ང་ལ་རེ་བ་བརྒྱབ་ནས་ཡོང་བ་ཡིན་སྟབས་ནད་པའི་གནས་སྟངས་སྡུག་པོ་ཆཊ་དུས་ངུ་དགོས་བྱུང་གི་འདུག

དང་བླངས་སྤྱི་ཚོགས་ཞབས་ཞུ་མ་ཨ་ཅག་ཚེ་རིང་སྒྲོལ་དཀར་ལགས་ཀྱིས་རྒྱ་གར་བྱང་ཁུལ་དུ་ཡོད་པའི་གྲོང་ཁྱེར་ཅན་དྷི་སྒར་དུ། ལོ་ངོ་ ༢༠ མ་ཟིན་ཙམ་གྱི་རིང་ནད་པ་ཁྲི་སྟོང་བརྒལ་བར་སྨན་པར་བསྟེན་གཏུག་ལ་རོགས་རམ་དང་། བདག་མེད་ཉམ་ཐག་གི་ནད་པ་མང་པོར་རོགས་དངུལ་འཚོལ་ཐབས་དང་ནད་གཡོག་བྱེད་པ་སོགས་རོགས་རམ་ཧ་ཅང་ལེགས་པོ་གནང་བཞིན་ཡོད་སྟབས། འདི་གའི་གསར་འགོད་པ་ཅན་དྷི་སྒར་ལ་སྨན་པར་སྟོན་དུ་ཕྱིན་པའི་སྐབས་དང་བསྟུན་ཏེ་ཁོང་མོར་བཅར་འདྲི་ཞུས་ཡོད།

ཨ་ཅག་ཚེ་རིང་སྒྲོལ་དཀར་ལགས་ཀྱི་པ་ལགས་སྟོད་སྤུ་ཧྲེང་ནས་ཡིན་པ་དང་། ཁོང་མོ་བལ་ཡུལ་སྦོག་ར་བྱམས་པ་གླིང་གཞིས་ཆགས་སུ་སྐྱེས་འཚར་བྱུང་ཞིང་། ཆུང་དུས་ནས་བོད་ཁྱིམ་སློབ་གྲྭའི་ནང་འཛུལ་ཞུགས་ཀྱིས་འཛིན་རིམ་ ༡༢  ཐོན་རྗེས། ཅན་དྷི་སྒར་མཐོ་སློབ་ཏུ་ཕྱིན་པ་དང་། མཐོ་སློབ་ཀྱི་སློབ་ལོ་དང་པོ་ནས་བཟུང་སྤྱི་ཚོགས་འབྲེལ་མཐུད་པའི་(Public Relations officer)ཕྱག་ལས་གནང་ཡོད་འདུག མཐོ་སློབ་ཀྱི་ལོ་ངོ་ ༥ རིང་ས་གནས་གཞོན་ནུའི་ཚོགས་མི་དང་རྒྱུན་ལས་གནང་སྟེ། ཅན་དྷི་སྒར་དུ་ཡོང་བའི་ནད་པ་མང་པོར་རོགས་རམ་གནང་ཡོད་པ་དང་། ཁོང་མོ་འཛིན་རིམ་ ༨ པར་བསླེབས་སྐབས་ཕ་མ་གཉིས་སྐུ་གྲོངས་ཡོད་པ་དང་། མིང་སྲིང་ ༥ ཡོད་པའི་ནང་ནས་ཁོང་མོ་རྒན་ཤོས་དེ་ཡིན་སྟབས། ཕ་མ་གཉིས་ཀྱི་ཚབ་བྱས་ཏེ་སྤུན་ཆུང་བ་རྣམས་ལ་ལྟ་སྐྱོང་གནང་ཡོད་པ་མ་ཟད། ནད་པ་ཁྲི་སྟོང་བརྒལ་བར་དང་བླངས་ཀྱིས་རོགས་གནང་སྟེ་ལོ་ངོ་ ༢༠ མ་ཟིན་ཙམ་འགྲོ་བཞིན་ཡོད་སྟབས། རྒྱ་བལ་འབྲུག་གསུམ་ན་ཡོད་པའི་བཙན་བྱོལ་བོད་མིའི་སྤྱི་ཚོགས་ནང་ཁོང་མོར་༼བོད་ཀྱི་ཨ་མ་ཋི་རི་སཱ༽ཞེས་ཀྱང་འབོད་ཀྱི་འདུག་ལ། ནད་པ་ཚོས་ཁོང་མོར་བྲིས་པའི་ཉིན་ཐོ་འབྲི་དེབ་མཐུག་པོ་དེའི་ནང་དུ། བོད་ཀྱི་རླབས་ཆེན་གྱི་ཨ་མ་ལགས། ཁྱེད་ཀྱིས་ང་ལ་ཚེ་སྲོག་གསར་པ་ཞིག་གནང་བར་བཀའ་དྲིན་ཆེ་ཟེར་བ་དང་། ང་ཚོའི་སྤྱི་ཚོགས་ནང་ཁྱེད་ལྟ་བུའི་བུད་མེད་གང་མང་ཞིག་བྱུང་ཐུབ་ན་ཅི་མ་རུང་ཟེར་བ་སོགས་བྲིས་འདུག

གསར་འགོད་པས་ཁོང་མོར་དང་བླངས་སྤྱི་ཚོགས་ཞབས་ཞུའི་བསམ་བློ་དེ་ཐོག་མར་ཇི་ལྟར་འཁོར་བ་དང་། དམིགས་བསལ་གྱི་ཤུགས་རྐྱེན་དེ་འདྲ་ཐེབས་ནས་མགོ་བརྩམས་པ་ཡིན་ནམ། ཡང་ན་རང་བཞིན་གྱིས་སྤྲོ་སྣང་བསླེབས་ཏེ་ལས་དེར་ཞུགས་པ་ཡིན་དྲིས་པར་ཁོང་མོས། ང་རང་སློབ་གྲྭའི་ནང་དུ་ཡོད་སྐབས་དངུལ་གྱི་དཀའ་ངལ་ཞེ་དྲགས་ཡོད། ང་ལ་ཕ་མ་གཉིས་མེད་སྟབས། གུང་གསེང་གི་སྐབས་སུ་གཞིས་ཆགས་ནང་ཡོད་པའི་ངའི་པ་ལགས་ཀྱི་ཕ་ཡུལ་གཅིག་པ་ཞིག་གི་ནང་དུ་འགྲོ་ཡི་ཡོད། ཐེངས་ཤིག་ང་ཁོང་ཚོའི་ནང་དུ་གུང་གསེང་ལ་ཕྱིན་པ་དང་། ང་ལ་གོས་ཐུང་ཞིག་དགོས་ཀྱི་འདུག་ལབ་པ་ཡིན། ཨ་ཅག་ལགས་དེས་དེ་རིང་ནས་བཟུང་ཁྱེད་རང་གི་པ་ལགས་ཀྱིས་བཞག་པའི་དངུལ་ཚང་མ་རྫོགས་སོང་བ་རེད་ཅེས་ལབ་བྱུང་། དེ་ནས་བཟུང་གུང་གསེང་སྐབས་གཞིས་ཆགས་ནང་ཕྱིན་ནའང་ཆོད་མི་འདུག་པས་ཅན་དྷི་སྒར་ནས་བསྡད་བཞག་པ་ཡིན། ང་རང་གཞོན་ནུའི་རྒྱུན་ལས་ཡིན་སྐབས་ཅན་དྷི་སྒར་དུ་ནད་པ་གསར་པ་མང་པོ་ཡོང་སྟེ། སྐད་མ་ཤེས་པ་སོགས་ཀྱི་དཀའ་ངལ་འཕྲད་དེ་ཉིན་ཁ་ཤས་རེར་ངུས་བསྡད་པ་དེ་འདྲ་མང་པོ་མཐོང་མྱོང་ཡོད་སྟབས། ཡར་མར་གུང་གསེང་ལ་འགྲོ་བ་ལས་ཁོང་ཚོར་རོགས་པ་བྱས་ནས་བསྡད་ན་ཡག་པོ་འདུག་བསམ་སྟེ། ནད་པ་ཚོར་སྨན་ཁང་དུ་བསྟེན་གཏུག་དང་སྐད་བསྒྱུར་སོགས་ཀྱི་རོགས་རམ་བྱས་ནས་བསྡད་པ་དང་། དེ་ནས་བཟུང་ལས་ཀ་འདི་མཚམས་མ་བཞག་པར་མུ་མཐུད་དུ་བྱས་ནས་སྡོད་ཀྱི་ཡོད། ཅེས་བརྗོད་བྱུང་།

ད་ལྟའི་བར་དུ་ནད་པ་ག་ཚོད་ཅིག་ལ་རོགས་རམ་གནང་ཡོད་པ་དང་། དེ་ཚོའི་ནང་ནས་དྲག་སྐྱེད་བྱུང་བ་དང་འདས་གྲོངས་སུ་ཕྱིན་པ་ག་ཚོད་ཤེས་རྟོགས་བྱུང་སྐོར་དྲིས་པར། ཕྱི་ལོ་ ༡༩༩༧ ནས་བཟུང་ནད་པར་རོགས་རམ་གྱི་ལས་ཀ་འདི་མུ་མཐུད་ནས་བྱས་བསྡད་པ་ཡིན་ལ། སྔོན་མ་ཡིན་ན་ལོ་རེར་ནད་པ་ ༡༠༠ དེ་འདྲ་ཡོང་གི་རེད། ཡིན་ནའང་།  དེང་སང་རྒྱ་གར་ལྷོ་ཕྱོགས་དང་འབྲུག ཨ་རུ་ནཱ་ཅལ། ར་ཝང་ལཱ། དེ་བཞིན་དྷ་རམ་ས་ལ་སོགས་ནས་ནད་པ་མང་པོ་ཡོང་གི་ཡོད་སྟབས། ལོ་རེར་ནད་པ་ ༤༠༠ ནས་ ༥༠༠ ཙམ་ལ་རོགས་པ་བྱེད་ཀྱི་ཡོད། ནད་པ་ཁ་ཤས་ལོ་རེར་ཐེངས་བཞི་ལྔར་སྨན་པར་བསྟེན་གཏུག་བྱེད་དུ་ཡོང་དགོས་བྱུང་བ་དང་། ཡང་གཤག་བཅོས་བཏང་བའི་ནད་པ་ཁ་ཤས་ལ་ཟླ་བ་གསུམ་དེ་འདྲ་འགོར་གྱི་འདུག ཡིན་ནའང་། དེ་ཚོ་ནད་པ་གཅིག་རང་ལ་མ་གཏོགས་གྲངས་ཀའི་ནང་དུ་རྩི་ཡི་མེད། ད་ལྟའི་བར་དུ་ང་ཚོའི་ནད་པ་ཧ་ཅང་མང་པོ་སངས་དྲག་ཏུ་སོང་ཡོད་ལ། ན་ཚ་རྙིང་པ་ཆགས་ཏེ་ཕྱི་དྲགས་པ་སོགས་ཀྱིས་ཁ་ཤས་འདས་གྲོངས་སུའང་ཕྱིན་སོང་ཞེས་ཟེར།

འདས་པའི་ལོ་ངོ་ ༢༠ མ་ཟིན་ཙམ་གྱི་རིང་ནད་པ་མང་པོར་རོགས་རམ་གནང་བའི་བརྒྱུད་རིམ་ཁྲོད། དཀའ་ངལ་གཙོ་བོ་ག་རེ་འཕྲད་སོང་དྲིས་པར་ཁོང་མོས། དཀའ་ངལ་གཙོ་བོ་ནད་པ་ཚོར་སྡོད་ས་ཡག་པོ་མེད་པ་དེ་རེད། སྔོན་མ་ངས་ནད་པ་ཚོར་ཁང་པ་ཞིག་གཡར་ཡོད་ཀྱང་། མཚམས་རེར་ནང་དུ་ཐིགས་པ་བརྒྱབ་པ་སོགས་དཀའ་ངལ་ཆེན་པོ་འཕྲད་བྱུང་། མ་གཞི་ནས་ཅན་དྷི་སྒར་དུ་ཁང་པ་རག་ཧ་ཅང་ཁག་པོ་ཡོད་པ་རེད། ཁང་བདག་མང་པོས་ལོ་དང་ལོ་བྱས་ནས་འདུག་མཁན་གྱི་སློབ་ཕྲུག་ཚོ་མ་གཏོགས་ནད་པར་ཁང་པ་གཡར་བ་ཉུང་ཉུང་ཡིན་ལ། གོང་ཡང་ཆེན་པོ་རེད། ད་ལྟ་ངས་ནད་པ་སྡོད་ས་ཞིག་གྲ་སྒྲིག་བྱས་ཡོད་པ་དང་། ཁྱོན་ཉལ་ཁྲི་བཅུ་གཉིས་ཙམ་ཡོད། ནད་པ་དངུལ་སྤྲོད་ཐུབ་མཁན་ཞིག་ཡིན་ན་ཉལ་ཁྲི་རེར་མཚན་གཅིག་ལ་ཧིན་སྒོར་ ༥༠ ཡིན། ནད་པ་དཀའ་ངལ་ཡོད་མཁན་ཚོར་དངུལ་ལེན་གྱི་མེད། ཁང་པའི་ནང་དུ་སོལ་རླངས་ཐབ་(Gas)སོགས་ཐབ་ཆས་ཆ་ཚང་གྲ་སྒྲིག་བྱས་ཡོད་སྟབས། སོ་སོས་འབྲས་དང་གྲོ་སོགས་ཉོས་ཏེ་སྡོད་ཁང་ནང་ནས་ཟ་མ་བཟོས་ན་འགྲོ་སོང་ཆེན་པོ་གཏོང་དགོས་པ་མ་རེད། ཅེས་བརྗོད་བྱུང་།

ང་ཚོ་བོད་པའི་སྤྱི་ཚོགས་ནང་ན་ཚ་མང་པོས་ག་རེ་ཡོང་གི་ཡོད་པ་དང་། རྒྱུ་རྐྱེན་གཙོ་བོ་ག་རེ་ཡིན་དྲིས་པར། ང་ཚོ་བོད་པའི་ནང་ན་ཚ་ཚབས་ཆེ་ཤོས་དང་མང་ཤོས་དེ་མཆིན་པའི་གཉན་ཚད་བྷི་(Hepatitis B)རེད་འདུག དེ་ནས་བད་ཀན་སྨུག་པོ་དང་ཁྲག་ཤེད་ཀྱི་ན་ཚ་བྱུང་མཁན་མང་པོ་འདུག་ལ། དེ་བཞིན་མཁལ་མ་འཕྲོ་བརླག་ཏུ་འགྲོ་མཁན་ཡང་མང་པོ་ཡོང་གི་འདུག སྤྱིར་བཏང་མིད་ཐག་འབྲས་སྐྲན་དང་རྒྱུ་མ་འབྲས་སྐྲན། ཕོ་བ་འབྲས་སྐྲན་སོགས་ཀྱི་འབྱུང་རྐྱེན་གཙོ་བོ་ང་ཚོ་བོད་པ་ཚོས་ཤ་ཟ་རྒྱུ་མང་དྲགས་པ་དང་། ཚལ་དང་ཤིང་ཏོག་སོགས་ལྗང་པོའི་རིགས་ཟ་རྒྱུ་ཉུང་དྲགས་པས་རེད་བསམ་གྱི་འདུག ནད་པ་མང་པོ་ཞིག་གིས་དུས་ཐོག་ལ་བརྟག་དཔྱད་མ་བྱས་པའི་སྐྱོན་ཆེན་པོ་ཡོང་གི་འདུག དཔེར་ན། བོད་པའི་ནད་པ་རྒན་འཁོགས་ཤིག་ཡིན་ན། བརྒྱ་ཆ་བརྒྱ་ཐམ་པ་འབྲས་སྐྲན་ཡིན་ཡིན་པ་རེད། རྒྱ་གར་གྱི་ནད་པ་ཨ་མ་རྒན་འཁོགས་ཤིག་ཡིན་ནའང་འབྲས་སྐྲན་ཆགས་པ་ཉུང་བ་འདུག་ཅེས་ཟེར།

ཡང་བོད་པའི་གྲྭ་བཙུན་ནང་མཆིན་པའི་གཉན་ཚད་བྷི་ཕོག་མཁན་མང་པོ་ཡོད་པའི་རྒྱུ་མཚན་སྐོར་ལ་ཁོང་མོས། མཆིན་པའི་གཉན་ཚད་བྷི་དེ་ཁྲག་དང་ཆུ་སེར་ནས་ཕར་ཚུར་འགོས་ཀྱི་ཡོད་པ་རེད། སྨན་པ་ཚོས་གྲྭ་བ་ཨ་ནེ་རྣམས་ཀྱིས་ཆང་ས་རྒྱག་གི་མེད་པས། ན་ཚ་དེ་ག་འདྲ་བྱས་ནས་འགོས་ཀྱི་ཡོད་པ་རེད་ཟེར་ནས་དོགས་འདྲི་བྱེད་ཀྱི་འདུག འདས་པའི་ལོ་མང་རིང་ནད་པ་མང་པོས་སོ་སོའི་ལོ་རྒྱུས་བཤད་སྐབས། གྲྭ་ཚང་ཁག་མང་པོའི་ནང་སྐྲ་བཞར་བྱེད་ཀྱི་བཞར་གྲི་(Blades)གཅིག་གི་རྣོ་ཁ་མ་རྫོགས་བར་དུ་གྲྭ་བ་མང་པོར་བེད་སྤྱོད་གཏོང་སྲོལ་ཤུགས་ཆེན་པོ་ཡོད་པ་དང་། མགོ་ལ་རྨ་བཟོས་པའི་ཁྲག་སོགས་བརྒྱུད་ནས་ན་ཚ་དེ་ཕན་ཚུན་འགོས་ཀྱི་ཡོད་སྟབས། གྲྭ་བཙུན་ཚོས་དེ་ལ་དོ་སྣང་བྱེད་དགོས་པ་ཧ་ཅང་གལ་ཆེན་པོ་རེད་བསམ་གྱི་འདུག བཞར་གྲི་གཅིག་ལ་གོང་ཧ་ཅང་ཁེ་པོ་ཡིན་ནའང་དེ་མ་ཉོས་པར་སོ་སོར་ན་ཚ་ཆེན་པོ་ཞིག་འགོས་པ་ཡིན་ན་དཔེ་ཕངས་པོ་རེད། དེ་བཞིན། ང་རང་གིས་ཡར་མར་ལྟ་ཡོང་དུས། ཨ་ར་བཞར་བྱེད་ཀྱི་འཕྲུལ་ཆས་དེའང་གྲྭ་བའི་ནང་ཞེ་དྲགས་གཡར་རེས་བྱེད་ཀྱི་ཡོད་ས་རེད། གྲྭ་བཙུན་ནད་པ་ཚོར་ང་ཚོ་བོད་པའི་ནང་མཆིན་པའི་གཉན་ཚད་ཡོད་མཁན་མང་པོ་འདུག་ལབ་དུས། ག་རེ་ཡིན་ན་ཤ་དང་མར་མང་པོ་ཟ་ཡི་ཡོད་པའི་རྐྱེན་གྱིས་ཡིན་ནམ་ཟེར་ནས་ན་ཚ་དེའི་འགོས་རྐྱེན་ཤེས་ཀྱི་མི་འདུག དེར་བརྟེན་ངས་དགོན་པ་ཁག་ལ་དམིགས་བསལ་གྱིས་ཞུ་དགོས་པ་ཞིག་ལ། བཞར་གྲི་གཅིག་གིས་བཞར་ཐེངས་དགུ་བཅུ་ག་ཚོད་འདང་གི་ཡོད་ནའང་། གཞན་སུ་ལའང་མི་གཡར་བར་སོ་སོ་གཅིག་པུས་བེད་སྤྱོད་གཏོང་རོགས་ཞེས་འབོད་སྐུལ་ཞུ་བ་ཡིན། དེ་ལྟར་བྱས་ན་ང་ཚོའི་སྤྱི་ཚོགས་ནང་ན་ཚ་དེ་འགོས་ཁྱབ་ཏུ་འགྲོ་ངེས་མ་རེད། གཞན་ཡང་། ཁྲག་ཤེད་མཐོ་བོ་ཡོད་པ་སོགས་ཀྱིས་མཁལ་མ་འཕྲོ་བརླག་ཏུ་འགྲོ་མཁན་མང་པོ་ཡོད་སྟབས།  མཁལ་མའི་ཞལ་འདེབས་སྤྲོད་རོགས་ལབ་མཁན་མང་པོ་ཡོང་གི་ཡོད་པ་རེད།  མཁལ་མའི་ཞལ་འདེབས་སློང་སྐབས་གཙོ་བོ་ཤ་ཁྲག་གཅིག་པ་འདྲ་བོ་རག་ན་འཕྲོད་ཤོས་དང་ཡག་ཤོས་རེད་མ་གཏོགས་ཅི་བྱུང་གང་བྱུང་གིས་མཁལ་མའི་ཞལ་འདེབས་ལེན་རྒྱུ་ཡོད་པ་མ་རེད་ཞེས་ཟེར།

མཆིན་པའི་གཉན་ཚད་འགོས་ན་ནད་རྟགས་ག་འདྲ་ཐོན་གྱི་ཡོད་པ་དང་། སྨན་བཅོས་བྱས་ན་ན་ཚ་དེ་སངས་དྲག་ཏུ་འགྲོ་ཐུབ་ཀྱི་ཡོད་མེད་དྲིས་པར་ཁོང་མོས། སྤྱིར་བཏང་མཆིན་པ་དེ་ང་ཚོའི་གཟུགས་པོའི་ནང་གི་ཐབ་ཚང་ལྟ་བུ་ཡིན་ལ། དེ་ལ་སྐྱོན་ཞིག་ཤོར་བ་ཡིན་ནའང་སྔ་ས་ནས་རྟགས་མཚན་ཞེ་དྲགས་མེད་པ་དང་། རྟགས་མཚན་སླེབ་སྐབས་ནད་པ་དེར་གང་ལ་གང་འཚམ་དཀའ་ངལ་ཆེན་པོ་འཕྲད་བསྡད་ཡོད་པ་རེད། དཔེར་ན། གྲོད་ཁོག་ཆེན་པོ་ཆགས་པ་ཡིན་ན། མཆིན་པ་གང་ལ་གང་འཚམ་བརྡོལ་ཡོད་པའི་རྟགས་རེད། དེ་བཞིན། མིད་པའི་ནང་བུ་གུ་བརྒྱུས་པ་ཡིན་ན་རྩ་སྦུག་རྣམས་སྐྲངས་ནས་འབུར་བསྡད་ཡོད་ན་ཡང་ནད་རྟགས་ཐོན་པ་ཡིན་སྟབས། ངེས་པར་དུ་རྩ་སྦུག་དེ་ཚོ་མ་བསྡམ་པ་ཡིན་ན་ཁྲག་བསྐྱུག་ནས་ག་དུས་ཡིན་ནའང་གྲོངས་སྲིད་པ་རེད།

སྤྱིར་བཏང་མཆིན་པའི་གཉན་ཚད་ལབ་པ་དེ་མཆིན་པར་གཉན་ཁ་བརྒྱབ་པ་རེད། དེ་ལ་མཆིན་པའི་གཉན་ཚད་ A དང་ B,  C, E བཅས་རིགས་བཞི་ཡོད་པ་རེད། ཨེ་དང་ཨི་གཉིས་ཟ་མ་བཙོག་པ་དང་ཆུ་བཙོག་པ་ནས་འགོས་ཀྱི་ཡོད་པ་དང་། དེ་གཉིས་ང་ཚོའི་གཟུགས་པོའི་ནང་བསླེབས་རྗེས་རང་བཞིན་གྱིས་བརླག་འགྲོ་ཡི་ཡོད་པ་རེད། བྷི་དང་སི་གཟུགས་པོའི་ཁྲག་དང་ཆུ་སེར་ནས་འགོས་ཀྱི་ཡོད་པ་དང་། འདིར་ཡོང་བའི་མཆིན་པའི་གཉན་ཚད་འགོས་པའི་ནད་པ་ཚང་མ་(Chronic hepatitis)ན་མཁན་རྐྱང་རྐྱང་རེད། ནད་འབུ་དེ་ང་ཚོའི་གཟུགས་པོའི་ནང་བསླེབས་ནས་ཟླ་བ་ ༦ ལས་ལྷག་ཕྱིན་པ་ཡིན་ན། ན་ཚ་རྙིང་པར་རྩི་ཡི་ཡོད་པས་སྨན་བཅོས་བྱས་ཏེ་རྩ་མེད་དུ་འགྲོ་ཐུབ་རྒྱུ་ཁག་པོ་རེད། གལ་སྲིད་ཟླ་བ་ ༦ གི་སྔོན་ལ་ན་ཚ་དེ་འགོས་ཡོད་པ་ཧ་གོ་བ་ཡིན་ན། ཨེ་ཁུའུ་(HBr Aq)ལབ་ཀྱི་ཡོད་པ་དང་། དེ་ལ་སྨན་བཅོས་བྱས་ནས་སངས་དྲག་ཏུ་འགྲོ་རྒྱུ་ཡོད་པ་རེད།

ང་ཚོའི་ནད་པའི་ནང་མཆིན་པའི་གཉན་ཚད་བྷི་ཕོག་མཁན་དྲག་སོང་བའང་མང་པོ་ཡོད། དཔེར་ན། སྔོན་མ་ཞིག་ལ་མཆིན་པའི་གཉན་ཚད་བྷི་ཕོག་པའི་ནད་པ་ལོ་ ༢༥ ཙམ་ཡིན་པ་ཞིག་འདིར་བསླེབས་སོང་། ཁོ་རང་གི་མཆིན་པ་བརྡོལ་འདུག སྐབས་དེ་ནས་བཟུང་ཁོས་མཆིན་པའི་གཉན་ཚད་བྷི་ཡི་སྨན་ཟ་རྒྱུ་མགོ་བཙུགས་ནས་མུ་མཐུད་དུ་བཟོས་པར་བརྟེན། ན་ཚ་དེ་བཀག་ནས་ད་ལྟ་བར་དུ་ཁོ་རང་བདེ་པོ་བདེ་རྐྱང་རེད། དོ་སྣང་བྱེད་མཁན་ཞིག་ཡིན་ན། མཆིན་པའི་གཉན་ཚད་བྷི་ཕོག་པ་དང་ལམ་སང་གྲོངས་འགྲོ་བ་དེ་འདྲ་མ་རེད།

གལ་སྲིད་སོ་སོའི་ནང་མིའི་ནང་མཆིན་པའི་གཉན་ཚད་བྷི་ཕོག་མཁན་ཡོད་པ་ཡིན་ན། ནད་པ་དེའི་སྨན་ཟ་དགོས་པ་མ་ཟད། སྨན་པའི་ལམ་སྟོན་ལྟར་མཆིན་པའི་གནས་སྟངས་ལ་བརྟག་དཔྱད་བྱེད་དགོས་པ་རེད། མཆིན་པའི་གནས་སྟངས་ལ་(SGOT  SGPT)ཟེར་བ་གཉིས་ཀྱི་ཚད་གཞི་དེ་ཀླད་ཀོར་ནས་ ༤༠ བར་དུ་དགོས་ཀྱི་ཡོད་པ་དང་། ཚད་གཞི་དེ་ལས་བརྒལ་བ་ཡིན་ན་མཆིན་པས་ལས་ཀ་བྱེད་པར་ནད་འབུས་གནོད་པ་བྱེད་ཀྱི་ཡོད་པའི་རྟགས་རེད། དེར་བརྟེན་ནད་འབུ་དེའི་གྲངས་ཀ་འཕར་གྱི་ཡོད་མེད་དང་། འབུ་དེ་འཇམ་ཐིང་ངེར་བསྡད་ཡོད་མེད། དེ་བཞིན། ཁྲག་བརྟག་དཔྱད་བྱས་ནས་མཆིན་པར་སྐྲན་དེ་འདྲ་ཡོད་མེད་སོགས་དུས་ཐོག་བརྟག་དཔྱད་བྱེད་དགོས་པ་རེད། གལ་སྲིད་ནང་མིའི་ནང་ན་ཚ་དེ་འགོས་མཁན་མེད་པ་ཡིན་ན། ནང་མི་ཚང་མས་སྔོན་འགོག་གི་ཁབ་ཐེངས་གསུམ་དེ་རྒྱག་རྒྱུ་དཔེ་གལ་ཆེན་པོ་རེད། སྔོན་འགོག་གི་ཁབ་དེ་ཚོ་བརྒྱབ་ཚར་ནས་ཟླ་གཉིས་ཙམ་གྱི་རྗེས་སུ། (Anti-Hts)ཞེས་པ་དེའི་ཚད་གཞིར་བལྟས་པ་ཡིན་ན། ན་ཚ་འགོག་ཐུབ་ཀྱི་འདུག་དང་མི་འདུག་ཧ་གོ་ཡི་རེད། གལ་སྲིད་སྔོན་འགོག་གི་བརྒྱ་ཆ་ཉུང་ཉུང་ཡིན་ན་ཡང་བསྐྱར་འགོག་ཁབ་ཅིག་རྒྱག་དགོས་པ་རེད།

མཆིན་པའི་གཉན་ཚད་བྷི་ཡིས་མཆིན་པ་བརྡོལ་བར་ (Compensated) དང་(De compensate)ཅེས་རིགས་གཉིས་ཡོད་པ་དང་། དང་པོ་དེར་ནད་རྟགས་གང་ཡང་ཡོད་པ་མ་རེད། གཉིས་པ་དེར་ནད་པ་མང་པོའི་གྲོད་ཁོག་ནང་ཆུ་གསོག་པ་དང་རྐང་པ་སྐྲང་བ། ཐང་ཆད་ཆོག་ཆོག་ཡོད་པ་རེད། དེ་ཚོ་མཆིན་པ་གང་ལ་གང་འཚམ་བརྡོལ་བའི་ནད་རྟགས་ཡིན་སྟབས། རྒྱུན་དུ་ཚྭ་ལ་འཛེམ་དགོས་པ་རེད། ཚྭ་ལ་འཛེམ་ཐུབ་པ་ཡིན་ན་གྲོད་ཁོག་ནང་གི་ཆུ་ཕྱིར་བཏོན་རྗེས་ཡང་བསྐྱར་གསོག་གི་མ་རེད། དེ་ནས་མཆིན་པའི་ན་ཚ་སྔོན་འགོག་ཆེད་གལ་ཆེ་ཤོས་དེ་ཟས་བཅུད་ཡག་པོའི་རིགས་དཔེར་ན། ཤ་དཀར་པོ་དེ་ཉ་ཤ་དང་བྱ་ཤ། དེ་བཞིན་སྒོང་ངའི་ནང་གི་དཀར་པོ། སྲན་མ་རིགས། ཤིང་ཏོག སྔོ་ཚལ་སོགས་ཟ་དགོས་པ་དང་། སྨན་པ་ཆེད་མཁས་པ་ཚོས་ལམ་སྟོན་གནང་བ་ལྟར་ན། མཆིན་པའི་གཉན་ཚད་ཀྱིས་གྲོད་ཁོག་སྐྲངས་བསྡད་ཡོད་མཁན་ཚོས་སྒ་སེར་སོས་པ་རྡུང་སྟེ་འོ་མའི་ནང་དུ་བླུགས་ནས་འཐུང་བ་ཡིན་ན་ཕན་ཐོགས་ཆེན་པོ་ཡོད་པ་རེད། ཅེས་བརྗོད་བྱུང་།

ཡང་གསར་འགོད་པས་ད་ལྟའི་བར་ཉམ་ཐག་ནད་པ་ག་ཚོད་ཅིག་ལ་སྨན་རིན་སོགས་ཀྱི་ཐད་རོགས་རམ་འཚོལ་ཐབས་དང་ནད་གཡོག་བྱས་པ་ཡིན་དྲིས་པར། ཉམ་ཐག་ནད་པ་དེ་འདྲ་ལོ་རྟག་པར་ཡོང་གི་འདུག མཚམས་རེར་ལོ་གཅིག་ནང་བཞི་ལྔ་དེ་འདྲ་ཡོང་གི་འདུག ནད་པ་ཁ་ཤས་ལ་རོགས་པ་བྱེད་མཁན་སུ་གང་མེད་པ་དང་། ལྷག་པར་དུ་ཁ་ཤས་ལ་ན་ཚ་སྡུག་ཅག་དེ་འདྲ་ཕོག་ཡོད་ན་ཕ་མ་སྤུན་མཆེད་ཀྱིས་ལྟ་སྐྱོང་མི་བྱེད་པ་དེ་འདྲའང་ཡོང་གི་འདུག ལྟ་སྐྱོང་བྱེད་མཁན་གཅིག་ཀྱང་མེད་པའི་ནད་པ་དེ་འདྲ་ཡོད་དུས། ང་ཚོས་མཚམས་རེར་ཅན་དྷི་སྒར་གྱི་ས་གནས་གཞོན་ནུར་སྐད་བཏང་སྟེ་རོགས་པ་བྱེད་དུ་འཇུག་གི་ཡོད། གལ་སྲིད་དངུལ་གྱི་ཐོག་ནས་དཀའ་ངལ་ཆེན་པོ་ཡོད་ན། ངས་སྐུའི་བླ་སྨན་པ་ཚེ་བརྟན་ལགས་སུ་འབྲེལ་བ་ཞུས་ཏེ། ཁོང་གིས་སྐུ་སྒེར་ཡིག་ཚང་ལ་མཇལ་ཁར་གཏང་དགོས་ཀྱི་ཡོད་ན་རེད། ༧རྒྱལ་བ་ཀརྨ་པ་མཆོག་ལ་མཇལ་ཁ་ཞུ་བར་གཏང་དགོས་ནའང་རེད། ག་རེ་བྱེད་དགོས་ནའང་རོགས་རམ་འཚོལ་ཐབས་གནང་གི་ཡོད་པ་རེད། ཡིན་ནའང་། མཚམས་རེར་དངུལ་ཕོན་ཆེན་པོ་དགོས་པ་དང་ན་ཚའང་ཛ་དྲག་ཡིན་ན་དཀའ་ལས་ཁག་པོ་ཆགས་ཀྱི་འདུག་ཟེར།

ནད་ཀྱིས་གདུང་ན་མི་ཚང་མ་རླུང་ཚ་བོ་དང་མ་འགྲིག་པ་མང་པོ་ཡོད་མཁན་ཞིག་ཏུ་རང་བཞིན་གྱིས་འགྱུར་འགྲོ་སྟབས། འདས་པའི་ལོ་ངོ་ ༢༠ མ་ཟིན་ཙམ་གྱི་རིང་ནད་པ་ཁྲི་སྟོང་བརྒལ་བར་རོགས་རམ་གནང་བའི་ཁྲོད། ཁོང་ཚོར་བསམ་ཤེས་དང་བཟོད་སྒོམ་ག་འདྲ་གནང་གི་ཡོད་པ་དང་། དེ་བཞིན་ནད་པ་མང་པོ་ཟུག་གཟེར་གྱིས་ཤིན་ཏུ་མནར་བ་མཐོང་དུས། འབྲེལ་བ་གང་ཡང་མེད་པའི་མི་ཞིག་ཡིན་ནའང་སེམས་ལ་མ་སྐྱིད་པ་ཆེན་པོ་ཡོང་ངེས་ཡིན་སྟབས། སྐབས་དེ་འདྲ་ལ་སོ་སོའི་སེམས་པ་གསོ་བར་ཐབས་ལམ་ག་རེ་འཚོལ་གྱི་ཡོད་དྲིས་པར་ཁོང་མོས། ནད་པ་མང་པོ་ཞིག་འདིར་བསླེབས་དུས་རྦད་དེ་ཕྱི་དྲགས་ནས་འབྲས་སྐྲན་ཚང་མ་ལུས་པོ་གང་སར་ཁྱབ་ཚར་བ་དེ་འདྲ་ཡོང་གི་འདུག ཡིན་ནའང་། ང་རང་ངོས་ནས་སྨན་པ་གཅིག་ལ་བསྟན་ནས་མ་ཡོང་ན་གཉིས་ལ་བསྟན། གསུམ་ལ་བསྟན་པ་སོགས་བྱས་ནས་གང་ཡོང་ཅི་ཡོང་བྱེད་ཀྱིན་ཡོད། ངས་ནམ་རྒྱུན་ཁོང་ཚོར་འདི་འདྲ་ལབ་ཀྱི་ཡོད། སྨན་པ་ཞིག་ལ་བསྟན་ཚར་ན་རྩ་བའི་བླ་མར་བསྟན་པ་དང་གཅིག་པ་རེད། ལམ་འགྲོ་ཡོང་སྲིད་པ་རེད་ལ། ལམ་འགྲོ་མི་ཡོང་བའང་བྱུང་སྲིད་པ་རེད། གང་ལྟར་སོ་སོའི་ལས་ལ་ཐུག་ཡོད་ཀྱང་ནམ་ཡང་སེམས་ཤུགས་མ་ཆགས་པ་དགོས་སྐོར་བརྗོད་ཀྱི་ཡོད།

ངས་ནད་པ་ཞིག་སྨན་ཁང་དུ་ཁྲིད་ཀྱི་ཡོད་ན་འགན་ཆ་ཚང་ང་ལ་ཡོད་སྟབས། མཚམས་རེར་ནད་པའི་གནས་སྟངས་སྡུག་ཏུ་ཕྱིན་ན་ང་ལའང་སེམས་ཁྲལ་ཞེ་དྲགས་འདུག དཔེར་ན། སྔོན་མ་སྐལ་བཟང་བཀྲ་ཤིས་ཟེར་བའི་ནད་པ་ཤ་སྐམ་པོ་སྐམ་པོ་ཞིག་ཡོད། ཁོ་བོ་ཡུན་རིང་ན་ནས་གཤག་བཅོས་ཐེངས་གཉིས་པ་བྱེད་སྐབས། ང་ནི་སྙིང་ཞེ་དྲགས་རྗེ་ནས་མང་པོ་ངུས་པ་ཡིན། ཡང་སྐལ་བཟང་ཟེར་བའི་ནད་པ་ཞིག་ལ་སྨན་པས་སྨན་རིན་ཆེན་པོ་འཁུར་ཤོག་ལབ་སྟེ་ང་ཚོ་ཚང་མ་ཞེ་དྲགས་ངུས་པ་ཡིན། གང་ལྟར་ནད་པ་དེ་ཚོས་ང་ལ་རེ་བ་ཞིག་བརྒྱབ་ནས་ཡོང་བ་ཡིན་སྟབས། མཚམས་མཚམས་ལ་ཁོང་ཚོའི་གནས་སྟངས་སྡུག་པོ་ཆགས་དུས་མང་པོ་ངུ་དགོས་བྱུང་གི་འདུག་ཅེས་ཟེར།

ཡུན་རིང་ནད་པ་མང་པོར་འབྲེལ་འདྲིས་གནང་བའི་ཉམས་མྱོང་བརྒྱུད། བོད་རིགས་སྨན་པ་ཚོའི་ངོས་ནས་རྒྱུན་དུ་ཐུགས་གཟབ་གནང་དགོས་པ་དང་ནད་པ་ཚོར་ལམ་སྟོན་གནང་ཕྱོགས་ཐད་ག་རེ་ཞུ་འདོད་ཡོད་དྲིས་པར། ང་ཚོའི་སྤྱི་ཚོགས་ནང་བརྟག་དཔྱད་གཅིག་ཀྱང་མ་བྱས་པར་ཡུན་རིང་པོར་བོད་སྨན་དང་རྒྱ་སྨན་གཉིས་ཟུང་འབྲེལ་བྱས་ནས་ཟ་མཁན་མང་པོ་འདུག དེ་འདྲ་བྱས་པ་ཡིན་ན་སྨན་གྱིས་སོ་སོའི་ན་ཚ་ལ་ཕན་གྱི་ཡོད་མེད་ཧ་གོ་ཡི་མ་རེད་ལ། སྟབས་མ་ལེགས་ན་གནོད་པའི་ཉེན་ཁའང་ཡོད་པ་རེད། དེར་བརྟེན་ངས་བསམ་ན་རྒྱ་སྨན་བོད་སྨན་ག་རེ་ཟ་བ་ཡིན་ནའང་། དང་པོར་ཁྲག་བརྟག་དཔྱད་དང་གློག་པར་རྒྱག་པ་སོགས་བརྟག་དཔྱད་ཡག་པོ་བྱས་ཏེ། ན་ཚ་ངོས་ཟིན་རྗེས་གཞི་ནས་སྨན་གཏང་རྒྱུ་ཧ་ཅང་གལ་ཆེན་པོ་རེད། སྨན་པ་ཚོའི་ངོས་ནས་ཀྱང་ནད་པའི་རྩར་བརྟག་སྐབས་དོགས་པ་ཅུང་ཙམ་བྱུང་ན། ཁྲག་བརྟག་དཔྱད་དང་གློག་པར་རྒྱག་དགོས་པའི་ལམ་སྟོན་གནང་རྒྱུ་གལ་ཆེན་པོ་མཐོང་གི་འདུག ཅེས་བརྗོད་བྱུང་།

ཁོང་མོས་ཆང་ས་ག་རེ་བྱས་ནས་མ་བརྒྱབ་པ་དང་། གལ་སྲིད་ཆང་ས་བརྒྱབ་པ་ཡིན་ན་དཀའ་ངལ་ག་རེ་འཕྲད་ས་རེད་དྲིས་པར། ང་རང་ནད་པ་ཚོར་རོགས་པ་བྱེད་པར་དབྱིངས་འདུག གལ་སྲིད་ཆང་ས་བརྒྱབ་པ་ཡིན་ན། སོ་སོའི་ནང་དང་ཕྲུ་གུའི་ཆེད་དུ་རྟག་པར་དཀའ་ལས་རྒྱག་དགོས་པ་རེད། ང་རྟག་པར་ཞོགས་པ་ཆུ་ཚོད་ ༨།༣༠ ནས་ཕྱི་ལོགས་སུ་ཕྱིན་ཏེ། དགོང་མོའི་ཆུ་ཚོད་ ༡༠།༣༠ ཟིན་སྐབས་གཞི་ནས་ཁྱིམ་དུ་སླེབ་ཐུབ་ཀྱི་ཡོད་དུས། ཆང་ས་བརྒྱབ་ནས་ཡོང་ཐབས་མི་འདུག ཡང་མིན་ན་སོ་སོའི་ལྟ་བ་དང་མཐུན་པའི་མི་ཞིག་དགོས་པ་རེད། ཕར་ཕྱོགས་དེའང་སྤྱི་ཚོགས་ལ་ཞབས་ཞུ་ཞུ་མཁན་ཞིག་ཡིན་ན་གནས་ཚུལ་ལོགས་ཀ་རེད། དེ་མིན་ཡོང་ཐབས་མི་འདུག་པས་ཆང་ས་མ་བརྒྱབ་ན་ཡག་ས་རེད་བསམ་སོང་ཞེས་ཟེར།

ང་ཚོའི་སྤྱི་ཚོགས་ནང་སྒྲིག་འཛུགས་ཀྱི་གོ་སྒྲིག་འོག འཕྲོད་བསྟེན་སོགས་སྤྱི་ཚོགས་ཞབས་ཞུའི་ཕྱག་ལས་གནང་མཁན་གང་འཚམ་ཡོད་པ་རེད། ཡིན་ནའང་། སྒེར་ནས་ཉིན་མ་ནས་ཟླ་བ་དང་། ཟླ་བ་ནས་ལོ་བྱས་ཏེ་དང་བླངས་ཞབས་ཞུ་གནང་མཁན་ཧ་ཅང་དཀོན་པོ་རེད། དེའི་རྒྱུ་རྐྱེན་གཙོ་བོ་ག་རེར་ཐུག་ཡོད་དྲིས་པར་ཁོང་མོས། མི་ཚང་མས་བསམ་བློ་གཏོང་ཕྱོགས་ལོགས་ཀ་རེད། ང་རང་འདྲ་བོ་ཡིན་ན། ནང་གི་རྒན་ཤོས་ཡིན་པས་དངོས་གནས་བྱས་ན་ཁྱིམ་དུ་སོང་ནས་ཕ་མ་གཉིས་ཀར་ཞབས་ཞུ་ཞུ་བའི་འགན་ཡོད་ཀྱང་།  ངའི་ཕ་མ་གཉིས་སྔ་མོ་ནས་གྲོངས་ཚར་སྟབས། སྤྱི་ཚོགས་ཞབས་ཞུའི་ལས་ཀ་ཞིག་བྱེད་ཐུབ་ན་འགྲིག་ས་རེད་བསམ་སོང་། ང་ཚོའི་སྤྱི་ཚོགས་ནང་དང་བླངས་ཞབས་ཞུ་ཞུ་མཁན་དཀོན་པོ་ཡིན་པ་དེ་ཁག་ཡོད་པ་མ་རེད། མང་པོ་ཞིག་གིས་ཆང་ས་བརྒྱབ་ཚར་དུས་སྤྱི་ཚོགས་ཞབས་ཞུ་ཞུ་རྒྱུ་ཁག་པོ་ཞེ་དྲགས་རེད། སོ་སོའི་ནང་སོགས་ཚང་མ་བློས་གཏོང་དགོས་པ་རེད། ང་འདྲ་བོ་ཡིན་ན། ཆང་ས་བརྒྱབ་ཡོད་པ་མ་རེད། ག་བར་ག་དུས་ཤིག་ལ་ཤོག་ལབ་པ་ཡིན་ནའང་འགྲོ་ཆོག་ཆོག་རེད། ཅེས་བརྗོད་བྱུང་།

ཡང་ཁོང་མོས་བོད་པའི་སྤྱི་ཚོགས་ནང་འཕྲོད་བསྟེན་དང་འབྲེལ་ནས་འབོད་སྐུལ་གནང་དོན། ང་ཚོ་སུ་ཡིན་ནའང་ལོ་རེའི་ནང་གཟུགས་པོར་བརྟག་དཔྱད་ཐེངས་གཅིག་བྱ་རྒྱུ་དཔེ་གལ་ཆེན་པོ་འདུག གཟུགས་པོར་བརྟག་དཔྱད་ལབ་དུས་ཡང་དྲ་རྒྱས་པོ་དེ་འདྲ་དགོས་པ་མ་རེད། གཙོ་བོ་ཁྲག་མང་ཉུང་ཚད་གཞི་ག་འདྲ་ཡོད་མེད་དང་། མཆིན་པ་དང་མཁལ་མས་ལས་ཀ་ཏག་ཏག་བྱེད་ཀྱི་ཡོད་མེད། སྙིང་གི་འཕར་ཚད་ཏག་ཏག་ཡོད་མེད་བཅས་བརྟག་དཔྱད་ཅིག་བྱས་པ་ཡིན་ན་རོབ་ཙམ་ཧ་གོ་འགྲོ་ཡི་རེད། ཅན་དྷི་སྒར་ལ་ཡོང་བའི་ནད་པ་མང་པོ་ཞིག་ཕྱི་དྲགས་པ་རྐྱང་རྐྱང་རེད་འདུག འབྲས་སྐྲན་ཡིན་ན་རིམ་པ་གསུམ་པ་བཞི་པར་བསླེབས་ཏེ་བཅོས་ཐབས་མེད་པའི་གནས་སྟངས་ཆགས་འདུག དེར་བརྟེན་ལོ་རེར་གཟུགས་པོར་བརྟག་དཔྱད་ཐེངས་གཉིས་མ་བྱུང་ནའང་ཐེངས་གཅིག་ངེས་པར་དུ་བྱ་རྒྱུ་ཧ་ཅང་གལ་ཆེན་པོ་རེད།

ང་ཚོའི་ནད་པ་ཁ་ཤས་ཀྱིས་ཨ་ཅག ངའི་གཟུགས་པོ་ཆ་ཚང་འཕྲུལ་ཆས་ནང་བཅུག་རྒྱུ་ཡོད་པ་དེ་བྱ་ཡི་ཡིན་ལབ་རྒྱུར་དགའ་བོ་ཡོད་པ་རེད། ཡིན་ནའང་། དེ་འདྲ་བྱས་ན་གཏན་ནས་ཡོང་གི་མ་རེད། བརྟག་དཔྱད་ཟེར་དུས་རབ་དང་རིམ་པ་བརྒྱུད་འཕྲུལ་ཆས་ཆེན་པོའི་ནང་འཛུལ་དགོས་དང་མི་དགོས་བལྟ་དགོས་པ་རེད་མ་གཏོགས། གཟུགས་པོའི་ནང་ཅི་ཡང་མེད་པར་འཕྲུལ་ཆས་ཆེན་པོའི་ནང་འཛུལ་བ་ཡིན་ན་དངུལ་གྱིས་ཞལ་འདེབས་བརྒྱབ་པ་དང་གཅིག་པ་རེད།

དེང་སང་ནད་པ་མང་པོ་ཕྱོགས་མཐའ་ཁག་ནས་འདིར་ཡོང་གི་ཡོད་སྟབས། ནད་པ་སུ་ཡིན་ནའང་ཉིན་གཅིག་གཉིས་ཀྱི་སྔོན་ལ་ངའི་སྐད་འཕྲིན་ཐོག་འབྲེལ་བ་གནང་བ་ཡིན་ན། ང་ལ་སྟབས་བདེ་བོ་ཆགས་ཀྱི་འདུག གང་ཡིན་ཟེར་ན། ངས་སྨན་པར་སྟོན་དགོས་པའི་ནད་པ་རྣམས་སྔར་ཉིན་ནས་གྲ་སྒྲིག་བྱེད་ཀྱི་ཡོད། གལ་སྲིད་གྲ་སྒྲིག་གང་ཡང་མེད་པར་གློ་བུར་དུ་ནད་པ་ཞིག་སླེབ་སོང་ན་ངའི་འཆར་གཞི་ཚང་མ་འཁྲུག་འགྲོ་ཡི་འདུག་ལ། ནད་པ་གཞན་རྣམས་སྨན་པར་སྟོན་རྒྱུ་ལའང་དཀའ་ངལ་འཕྲད་ཀྱི་འདུག ཅེས་ཟེར།

མཇུག་ཏུ་ཕྱོགས་མཐའ་གང་སར་ཡོད་པའི་ཨ་ཅག་ལགས་ཀྱི་ནད་པ་ཚོར་བཅར་འདྲི་འདི་བརྒྱུད་སྐད་ཆ་ག་རེ་བཤད་འདོད་ཡོད་དྲིས་པར། རྒྱ་གར་ལྷོ་ཕྱོགས་སོགས་སུ་སྡོད་མཁན་ཡིན་ན་ཅན་དྷི་སྒར་ལ་ཡོང་རྒྱུ་ཁག་པོ་ཡིན་སྟབས། དཀའ་ངལ་ག་རེ་ཡོད་པ་ཡིན་ནའང་ཐད་ཀར་ངའི་ཁ་པར་ཨང་གྲངས་(༠༩༨༡༥༢༢༣༥༥༤) ཐོག་འབྲེལ་བ་བྱས་ན་འགྲིག་གི་རེད་ལ། མཚམས་རེར་ཁྲག་བརྟག་དཔྱད་སོགས་བརྟག་དཔྱད་ཀྱི་མཇུག་འབྲས་རིགས་ཧ་མ་གོ་བའི་དཀའ་ངལ་དེ་འདྲ་ཡོད་ན།  ངའི་སྐད་འཕྲིན་ཁ་བྱང་(Tsedoka chandigarh)ཐོག་བརྟག་དཔྱད་མཇུག་འབྲས་ལ་པར་བརྒྱབ་ནས་གཏང་ཡོང་ནའང་འགྲིག་པ་རེད།

ཕྱོགས་མཐའ་ཁག་ལ་ཡོད་པའི་ནད་པ་ཚོར་གཙོ་བོ་ག་རེ་ཞུ་འདོད་བྱུང་ཟེར་ན། མཆིན་པའི་གཉན་ཚད་བྷི་ཡིས་མཆིན་པ་འཕྲོ་བརླག་ཏུ་ཕྱིན་པའི་ནད་པ་མང་པོ་ཡོད་སྟབས། རྒྱ་གར་གྱི་མཆིན་པའི་སྨན་དེ་ཧ་ཅང་ཕན་པོ་ཡོད་པས་སྨན་དེ་ཟ་བཞིན་ཟ་བཞིན་མཆིན་པ་འཕྲོ་བརླག་དང་མཆིན་པར་སྐྲན་ཆགས་པ་སོགས་རྩ་བ་ཉིད་ནས་ཡོང་གི་མི་འདུག ཟ་མ་དང་མཉམ་དུ་རིལ་བུ་གཅིག་བཟའ་རྒྱུར་དཀའ་ངལ་གང་ཡང་ཡོད་པ་མ་རེད། སྡོད་ས་ཐག་རིང་པོ་ཡིན་ན་ཟླ་བ་གསུམ་རེའི་ནང་བརྟག་དཔྱད་བྱེད་དུ་ཡོང་མ་ཐུབ་ཀྱང་གཙོ་བོ་སྨན་ཆད་མེད་དུ་ཟ་དགོས་པ་དེ་ཧ་ཅང་གལ་ཆེན་པོ་རེད། ཅེས་བརྗོད་བྱུང་།

གསར་འགོད་པ། པདྨ་མཚོ།