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་གསུངས་དོན། དེ་རིང་གི་མཆོད་འབུལ་སྨོན་ལམ་འདི་ནི་ཤིན་ཏུ་ཡིད་སྐྱོ་བའི་གནས་སྟངས་གཉིས་ཀྱི་ཐོག་ལ་བྱུང་ཡོད་པ་དང་། གཅིག་དེ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་ནག་གི་བཙོན་ཁང་ནས་སྐུ་གཤེགས་པ་དང་། དེ་ནས་གྲྭ་བསོད་ནམས་སྟོབས་རྒྱལ་ལགས་ཀྱིས་སྐུ་ལུས་མེ་བསྲེགས་གནང་སྟེ་སྐུ་གྲོངས་ཡོད་སྟབས། བོད་ཀྱི་དཔའ་བོ་གཉིས་མེད་པ་ཆགས་པའི་ཡིད་སྐྱོ་བའི་གནས་སྟངས་ཤིག་གི་སྟེང་བོད་མིའི་སྒྲིག་འཛུགས་ཆོས་རིགས་ལས་ཁུངས་ཀྱིས་མཆོད་འབུལ་སྨོན་ལམ་གནང་གི་ཡོད། ཅེས་གསུངས་སོང་།

ཁོང་གིས་མུ་མཐུད་དུ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་མཛད་རྗེས་དང་སྐུ་ལས་བསྐྱོན་པའི་ལོ་རྒྱུས་དང་། གྲྭ་བསོད་ནམས་སྟོབས་རྒྱལ་ལགས་ག་དུས་གྲོངས་པའི་གནས་ཚུལ་སོགས་མདོར་བསྡུས་རེ་གསུངས་རྗེས། ང་ཚོས་དུས་ནམ་ཡང་དཔའ་བོ་ཁོང་རྣམས་ཀྱི་མཛད་རྗེས་དང་སྙིང་སྟོབས་ལ་རྗེས་དྲན་བྱ་དགོས་པ་དང་། ད་ལྟའི་བར་རང་ལུས་མེ་བསྲེགས་གནང་མཁན་གྱི་དཔའ་བོ་དཔའ་མོ་ ༡༤༡ ཙམ་བྱུང་ཡོད་པའི་ནང་ནས་མི་ ༡༢༡ འདས་གྲོངས་སུ་སོང་པ་ཡོངས་རྫོགས་ལ་མྱ་ངན་དང་གུས་འདུད་ཞུ་བཞིན་ཡོད། ཅེས་སོགས་གསུངས་སོང་།