“ ལས་གཞི་འདི་རིམ་གྱིས་འཛམ་གླིང་ཁྱོན་ཡོངས་ལ་ཁྱབ་ཐུབ་དགོས ”

རྒྱ་གར་ལྷོ་ཕྱོགས་སུ་སེམས་དང་སྲོག་གི་བགྲོ་གླེང་ཐེངས་སུམ་བཅུ་བ་ཚོགས་པའི་སྟེང་༧གོང་ས་མཆོག་གིས་མ་འོངས་པར་ང་ཚོ་མེད་ཀྱང་བགྲོ་གླེང་འདི་མུ་མཐུད་དགོས་པའི་བཀའ་གནང་འདུག

ཚེས་ ༡༤ ནས་ ༡༧ བར། རྒྱ་གར་ལྷོ་ཕྱོགས་སྦེལ་ཀོབ་སེ་ར་བླ་སྤྱིའི་ཚོགས་ཁང་དུ། ཏཱ་ལ་བླ་མའི་ཐེབས་རྩས་གོ་སྒྲིག་འོག ‘སེམས་དང་སྲོག་གི་ཚོགས་འདུ’ ཐེངས་ ༣༠ པ་དེ་ཚོགས་ཏེ་མངོན་སུམ་དང་རྟོག་པ། བདག་བཅས་ཀྱི་བརྗོད་གཞིའི་ཐོག་ཚན་རིག་པ་མང་པོ་ཞིག་དང་བགྲོ་གླེང་གནང་ཡོད་པ་རེད།

ཐེངས་འདིའི་བགྲོ་གླེང་སྟེང་ཕྱི་རྒྱལ་ཁག་གི་ཚན་རིག་པ་དང་སེམས་ཁམས་རིག་པ་བ། ལྟ་གྲུབ་སྨྲ་བ། དེ་བཞིན། དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས། གླིང་རིན་པོ་ཆེ་མཆོག སྐུའི་གསུང་སྒྱུར་གླང་རི་བ་དགེ་བཤེས་ཐུབ་བསྟན་སྦྱིན་པ་དང་། སློབ་དཔོན་དགེ་བཤེས་ཡེ་ཤེས་ཐབས་མཁས། དགེ་བཤེས་ལྷག་རྡོར། དགེ་བཤེས་དགྲ་འདུལ། གྲྭ་ཚང་ཁག་གི་མཁན་བླ་སྤྲུལ་བཅས་མཉམ་ཞུགས་གནང་ཡོད་འདུག

ཉིན་དང་པོའི་བགྲོ་གླེང་དབུ་འཛུགས་སྟེང་གི་༧གོང་ས་མཆོག་གི་བཀའ་སློབ་དུམ་ཚན་གཅིག་འདིར་བཀོད་ཡོད། “ཕལ་ཆེར་ལོ་བཞི་བཅུའི་གོང་ནས་ཚན་རིག་པ་དང་མཉམ་དུ་ཞིབ་ཚགས་པོས་གོ་བསྡུར་བྱ་རྒྱུ་བྱུང་ན་ཞེས་རེ་བ་བཏོན་པ་བཞིན། ངོས་རང་ཆུང་ངུའི་སྐབས་ནས་ཚན་རིག་ལ་དོ་སྣང་ཡོད། རྒྱ་གར་ལ་བསླེབས་ནས་ཚན་རིག་དང་འབྲེལ་བའི་དེབ་དེ་འདྲ་ཏོག་ཙམ་བཀླགས་མྱོང་། དེ་བཞིན་ཚན་རིག་པ་ཞིག་དང་དངོས་སུ་འཕྲད་ནས་གོ་བསྡུར་བྱ་རྒྱུ་བྱུང་ན་ཕན་ཐོགས་མི་ཡོང་བསམ་པ་ཞིག་བློ་ལ་ཤར་བ་དེ་ནས་རིམ་བཞིན་ཚན་རིག་པ་དང་ལྷན་དངོས་སུ་ཐུག་རྒྱུའི་མགོ་ལྟ་བུ་ཞིག་ཚུགས་པ་རེད། ཚན་རིག་པ་འཕྲད་སྐབས་དངོས་གནས་དྲང་གནས་ཚན་རིག་པ་སྤྱིའི་བསམ་བློའི་འགྲོ་སྟངས་དེ་ཕལ་ཆེར་བློ་གཟུ་བོར་གནས་པ་རེད་ཅེས་བརྗོད་ཆོག་གི་རེད། ཚན་རིག་པ་འགའ་ཤས་ནི་ཐ་དད་ཡིན། དེ་བཞིན་ང་རང་ཚོ་ནང་པ་ཞིག་གི་ངོས་ནས་ཞུས་ན་སོ་སོ་ནང་པའི་ལྟ་གྲུབ་དེ་ཡིན་ཤག་ཤག་ལྟ་བུ་དྲན་གྱི་ཡོད། སྔོན་ལ་བློ་གཟུ་བོར་གནས་པ་ཟེར་བ་འདི་དངོས་གནས་ཀྱི་ཚན་རིག་པ་ཚོ་བློ་གཟུ་བོར་གནས་པ་ཆགས་ཡོད། དེ་འདྲ་བྱས་ནས་ལོ་སུམ་ཅུ་བརྒལ་བ་ཙམ་གྱི་རིང་ལ་ང་ཚོ་ཚན་རིག་དང་འབྲེལ་བ་བྱེད་སྐབས་ཕྱོགས་གཉིས་ཀར་ཕན་ཐོགས་ཡོད་པ་ཞིག་རེད། གཙོ་བོ་སངས་རྒྱས་པའི་ཆོས་སྤྱི་དང་། ལྷག་པར་དཔལ་ནཱ་ལེན་ཊའི་ཆོས་བརྒྱུད་འཛིན་མཁན་ཞིག་གི་ངོས་ནས་བལྟས་ན། རིག་གནས་གསར་པ་འཕྲུལ་ཆས་ལ་སོགས་པའི་ཚན་རིག་གི་རིགས་དེ་དག་ལ་གཏིང་ཟབ་པོས་སློབ་སྦྱོང་དང་ཞིབ་འཇུག་བྱ་རྒྱུ་ཡོད་པ་ནི་དཔལ་ནཱ་ལེན་ཊའི་ཆོས་པ་ཞིག་ལ་གལ་ཆེན་པོ་ཆགས་ཡོད། དེ་མཚུངས་ཚན་རིག་པ་ཚོར་མཚོན་ན། ད་ལྟ་བར་ཚན་རིག་པ་ཚོས་ཞིབ་འཇུག་བྱེད་ས་གཙོ་བོ་ནི་ཚད་འཇལ་རྒྱུ་ཡོད་པའི་ཕྱིའི་གཟུགས་ཅན་གྱི་རིགས་དེ་དག་ཆགས་ཡོད། ཚན་རིག་པས་ནང་ཤེས་པ་ཟེར་ན་མྱོང་ཚོར་དངོས་སུ་མྱོང་གི་ཡོད་པ་ཞིག་ལ་བརྩིས་པ་མ་གཏོགས་དངོས་སུ་ཕྱི་དངོས་པོའི་གཟུགས་ཅན་རིགས་ལ་དཔྱད་ཚུལ་བཞིན་དེ་སྔོན་ནང་སེམས་ཀྱི་འགྲོ་སྟངས་ཐོག་ཞིབ་འཇུག་བྱས་མེད། དེང་སྐབས་ཚན་རིག་པ་ཚོས་གནའ་རབས་རྒྱ་གར་གྱི་རིག་གཞུང་ངམ་དཔལ་ནཱ་ལེན་ཊའི་སྔོན་གྱི་མཁས་པ་དུ་མས་མཛད་པའི་སེམས་ཁམས་རིག་པ་ཞིབ་ཚགས་པོ་ཡོད་པ་དེར་ཡིད་དབང་འཕྲོག་ནས་དོ་སྣང་བྱེད་བཞིན་ཡོད། དེར་བརྟེན་གཉིས་ཀར་ཕན་ཐོགས་ཡོང་གི་ཡོད་པ་གསལ་པོ་རེད།” ཅེས་གསུངས་འདུག

༧གོང་ས་མཆོག་གིས་མུ་མཐུད་དུ་གསུངས་དོན། “ དེ་རིང་འདིར་ཚན་རིག་པ་ཚོས་འགྲེལ་བཤད་དེ་ཚོར་གཅིག་ཉན། དེ་བཞིན་ཚན་རིག་པ་ཚོས་ཀྱང་ནང་པ་སངས་རྒྱས་པའི་ཆོས་ནས་གསུང་པའི་ཚན་རིག་སྐོར་གྱི་ལེགས་བཤད་དེ་དག་ལའང་གཅིག་ཉན། དེ་རིང་ཐེངས་སུམ་ཅུ་པ་ཡིན་པར་བརྟེན་ལས་ཀ་འདི་མུ་མཐུད་གནས་ཐུབ། ཐེངས་མ་སུམ་ཅུ་སོ་ལྔ་པ་དང་བཞི་བཅུ་པའི་སྐབས་ལ་ང་ཚོ་ཕལ་ཆེ་བ་དགོངས་པ་ཞུས་མདོག་ཁ་པོ་རེད། ཡིན་ནའང་ད་ལྟའི་ལས་གཞི་འདི་མུ་མཐུད་ནས་འགྲོ་ཐུབ་ཀྱི་རེད། ཇི་སྲིད་འཛམ་གླིང་འདིའི་སྟེང་གི་རྣམ་དཔྱོད་ལྡན་པའི་མི་སྣ་གནས་པ་དེ་སྲིད་དུ་ང་ཚོའི་ལས་ཀ་དེ་དག་མུ་མཐུད་གནས་ཐུབ་ཀྱི་རེད་བསམ་གྱི་ཡོད་པར་བརྟེན། དུས་ད་ལྟ་བར་གནས་ཐུབ་པ་རེད། ད་ལྟ་ང་རང་ཚོའི་སེམས་དང་སྲོག་གི་ལས་ཀ་འདི་ཕན་ཐོགས་ཡོད་པ་ཞིག་ཡིན་པར་བརྟེན་དུས་རབས་ཉི་ཤུ་རྩ་གཅིག་སྐབས་ཨ་རི་ནས་མགོ་བཙུགས་ནས་ད་ལྟ་དུས་རབས་ཉི་ཤུ་རྩ་གཅིག་པའི་ནང་ལས་ཀ་མུ་མཐུད་འགྲོ་བཞིན་པ་དང་། འབྱུང་འགྱུར་དུས་རབས་ཉི་ཤུ་རྩ་གཉིས་པའི་ནང་འགྲོ་ཐུབ་པ་ཞིག་ཡོང་གི་རེད། ལས་གཞི་འདི་རིམ་བཞིན་འཛམ་གླིང་ཁྱོན་ཡོངས་ཀྱི་ནང་ཁྱབ་ཐུབ་དགོས་པ་ཡིན། མི་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་ཤ་སྟག་ཡིན་སྟབས། སྡུག་བསྔལ་གྱི་རྩ་བ་སེམས་མ་དུལ་བར་བརྟེན་ནས་ཡོང་གི་ཡོད་པར་བརྟེན། སེམས་འདུལ་ཐབས་དེ་ཡང་སྐྱེ་བ་ཕྱི་མ་དང་། ལྷ་ཡུལ་གྱི་སྐད་ཆ་མིན་པར་འཚོ་བའི་རིང་ལ་སེམས་སྐྱིད་པ་བག་ཕེབས་པ་དེ་འདྲ་ཞིག་ཡོང་ན་མི་ཚང་མ་དང་མཉམ་དུ་འཆམ་པོ་ཡོང་གི་རེད།” ཅེས་སོགས་གསུངས་འདུག

ཐེངས་འདིའི་བགྲོ་གླེང་སྟེང་། སེམས་ཁམས་རིག་པའི་ཚན་རིག་པ་སྐུ་ཞབས་རི་ཆཌ་ཇེ་ཌེ་ཝིཌ་སོན་ Richard.J.Davidson ལགས། ནུབ་ཕྱོགས་ལྟ་གྲུབ་སྨྲ་བ་སློབ་དཔོན་སྐུ་ཞབས་ Jay Garfield ལགས། ཨེམ་ཨཱ་ཧེ་ཊི་གཙུག་ལག་སློབ་གཉེར་ཁང་ (Amherst University) གི་ཚན་རིག་སློབ་དཔོན་པ་ཝན་སིན་ཧཱ Pawan Sinha ལགས། དབང་རྩའི་ཉམས་ཞིབ་པ་ལྕམ་སྐུ་ཁེ་དི་རིན་ཀེར Catherine Kerr ལགས། བསམ་གཏན་(Zen)ཆོས་དཔོན་རོ་ཤི་ཇོན་ཧེ་ལི་ཕེག་སི Roshi Joan Halifax ལགས་སོགས་མཉམ་ཞུགས་གནང་ཡོད་འདུག