ཝང་ཆི་ཧྲན་ནི་ཞི་ཅིན་ཕིན་གྱི་ལམ་ཁ་འཕྱག་མཁན་དང་མེ་གསོད་རུ་ཁག་གི་རུ་དཔོན་ཡིན་ལ། ཞི་ཅིན་ཕིན་གྱིས་གང་བྱེད་དགོས་ཀྱང་ཝང་ཆི་ཧྲན་གྱིས་སྔོན་ལ་ཞི་ཅིན་ཕིན་གྱི་འགྲོ་ལམ་གཙང་བཟོ་བྱེད་ཀྱི་ཡོད་སྐོར་བརྗོད་འདུག
ཉེ་སྔོན་ཕྱི་སྡོད་རྒྱ་རིགས་སྐབས་དོན་དཔྱད་ཞིབ་པ་ཁྲིན་ཕོ་ཁོང་(Chen Pokong) གིས། ཞི་ཅིན་ཕིན་དང་ཝང་ཆི་ཧྲན་གཉིས་ནི་སྐུ་སྲས་ཚོགས་པའི་ཕྱོགས་སུ་གཏོགས་པ་མ་ཟད། ཁོ་གཉིས་ཀྱི་མཛའ་བརྩེ་གཏིང་ཟབ་པ་དང་། གཉི་ག་གྲོང་གསེབ་ནས་སྡུག་བསྔལ་མྱོང་པ་གཅིག་མཚུངས་ཡིན་ལ། ད་ལྟའི་ཆེས་མཐོའི་དབང་ཆ་མཉམ་སྤྱོད་ཀྱི་ཉིན་མོར་ཡུན་རིང་རེ་སྒུག་བྱས་པ་རེད་ལ། ཝང་ཆི་ཧྲན་ལ་ནུས་སྟོབས་ལྡན་པ་དང་གསར་བརྗེའི་བསམ་བློ་ཡོད་སྟབས། རྒྱ་གཞུང་གི་ཆབ་སྲིད་རྒན་རབས་པ་ཚོས་དོགས་ཟོན་ནན་མོ་བྱས་ཀྱང་འགོག་ཐབས་མེད་པའི་གནས་སྟངས་འོག རྒྱ་ནག་དབུས་ཆབ་སྲིད་ལྷན་ཁང་དུ་འཛུལ་ཏེ། དབུས་སྒྲིག་ཁྲིམས་ཞིབ་བཤེར་ལྷན་ཁང་གི་མགོ་གཙོ་རུ་གྱུར་བ་རེད། བསམ་ཡུལ་ལས་འདས་པ་ཞིག་ལ་ཝང་ཆི་ཧྲན་གྱིས་དངོས་སུ་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་ལག་ཆ་འདི་བེད་སྤྱོད་བཏང་པ་དང་ཞི་ཅིན་ཕིན་གྱི་དམིགས་འབེན་ལའང་འོས་འཚམ་བྱུང་ཡོད་སྟབས། ཁོ་བོ་གཉིས་ནི་ལམ་འགྲོ་ཡོད་མཁན་གཉིས་རེད། ཅེས་བརྗོད་འདུག
ཟླ་འདིའི་ཚེས་ ༦ ཉིན་ ༼མཆུན་མདོག་མེ་ཏོག་ ༽ ཅེས་པའི་རྩོམ་ཡིག་ནང་། ཞི་ཅིན་ཕིན་ལ་གོ་གནས་ཐོབ་པ་དེར་རྒྱ་ནག་གི་ཚོགས་པ་ཚང་མས་མོས་མཐུན་བྱས་ཡོད་པ་མ་ཟད། ཧུའུ་ཅིན་ཐའོ་དང་ཝིན་ཅ་པའོ་གཉིས་ཀྱིས་མཐའ་གཅིག་ཏུ་རྒྱབ་སྐྱོར་བྱས་པའི་འབྲས་བུ་རེད། འོན་ཀྱང་གོ་གནས་ཐོབ་ཙམ་གྱིས་དབང་ཆ་ཡོད་པས་མ་ཁྱབ། ཞི་ཅིན་ཕིན་ལ་སྲིད་དབང་ཐོབ་རྗེས་རི་རྡུང་སྟག་འཇིགས་བྱས་ཏེ་དབང་ཆ་འཕྲོག་རྩོད་བྱེད་སྐབས། ཝང་ཆི་ཧྲན་གྱིས་རང་སྲོག་བློས་གཏོང་གི་ཉེན་ཁ་བརྒྱུད་ནས་རམ་འདེགས་བྱས་པ་དང་། ལྐོག་ཟ་རུལ་སུངས་ལ་རྒོལ་རྡུང་གི་ལག་ཆ་བེད་སྤྱོད་དེ། ཚེར་ཤིང་རྩ་རྫོགས་ཀྱིས་ཁྲག་གི་བགྲོད་ལམ་གསར་པ་ཞིག་བཏོད་པ་རེད།
ཡང་རྩོམ་ཡིག་དེའི་ནང་། ཆེས་མཐོའི་དབང་འཛིན་དཔོན་རིགས་ཚོས་ལྐོག་ཟ་རུལ་སུངས་ལ་རྒོལ་རྡུང་གཏོང་བ་ནི་འཇིག་ཉེན་ཆེ་བའི་ལས་དོན་ཞིག་ཡིན་པ་ཤེས་རྟོགས་བྱུང་ཡོད་ལ། ལྐོག་ཟ་རུལ་སུངས་ལ་རྒོལ་རྡུང་གཏོང་བ་ནི་ཕྱོགས་གཞན་གྱི་ཁེ་དབང་ལ་ལག་པ་འཆང་བ་ཡིན་པས། གཟབ་ནན་མ་བྱས་པར་ནོར་འཁྲུལ་ཤོར་ན་ཁེ་གྲགས་གཉིས་ཤོར་ཉེན་ཡོད་པ་མ་ཟད། མི་ཤི་དུར་སྦེད་བྱ་ཡུལ་མེད་པའི་གནས་སུ་ལྷུང་ངེས་རེད། དེར་བརྟེན་རྒྱ་གཞུང་གི་ལོ་རྒྱུས་སྟེང་སྒྲིག་ཁྲིམས་ཞིབ་བཤེར་ཁང་གི་མགོ་གཙོས་ལྐོག་ཟ་རུལ་སུངས་ལ་རྒོལ་རྡུང་གཏོང་པའི་ལས་དོན་ཐོག་གཟབ་ནན་ཞེ་དྲགས་བྱེད་ཀྱི་ཡོད་སྟབས། ལས་འགན་གང་ཡང་མ་སྒྲུབ་པར་གོ་གནས་སྲུང་བ་དང་ལས་འགན་ཞིག་སྒྲུབ་པ་ལས་གང་ཡང་མ་བྱས་པ་དེ་རྒྱུན་ལྡན་ལྟ་བུ་རེད། ཅེས་བཀོད་འདུག
ཟླ་འདིའི་ཚེས་ ༨ ཉིན་ཀྲུང་གོར་ལྟ་བ་ཞེས་པའི་དྲ་ཚིགས་སྟེང་ཝང་ཆི་ཧྲན་དང་ཞི་ཅིན་ཕིན་གཉིས་ལ་འབྲེལ་བ་ཡོད་པའི་གནས་ཚུལ་ཞིག་སྤེལ་བའི་ནང་། ཕྱི་སྡོད་རྒྱ་རིགས་ཚོས་ཝང་ཆི་ཧྲན་ནི་ཞི་ཅིན་ཕིན་གྱི་ལམ་གྱི་ས་རྡུལ་འཕྱག་མཁན་དང་མེ་གསོད་རུ་ཁག་གི་རུ་དཔོན་ཡིན་ལ། ཞི་ཅིན་ཕིན་གྱིས་གང་བྱེད་དགོས་ཀྱང་ཝང་ཆི་ཧྲན་གྱིས་སྔོན་ལ་ཞི་ཅིན་ཕིན་གྱི་འགྲོ་ལམ་གཙང་བཟོ་བྱེད་ཀྱི་ཡོད་པ་རེད། དེ་བཞིན་ཞི་ཅིན་ཕིན་སྲིད་སྟེགས་སྟེང་བུད་དེ་ཐོག་དང་པོར་པའོ་ཞི་ལེའི་གྱོད་དོན་ཐག་བཅད་རྗེས། རྒྱ་གཞུང་གི་བརྒྱུད་ལམ་ཁག་གིས་ཞི་ཅིན་ཕིན་དང་ཝང་ཆི་ཧྲན་གཉིས་ཀྱི་མཛའ་འབྲེལ་ཟབ་མོ་ཡོད་པ་ཕྱིར་བསྒྲགས་བྱས་ཤིང་། ཁོང་གཉིས་རྒྱ་ནག་དབུས་ཆབ་སྲིད་ལྷན་ཁང་དུ་བསླེབས་རྗེས་ཝང་ཆི་ཧྲན་གྱིས་དཔལ་འབྱོར་ཆེད་ལས་རིག་པའི་ལས་འགན་འཁུར་མེད་པ་དང་། ལྐོག་ཟ་རུལ་སུངས་ལ་རྒོལ་རྡུང་གཏོང་བའི་དབུས་སྒྲིག་ཁྲིམས་ཞིབ་བཤེར་ཁང་གི་ལག་ཆ་བེད་སྤྱོད་བཏང་ནས་ཞི་ཅིན་ཕིན་ལ་རམ་འདེགས་བྱེད་ཀྱི་ཡོད་པ་རེད། རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་ ༡༨ པ་ཚོགས་པ་ནས་བཟུང་། ཞི་ཅིན་ཕིན་དང་ཝང་ཆི་ཧྲན་གཉིས་ཀྱིས་རུལ་སུངས་གཙང་བཤེར་ལས་འགུལ་མུ་མཐུད་ལག་བསྟར་བྱེད་པར་འཕངས་པའི་མདའ་ལ་ཕྱིར་འཐེན་མེད། རུལ་སུངས་གཙང་བཤེར་བྱེད་པ་ནི་ཕམ་ཉེས་མི་ཆོག་པའི་འཐབ་རྩོད་ཅིག་ཡིན་སྐོར་གྱི་གཏམ་གླེང་ཤུགས་ཆེན་བྱས་ཡོད། ཅེས་བཀོད་འདུག
གསར་འགོད་པ། འཇིགས་མེད་རྒྱ་མཚོ།
