ཉེ་སྔོན་རྔ་བ་རྫོང་མཁར་དུ་བོད་མི་སེར་སྐྱ་མང་པོས་རྒྱ་གཞུང་གི་བཙན་གནོན་ལ་ཞི་རྒོལ་གནང་བར་བརྟེན་ཉེན་རྟོག་པས་ཞི་རྒོལ་བ་མང་པོ་འཛིན་བཟུང་བཙན་ཁྲིད་བྱས་ཡོད་འདུག
འདི་ཟླའི་ཚེས་ ༡༠ ཉིན་གྱི་ཉིན་གུང་རྔ་བ་རྫོང་གི་ཁྲོམ་གཞུང་དུ། ཕོ་གསར་གཉིས་ཀྱིས་རྒྱ་གཞུང་ལ་ངོ་རྒོལ་སྐད་འབོད་གནང་བ་དང་དུས་མཚུངས་སུ། མི་མང་གིས་དེར་མཐུད་ནས་སྐད་འབོད་གནང་སྐབས། ཉེན་རྟོག་པས་མི་མང་གི་ཁྲོད་ནས་ལོ་ན་ ༦༤ ཙམ་ཡིན་པའི་ཨ་མ་གུས་མོ་ལགས་འཛིན་བཟུང་བཙན་ཁྲིད་བྱས་ཡོད་པ་དང་། ཁོང་མོ་རྔ་བ་རྫོང་རོང་མཁར་སར་ཡུལ་ཚོའི་རུ་ཆེན་གཉིས་པའི་ནམ་མཁའ་ཚང་གི་ཡིན་ཞིང་། ཁོང་མོར་བཟའ་ཟླ་སོགས་ནང་མི་དགུ་ཡོད་པ་དང་། ཁོང་མོ་རྒྱུན་དུ་རྔ་བ་རྫོང་མཁར་གྱི་གཞུང་ལམ་གཙང་མ་བཟོ་བའི་ལས་ཀར་ཉིན་གླ་བྱས་ནས་འགྲོ་གི་ཡོད་ཅིང་། ཁོང་མོ་འཛིན་བཟུང་ཐེབས་པའི་སྔར་རྗེས་ཀྱི་གནས་ཚུལ་གསལ་བོར་ཤེས་རྟོགས་བྱུང་ཐུབ་མེད་པ་མ་ཟད། ཉིན་དེར་ངོ་རྒོལ་གནང་མཁན་ཕོ་གསར་གཉིས་དང་གཞན་མི་མང་ཁག་ཅིག་འཛིན་བཟུང་བྱས་ཡོད་ཀྱང་། ཁོང་རྣམས་པའི་མིང་དང་ཕ་ཡུལ་སོགས་ཤེས་རྟོགས་བྱུང་མེད་པ་རེད།
འདི་ཟླའི་ཚེས་ ༡༡ ཉིན་རྔ་བ་ཀིརྟི་དགོན་པའི་བློ་རིག་འཛིན་གྲྭའི་དགེ་འདུན་པ་ལྔ་ལྷག་མཉམ་དུ་དབྱར་གནས་ས་ཚིགས་བརྒལ་ནས་འགྲོ་སྐབས་ཉེན་རྟོགས་པས་དོན་མེད་ལ་འཛིན་བཟུང་བཙན་ཁྲིད་ཀྱིས་བཀག་ཉེར་བྱས་ཡོད་ཅིང་། ཉིན་གཉིས་གསུམ་གྱི་རྗེས་སུ་དགེ་འདུན་པ་གཞན་རྣམས་ཀློད་གྲོལ་བཏང་ཡོད་ནའང་། རང་ལོ་ ༢༢ ཡིན་པའི་གྲྭ་བློ་བཟང་བསམ་ནམས་ད་དུང་བཀག་ཉར་བྱས་ཡོད་འདུག་ལ། ཁོང་རྔ་བ་རྫོང་རོང་མཁར་སར་ཡུལ་ཚོའི་རུ་ཆེན་གཉིས་པའི་ཕ་སྐལ་བཟང་ལགས་དང་མ་ཚེ་རིང་སྒྲོལ་མ་ལགས་གཉིས་ཀྱི་བུ་ཡིན་ཞིང་། མིང་སྲིང་བཞི་ཡོད་པའི་གྲས་ཀྱི་ཆེ་ཤོས་ཡིན་ལ། ཆུང་ཆུང་སྐབས་ནས་ཁོང་རྔ་བ་ཀིརྟི་དགོན་པར་གྲྭ་བ་བྱས་ཡོད་པ་རེད། ཡིན་ནའང་། རྒྱ་གཞུང་གིས་ཁོང་འཛིན་བཟུང་བཀག་ཉར་བྱས་དོན་སོགས་ཞིབ་ཕྲའི་གནས་ཚུལ་གསལ་རྟོགས་བྱུང་མི་འདུག
དེ་མིན་ཕྱི་ཟླ་ ༨ ཚེས་ ༢༠ ཉིན་གྱི་བོད་ནང་གི་ཞོགས་ཀའི་དུས་ཚོད་༨:༣༠ ཙམ་ལ་ལོ་ན་ ༢༩ ཡིན་ཞིང་མི་ལ་རྡོ་རྗེ་སྒྲོལ་མ་ཟེར་བའི་བོད་རིགས་བུད་མེད་ཅིག་གིས། རྔ་བ་རྫོང་མཁར་གྱི་ཁྲོམ་གཞུང་དུ་ངོ་རྒོལ་སྐད་འབོད་བྱེད་བཞིན་ཞི་བའི་གོམ་བགྲོད་གནང་ཡོད་ཀྱང་། དེ་མ་ཐག་ཉེན་རྟོག་པ་བཅུ་གྲངས་ཤིག་ཡོང་ནས་ཁོང་མོ་འཛིན་བཟུང་བཙན་ཁྲིད་བྱས་ཡོད་པ་དང་། ཁོང་མོ་མདོ་སྨད་རྔ་བའི་རྨེའུ་རུ་མ་ཡུལ་ཚོའི་རུ་ཆེན་གཉིས་པའི་བསྟན་དར་ཚང་གི་ཕ་རྡོ་རྗེ་རབ་བརྟན་དང་མ་རྟ་མགྲིན་འཚོ་གཉིས་ལ་བུ་བུ་མོ་བཞི་ཡོད་པའི་གྲས་ཀྱི་གཉིས་པ་དེ་ཡིན་ཞིང་། ཁོང་མོར་ད་དུང་ཕྲུ་གུ་གཉིས་ཡོད་པ་རེད། ད་ལྟའི་བར་ཁོང་མོ་ས་གནས་གང་དུ་བཀག་ཉེར་བྱས་ཡོད་མེད་ཀྱི་ཞིབ་ཕྲའི་གནས་ཚུལ་ཞིག་འབྲེལ་ཡོད་སུས་ཀྱང་རྩད་གཅོད་དང་ཤེས་རྟོགས་ཐུབ་ཡོད་པ་མ་རེད།
གནས་ཚུལ་འབྱོར་བ་ལྟར་ན། དེང་སྐབས་རྔ་བ་རྫོང་མཁར་གྱི་གཞུང་ལམ་ཁག་དང་ལམ་གྱི་བཞི་མདོ་སོགས་སུ་ཉེན་རྟོག་པས་རྒྱུན་དུ་ལྟ་སྲུང་ནན་མོ་བྱས་ཡོད་པ་མ་ཟད། གཞུང་གི་ལས་ཁུངས་ཁག་མ་གཏོགས་གཞན་པའི་དྲ་ལམ་ཡོངས་རྫོགས་མུ་མཐུད་དུ་བཀག་སྡོམ་བྱས་ཡོད་འདུག
གནས་ཚུལ་མཁོ་སྤྲོད་པ། ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས།
