མདོ་ཁམས་ཆུ་བཞི་སྒང་དྲུག་ཚོགས་པའི་ངོས་ནས་རྒྱུ་མཚན་གསུམ་གྱི་ཐོག་ནས་ད་རེས་སྲིད་སྐྱོང་དང་སྤྱི་འཐུས་ཀྱི་འོས་མི་མཚན་འདོན་གནང་རྒྱུ་མིན་པ་གསལ་བསྒྲགས་གནང་འདུག
མདོ་ཁམས་ཆུ་བཞི་སྒང་དྲུག་ཚོགས་པའི་ངོས་ནས་དེ་སྔོན་བཀའ་སྤྱི་གཉིས་ཀྱི་འོས་མི་མཚན་འདོན་གནང་སྲོལ་ཡོད་ཀྱང་། ཕྱི་ཟླ་ ༨ ཚེས་ ༢༦ ནས་ཉིན་གྲངས་ ༣ རིང་རྒྱ་གར་གྱི་རྒྱལ་ས་ལྡི་ལིར་སྐོང་ཚོགས་གནང་བའི་དབུས་རྒྱུན་སྐབས་ ༢༠ པའི་ཚོགས་ཐེངས་ ༥ པའི་ཐོག་གྲོས་ཆོད་བཞག་པ་ལྟར། དམངས་གཙོའི་ཁེ་དབང་ཡང་དག་གིས་ལོངས་སུ་སྤྱོད་ཐུབ་པའི་ཆེད་དུ་སྲིད་སྐྱོང་དང་སྤྱི་འཐུས་འོས་མི་མཚན་འདོན་གནང་རྒྱུ་མིན་པ་གསལ་བསྒྲགས་གནང་འདུག
དེ་ཡང་ལྷན་ཚོགས་ཐོག་དབུས་རྒྱུན་ཚོགས་གཙོ་པདྨ་བདེ་ལེགས་ལགས་ཀྱིས་ཡིག་ཐོག་ནས་བསྒྲགས་གཏམ་སྒྲོག་སྦྱངས་གནང་བའི་ནང་། སྤྱིར་བཏང་ད་བར་མདོ་ཁམས་ཆུ་བཞི་སྒང་དྲུག་ཚོགས་པའིི་ངོས་ནས་བཀའ་སྤྱི་གཉིས་ཀྱི་འོས་མི་བཏོན་པའི་ལམ་སྲོལ་ཞིག་ཡོད་བསྡད་པ་རེད་ལ། དེའང་མདོ་སྟོད་ཀྱི་གནད་ཡོད་མི་སྣ་རྣམ་པ་དང་། དབུས་དང་ས་གནས་ཀྱི་རྒྱུན་ལས་རྣམ་པས་བཀའ་གྲོས་བསྡུར་ཏེ་བཏོན་པ་དེ་དག་གིས་ཀྱང་ད་བར་༸གོང་ས་༸རྒྱལ་དབང་ཐམས་ཅད་མཁྱེན་པ་ཆེན་པོ་མཆོག་གི་བཀའ་དགོངས་ལམ་སྟོན་གཞིར་བཟུང་།བོད་བསྟན་སྲིད་མི་རིགས་སྤྱིའི་རྩ་དོན་ཐད་ངོས་ལྐོག་རྒྱབ་མདུན་མེད་པ་འགན་ཁུར་བ་དང་། མང་ཚོགས་ཀྱི་ཡང་དག་པའི་སྐུ་ཚབ་མཚོན་ཐུབ་པའི་མི་སྣ་རེ་བྱུང་བསྡད་ཡོད་པ་རེད། འོན་ཀྱང་འདི་ལོར་དབུས་རྒྱུན་སྐབས་ ༢༠ ཚོགས་ཐེངས་ ༥ པའི་སྟེང་ནས་སྲིད་སྐྱོང་དང་སྤྱི་འཐུས་ཀྱི་སྔོན་འགྲོའི་འོས་གཞི་མི་འདོན་རྒྱུའི་སྤྱི་མོས་གྲོས་ཆོད་བྱུང་ཡོད་པ་རེད། དེའི་རྒྱུ་མཚན་ནི།
གཅིག་ན་བོད་ཀྱི་སྤྱི་ཚོགས་ནང་མང་གཙོའི་ལམ་སྲོལ་དབུ་བརྙེས་ཏེ་མི་ལོ་ ༥༣ ཙམ་འཁོར་ཡོང་གིན་ཡོད་པ་རེད། ༸གོང་ས་མཆོག་གིས་ཐོག་མ་མང་གཙོ་གསོལ་རས་གནང་པའི་རྒྱུ་མཚན་དང་། གསོལ་རས་གནང་ནས་ད་བར་གྱི་ཐུགས་རེ་གཙོ་བོ་དེ་ཆོལ་ཁ་བྱེ་བྲག་པའི་ལངས་ཕྱོགས་བཟུང་བསྡད་རྒྱུ་ཙམ་མིན་པ། བོད་མི་མི་རེ་ངོ་རེ་ནས་བོད་སྤྱི་པའི་རྩ་དོན་འདི་མགོ་ཚོས་པ་དང་། མང་གཙོའི་ཁེ་དབང་ལོངས་སུ་སྤྱད་ནས་འགན་ཁུར་ཐུབ་རྒྱུ་དེ་ཡིན་པ་ལྟར། ད་ཐེངས་འདི་ནས་༸རྒྱལ་བའི་དགོངས་པ་བཞིན་མང་ཚོགས་ཀྱིས་མང་གཙོའི་ཁེ་དབང་ཡང་དག་པ་ཞིག་ལོངས་སུ་སྤྱོད་ཐུབ་ཐབས་ཀྱི་ཆེད་དུ་ཡིན།
གཉིས་ན་འདས་པའི་བཀའ་སྤྱི་གཉིས་ཀྱི་འོས་བསྡུ་གནང་སྟངས་དང་། དེ་ལས་ཀྱང་ད་ལྟའི་བརྡ་འཕྲིན་གྱི་དུས་རབས་འདིར་ཕན་ཚུན་འབྲེལ་ལམ་དང་། རྒྱུས་ལོན་ཡོང་རྒྱུར་དེ་ཙམ་ཁག་པོ་མེད་པ་སོགས་ལ་བརྟེན་མདོ་སྟོད་མང་ཚོགས་ལ་མཚོན་ན་སྔོན་འགྲོའི་འོས་གཞི་ཞིག་བཏོན་ཏེ་བྱིས་པར་ལམ་སྣ་ཁྲིད་བསྡད་དགོས་པ་ལྟ་བུ་ཞིག་མཐོང་གིན་མེད་ལ། བོད་ཀྱི་བསྟན་སྲིད་སྤྱི་ལ་ཕན་པའི་སྲིད་སྐྱོང་དང་། སྤྱི་འཐུས་ཤིག་གདམས་སྒྲུབ་བྱེད་པར་རྣམ་དཔྱོད་ལྡན་པའི་ཐོག་གོ་རྟོགས་ཏག་ཏག་ཅིག་སད་བསྡད་ཡོད་པར་ངོས་འཛིན་བྱེད་ཀྱིན་ཡོད།
གསུམ་ན་མདོ་ཁམས་ཆུ་བཞི་སྒང་དྲུག་གི་ཚོགས་པ་འདི་མདོ་སྟོད་ཆོལ་ཁའི་སྒྲིག་འཛུགས་ལྟེ་བ་དང་། མང་ཚོགས་ཀྱི་ཡིད་ཆེས་བྱ་ས་གཙོ་བོ་དེ་ཡིན་དུས་བཀུར་འོས་ལས་ཐོག་སྤྱི་འཐུས་རྣམ་པ་དབུར་བཞུགས་ཐོགའདི་ལོ་མདོ་སྟོད་མང་ཚོགས་ཀྱི་ནང་ནས་གཞོན་སྐྱེས་འདབ་གཤོག་གཉིས་ལྡན་ཅན་གྱི་དང་བླངས་འོས་མི་མང་པོ་ཞིག་ཐོན་ཡོང་བཞིན་འདུག་པས། དེ་དག་ཚང་མ་ལ་ཆེ་མཐོང་དང་གུས་བཀུར་ཞུས་ཏེ། སྔོན་འགྲོའི་འོས་གཞིའི་ནང་གདམས་གསེས་བྱས་ཏེ་འོས་མི་ཟུར་འདོན་ཞུ་མ་དགོས་པ་བྱས་པ་ཡིན། ཞེས་བཀོད་འདུག
གསལ་བསྒྲགས་དེ་བརྒྱུད་རྒྱ་ཆེའི་མི་མང་དང་འོས་མིར་ལངས་པ་ཚོར་འབོད་སྐུལ་གནང་དོན། རྒྱ་ཆེའི་མང་ཚོགས་ཀྱི་ངོས་ནས་བོད་ཀྱི་རྒྱལ་རབས་ལོ་རྒྱུས་ཀྱི་ལ་རྒྱ་མ་ཤོར་པའི་ཐོག འདས་པའི་ཕ་མེས་དམ་པ་ཚོས་དཀའ་བ་ཁྱད་དུ་བསད། ངལ་བ་དང་དུ་བླངས་ཏེ་དགྲ་རྒོལ་བོད་སྐྱོབ་ཀྱིས་བོད་ཀྱི་སྲིད་པ་འདི་ཇི་ལྟར་བསྐྱངས་པའི་བྱུང་རབས་ཁག་ལ་རྒྱུས་ལོན་བྱས་ཏེ། ༸གོང་ས་༸རྒྱལ་དབང་ཐམས་ཅད་མཁྱེན་པ་ཆེན་པོ་མཆོག་གི་རླབས་ཆེན་དགོངས་བཞེད་ལྟར་ད་ལྟའི་བོད་ཀྱི་ཆེས་དཀའ་སྡུག་གཉན་འཕྲང་ཅན་གྱི་དུས་ཚོད་འདིར་དཔལ་ལྡན་སྲིད་སྐྱོང་དང་། སྤྱི་འཐུས་ཀྱི་འོས་མི་ཚད་ལྡན་རེ་འདོན་ཐུབ་པའི་རེ་བ་དང་ཡིད་ཆེས་གཙང་མ་བྱེད་བཞིན་ཡོད་ལ། འོས་མིར་བཞེངས་མཁན་ཚོའི་ངོས་ནས་ཀྱང་རྒྱ་ཆེའི་མང་ཚོགས་ཀྱི་རྒྱབ་སྐྱོར་ཐོབ་དགོས་ཀྱི་ཡོད་ན།མང་ཚོགས་ཀྱི་ཁ་ཕྱོགས་དང་མངོན་འདོད་རྣམས་ལ་གོ་རིམ་ལྡན་པའི་བརྩི་བཀུར་དང་འགན་ཁུར་གནང་དགོས་པས་མ་ཚད། དེ་དག་ལ་རྒྱུན་དུ་ནས་འགན་ཁུར་དང་སྣེ་ཁྲིད་བྱེད་མཁན་དག་ཀྱང་ངོ་ཤེས་པར་བྱས་ཏེ་བརྒྱུད་རིམ་ལྡན་པ་ཞིག་བྱ་དགོས་རྒྱུ་དེའང་འོས་མི་ཞིག་གི་ཆ་རྐྱེན་རེད་བསམ་གྱི་ཡོད། ཞེས་བརྗོད་འདུག
ཡང་ལྷན་ཚོགས་ཐོག་དབུས་རྒྱུན་དྲུང་ཆེ་འཆམ་ར་དྲི་མེད་རྒྱལ་མཚན་ལགས་ཀྱིས་རྒྱལ་བའི་ཞབས་རིམ་ཆེན་མོ་དང་འབྲེལ་བའི་ཡིག་ཐོག་གསལ་བསྒྲགས་ཤིག་སྒྲོག་སྦྱངས་གནང་བའི་ནང་།༸གོང་ས་༸སྐྱབས་མགོན་ཆེན་པོ་མཆོག་འདི་ལོ་དགུང་གྲངས་ ༨༠ ཐམ་པར་ཕེབས་ཀྱིན་ཡོད་པའི་དུས་སྐབས་འདི་དང་བསྟུན་ནས་མདོ་ཁམས་ཆུ་བཞི་སྒང་དྲུག་ཚོགས་པའི་ངོས་ནས་ཧ་ཅང་གལ་ཆེན་དོན་ཆེན་ཞིག་ལ་བརྩིས་ཏེ་དབུས་ས་གཉིས་ནས་སྐུ་ཕྱྭའི་ཞབས་རིམ་གཞི་རྒྱ་ཆེ་བ་ཞིག་བསྒྲུབས་པ་ཡིན། སྤྱིར་བཏང་རྒྱལ་ས་ལྷ་ས་ནས་གསེར་ཁྲི་ཁམས་གསུམ་ཟིལ་གནོན་གསར་བཞེངས་ཞུས་ཏེ་བརྟན་བཞུགས་ཐོག་མ་ཕུལ་བ་ནས་ད་བར་བརྟན་བཞུགས་གྲངས་ ༦ ཙམ་ཕུལ་རྒྱུའི་བསྐལ་བཟང་བྱུང་འདུག་ལ། མདོ་སྟོད་ཆོལ་ཁའི་ལུང་ཚན་ཁག་བཅུ་ཙམ་གྱིས་བརྟན་བཞུགས་འབུལ་རྒྱུའི་དུས་བཟང་བྱུང་སྟེ་ཧ་ཅང་དགའ་སྤོབས་འོས་པ་བྱུང་འདུག དེར་བརྟེན་མདོ་ཁམས་ཆུ་བཞི་སྒང་དྲུག་གི་འགན་འཛིན་ལྷན་ཚོགས་ཐེངས་ ༤༥ པའི་སྟེང་ནས་སྤྱི་མོས་གྲོས་ཆོད་བཞག་སྟེ་༸རྒྱལ་བའི་ཞབས་རིམ་ཆེན་མོ་བསྒྲུབ་རྒྱུ་བྱས་པ་ལྟར། ཐོག་མའི་དམིགས་ཡུལ་གཞིར་བཟུང་དབུས་རྒྱུན་གྱིས་སྣེ་ཁྲིད་དེ་ཞབས་རིམ་ཧ་ཅང་ཡག་པོ་བསྒྲུབས་ཐུབ་པ་བྱུང་ཡོད། ཐེངས་འདིའི་༸རྒྱལ་བའི་ཞབས་རིམ་ཁག་བསྡོམས་ན་ཚེ་ཐར་སྲོག་བླུ་གྲངས་ ༡༩༤༣༨༠། འབྲས་ལྡན་ཤིང་སྣ་བཏབ་པ་གྲངས་ ༣༦༢། ཁོར་ཡུག་གཙང་བཟོའི་སྐོར་ནས་བཞུགས་སྒར་རྡ་རམ་ས་ལ་དང་། ལྡི་ལི་བསམ་ཡས་གླིང་། བལ་ཡུལ་མཆོད་རྟེན་རྣམ་གསུམ་གྱི་མདུན། དེ་བཞིན་ལྡེ་ར་ལྡུན་བོད་མའི་གཞིས་སྒར་ཁུལ་དང་། ཧི་མ་ཅལ་ཁུལ་བཅས་ལ་ཁོར་ཡུག་གཙང་བཟོའི་ལས་གཞི་སྤེལ་ཡོད། དེ་མིན་ཁོར་ཡུག་སྲུང་སྐྱོབ་དང་འབྲེལ་བའི་གྱང་སྦྱར་པར་རིས་སྤུས་ལྡན་གྲངས་ ༥༠༠འགྲེམ་སྤེལ་དང་། འགྱིག་གི་གད་སྙིགས་སྒམ་སྤུས་ལྡན་གྲངས་ ༢༥ མང་ཚོགས་ལ་ཕུལ་ཡོད། ད་དུང་རྒྱལ་བའི་བཀའ་འགྱུར་དག་ཚར་ ༡། སྒྲོལ་མ་འབུམ་ཐེར་ ༢། སྒྲོལ་མའི་གཟུངས་སྔགས་གྲངས་ས་ཡ་ ༦ ལྷག་ཙམ། རླུང་རྟ་ཉིས་འབུམ་གཅིག་ཁྲི། ཚེ་མདོ་དག་ཚར་འབུམ་ཐེར་ ༡། ཚེ་གཟུངས་གྲངས་ས་ཡ་ ༤ ལྷག་ཙམ། སྤྱན་རས་གཟིགས་ཀྱི་གཟུངས་སྔགས་མ་ཎི་གྲངས་དུང་ཕྱུར་ ༥ ལྷག གུ་རུའི་གཟུངས་སྔགས་བཛྲ་གུ་རུ་གྲངས་ས་ཡ་ ༡ ལྷག་བཅས་ཀྱི་༸རྒྱལ་བའི་ཞབས་རིམ་ཆེན་མོ་བསྒྲུབས་ཐུབ་པ་བྱུང་ཡོད། ཅེས་བཀོད་འདུག
གསར་འགོད་པ། པདྨ་མཚོ།
ཐག་གཅོད་ཡག་པོ་གནང་འདུག
མདོ་སྟོད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་གི་གསལ་བསྒྲགས་ཆ་ཚང་མཇལ་བས་དགའ་བྱུང་ལ། གསལ་བསྒྲགས་ནང་འཁོད་ལྟར་ཞོར་དུ་དྲན་སྐུལ་འགའ་ཞུ་འདོད་པ་ནི།
གཅིག ཆོལ་ཁ་སོ་སོའི་ཁོངས་ནས་དོལ་རྒྱལ་རྗེས་འབྲངས་པའི་ངོ་ལོག་གི་ལས་འགུལ་སྤེལ་མཁན་མ་ཤེས་པ་དང། ཤེས་བཞིན་ཁྱད་དུ་གསོད་པ། རྒྱ་གཞུང་གི་བེད་སྤྱོད་འོག་ཕྱིན་པ་བཅས་ཅི་རིགས་ཐོན་པ་རྣམས་ལ་དབུས་སྤྱི་ཁྱབ་རྒྱུན་ལས་ཁང་གི་ངོས་ནས་ཞིབ་འཇུག་ནན་ཏུར་གྱིས། བོད་བསྟན་སྲིད་མི་རིགས་བཅས་པར་ཕན་པའི་རླབས་ཆེན་ཆིག་སྒྲིལ་ལ་གཞོགས་འདེགས་མིག་སྨན་མིག་ཐོག་ཡོང་ཕྱིར་དེ་དག་ལ་ཁ་ཏ་བསླབ་བྱས་མཚོན་ལམ་ནོར་ལྡོག་ཤེས་ལ་དགོངས་བཞེས་འཕྱི་མ་དྲག་པ་ཞིག་གནང་གལ་ཞུ་རྒྱུ།
གཉིས། བོད་ཕྱི་ནང་གཉིས་དང། ལྷག་པར་གཞིས་བྱེས་བོད་མིའི་མཁས་ཆེན་ཆབ་སྲིད་པ། དགེ་རྒན། ཤེས་ཡོན་ཅན། བླ་སྤྲུལ་གནད་ཡོད་མི་སྣ། དཔེར་ན་ཕུན་དབང་དང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་སོགས་མདོ་སྟོད་ཀྱི་གནད་ཡོད་མི་སྣ་མང་པོས་མ་གྲོས་གཅིག་མཐུན་གྱིས་དབུ་མའི་ལམ་གྱི་སྲིད་བྱུས་ལ་རྒྱུ་མཚན་ངེས་པ་རྙེད་དེ་རྒྱབ་སྐྱོར་ཡིད་ཆེས་རྩེ་གཅིག་གནང་བ་ལྟར། མདོ་སྟོད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་ནས་ཀྱང་རྒྱུ་མཚན་ཡང་དག་པ་དང་ཐབས་ཚུལ་ཡང་དག་པའི་དངོས་ཐོག་བདེན་འཚོལ་གྱི་གནས་བབ་དེ་དག་ལ་དགོངས་བཞེས་ཀྱིས་ལངས་ཕྱོགས་མ་ནོར་བ་ཞིག་འཛིན་རོགས་ཞུ་རྒྱུ་ཡིན།
གསུམ། ༧གོང་ས་ཆེན་པོས་རྒྱལ་སྲིད་བཙན་གྱིས་མི་མང་ལ་གནང་དགོས་དོན་ནི། མ་འོངས་པའི་དབུས་བོད་མིའི་སྒྲིག་འཛུགས་གི་གཞུང་སྲིད་རྒྱུད་དང་བཅས་པའི་བྱེད་སྒོ་ཆེ་ཕྲ་ཆུང་གསུམ་ཁྲིམས་ཀྱི་དབང་བསྒྱུར་དང། ཡང་དག་པའི་མང་གཙོའི་ལམ་ཆེན་ནང་བསྐྱོད་ཆེད་ཡིན་པ་ཉི་ཤར་སྤར་མོས་མི་ཁེབས་པ་ལྟར། བཙན་བྱོལ་ནང་ཆོལ་ཁ་སོ་སོའི་དབུས་སྤྱི་ཁྱབ་རྒྱུན་ལས་ཁང་ཁག་གིས་སྤྱི་བའི་སྒྲིག་འཛུགས་ལ་འགན་འཁུར་ལྷོད་མེད་ཞུ་བཞིན་པ་ལྟར། སྲིད་སྤྱིའི་འོས་བསྡུ་ཆེན་མོ་དང་འབྲེལ་ནས་ཆོལ་ཁོངས་སོ་སོའི་སེར་སྐྱ་དྲག་ཞན་སུས་ཀྱང་སྤྱི་བའི་རྩ་དོན་ལས་ཆོལ་ཁའི་ཁེ་ཕན་གཙོ་བོ་འཛིན་པའི་རྣམ་འགྱུར་ཙམ་ཡང་མི་ཐོན་ཆེད། ཞལ་ཞེ་མཚུངས་པའི་བདའ་འདེད་དམ་དོན་གནང་དགོས་རོགས་ཞུ་རྒྱུའི་དྲན་སྐུལ་བཅས།
མི་ཆུང་ཆུང་གི་གཏམ་ཆེན་པོ་ཞེས་དམོད་ངེས་ལ། བབ་མེད་སར་སྐེད་སྲིང་སྟེ་ཞེས་འཕྱ་བའང་གསལ་བོ་ཧ་གོ་བའི་ཐོག་ཕན་དུ་རེ་བའི་ཀུན་སློང་གཡོ་བ་མེད་པས་རྒྱབ་མནན་ཏེ་བྲིས།
རྒྱབ་སྐྱོར་ཡོད།