འབྲི་རུ་རྫོང་ཁོངས་སུ་ཡོད་པའི་བྱ་མདའ་དགེ་ལྡན་མཁའ་སྤྱོད་གླིང་གི་བཙུན་མ་ ༡༠༦ ཕྱིར་འབུད་བཏང་ཡོད་པ་མ་ཟད། ཤུལ་དུ་ལྷག་པའི་བཙུན་མ་རྣམས་ཀྱི་བཙུན་ཤག་མང་ཆེ་བ་གཏོར་བཤིག་བཏང་སྟེ་དཀའ་ངལ་ཆེན་པོ་འཕྲད་ཀྱི་ཡོད་འདུག
འབྲི་རུ་རྫོང་གི་བོད་རིགས་དཔོན་པོ་སངས་རྒྱས་བཀྲ་ཤིས་ཟེར་བ་ཞིག་གིས་སྣེ་ཁྲིད་དེ། འབྲི་རུ་རྫོང་ཁོངས་སུ་ཡོད་པའི་བྱ་མདའ་དགེ་ལྡན་མཁའ་སྤྱོད་གླིང་གི་བཙུན་མ་ ༡༠༦ དགོན་ནས་ཕྱིར་འབུད་བཏང་སྟེ། སྤེན་པ་རྫོང་དང་སོག་རྫོང་། འབྲི་རུ་རྫོང་བཅས་སུ་ཡོད་པའི་གྲོང་ཚོ་ཁག་གི་མགོ་ཁྲིད་བརྒྱུད་རང་ཁྱིམ་དུ་རྩིས་སྤྲོད་བྱས་ཡོད་པ་མ་ཟད། རྒྱལ་ཁབ་ཀྱི་རོགས་རམ་འོག་བཙུན་ཤག་གསར་པ་རྒྱག་རྒྱུ་ཡིན་སྐོར་བརྗོད་དེ། དགོན་པའི་སྒྲིག་ཁོངས་སུ་ཡོད་པའི་བཙུན་མ་རྣམས་ཀྱི་བཙུན་ཤག་ཀྱང་མང་ཆེ་བ་གཏོར་བཤིག་བཏང་སྟེ་འདུག་ས་འདུག་ཡུལ་མེད་པར་དཀའ་ངལ་ཆེན་པོ་འཕྲད་ཀྱི་ཡོད་འདུག
དགེ་ལྡན་མཁའ་སྤྱོད་གླིང་ནས་ཡིན་ཞིང་ད་ལྟ་རྒྱ་གར་ལྷོ་ཕྱོགས་བྱང་ཆུབ་ཆོས་གླིང་དུ་སློབ་གཉེར་གནང་བཞིན་ཡོད་པའི་བཙུན་མ་ཐུབ་བསྟན་པདྨོ་ལགས་ཀྱིས་འདི་གའི་གསར་འགོད་པར་བརྗོད་དོན། ང་ཚོའི་དགོན་པ་དེ་དངོས་གནས་གཙང་མ་གཙང་རྐྱང་གི་དགོན་པ་ཞིག་ཡིན་སྟབས། རྒྱ་གཞུང་གི་སྣང་བར་མ་སོང་ནས་གཏོར་བཤིག་བཏང་འདུག ཕྱིར་འབུད་བཏང་བའི་བཙུན་མ་ ༡༠༦ དེ་རང་ཁྱིམ་དུ་བསྐྱལ་ནས་ཁ་འདོན་འདོན་པ་དང་གྲྭ་ཆས་གྱོན་པ་ཡན་ཆད་ཀྱང་བྱེད་ཆོག་གི་མི་འདུག་ལབ་བྱུང་། ཞེས་དང་།
ཕྱི་ཟླ་ ༡༠ ཚེས་ ༥ ཉིན་ནས་བཟུང་འབྲེལ་ཡོད་ས་གནས་མགོ་ཁྲིད་ཚོས། དགོན་ནང་དུ་ཡོད་པའི་བཙུན་མ་ཚོར་ཚོགས་འདུ་ཡང་ཡང་བསྡུས་ཏེ། སྲིད་གཞུང་གི་རོགས་རམ་འོག་བཙུན་ཤག་གསར་པ་རྒྱག་རྒྱུ་ཡིན་པར་ཁ་གཡར་ནས་བཙུན་ཤག་མང་ཆེ་བ་གཏོར་བཤིག་བཏང་ཡོད་སྟབས། ད་ལྟ་ཤུལ་དུ་ལྷག་པའི་བཙུན་རྣམས་ཀྱང་འདུག་ས་འདུག་ཡུལ་མེད་པར་དཀའ་ངལ་ཆེན་པོ་འཕྲད་ཀྱི་འདུག དགོན་པའི་གཡས་གཡོན་གྱི་གྲོང་ཚོའི་ནང་ཕྱིན་ན། སོ་སོའི་ནང་མིན་ཚེ་གྲོང་ཚོའི་མགོ་ཁྲིད་ཀྱི་ཆོག་མཆན་ཡི་གེ་འདྲ་པོ་དགོས་ཀྱི་ཡོད་འདུག ད་ལྟའི་ཆར་སྲིད་གཞུང་གིས་ས་གནས་ཀྱི་དགོན་གྲོང་ནང་དམ་དྲག་ཆེན་པོ་བྱེད་ཀྱི་ཡོད་སྟབས་པར་དང་གནས་ཚུལ་ཏོག་ཙམ་རེ་མ་གཏོགས་ཁོང་ཚོས་ཞེ་དྲགས་ལབ་ཕོད་ཀྱི་མི་འདུག ཐ་ན་མི་གཉིས་མཉམ་དུ་སྐད་ཆ་བཤད་ནས་འགྲོ་བཅུག་གི་མི་འདུག་ཟེར། ཅེས་བརྗོད་བྱུང་།
རྒྱ་གཞུང་གིས་འགྲེལ་བཤད་གང་འདྲ་བརྒྱབ་ཡོད་མེད་ཐད་ཁོང་མོས། སྲིད་གཞུང་གི་མགོ་ཁྲིད་ཚོས་བཙུན་ཤག་གཏོར་སའི་ས་ཆ་དེ་རང་ལ་གཞུང་གིས་བཙུན་ཤག་རྒྱག་རྒྱུ་ཡིན་པ་སོགས་སྒྲིག་ཁོངས་ཀྱི་བཙུན་མ་ཚོར་རོགས་རམ་ཞེ་དྲགས་བྱ་རྒྱུ་ཡིན་སྐོར་དང་། རྒན་ཡོལ་གྱི་བཙུན་མ་ཚོར་རྒན་གསོ་ཁང་རྒྱག་རྒྱུ་དང་། སྒྲིག་ཁོངས་ན་མེད་པའི་བཙུན་མ་ཚོར་སློབ་གྲྭ་འཛུགས་རྒྱུ་ཡིན་ལུགས་སོགས་ཁ་ནས་སྙིང་རྗེ་མོ་ལབ་འདུག་ཀྱང་། དེ་ཚོ་ཚང་མ་རྫུན་མ་རྫུན་རྐྱང་རེད་མགོ་སྐོར་གཏོང་གི་ཡོད་པ་རེད་ཅེས་ཟེར།
ཁོང་མོར་ཡང་དེ་སྔོན་དཀའ་ངལ་མང་པོ་འཕྲད་པའི་སྐོར་ལ། སྔོན་མ་ང་རང་ཡིན་ནའང་། དགོན་པ་དེའི་ནང་ལོ་ ༨ ཙམ་ལ་བསྡད་པ་དང་། སྐབས་དེར་རྒྱ་གཞུང་གིས་རྒྱལ་གཅེས་ཆོས་གཅེས་ཟེར་བའི་ཚོགས་འདུ་རྐྱང་རྐྱང་བསྡུས་ཏེ། ༧སྐྱབས་མགོན་རིན་པོ་ཆེར་དགག་པ་རྒྱག་དགོས་པ་རེད་ཅེས་ལས་དོན་རུ་ཁག་ཟེར་བའི་མི་སྣ་བཅུ་བཅོ་ལྔ་དེ་འདྲ་ཡོང་གི་རེད། ང་ཚོས་རྒྱ་མི་ལབ་བསྡད་པ་རེད་མ་གཏོགས་དངོས་གནས་བྱས་ན་སྐབས་དེར་ལས་དོན་རུ་ཁག་གི་མི་སྣའི་ནང་གཞིས་ཀ་རྩེ་ནས་ཡིན་པའི་རྒྱ་མི་ཞིག་མ་གཏོགས་གཞན་ཚང་མ་བོད་པ་རེད་འདུག བཙན་བཀའ་འདྲ་མི་འདྲ་གཏོང་མཁན་ཡང་བོད་པ་རང་རེད། ཁོ་ཚོས་ལས་སླ་བོ་ཞེ་དྲགས་རེད། ༧ཏཱ་ལའི་བླ་མར་དགག་པ་རྒྱོབས་དང་འགྲིག་ཚར་བ་རེད་ཅེས་ཨུ་ཚུགས་བརྒྱབ་བྱུང་། ཡིན་ནའང་། ང་ཚོས་ཁ་ཁྱོན་ནས་མ་གྲགས་པར་ངུས་ནས་བསྡད་པ་མ་ཟད། བདུན་ཕྲག་གཅིག་གཉིས་ཞིག་ལ་ཁ་ལག་མ་ཟོས་སྟབས། ཁ་ནས་ཁྱེད་རང་ཚོས་ཁ་ལག་མ་ཟོས་ན་ང་ཚོའི་སེམས་ནས་ཀྱང་སྐྱིད་པོ་མི་འདུག་ཅེས་བཤད་ཀྱི་འདུག ཡིན་ནའང་། མཐར་གཏུག་ན་ཁོ་ཚོ་སོ་སོའི་ལྟོ་གོས་ཀྱི་ཆེད་དུ་རེད། ང་ཚོར་སྡུག་པོ་ག་ཚོད་བཏང་ན་ཁོ་རང་ཚོར་གླ་ཕོགས་སོགས་ཀྱི་ཁེ་བཟང་མང་བ་རག་གི་ཡོད་རེད། ང་རང་ཚོ་བོད་པས་བོད་པར་སྡུག་པོ་བཏང་ནས་བསྡད་ཡོད་པ་རེད།
དགོན་པའི་ནང་དུ་ཚོགས་འདུ་རྐྱང་རྐྱང་བསྡུས་ཏེ་བསླབ་པ་སློབ་གཉེར་གང་ཡང་བྱེད་ཐུབ་ཀྱི་མི་འདུག་པས། དེ་འདྲ་བྱས་ནས་འདུག་པ་ལས་ཕར་ཚུར་ཞིག་ལ་ཕྱིན་ན་ཡག་ས་རེད་བསམ་ནས་རོགས་པ་ཨ་ནེ་ཞིག་དང་མཉམ་དུ་བཙན་བྱོལ་དུ་ཡོང་བ་ཡིན། ང་རང་ད་ལྟ་དགོན་པ་ནང་སྐྱིད་པོ་འདུག་སྟེ་ཕ་ཡུལ་གྱི་དགོན་པར་དཀའ་ངལ་ཆེན་པོ་འཕྲད་དུས། སེམས་ཁྲལ་བྱས་ནས་འདུག་རྒྱུ་མ་གཏོགས་ཐབས་ཤེས་གང་ཡང་མི་འདུག ཅེས་ཟེར།
བཙུན་དགོན་དེར་སྔོན་ཆད་བཙུན་མ་ག་ཚོད་ཡོད་པ་དང་། ད་ལྟ་ག་ཚོད་ལྷག་ཡོད་དྲིས་པར་ཁོང་མོས། སྔོན་མ་ང་དགོན་པའི་ནང་དུ་ཡོད་སྐབས། ཁྱོན་བཙུན་མ་ ༢༠༠ ལྷག་ཡོད་ཀྱང་། ཕྱིས་སུ་རྒྱ་གཞུང་གིས་མི་འབོར་མང་དྲགས་འདུག ཁོ་ཚོར་མང་ཚིག་མི་དགོས་ཉུང་ཚིག་དགོས་ཞེས་བཙུན་མ་ལོ་ ༤༠ ནས་ ༥༠ ཟིན་པ་ཚོ་ངེས་པར་དུ་རྒན་གསོ་ཁང་དུ་འགྲོ་ལུགས་སོགས་བརྗོད་དེ་བཙུན་མ་ ༤༠ ཙམ་ལས་བཞག་མེད་པ་དང་། ཕྱིས་སུ་དགོན་པའི་ངོས་ནས་ང་ཚོར་བཙུན་མ་ཉུང་དྲགས་འདུག་ཅེས་ཞུ་བ་བརྒྱབ་པར་བརྟེན། དགོན་པའི་ཕྱི་ནང་བདག་པོ་རྒྱག་མཁན་སོགས་བཙུན་མ་ ༢༥ མང་དུ་བཏང་སྟེ། ད་ལྟའི་ཆར་དགོན་པའི་སྒྲིག་ཁོངས་སུ་ཡོད་པའི་བཙུན་མ་ ༦༠ ཙམ་ལྷག་ཡོད་ས་རེད། ཡིན་ནའང་། ཤུལ་དུ་ལྷག་པའི་བཙུན་མ་ཁ་ཤས་སེམས་སྡུག་གིས་སྙིང་ན་ནས་གྲོངས་བ་དང་། དགོན་པའི་ནང་གི་དམ་དྲག་བཟོད་མ་ཐུབ་པར་སྐྱ་སར་བབས་པའི་གནས་ཚུལ་ཡང་བྱུང་འདུག ཅེས་བརྗོད་བྱུང་།
ཡང་ཕྱི་ཕྱོགས་ཀྱི་བོད་མི་ཞིག་གིས་འདི་གར་གོང་གི་གནད་དོན་དེའི་སྐོར་གནས་ཚུལ་མཁོ་སྤྲོད་གནང་བའི་ནང་། བོད་ཟླ་ ༨ ཚེས་ ༡༨ ནས་ ༢༠ (ཕྱི་ཟླ་ ༩ ཚེས་ ༣༠ ནས་བཅུ་པའི་ཚེས་ ༢ )ཉིན་གྲངས་གསུམ་རིང་ས་གནས་མགོ་ཁྲིད་ཚོ་བྱ་མདའ་དགེ་ལྡན་མཁའ་སྤྱོད་གླིང་དུ་ཡོང་སྟེ། བཙུན་དགོན་གྱི་གསེར་དངུལ་ལས་གྲུབ་པའི་རོལ་ཆའི་རིགས་དང་། ལྷ་སྐུ་གསུང་རབས་རྣམས་ས་གནས་སྲིད་གཞུང་གིས་བདག་བཟུང་བྱས་ཡོད་པ་མ་ཟད། ཕྱི་ཟླ་ ༡༠ ཚེས་ ༥ ཉིན་ནས་བཟུང་ས་གནས་མགོ་ཁྲིད་ཚོས་དགོན་པའི་སྒྲིག་ཁོངས་སུ་ཡོད་པའི་བཙུན་མ་རྣམས་ལ་ཚོགས་འདུ་ཡང་ཡང་བསྡུས་ཏེ། ༧གོང་ས་མཆོག་ལ་མཚན་སྨོད་ཞུ་དགོས་པ་དང་རྒྱལ་གཅེས་ཆོས་གཅེས་ཀྱི་བསམ་བློ་སྐྱེད་སྲིང་དགོས་ལུགས་ཀྱི་བཙན་བཀའ་བཏང་བ་སོགས། ད་ལྟ་དགོན་སྡེ་གཉིས་ཀྱི་སྡུག་བསྔལ་ནི་བསམ་ཡུལ་ལས་འདས་པ་ཞིག་ཡིན་པ་མ་ཟད། ཕྱི་ལོ་ ༡༩༥༩ ལོ་ལྟ་བུའི་ཛ་དྲག་གི་གནས་སྟངས་མངོན་སུམ་ངང་མིག་མཐོང་ལག་ཟིན་དུ་གྱུར་ཡོད་པ་དང་། དགོན་པའི་ལྷ་ཁང་མན་ཆད་ཀྱི་བཙུན་ཤག་ཚང་མ་གཏོར་བཤིག་བཏང་ཚར་ཡོད་པ་མ་ཟད། ལྷ་ཁང་ཡན་ཆོད་ཀྱི་བཙུན་ཤག་ཁ་ཤས་ཀྱང་གཏོར་ཚར་ཡོད་ལ། ཆུ་ཕར་རྒྱབ་ཀྱི་ཁང་པ་རྣམས་ཀྱང་གཏོར་འཆར་ཡོད་སྐོར་དང་། བྱ་མདའ་དགོན་གྱི་ཕྱིར་འབུད་བཏང་བའི་བཙུན་མ་རྣམས་ཀྱི་ཁང་པ་མང་པོ་དགོན་པ་ལ་ཕུལ་ཀྱང་། སྲིད་གཞུང་གིས་གཏོར་བཤིག་བཏང་སྟེ་ཤིང་ཆ་རྣམས་བན་དཀར་གྲོང་ཚོའི་མགོ་ཁྲིད་དང་ནགས་ལས་བ་ཚོས་གཅིག་ཏུ་སྤུངས་ཏེ་དབོར་འདྲེན་བྱ་འཆར་ཡོད་སྐོར་བརྗོད་འདུག
གསར་འགོད་པ། པདྨ་མཚོ།
