དེ་རིང་འཛམ་གླིང་གཉན་ནད་རེག་དུག་གི་ཉིན་མོ་དང་བསྟུན་བཙན་བྱོལ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གཙོས་གཞུང་འབྲེལ་མ་ཡིན་པའི་ཚོགས་པ་ཁག་ཅིག་གིས་གཉན་ནད་རེག་དུག་གི་ཉིན་མོ་སྲུང་བརྩི་དང་འབྲེལ་མི་མང་ལ་གོ་རྟོགས་སྤེལ་བཞིན་འདུག
དེ་རིང་ཞོགས་པ་ཆུ་ཚོད་ ༩།༣༠ སྟེང་བཞུགས་སྒར་དྷ་རམ་ས་ལའི་མེག་གྷན་བཞི་མདོ་རུ། བཙན་བྱོལ་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁང་གིས་གཙོས་ས་གནས་བུད་མེད་ལྷན་ཚོགས་དང་ཀུན་ཕན་ཚོགས་པ་བཅས་མཉམ་རུབ་ཐོག་འཛམ་གླིང་གཉན་ནད་རེག་དུག་གི་ཉིན་མོ་སྲུང་བརྩི་བྱས་སོང་བ་དང་། གཉན་ནད་རེག་དུག་ནི་སྡང་པོ་བཞིན་ཡལ་ག་རྒྱས་ཏེ་འཛམ་གླིང་གང་སར་དར་ཁྱབ་འགྲོ་བཞིན་ཡོད་པའི་མཚོན་རྟགས་སུ། ཁོང་ཚོས་སྡང་པོ་ཞིག་བཙུགས་ནས་དེའི་ཐོག་ལ་གཉན་ནད་རེག་དུག་གི་མཚོན་རྟགས་འདྲ་མིན་དང་སྲུང་ཤུབས་སོགས་བཀལ་ནས་ཁྱབ་བསྒྲགས་བྱས་སོང་བ་དང་། ཉིན་རྒྱབ་ནོར་གླིང་དུ་ཤེས་རབ་དགའ་ཚུལ་སློབ་གླིང་གི་སློབ་ཕྲུག་ཚོས་གཉན་ནད་རེག་དུག་གི་འཁྲབ་སྟོན་བྱེད་བཞིན་ཡིན་འདུག དེ་བཞིན། བདེ་ལེགས་སྨན་ཁང་དང་ལྷ་སྤྱི་ཚོགས་ཞབས་ཞུ་ཚོགས་པ། དྷ་ས་རོ་ཊ་རེ་སྤྱི་ཚོགས་ཞབས་ཞུ་ཁང་ (Rotary Club Dharamshala) བཅས་མཉམ་འབྲེལ་ཐོག དེ་རིང་སྔ་དྲོར་མེག་གྷན་བཞི་མདོ་རུ་འཛམ་གླིང་གཉན་ནད་རེག་དུག་ཉིན་མོ་སྲུང་བརྩི་གནང་བ་དང་འབྲེལ། མི་མང་ལ་གཉན་ནད་རེག་དུག་གི་རྒྱུན་ཤེས་ཡིག་ཆ་འགྲེམས་སྤེལ་བཅས་གནང་སོང་།
སྐབས་དེར་ཀུན་ཕན་ཚོགས་པའི་འགན་འཛིན་སྤྱི་འཐུས་ཟླ་བ་ཚེ་རིང་ལགས་ཀྱིས་འདི་གའི་གསར་འགོད་པར་བརྗོད་རྒྱུར། ང་ཚོས་འཛམ་གླིང་གཉན་ནད་རེག་དུག་ལོ་ལྟར་སྲུང་བརྩི་བྱེད་བཞིན་ཡོད་པ་དང་། ད་ལོར་འཕྲོད་བསྟེན་ལས་ཁུངས་དང་ས་གནས་བུད་མེད་ལྷན་ཚོགས། ཀུན་ཕན་ཚོགས་པ་བཅས་མཉམ་འབྲེལ་ཐོག་ལས་འགུལ་སྤེལ་གྱི་ཡོད། སྤྱིར་བཏང་ང་ཚོས་ལས་འགུལ་ག་རེ་སྤེལ་གྱི་ཡོད་ནའང་གཞུང་འབྲེལ་མིན་པའི་ཚོགས་པ་ཚང་མར་འབྲེལ་བ་བྱེད་ཀྱི་ཡོད། དཔེར་ན། ལྷ་སྤྱི་ཚོགས་ཞབས་ཞུ་ལྟ་བུ་ཡིན་ན་ཐོག་མར་ང་ཚོས་འབྲེལ་བ་ཞུས་ཀྱང་ལས་འགུལ་སྤེལ་གྱི་མིན་གསུངས་སོང་། ཡིན་ཡང་ད་ལྟ་ཟུར་དུ་ལས་འགུལ་ཞིག་སྤེལ་བཞིན་འདུག དེ་ངས་ཧ་གོ་མ་སོང་། སྤྱིར་བཏང་ང་ཚོས་མཉམ་དུ་ལས་ཀ་བྱེད་པར་ཐབས་ཤེས་བྱེད་བཞིན་ཡོད། ཅེས་དང་།
ཡང་ཁོང་གིས་མུ་མཐུད་དུ་ལས་འགུལ་ག་རེ་གནང་ཡོད་མེད་སྐོར་ལ། དེ་རིང་གཉན་ནད་རེག་དུག་གི་མཚོན་རྟགས་ཆེད་དམིགས་བསལ་གྱི་ཤིང་སྡོང་ཞིག་བཟོས་ཏེ། དེའི་ཐོག་ལ་གཉན་ནད་རེག་དུག་གི་མཚོན་རྟགས་དང་སྲུང་ཤུབས་སོགས་བཀལ་ནས་མང་ཚོགས་ལ་གོ་རྟོགས་སྤེལ་ཏེ། གཉན་ནད་རག་དུག་གི་ནད་ཚ་དེ་ཤིང་སྡོང་བཞིན་འཛམ་གླིང་སྤྱི་དང་ལྷག་པར་བོད་པའི་སྤྱི་ཚོགས་ནང་ལ་འཕེལ་གྱི་ཡོད་པ་རེད་ཅེས་ནས་གོ་རྟོགས་སྤེལ་བ། དེ་བཞིན་སྲུང་ཤུབས་སོགས་བེད་སྤྱོད་བྱེད་སྟངས་ཤེས་དགོས་པ་དང་། ད་ལོ་སྐུ་མདུན་དགུང་ལོ་ ༨༠ ཕེབས་པ་དང་འབྲེལ་ནས་ཉལ་ཐ་དང་མྱོ་རྫས་སྨན་སོགས་ཀྱི་སྐོར་ལ་དམིགས་བསལ་ཀྱི་ཡིག་ཆ་བཟོས་ནས་འགྲེམས་སྤེལ་བྱེད་ཀྱི་ཡོད། དེ་རིང་དམིགས་བསལ་སྡེ་ཚན་གཉིས་བཟོས་ཏེ་གཅིག་ནོར་བུ་གླིང་ཀའི་མང་ཚོགས་ལ་གཉན་ནད་རེག་དུག་གི་གོ་རྟོགས་སྤེལ་ཆེད། འཕྲོད་བསྟེན་ལས་ཁང་གི་སྨན་པ་དང་སྨན་རྩིས་ཁང་གི་སྨན་པ་གདན་འདྲེན་ཞུས་ནས་བཀའ་སློབ་དང་གོ་རྟོགས་སྤེལ་གྱི་ཡོད། ཅེས་བརྗོད་སོང་།
ཡང་བདེ་ལེགས་སྨན་ཁང་དང་ལྷ་སྤྱི་ཚོགས་ཞབས་ཞུ་ཚོགས་པ། དྷ་ས་རོ་ཊ་རེ་སྤྱི་ཚོགས་ཞབས་ཞུ་ཁང་བཅས་ཀྱི་ལས་འགུལ་སྐབས། ལྷ་སྤྱི་ཚོགས་ཞབས་ཞུ་ཁང་གི་དགེ་སློབ་དང་ཚོགས་པ་ཁག་གཞན་གྱི་འབྲེལ་ཡོད་ལས་མི་ཁག་མཉམ་ཞུགས་ཀྱིས་དེ་རིང་གི་ཉིན་མོ་དང་འབྲེལ་བའི་གླུ་གཞས་ཤིག་བཏང་རྗེས། གཉན་ནད་རེག་དུག་གིས་ཕར་རྒོལ་གཏོང་སྟངས་དང་སྲུང་ཤུབས་ཀྱིས་ཇི་ལྟར་སྲུང་སྐྱོབ་བྱེད་པའི་སྐོར་གྱི་འཁྲབ་སྟོན་ཆུང་ཆུང་ཞིག་བྱས་སོང་། དེའི་རྗེས་ཚོགས་ཞུགས་པ་རྣམས་ཀྱིས་འཛམ་གླིང་གཉན་ནད་རེག་དུག་ཉིན་མོ་ཞེས་འཕྲེད་དར་བཟུང་ནས་མེག་གྷན་ཁྲོམ་གཞུང་དུ་སྐོར་སྐྱོད་ཐེངས་གཅིག་བྱས་སོང་བ་དང་། ཉིན་རྒྱབ་ཆུ་ཚོད་ ༡།༠༠ བར་དུ་བཞི་མདོ་རུ་གཉན་ནད་རེག་དུག་གི་རྒྱུན་ཤེས་ཡིག་ཆ་འགྲེམས་སྤེལ་བྱས་ཏེ་མི་མང་ལ་གཉན་ནད་རེག་དུག་གི་གོ་རྟོགས་སྤེལ་སོང་།
སྐབས་དེར་བདེ་ལེགས་སྨན་ཁང་གི་འགན་འཛིན་སྤྱི་འཐུས་ཟླ་བ་ཕུན་སྐྱིད་ལགས་ཀྱིས། དེ་རིང་འཕྲོད་བསྟེན་ལས་ཁུངས་དང་ཀུན་ཕན་ཚོགས་པ། ས་གནས་བུད་མེད་ཚོགས་པ་བཅས་ནས་ཕར་ཕྱོགས་ལ་ལས་འགུལ་གྱི་གོ་རྟོགས་སྤེལ་བཞིན་འདུག དང་པོ་ང་ཚོ་བཀའ་མོལ་མཉམ་དུ་བྱུང་བ་ཡིན་ན། ལས་འགུལ་ཏོག་ཙམ་རྒྱ་ཆེ་རུ་གཏོང་ན་བསམས་པ་ཞིག་བྱུང་། ཡིན་ཡང་གོ་རྟོགས་སྤེལ་རྒྱུ་གང་མང་མང་དང་ག་ས་གང་ནས་སྤེལ་ཐུབ་པ་ཡིན་ན་ཡག་པོ་ཞིག་ལ་ངོས་འཛིན་བྱེད་ཀྱི་ཡོད། ང་ཚོ་བདེ་ལེགས་སྨན་ཁང་དང་མཉམ་དུ་ལྷ་སྤྱི་ཚོགས་ཞབས་ཞུ་ཚོགས་པ། དྷ་ས་རོ་ཊ་རེ་སྤྱི་ཚོགས་ཞབས་ཞུ་ཁང་བཅས་ཡོད། དེ་རིང་གི་ལས་དོན་གཙོ་བོ་དེ་ཡིག་ཆ་དང་སྲུང་ཤུབས་སོགས་འགྲེམས་སྤེལ་བྱེད་བཞིན་ཡོད་པ་མ་ཟད། གཏམ་བརྗོད་ཐུང་ཐུང་ཞིག་འཁྲབ་སྟེ་མང་ཚོགས་ལ་གོ་རྟོགས་སྤེལ་བཞིན་ཡོད། དེ་བཞིན་བདེ་ལེགས་སྨན་ཁང་གི་ཡན་ལག་སྨན་ཁང་ནས་རིན་མེད་ཐོག་ནས་ཁྲག་བརྟག་དཔྱད་བྱ་རྒྱུ་ཞིག་གོ་སྒྲིག་བྱས་ཡོད། ཅེས་བརྗོད་སོང་།
དྷ་ས་རོ་ཊ་རེ་སྤྱི་ཚོགས་ཞབས་ཞུ་ཁང་གི་སྤྱི་ཁྱབ་འགན་འཛིན་ཝེ་རེན་གྷའི་ ( Virinder Singh Parmar ) ཡིས་ལས་འགུལ་ནང་མཉམ་ཞུགས་བྱེད་དགོས་དོན་སྐོར་ལ་ཁོང་གིས། ཐེ་ལན་ཌིའི་རྒྱལ་ས་བྷན་ཁོ་ཁི་(Bangkok) རུ་འཁྲིག་སྤྱོད་ཀྱི་ཚོང་ལས་གཉེར་མཁན་མང་པོ་ཡོད་ཀྱང་། ཁོ་ཚོའི་ལུང་པའི་ནང་གཉན་ནད་རེག་དུག་གི་ནད་ཚའི་བརྒྱ་ཆ་ཧ་ཅང་དམའ་བོ་ཡོད་པ་དེ། དུས་རྒྱུན་ཁོ་ཚོར་གཉན་ནད་རེག་དུག་གི་གོ་རྟོགས་ལས་རིམ་འདྲ་མིན་སྤེལ་གྱི་ཡོད་པས་རེད། དྷ་རམ་ས་ལ་ལྟ་བུ་ཡིན་ན་འཛམ་གླིང་རྒྱལ་ཁབ་དང་མི་རིགས་འདྲ་མིན་སྣ་ཚོགས་ཕེབས་ཀྱི་ཡོད་སྟབས། ན་ཚ་འདྲ་མིན་སྣ་ཚོགས་ཡོང་མི་སྲིད་པ་མིན་སྟབས། གལ་སྲིད་ང་ཚོས་གོ་རྟོགས་མ་སྤེལ་བ་ཡིན་ན་ཉེན་ཁ་ཆེན་པོ་ཆགས་འགྲོ་ཡི་རེད། དེར་བརྟེན་ལས་འགུལ་འདིའི་རིགས་སྤེལ་རྒྱུ་ཧ་ཅང་གལ་ཆེན་པོ་ཞིག་མཐོང་ནས་ལས་འགུལ་ནང་མཉམ་ཞུགས་བྱས་པ་ཡིན། ཞེས་བརྗོད་སོང་།
གཞན་ཡང་། དེ་རིང་གི་ཉིན་མོ་དང་བསྟུན་བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་ཡོངས་ཁྱབ་གསུང་འཕྲིན་ཞིག་གནང་བའི་ནང་། དེ་རིང་ཕྱི་ལོ་ ༢༠༡༥ ཟླ་ ༡༢ ཚེས་ ༡ ཉིན་ང་ཚོས་སླར་ཡང་སྲོག་ཉེན་ཅན་གྱི་ནད་གཞི་གཉན་ནད་རེག་དུག་ལ་རྒོལ་བའི་འཛམ་གླིང་གཉན་ནད་རེག་དུག་ཉིན་མོ་ཞེས་སྲུང་བརྩི་ཞུ་ཡི་ཡོད། ང་ཚོས་ཉིན་མོ་བྱེ་བྲག་པ་འདི་འདེམས་དགོས་དོན་ནི་ནད་གཞི་དེས་རྐྱེན་པས་རྒྱལ་སྤྱིའི་ས་ཁུལ་དུ་འཕྲད་བཞིན་པའི་དཀའ་སྡུག་རྣམས་གསལ་སྟོན་དང་། ནད་གཞི་དེའི་དཀའ་རྙོག་དང་ཁྱབ་འཕེལ་འགོག་པའི་འཐབ་རྒོལ་བྱ་རྒྱུར་ང་ཚོས་ལྷག་བསམ་ཟོལ་མེད་ཀྱི་གཞུང་སྒེར་གཉིས་ཀའི་འབད་བརྩོན་རྣམས་སྐྱར་གསོ་ཡོང་བའི་དྲན་སྐུལ་ཞུ་རྒྱུ་ཡིན། འཛམ་གླིང་འཕྲོད་བསྟེན་ལྷན་ཚོགས་ཀྱི་ཚོད་རྩིས་ལྟར་བྱས་ན། ཕྱི་ལོ་ ༢༠༡༤ ལོར་གཉན་ནད་རེག་དུག་གི་མི་གྲངས་ས་ཡ་ ༣༦.༩ ཙམ་དང་། དེའི་ཁྲོད་ནས་མི་འབོར་ས་ཡ་ ༢.༦ ནི་ལོ་ན་བཅོ་ལྔ་མན་གྱི་ཕྲུ་གུ་ཆགས་ཡོད། ཕྱི་ལོ་ ༢༠༡༤ ལོ་དེ་རིང་བར་གཉན་ནད་རེག་དུག་གི་ནད་གཞི་གསར་དུ་ཕོག་པ་མི་གྲངས་ས་ཡ་ ༢ ཙམ་དང་། ནད་གཞི་དེས་རྐྱེན་པས་མི་གྲངས་ས་ཡ་ ༡.༢ ཙམ་འདས་གྲོངས་སུ་གྱུར་ཡོད་པ་སྟེ། ནད་གཞི་འདི་ཡིས་ད་དུའང་ང་ཚོའི་ཚེ་སྲོག་ལ་འཇིགས་ཉེན་བཟོ་བཞིན་ཡོད་པ་ཁ་གསལ་སྟོན་བཞིན་པ་མ་ཟད། ད་བར་ང་ཚོས་འབད་བརྩོན་སྣ་ཚོགས་ཤིག་བྱས་ཡོད་ཀྱང་འཛམ་གླིང་གཉན་ནད་རེག་དུག་ལས་འགུལ་ཁང་གི་རྒྱལ་སྤྱིའི་འཆར་འགོད་ཚོགས་ཆུང་གིས་གསལ་སྟོན་བྱས་པའི་བརྗོད་གཞི་ལྟར་འགོ་ནད་ཀྱི་གྲངས་ཚད་ཀླད་ཀོར་དུ་སླེབས་པར་འབད་བརྩོན་སྔར་ལས་མང་བ་བསྟེན་དགོས་ཀྱི་ཡོད། “ གཉན་ནད་རེག་དུག་གི་དབང་གིས་འཆི་རྐྱེན་མི་འབྱུང་བ་དང་། ནད་གཞི་འདི་རིགས་ཕོག་པ་རྣམས་ལ་དབྱེ་འབྱེད་མི་བྱེད་པ། ནད་གཞི་གསར་པ་མི་འབྱུང་བ།” ཞེས་པ་དེ་ནི་ ༢༠༡༡ ནས་ ༢༠༡༥ བར་དུ་བདམས་པའི་ལོ་མང་གི་བརྗོད་གཞི་ཞིག་ཡིན། གཉན་ནད་རེག་དུག་དང་། ལུས་ཟུངས་ཟད་པའི་གཉན་ནད་ཀྱི་ནད་གཞི་ནི་རྒྱལ་སྤྱིའི་དཀའ་ངལ་ཞིག་ཏུ་འགྱུར་ཡོད་ཅིང་དེས་འཛམ་གླིང་གི་ཡུལ་གྲུ་ཀུན་ལ་གནོད་ཚབས་བཟོ་བཞིན་ཡོད། ང་ཚོས་ལུས་ཟུངས་ཟད་པའི་གཉན་ནད་ཀྱི་ནད་གཞི་ལ་བཅོས་ཐབས་མེད་པ་ཤེས་ཀྱི་ཡོད་མོད་ཀྱང་། དེ་ནི་སྔོན་འགོག་ཐུབ་རུང་ཞིག་ཡིན། རྒྱུ་མཚན་དེར་བརྟེན་གཉན་ནད་རེག་དུག་དང་། ལུས་ཟུངས་ཟད་པའི་གཉན་ནད་ཀྱི་ནད་གཞི་ཁྱབ་འཕེལ་འགོག་པའི་ཐབས་ལམ་ཡག་ཤོས་གཅིག་ནི་ཤེས་ཡོན་སློབ་གསོ་སྤེལ་རྒྱུ་དེ་ཡིན་པ་རེད། ཅེས་དང་།
ཁོང་གིས་མུ་མཐུད་དུ། ང་ཚོ་བོད་མི་རང་ཉིད་ཀྱི་སྤྱི་ཚོགས་ནང་དུ་ནད་གཞི་དེ་ཉིད་འགོ་ཉེན་སླ་བར་ངོས་འཛིན་ཆོག་པའི་མི་སྣའི་སྡེ་ཁག་སྣ་ཚོགས་ཤིག་འདུས་ཡོད། འཛམ་གླིང་ཁྱོན་ཡོངས་སུ་ཡོད་པའི་རྙིང་ཞེན་ཅན་གྱི་རིག་གཞུང་ལྡན་པའི་ཚོགས་སྡེ་ཀུན་དང་མཚུངས་པར་བོད་མིའི་ཚོགས་སྡེ་ཁག་གི་ནང་དུའང་རིག་གཞུང་གི་ཚོར་སྐྱེན་དང་ལྟ་སྟངས། དེ་བཞིན་ནད་གཞི་དེའི་ཐད་ཕྱོགས་ཡོངས་ཀྱི་ཤེས་ཡོན་གྱི་གོ་རྟོགས་ཧ་ཅང་ཞན་རྐྱེན་གྱིས་ནད་གཞི་དེའི་སྐོར་ལ་ཕྱི་གསལ་ནང་གསལ་གྱི་བགྲོ་གླེང་ཞིག་ཡོང་རྒྱུར་དཀའ་ངལ་འཕྲད་བཞིན་ཡོད། དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ངོས་ནས་ནོར་ཝེ་རོགས་ཚོགས་(Norwegian Church Aid) ཀྱིས་མཐུན་འགྱུར་འོག་བཙན་བྱོལ་བོད་མིའི་སྤྱི་ཚོགས་ནང་གི་གཉན་ནད་རེག་དུག་པ་རྣམས་ལ་བདེ་སྡུག་ལྟ་སྐྱོང་དང། གཉན་ནད་རེག་དུག་གི་ནད་གཞི་འགོག་སྡོམ་གྱི་ལས་འཆར་ཞིག་གཉེར་བཞིན་ཡོད། ལས་འཆར་འདིར་དམིགས་ཡུལ་གཉིས་ཡོད་པ་ནི་འགོ་ནད་གསར་པ་ཁྱབ་འཕེལ་འགྲོ་རྒྱུར་སྔོན་འགོག་དང་། གཉན་ནད་རེག་དུག་གི་ནད་གཞིས་ཟིན་པ་རྣམས་མི་ཚེ་བདེ་ཐང་ངང་ཡུན་རིང་འཚོ་གནས་ཐུབ་ཆེད་སྨན་བཅོས་དང་། དབྱེ་འབྱེད་མེད་པར་མི་ཚེ་དོན་སྙིང་ལྡན་པའི་ངང་འཚོ་ཐུབ་ཆེད་སྤྱི་ཚོགས་ཀྱི་ནུས་སྟོབས་གོང་འཕེལ་གཏོང་རྒྱུ་བཅས་ཕྱོགས་གཉིས་ཐད་ནས་རོགས་སྐྱོར་བྱ་རྒྱུ་དེ་ཡིན། ལས་འཆར་དེ་ལ་གཞི་རྒྱ་ཆེ་བའི་སྔོན་འགོག་གི་རྣམ་པ་ཞིག་ཡོད་པ་ནི་དེས་རྒྱ་ཆེ་མང་ཚོགས་སྤྱི་དང་། ཡང་སྒོས་ལོ་ལྟར་གཞོན་སྐྱེས་དང་སློབ་གྲྭར་སྐྱོད་བཞིན་པའི་སློབ་ཕྲུག་རྣམས་ཀྱི་ཐོག་ནད་གཞི་འགོག་སྡོམ་བྱ་རྒྱུར་དམིགས་འབེན་བཟུང་བཞིན་ཡོད། དེ་རིང་ནི་ས་གནས་འཕྲོད་བསྟེན་ཡན་ལག་སྨན་ཁང་བརྒྱུད་རྒྱ་གར་དུ་ཡོད་པའི་བོད་མིའི་གཞིས་ཆགས་ཁག་ཡོངས་དང། དབུས་བོད་མིའི་སྒྲིག་འཛུགས་ཀྱི་ཁྱབ་ཁོངས་འོག་ཡོད་པའི་སློབ་གྲྭ་ཁག་གི་ནང་འཛམ་གླིང་གཉན་ནད་རེག་དུག་གི་ཉིན་མོ་སྲུང་བརྩི་ཞུ་བཞིན་ཡོད། ང་ཚོས་ཉིན་མོ་འདི་སྲུང་བརྩི་ཞུ་དགོས་དོན་ནི་འབྱུང་འགྱུར་གཉན་ནད་རེག་དུག་གི་ནད་གཞི་མེད་པའི་ཚོགས་སྡེ་ཞིག་དང་། གཉན་ནད་རེག་དུག་མེད་པའི་འཛམ་གླིང་ཞིག་བསྐྲུན་ཆེད་ནད་གཞི་དེའི་སྐོར་ལ་ཕན་ཚུན་དབར་ཤེས་ཡོན་སློབ་གསོ་སྤེལ་རེས་དང་། ནད་གཞི་ཕོག་པ་རྣམས་ལ་སྨན་བཅོས་དང་གསར་དུ་མི་འཕོག་པའི་སྔོན་འགོག་ཆེད་འབད་བརྩོན་བྱ་རྒྱུར་རང་ངོས་ནས་དྲན་སྐུལ་གཏོང་དགོས་པ་ཡིན། ཞེས་གསུངས་འདུག
གསར་འགོད་པ། འཇིགས་མེད་རྒྱ་མཚོ།
