རྔ་པ་ཁུལ་མཛོད་དགེ་རྫོང་འབྲིང་བ་ཡུལ་ཚོའི་གནས་རི་བྲག་རྫོང་དུ་རྒྱ་གཞུང་གིས་བཙན་གྱིས་གཏེར་ཁ་སྔོག་འདོན་བྱེད་པར་གྲ་སྒྲིག་ཆ་ཚང་བྱས་འདུག
ཟླ་འདིའི་ཕྱི་ཚེས་ ༡༩ ཉིན་བོད་ནས་གནས་ཚུལ་འབྱོར་བ་ལྟར་ན། ཟླ་འདིའི་ཚེས་༡༠ ཉིན་རྔ་པ་ཁུལ་མཛོད་དགེ་རྫོང་འབྲིང་བ་ཡུལ་ཚོའི་གནས་རི་བྲག་རྫོང་དུ། རྒྱ་གཞུང་གི་གཏེར་འདོན་ཚན་པ་ཞིག་གིས་བཙན་ཤེད་ཀྱིས་གཏེར་ཁ་སྔོག་རྩིས་བྱེད་བཞིན་ཡོད་ཅིང་། ས་གནས་མང་ཚོགས་ཀྱིས་གནས་རི་བྲག་རྫོང་སྔོག་ན་ཡུལ་ལ་བཀྲ་མི་ཤིས་ཤིང་། འཁོར་ཡུག་ལ་གནོད་པ་ཆེ་ལུགས་སོགས་བཤད་ནས་མི་འགྲིག་ཚུལ་ནན་བརྗོད་བྱས་ཏེ། གནས་རི་བྲག་རྫོང་ལ་འགྲོ་སའི་ལམ་ཁར་མི་མང་འདུ་འཛོམས་ཀྱིས་ནུས་པ་གང་ཡོད་སྒོས་གཏེར་རྐོ་པ་ཚོར་བཀག་འགོག་བྱས་ཡོད་ཀྱང་། གཏེར་བརྐོ་རུ་མ་བཅུག་ན་སྲིད་གཞུང་ནས་དམག་མི་གཏོང་རྒྱུ་ཡིན་ཚུལ་སོགས་མི་མང་ལ་འཇིགས་སྐུལ་སྣ་ཚོགས་དང་བཙན་ཤེད་ཀྱི་སྒོ་ནས་མང་ཚོགས་ཀྱི་རེ་བ་རྩིས་མེད་རྡོག་རོལ་བཏང་མཐར། གཏེར་འདོན་ཚན་པས་གནས་རི་བྲག་རྫོང་འདབ་ཏུ་གཏེར་ཁ་སྔོག་བྱེད་ཀྱི་འཕྲུལ་ཆས་མང་པོ་དབོར་འདྲེན་བྱས་ཏེ། གྲ་སྒྲིག་ཨང་གསར་བྱས་ནས་ལས་ཀའི་འགོ་འཛུགས་ཆོག་ཆོག་བྱས་ཡོད་འདུག
གནས་རི་དེ་ནི་ས་གནས་འབྲིང་བ་ཤོག་ཀ་སྤྱིའི་ཡུལ་ལྷ་སྐྱེས་ལྷར་མཆོད་ཅིང་བཀུར་བཞིན་པའི་ཨ་མྱེ་བྲག་རྫོང་གི་གནས་རི་ཡིན་ཞིང་རི་ངོས་སུ་གནས་མཇལ་ཞུ་ཡལ་གྱི་བྲག་ཕུག་གཉིས་ཡོད་པ་དེར་གནས་མཇལ་པ་རྒྱུན་དུ་ཡོད་འདུག་པས། དེར་ས་རྐོ་རྡོ་སློག་བྱས་ན་ཡུལ་ལ་ནད་ཡམས་དང་ཐན་པ་འབྱུང་ཞིང་བཀྲ་མི་ཤིས་པའི་བཤད་སྲོལ་ཡོད་ལ། གནའ་ནས་ད་བར་སྲུང་སྐྱོབ་འབའ་ཞིག་བྱས་པ་མ་གཏོགས་གནས་དེར་ཡུལ་མི་རང་ངོས་ནས་ས་རྐོ་རྡོ་སློག་བྱས་མྱོང་མེད་ཀྱང་། དེང་སྐབས་རྒྱ་གཞུང་གིས་ལག་པ་གསུམ་པ་ཞིག་གནས་རི་བྲག་རྫོང་ལ་རྐྱོང་བཞིན་ཡོད་སྟབས། ས་གནས་ཡུལ་མི་རྣམས་ཀྱིས་སེམས་ཁྲལ་ཆེན་པོ་བྱེད་བཞིན་ཡོད་འདུག
གཞན་ཡང་། དེ་སྔ་ཕྱི་ལོ་༡༩༦༠ ནང་ནས་༡༩༩༥ བར་ལོ་ངོ་༣༠ ལྷག་གི་རིང་རྐྱང་ཚ་དང་ཐེ་བོའི་ཁོག་ལ་རྟེན་གཞི་བྱས་པའི་གཏེར་འདོན་ལས་ཁུངས་ཚབ་མིང་ལ་ ༧༩༢ ཟེར་བ་དེ་དང་མཉམ་དུ། ཚབ་མིང་༤༠༥ དང་༤༠༧ ཟེར་བའི་གཏེར་འདོན་ཚན་པ་གཉིས་ཀྱིས་འབྲིང་བའི་ཁོག་ལའང་ལོ་ ༣༠ ལྷག་རིང་གཏེར་ཁ་སྔོག་འདོན་བྱས་ཏེ་འཁོར་ཡུག་ལ་གཏོར་བརླག་ཚབས་ཆེན་བཟོས་ཡོད་པར་མ་ཟད། ས་གནས་ཀྱི་སེམས་ཅན་མང་པོར་ཤི་རྨས་བྱུང་བ་སོགས་མང་ཚོགས་ལ་དཀའ་ངལ་མང་པོ་བྱུང་མྱོང་ཡོད་འདུག
ཡང་གནས་ཚུལ་མཁོ་སྤྲོད་པས་བརྗོད་ན། ད་ལྟའི་ཆར་གནས་རི་བྲག་རྫོང་དུ་གཏེར་ཁ་སྔོག་འདོན་བྱེད་པར་ཡོང་བའི་གཏེར་འདོན་ཚན་པ་དེའི་མིང་དང་ལས་ཁུངས་གང་ཞིག་ཏུ་གཏོགས་མིན་སོགས་ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མེད་པ་དང་། གནས་དེར་གཙོ་བོ་རྒྱ་སྐད་དུ་ཡུ་ཟེར་བའི་གཏེར་རིགས་ཤིག་ཡོད་འདུག
གནས་ཚུལ་མཁོ་གཏོང་བ་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས།
