རྒྱ་ནག་བདེ་འཇགས་ལྷན་ཁང་གིས་དྲ་ལམ་ཁག་ཏུ་ནག་ཉེས་བཟོ་བཞིན་ཡོད་པའི་དོགས་ཡོད་མི་སྣ་ ༡༥༠༠༠ འཛིན་བཟུང་བྱས་ཡོད་སྐོར་བསྒྲགས་འདུག
ཁ་སང་རྒྱ་ནག་བདེ་འཇགས་ལྷན་ཁང་ནས་བསྒྲགས་གཏམ་སྤེལ་བ་ལྟར་ན། རྒྱ་ནག་དབུས་གཞུང་གིས་དྲ་ལམ་གཙང་བཤེར་ལས་འགུལ་ཞེས་པ་ཞིག་ལག་བསྟར་བྱས་ཏེ། དྲ་ལམ་གྱི་དོགས་ཡོད་ཉེས་ཅན་ཁྱོན་ ༡༥༠༠༠ འཛིན་བཟུང་བྱས་ཡོད་པ་དང་། ལས་འགུལ་དེའི་དམིགས་ཡུལ་གཙོ་བོ་ནི་དྲ་ལམ་ཁག་ཏུ་ཁྲིམས་འགལ་གྱི་སྦྱོར་བ་སྤེལ་མཁན་ཚོ་ཚར་གཅོད་བྱས་ཏེ། སྤྱི་ཚོགས་བརྒྱུད་ལམ་གྱི་བདེ་འཇགས་སྔར་ལས་མཐོར་འདེགས་གཏོང་རྒྱུ་ཡིན་སྐོར་བརྗོད་འདུག
བསྒྲགས་གཏམ་དེའི་ནང་། ཕྱི་ཟླ་ ༧ པ་ནས་ད་ལྟའི་བར་རྒྱ་ནག་བདེ་འཇགས་ལྷན་ཁང་གིས་རྒྱལ་ནང་བརྟན་ལྷིང་མིན་པའི་གནད་དོན་ ༧༤༠༠ ལྷག་ཅིག་ལ་བརྟག་དཔྱད་དང་ཞིབ་འཇུག་བྱས་པ་བརྒྱུད། གནད་དོན་མང་ཆེ་བ་གཞུང་སྒེར་གང་རུང་གི་དྲ་རྒྱར་འཇབ་རྒོལ་ཐེབས་ཏེ། མི་སྒེར་དང་ཁེ་ལས་བའི་ཡིག་ཆ་ཁག་རྐུ་འཁྱེར་བྱས་པ་དེ་ཡིན་ལུགས་དང་། དེ་བཞིན་སྤྱི་ཚོགས་བརྒྱུད་ལམ་གྱི་འཆལ་སྤྱོད་དང༌དྲག་ཆས་ཉོ་འཚོང་། རྒྱན་འཛུགས། རྫུན་གཏམ། དཀྲོག་གཏམ་སོགས་ཚུད་པའི་སྤྱི་ཚོགས་བརྟན་ལྷིང་དང་བདེ་འཇགས་ལ་གནོད་སྐྱོན་ཐེབས་ཀྱི་ཡོད་པའི་གནད་དོན་ཁག་ ༡༠ ཐེར་འདོན་བྱས་ཡོད་སྐོར་བརྗོད་འདུག
ཉེ་ལམ་ནས་རྒྱལ་སྤྱིའི་བརྒྱུད་ལམ་གྷོའུ་གྷལ་དང་ངོ་དེབ་སོགས་ཕྱིའི་སྤྱི་ཚོགས་བརྒྱུད་ལམ་ཁག་ལ་བཀག་སྡོམ་བྱས་ཏེ། རྒྱ་ནག་ནང་གི་སྤྱི་ཚོགས་བརྒྱུད་ལམ་ཁག་ཏུ་ཁྲིམས་འགལ་གྱིས་བསམ་སྦྱོར་སྤེལ་མཁན་ཚོར་སྔར་ལས་ཞིབ་བཤེར་དང་། དམ་དྲག་ཤུགས་ཆེ་རུ་གཏོང་འཆར་ཡོད་པ་དང་། རྗེས་ཕྱོགས་དྲ་ལམ་དུ་འཇུག་མཁན་ཚོས་སྲིད་གཞུལ་ལ་ཐོ་འགོད་བྱེད་དགོས་པ་མ་ཟད། རང་ཉིད་ཀྱི་འདྲ་པར་དང་རུས་མིང་ངོ་མ་བེད་སྦྱོད་གཏོང་དགོས་པའི་བསྒྲགས་གཏམ་སྤེལ་འདུག
