རྒྱ་གར་གྱི་ནང་སྲིད་བློན་ཆེན་མཆོག་གིས་པ་ཀི་སི་ཐན་གཞུང་གིས་རྒྱལ་ཁབ་གཉིས་བར་གྱི་གྲོས་མོལ་ཕྱིར་འཐེན་བྱས་པར་སྐྱོན་བརྗོད་བྱས་འདུག
དེ་རིང་རྒྱ་གར་གྱི་ནང་སྲིད་བློན་ཆེན་ར་ཇེ་ཎཱ་ཋ་སིང་ (Rajnath Singh) མཆོག་གིས། པ་ཀི་སི་ཐན་གཞུང་གིས་ཟླ་འདིའི་ཚེས་ ༢༤ ཉིན་རྒྱ་གར་གྱི་རྒྱས་ས་ལྡི་ལིར་པ་ཀི་སི་ཐན་དང་རྒྱ་གར་རྒྱལ་སྲུང་སློབ་སྟོན་པ་བར་གྲོས་མོལ་བྱ་རྒྱུ་ཕྱིར་འཐེན་བྱས་པར་སྐྱོན་བརྗོད་དང་འབྲེལ། མ་འོངས་པར་ཁྱིམ་མཚེས་རྒྱལ་ཁབ་གཉིས་བར་གྲོས་མོལ་ཡོང་མིན་ནི་པ་ཀི་སི་ཐན་གཞུང་གི་བྱ་སྤྱོད་ལ་རག་ལུས་ཡོད་སྐོར་བརྗོད་འདུག
རྒྱལ་སྤྱིའི་དཔལ་འབྱོར་དུས་བབ་ཐོག་རྒྱ་གར་ནང་སྲིད་བློན་ཆེན་ར་ཇེ་ཎཱ་ཋ་སིང་མཆོག་གིས། པ་ཀི་སི་ཐན་གཞུང་གིས་ཟླ་སྔོན་མའི་ནང་ཨུ་རུ་སུའི་གྲོང་ཁྱེར་ཨུ་ཧྥ་ (Ufa) ནང་རྒྱལ་ཁབ་གཉིས་ཀྱི་སྲིད་བློན་རྣམ་གཉིས་ཐུག་འཕྲད་གནང་སྐབས། ཀཱ་ཤི་མེར་གནད་དོན་སྐོར་ལ་གླེང་སློང་གང་ཡང་བྱས་མེད་ཀྱང་། ད་ཐེངས་རྒྱལ་ཁབ་གཉིས་ཀྱི་རྒྱལ་སྲུང་སློབ་སྟོན་པ་བར་གྲོས་མོལ་བྱ་གྲབས་ཡོད་སྐབས། ཁོ་ཚོས་ང་ཚོར་གྲོས་མོལ་གྱི་ཆ་རྐྱེན་ནང་འཇིགས་སྐུལ་རིང་ལུགས་པའི་གནད་དོན་ཙམ་མིན་པར། ཀཱ་ཤི་མེར་རང་བཙན་རྩོད་ལེན་བྱེད་མཁན་གྱི་ཆབ་སྲིད་ཚོགས་པ་ཧུ་རེ་ཡཱ་ཌི་ (Hurriyat) ཡི་མགོ་ཁྲིད་དང་ཐུག་ནས་གནད་དོན་གླེང་སློང་དགོས་པའི་དགོས་འདུན་བཏོན་པ་ང་ཚོས་ཁས་ལེན་བྱས་མེད་སྟབས། ད་རེས་ཀྱི་གྲོས་མོལ་ཕྱིར་འཐེན་བྱས་པ་རེད། མ་འོངས་པར་ཁྱིམ་མཚེས་རྒྱལ་ཁབ་གཉིས་བར་གྲོས་མོལ་ཡོང་མིན་ནི་པ་ཀི་སི་ཐན་གཞུང་གི་བྱ་སྤྱོད་ལ་རག་ལུས་ཡོད། ཅེས་བརྗོད་འདུག
རྒྱ་གར་ཧིན་རྡུ་སི་ཐན་དུས་བབ་ཀྱིས་ཟླ་སྔོན་མའི་ཚེས་ ༡༠ ཉིན་ཨུ་རུ་སུའི་གྲོང་ཁྱེར་ཨུ་ཧྥ་ནང་རྒྱ་གར་དང་པ་ཀི་སི་ཐན་གྱི་སྲིད་བློན་རྣམ་གཉིས་ཐུག་སྟེ། མ་འོངས་པར་རྒྱ་གར་གྱི་རྒྱལ་ས་ལྡི་ལིར་རྒྱལ་ཁབ་གཉིས་ཀྱི་རྒྱལ་སྲུང་སློབ་སྟོན་པ་ཐུག་འཕྲད་ཀྱིས། འཇིགས་སྐུལ་རིང་ལུགས་དང་འབྲེལ་བའི་གནད་དོན་ཁག་ལ་གྲོས་མོལ་བྱ་རྒྱུའི་མཚོན་གྲོས་མཐུན་དོན་ཚན་ལྔ་བཞག་ཡོད་པ་མ་ཟད། ཟླ་འདིའི་ཚེས་ ༢༤ ཉིན་ལྡི་ལིར་གྲོས་མོལ་བྱ་རྒྱུ་ཐག་གཅོད་བྱས་ཡོད་ཀྱང་། ཟླ་འདིའི་ཕྱི་ཚེས་ ༢༢ ཉིན་པ་ཀི་སི་ཐན་སྲིད་བློན་གྱི་སློབ་སྟོན་པ་སར་ཌ་ཇེ་ཨ་ཛི་ཛི་ (Sartaj Aziz) ཡིས། ད་ཐེངས་ང་ཚོས་རྒྱ་གར་གཞུང་དང་འཇིགས་སྐུལ་རིང་ལུགས་པའི་གནད་དོན་ཙམ་མིན་པར་ཀཱ་ཤི་མེར་གྱི་སྐོར་ལའང་གྲོས་མོལ་བྱ་རྒྱུ་ཡིན་སྐོར་བརྗོད་ཡོད་སྟབས། རྒྱ་གར་གྱི་ཕྱི་སྲིད་བློན་ཆེན་ལྕམ་སུ་ཞི་མ་སོ་ཝ་ར་ཇེ་མཆོག་གིས། པ་ཀི་སི་ཐན་གཞུང་གིས་ཕྱི་ལོ་ ༡༩༧༢ ལོའི་སིམ་ལའི་ཆིངས་ཡིག་དང་། ཉེ་ཆར་ཨུ་རུ་སུའི་གྲོང་ཁྱེར་ཨུ་ཧྥ་རུ་བཞག་པའི་རྒྱལ་ཁབ་གཉིས་ཀྱི་གྲོས་མཐུན་གཞིར་བཟུང་སྟེ། ང་ཚོར་དང་གྲོས་མོལ་བྱ་དགོས་པ་ལས་ཆ་རྐྱེན་གཞན་དག་བཏོན་ན་གྲོས་མོལ་ལ་འགོག་རྐྱེན་འཕྲད་རྒྱུ་ཡིན་པའི་ལན་འདེབས་བྱས་པ་ལྟར། ཐེངས་འདིའི་རྒྱལ་ཁབ་གཉིས་བར་གྱི་གྲོས་མོལ་ཕྱིར་འཐེན་བྱས་པ་རེད་ཅེས་བཀོད་འདུག
རྒྱ་གར་དང་པ་ཀི་སི་ཐན་གྱི་འབྲེལ་ལམ་ལོ་རེ་བཞིན་ཇེ་སྡུག་ཏུ་འགྲོ་བཞིན་ཡོད་སྟབས། ཕྱི་ལོ་ ༢༠༡༤ ལོར་ནཱ་རེན་ཌ་མུ་དྷེ་མཆོག་རྒྱ་གར་གྱི་སྲིད་བློན་ཆགས་སྐབས། ཁོང་གི་སྲིད་བློན་གྱི་དམ་འབུལ་མཛད་སྒོའི་ཐོག་པ་ཀི་སི་ཐན་གྱི་སྲིད་བློན་ནཱ་ཝ་སེ་ཤཱ་རེབ་མགྲོན་འབོད་གནང་སྟེ། ཕྱོགས་གཉིས་ཀྱི་འབྲེལ་ལམ་ཡག་ཏུ་གཏོང་ཐབས་གནང་ཡོད་ཀྱང་། རྒྱ་གར་རྒྱལ་སར་རྟེན་གཞི་བྱས་པའི་པ་ཀི་སི་ཐན་གྱི་གཞུང་ཚབ་པས་ཀཱ་ཤེ་མེར་གྱི་རང་བཙན་རྩོད་ལེན་བྱེད་མཁན་གྱི་ཆབ་སྲིད་ཚོགས་པ་ཧུ་རེ་ཡཱ་ཌི་ (Hurriyat) ཡི་མགོ་ཁྲིད་ལ་ཐུག་འཕྲད་བྱས་པར་བརྟེན། རྒྱ་གར་གཞུང་གིས་པ་ཀི་སི་ཐན་རྒྱལ་སར་ཚོགས་གཏན་འཁེལ་བའི་རྒྱལ་ཁབ་གཉིས་ཀྱི་ཕྱི་སྲིད་དྲུང་ཆེའི་ལྷན་ཚོགས་ཕྱིར་འཐེན་དང་། ད་ཐེངས་པ་ཀི་སི་ཐན་གཞུང་གིས་རྒྱལ་ཁབ་གཉིས་ཀྱི་རྒྱལ་སྲུང་སློབ་སྟོན་པ་བར་གྱི་གྲོས་མོལ་ཕྱིར་འཐེན་བྱས་ཡོད་སྟབས། མ་འོངས་པར་རྒྱལ་ཁབ་གཉིས་ཀྱི་འབྲེལ་ལམ་སྔར་ལས་ཇེ་སྡུག་ཏུ་འགྲོ་ཉེན་ཡོད་འདུག
ཁ་སང་པ་ས་ཀི་སི་ཐན་གྱི་གསར་འགྱུར་བརྒྱུད་ལམ་སྐྱ་རེངས་ཐོག་ཆབ་སྲིད་དབྱེ་ཞིབ་པ་ཨུ་མར་གྷ་ལཱ་ཎེ་ཡིས། ༼ང་ཚོས་གང་འདྲ་བྱས་ནས་ཁྱིམ་མཚེས་རྒྱལ་ཁབ་གཉིས་ཀྱི་འབྲེལ་ལམ་འཕེལ་རྒྱས་གཏོང་ཐུབ་བམ༽ཞེས་པའི་ཆེད་བརྗོད་རྩོམ་ཡིག་ཅིག་བྲིས་པའི་ནང་། ད་ལྟ་རྒྱལ་ཁབ་གཉིས་ཀྱིས་གཅིག་གིས་གཅིག་ལ་སྐྱོན་འཛུགས་བྱེད་བཞིན་ཡོད་སྟབས། ཕྱོགས་གཉིས་ཀྱི་མགོ་ཁྲིད་དང་མང་ཚོགས་ཕན་ཚུན་བར་འགྲོ་འོང་བྱེད་ཤུགས་ཆེ་རུ་གཏང་ནས་དཀའ་རྙོག་སེལ་ཐབས་མ་བྱས་ཚེ། མ་འོངས་པར་ཁྱོད་ཤི་ང་གསོན་གྱི་དམག་འཁྲུག་འབྱུང་སྲིད་པ་ཞིག་ཡིན་སྐོར་སོགས་བརྗོད་འདུག
གསར་འགོད་པ། དོན་གྲུབ།
