རྒྱ་གཞུང་གིས་ཁྲོམ་སྲང་ཁག་ཏུ་གསང་བའི་པར་ལེན་སྒྲིག་ཆས་བཙུགས་ཏེ་སྤྱི་མང་གི་འགྲོ་འདུག་སྤྱོད་གསུམ་ལ་མྱུལ་ཞིབ་ལྐོག་ཉན་བྱེད་བཞིན་ཡོད་པའི་སྲིད་ཇུས་ཤུགས་ཆེ་རུ་གཏོང་རྒྱུ་ཡིན་འདུག
ཁ་སང་པེ་ཅིན་གྲོང་ཁྱེར་གྱི་ཉེས་དོན་རྟོག་ཞིབ་ཚན་པས་བསྒྲགས་གཏམ་ཞིག་སྤེལ་བའི་ནང་། དེང་སྐབས་པེ་ཅིན་གྲོང་ཁྱེར་གྱི་ཁྲོམ་སྲང་གི་གྲུ་ཟུར་རེ་རེར་གསང་བའི་པར་ལེན་སྒྲིག་ཆས་བཙུགས་ཏེ་དོགས་སྲུང་ནན་པོ་བྱེད་ཀྱི་ཡོད་པ་དང་། གསང་བའི་པར་ལེན་སྒྲིག་ཆས་ལ་བརྟེན་ནས་པེ་ཅིན་གཞུང་གིས་སྤྱི་མང་གི་ཉེས་དོན་དང་རྒྱལ་ཁབ་ཀྱི་བདེ་འཇགས་སྲིད་ཇུས་ཇེ་དམ་དུ་གཏོང་རྒྱུ་ཡིན་སྐོར་བསྒྲགས་འདུག
ཉེ་ལམ་ནས་པེ་ཅིན་གྲོང་ཁྱེར་གྱི་ཁྲོམ་སྲང་བརྒྱ་ཆའི་ ༢༩ ལྷག་ནང་གསང་བའི་པར་ལེན་སྒྲིག་ཆས་འཛུགས་བཞིན་པའི་བྱ་འགུལ་དེ། མི་འགྱང་བར་རྒྱ་ནག་གི་གྲོང་དང་གྲོང་ཁྱེར་ཡོངས་སུ་གསང་བའི་པར་ལེན་སྒྲིག་ཆས་ཆེད་འཛུགས་བྱ་བའི་སྐུད་མེད་དྲ་ལམ་སྲིད་ཇུས་ཤིག་ཡིན་ཞིང་། ཕྱི་ལོ་ ༢༠༡༢ ལོ་ནས་བཟུང་རྒྱ་གཞུང་གིས་པེ་ཅིན་གྲོང་ཁྱེར་ནས་འགོ་བཙུགས་ཏེ་གྲོང་དང་གྲོང་ཁྱེར་ཁག་ཏུ་གསང་བའི་པར་ལེན་སྒྲིག་ཆས་འཛུགས་པའི་བྱ་འགུལ་ལག་བསྟར་བྱས་ཏེ། ཉོ་འཚོང་ཁྲོམ་ར་དང་རླངས་འཁོར་ས་ཚིགས། བདེ་བཞིན་མི་མང་འདུས་སྡོད་ས་གནས་ཁག་ཏུ་ཉེན་སྲུང་སྒྲིག་ཆས་ཆེད་འཛུགས་བྱས་ཡོད་འདུག
རྒྱ་ནག་གཞུལ་འབྲེལ་ཞིན་ཧྭ་གསར་ཁང་གིས་བསྒྲགས་པའི་གནས་ཚུལ་ལྟར་ན། ཕྱི་ལོ་ ༢༠༡༤ ལོ་ནས་རྒྱ་ནག་གི་དབང་འཛིན་པ་ཚོས་ཉེན་རྟོག་དམག་མི་ ༤༣༠༠ ལྷག་ལ་འཆར་ཅན་སྦྱོང་བརྡར་སྤྲད་དེ། གསང་བའི་པར་ལེན་སྒྲིག་ཆས་ཀྱིས་སྤྱི་མང་གི་འགྲོ་འདུག་བྱ་སྤྱོད་གསུམ་ལ་ལྟ་ཞིབ་ནན་མོ་བྱེད་ཀྱི་ཡོད་པ་མ་ཟད། གསང་བའི་པར་ལེན་སྒྲིག་ཆས་ལ་བརྟེན་ནས་ད་ལྟའི་བར་ཉེས་དོན་ ༡༥༠༠ ལྷག་ཐག་གཅོད་ཐུབ་ཡོད་ལུགས་བརྗོད་འདུག
པེ་ཅིན་གྲོང་ཁྱེར་དུ་གནས་སྡོད་འགྲོ་བ་མིའི་ཐོབ་ཐང་དོན་གཉེར་བ་ཧུའུ་ཅཱ་ཡིས། རྒྱ་ནག་གཞུང་གིས་གསང་བའི་པར་ལེན་སྒྲིག་ཆས་འཛུགས་དོན་ནི། དོན་དངོས་ནས་རྒྱལ་ནང་གི་ཁྲིམས་འགལ་ཉེས་དོན་གཅིག་པུར་དམིགས་པ་ཙམ་མ་ཡིན་པར། སྲིད་གཞུང་གིས་ཁྲོམ་སྲང་ཁག་ཏུ་གསང་བའི་པར་ལེན་སྒྲིག་ཆས་སྤྱད་དེ། ང་ཚོ་སྤྱི་མང་གི་འགྲོ་འདུག་སྤྱོད་གསུམ་ལ་མྱུལ་ཞིབ་དང་མི་མང་གི་གཏམ་གླེང་ལ་ལྐོག་ཉན་བྱེད་ཀྱི་ཡོད་པ་རེད། ཅེས་བརྗོད་འདུག
ཡང་ཀོང་ཀྲུའུ་གྲོང་ཁྱེར་གྱི་སྤྱི་མང་ཁེ་དབང་རྩོད་ལེན་པ་ཡེ་ཏོ་ཟེར་བ་ཞིག་གིས། ཕྱི་ལོ་ ༢༠༠༨ ལོ་ནས་བཟུང་བོད་དང་ཤིན་ཅང་མི་རིགས་ཀྱི་གཙོས་མི་མང་གི་ཁེ་དབང་དང་རང་དབང་རྩོད་ལེན་གནང་བཞིན་པའི་སྐབས་འདིར། རྒྱ་གཞུང་གི་དཔོན་རིགས་ཚོས་མི་མང་འདུས་སྡོད་བྱེད་སའི་ཁྲོམ་སྲང་གང་སར་གསང་བའི་པར་ལེན་སྒྲིག་ཆས་ཆེད་འཛུགས་བྱེད་ཀྱིན་པར་རྒྱུ་མཚན་མང་པོ་ཡོད་པ་རེད། ཅེས་བརྗོད་འདུག
གསར་འགོད་པ། པདྨ་རྒྱལ།
རྒྱ་ནག་དམར་གཞུང་གིས་དུས་རྟག་པར་འདི་འདྲ་ངན་གཡོ་ལས་བྱེད་ཡ་ཡོད་པ་མ་རེད།