རྒྱ་ནག་གི་དཔལ་འབྱོར་ཉམས་རྒུད།

ཁ་སང་རྒྱ་ནག་དབུས་དངུལ་ཁང་གིས་མི་མང་ཤོག་སྒོར་དང་ཨ་རིའི་ཌོ་ལར་བརྗེ་ཚོང་གི་འཛའ་ཐང་ཐད་རྒྱ་སྒོར་གཅིག་དང་སྒོར་ཟུར་ ༩ གཅོག་ཆ་བྱས་ཏེ་དཔལ་འབྱོར་ཉམས་རྒུད་སྐྱོབ་ཐབས་བྱས་ཡོད་འདུག

ཁ་སང་རྒྱ་ནག་དབུས་དངུལ་ཁང་གིས་མི་མང་ཤོག་སྒོར་དང་ཨ་རིའི་ཌོ་ལར་བརྗེ་ཚོང་གི་འཛའ་ཐང་ཐད་རྒྱ་སྒོར་གཅིག་དང་སྒོར་ཟུར་ ༩ གཅོག་ཆ་བྱ་རྒྱུ་ཡིན་པ་གསལ་བསྒྲགས་བྱས་ཡོད་ཅིང་། དེ་ནི་རྒྱལ་སྤྱིའི་དངུལ་རྩའི་ཁྲོམ་རྭའི་ནང་རྒྱ་ནག་གི་མི་མང་ཤོག་སྒོར་གྱི་འཛའ་ཐང་ཉིན་གཅིག་གི་ནང་བརྒྱ་ཆ་ ༡.༨༦ མར་ཆག་སྟེ། ལོ་གསུམ་གྱི་རྗེས་སུ་དམའ་ཤོས་ཆགས་ཡོད་སྟབས་གཅོག་ཆ་བྱས་པ་ཞིག་ཡིན་འདུག

ཡཱ་ཧོ་གསར་ལམ་ཐོག་རྒྱ་ནག་དབུས་དངུལ་ཁང་གིས། ང་ཚོས་མི་མང་ཤོག་སྒོར་གྱི་འཛའ་ཐང་མར་བཅག་པ་དེ་ནི། རྒྱལ་སྤྱིའི་ཁྲོམ་རྭའི་གནས་སྟངས་དང་མཐུན་པའི་བཅོས་སྒྱུར་བྱས་པ་ཞིག་ཡིན་པ་མ་ཟད། ད་དུང་མ་འོངས་པའང་འཛའ་ཐང་ཆག་སྲིད་པ་ཞིག་ཡིན་སྟབས། དེའི་ཤུགས་རྐྱེན་གྱིས་རྒྱལ་སྤྱིའི་ཁྲོམ་རྭའི་ནང་རྒྱ་ནག་གི་ཕྱིར་ཚོང་འཕེལ་རྒྱས་བྱུང་སྟེ། ད་ལྟ་དཔལ་འབྱོར་འཕེལ་ཚད་ཇེ་དལ་དུ་ཕྱིན་པ་དག་བསྐྱར་གསོ་ཐུབ་ཀྱི་རེད། ཅེས་བརྗོད་འདུག

ཨ་རིའི་སྙན་གྲགས་ཅན་གྱི་གསར་འགྱུར་བརྒྱུད་ལམ་བྷུ་ལུམ་བྷག་ཐོག རྒྱ་ནག་གི་དཔལ་འབྱོར་རིག་པ་བ་གྲགས་ཅན་ལེའུ་ལི་ཀང་ (Liu Li-Gang) གིས། དེ་རིང་རྒྱ་ནག་གཞུང་གིས་གློ་བུར་དུ་ཐག་གཅོད་འདི་འདྲ་ཞིག་བྱས་པ་དེ་ནི། ཟླ་སྔོན་མའི་ནང་རྒྱ་ནག་གི་ཕྱིར་ཚོང་ཉམས་རྒུད་ཤུགས་ཆེ་ཕྱིན་ཏེ་དཔལ་འབྱོར་འཕེལ་རྒྱས་ལ་དོ་ཕོག་བྱུང་ཡོད་པ་མ་ཟད། རྒྱལ་སྤྱིའི་དངུལ་རྩའི་ཁྲོམ་རྭའི་ནང་རྒྱ་སྒོར་གྱི་འཛའ་ཐང་ཤུགས་ཆེ་ཆག་ཡོད་སྟབས། ཐག་གཅོད་འདི་འདྲ་ཞིག་མ་བྱེད་ཀ་མེད་ཆགས་པ་རེད། ཅེས་དང་།

ཡང་སིང་གྷ་པུར་བཟོ་ཚོང་དངུལ་ཁང་གི་དཔལ་འབྱོར་རིག་པ་བ་ཀྲུའུ་ཧོ་ (Zhou Hao) ཡིས། དཔལ་འབྱོར་དབྱེ་ཞིབ་པ་ཁ་ཤས་ཀྱིས་རྒྱ་ནག་གཞུང་གིས་དཔལ་འབྱོར་སྙོམ་སྒྲིག་བྱ་ཆེད་མི་མང་ཤོག་སྒོར་གྱི་འཛའ་ཐང་བཅག་པ་ཡིན་ཚུལ་གླེང་སློང་བྱེད་ཀྱིན་ཡོད་ཀྱང་། ངས་བལྟས་ན་རྒྱ་ནག་གཞུང་གིས་མ་འོངས་པར་རྒྱལ་སྤྱིའི་ཁྲོམ་རྭའི་ནང་ཁོ་ཚོའི་ཚོང་ཟོག་འགྲེམས་ཚོང་བྱེད་ཤུགས་ཆེ་རུ་གཏོང་ཆེད་ཐག་གཅོད་འདི་བྱས་པ་རེད་བསམ་གྱི་འདུག ཅེས་བརྗོད་འདུག

དེ་རིང་རོའུ་ཌར་གསར་ལམ་དང་དབྱིན་ཡུལ་གྱི་གྷར་ཌིན་གྱིས། ཕྱི་ལོ་ ༢༠༡༠ ལོ་ནས་བཟུང་རྒྱ་ནག་གི་དཔལ་འབྱོར་འཕེལ་རྒྱས་ཤུགས་ཆེ་ཕྱིན་ཏེ། ལོ་རེར་ཆ་སྙོམ་ཡོང་འབབ་བརྒྱ་ཆ་ ༨ ལྷག་འཕར་སྣོན་བྱུང་ནས་རྒྱལ་སྤྱིའི་ཐོག་དཔལ་འབྱོར་སྟོབས་ཆེ་ཤོས་གཉིས་པ་ཆགས་ཡོད་ཀྱང་། འདས་ལོ་ནས་བཟུང་རྒྱལ་སྤྱིའི་ཁྲོམ་རྭའི་ནང་རྒྱ་ནག་གི་ཕྱིར་ཚོང་བྱེད་ཚད་ཉུང་དུ་ཕྱིན་ནས་དཔལ་འབྱོར་འཕེལ་རྒྱས་ཇེ་དལ་དུ་ཕྱིན་ཡོད་པ་མ་ཟད། ཟླ་སྔོན་མའི་ནང་རྒྱ་ནག་གི་མ་རྐང་ཁྲོམ་རྭ་ཟགས་ནས་རྒྱ་ནག་དབུས་གཞུང་དངུལ་ཁང་གིས་མ་དངུལ་ཕོན་ཆེ་གཏོང་དགོས་ཁེལ་ཡོད། དེ་བཞིན་བདུན་ཕྲག་སྔོན་མའི་གཟའ་མཇུག་ཏུ་རྒྱ་ནག་གི་ཕྱིར་ཚོང་བྱེད་ཤུགས་ལོ་སྔོན་མ་དང་བསྡུར་ན་བརྒྱ་ཆ་ ༨།༣ མར་ཆག་སྟེ། ལོ་དྲུག་ནང་ཐབས་སྐྱོ་ཤོས་ཀྱི་གནས་སུ་གྱར་ཡོད་པ་མ་ཟད། རྒྱལ་སྤྱིའི་དངུལ་རྩའི་ཁྲོམ་རྭའི་ནང་མི་མང་ཤོག་སྒོར་གྱི་འཛའ་ཐང་ཡང་ཉིན་རེ་བཞིན་ཆག་གི་ཡོད་སྟབས། ཟླ་འདིའི་ཚེས་ ༡༡ ཉིན་རྒྱ་ནག་གཞུང་གིས་མི་མང་ཤོག་སྒོར་གྱི་འཛའ་ཐང་ཐད་སྒོར་གཅིག་དང་སྒོར་ཟུར་ ༩ མར་བཅག་སྟེ། དཔལ་འབྱོར་ཉམས་རྒུད་ཀྱི་གནས་སྟངས་སྐྱོབ་ཐབས་བྱས་ཡོད་ཀྱང་། དེ་རིང་སླར་ཡང་རྒྱལ་སྤྱིའི་དངུལ་རྩའི་ཁྲོམ་རྭའི་ནང་མི་མང་ཤོག་སྒོར་གྱི་འཛའ་ཐང་སྒོར་གཅིག་དང་སྒོར་ཟུར་ ༦ མར་ཆག་ཡོད་སྟབས། མ་འོངས་པར་རྒྱལ་སྤྱིའི་དཔལ་འབྱོར་འཕེལ་རྒྱས་ལ་དོ་ཕོག་འགྲོ་རྒྱུ་དང་། ལྷག་པར་དུ་ཨ་རིའི་ཚོང་ཟོག་གི་ཕྱིར་ཚོང་རིན་གོང་མཐོ་རུ་ཕྱིན་ཏེ། མ་འོངས་པར་ཨ་རིའི་དཔལ་འབྱོར་འཕེལ་རྒྱས་ལའང་གྱོང་རག་རྒྱུ་རེད་ཅེས་བཀོད་འདུག

དཔལ་འབྱོར་དབྱེ་ཞིབ་པ་ཁག་ཅིག་གིས། དེ་སྔོན་རྒྱ་ནག་གཞུང་གིས་ཨ་རི་གཙོས་རྒྱལ་སྤྱིའི་རྒྱལ་ཁབ་ཁག་གིས་མི་མང་ཤོག་སྒོར་གྱི་འཛའ་ཐང་ཁྲོམ་རྭའི་ཚད་གཞི་དང་མི་མཐུན་པར་ཚད་མཐོ་པོ་ཉར་ཡོད་སྟབས། རྒྱ་ནག་གི་ཚོང་ཟོག་ཁག་ཨ་རི་གཙོས་ནུབ་ཕྱོགས་རྒྱལ་ཁབ་ཁག་ཏུ་རིན་གོང་དམའ་པོ་བྱས་ནས་ཕྱིར་ཚོང་བྱེད་ཐུབ་པ་མ་ཟད། ཨ་རིའི་བཟོ་ཚོང་ཁག་ལ་ཁེ་བཟང་འདྲ་མཉམ་མེད་པའི་དཀའ་ངལ་བཟོས་ནས་ཨ་རྒྱ་གཉིས་ཀྱི་འབྲེལ་ལམ་སྡུག་ཏུ་ཕྱིན་ཡོད་སྟབས། འདི་ལོའི་ཟླ་ ༩ པའི་ནང་རྒྱ་ནག་གི་སྲིད་འཛིན་ཞི་ཅིན་ཕིན་ཨ་རིར་རྒྱལ་དོན་སྐོར་སྐྱོད་བྱ་རྒྱུ་ཡིན་པ་དང་བསྟུན་ཏེ། ད་ཐེངས་རྒྱ་ནག་གཞུང་གིས་མི་མང་ཤོག་སྒོར་གྱི་འཛའ་ཐང་བཅག་པ་རེད་ཅེས་དང་། ཡང་བྷི་བྷི་སི་གསར་ལམ་ཐོག་ཨ་རིའི་ནོར་དོན་ལྷན་ཁང་གིས། ད་ལྟ་ང་ཚོས་རྒྱ་ནག་གཞུང་གིས་དངུལ་ལོར་གྱི་འཛའ་ཐང་གཅོག་ཆ་བྱས་པ་དེ་ཡག་རྟགས་ཤིག་རེད་ཅེས་ཞུ་ཐུབ་རྒྱུ་ཁག་པོ་ཆགས་ཡོད་ཀྱང་། འདི་ང་ཚོས་བཟང་ཕྱོགས་ཀྱི་འགྱུར་བ་ཞིག་ཡིན་པར་ངོས་འཛིན་བྱེད་ཀྱིན་ཡོད་སྟབས། གལ་སྲིད་མ་འོངས་པར་རྒྱ་ནག་གཞུང་གིས་བཅོས་སྒྱུར་འདི་མགོ་རྟིང་སློག་ནས་ལག་བསྟར་བྱས་པ་ཡིན་ན། རྒྱལ་ཁབ་གཉིས་ཀྱི་འབྲེལ་ལམ་འཕེལ་རྒྱས་ལ་དོ་ཕོག་འགྲོ་གི་རེད་ཅེས་བརྗོད་འདུག

ཨ་རིའི་གྲོས་ཚོགས་གོང་མའི་འཐུས་མི་ཅག་ཤུ་མར་ (Chuck Schumer) ལགས་ཀྱིས། འདས་པའི་ལོ་མང་རིང་རྒྱལ་སྤྱིའི་རྒྱལ་ཁབ་ཁག་གིས་རྒྱ་ནག་གཞུང་ལ་མི་མང་ཤོག་སྒོར་གྱི་འཛའ་ཐང་གཅོག་དགོས་པའི་གནོན་ཤུགས་སྤྲད་ཡོད་ཀྱང་། རྒྱ་ནག་གཞུང་གིས་ཉན་འཇོག་ཙམ་ཡང་མ་བྱས་པར་རྒྱལ་སྤྱིའི་དངུལ་རྩའི་ཁྲོམ་རྭའི་ནང་གཡོ་རྫུན་མང་པོ་འཁྲབ་ཡོད་སྟབས། ད་ཐེངས་རྒྱ་ནག་གཞུང་གིས་གློ་བུར་དུ་འཛའ་ཐང་བཅག་པ་དེ་རྒྱ་ནག་གི་དཔལ་འབྱོར་ལྡབ་གཉིས་ཙམ་ཉམས་རྒུད་ཕྱིན་ཡོད་སྲིད་པ་ཞིག་རེད་ཅེས་བརྗོད་འདུག

གསར་འགོད་པ། དོན་གྲུབ།