དེ་རིང་བཙོན་གྲོལ་ཐོབ་པའི་ཆབ་སྲིད་བཙོན་པའི་རྗེས་དྲན་བགྲོ་གླེང་སྟེང་ད་ལྟ་རྒྱ་ནག་གཞུང་གིས་ཆབ་སྲིད་བཙོན་པ་ཀློད་གྲོལ་བཏང་བ་ཡིན་ཡང་ཁོ་ཚོར་འགུལ་སྐྱོད་བྱེད་དབང་མེད་པའི་སྐོར་གླེང་སློང་བྱས་སོང་།
དེ་རིང་ཕྱི་དྲོའི་ཆུ་ཚོད་ ༤།༠༠ སྟེང་མེག་གྷན་ཡོངས་གླིང་སློབ་གྲྭའི་རྩེད་ཐང་དུ་བོད་རང་བཙན་སློབ་ཕྲུག་ཚོགས་པའི་གོ་སྒྲིག་འོག སྒྲོལ་མ་སྐྱབས་ལགས་གཙོས་ ༢༠༡༥ ལོར་བཙོན་གྲོལ་ཐོབ་པའི་བོད་ནང་གི་ཆབ་སྲིད་བཙོན་པ་ ༣༠ ལ་རྗེས་དྲན་དང་མུ་མཐུད་རྒྱའི་བཙོན་འོག་ཏུ་ཡོད་པའི་བོད་ཀྱི་ཆབ་སྲིད་བཙོན་པ་ཚོར་གདུང་སེམས་མཉམ་སྐྱེད་ཀྱི་བགྲོ་གླེང་ཞིག་ཚོགས་སོང་ལ། བགྲོ་གླེང་གི་གཏམ་བཤད་པར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་དང་། པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཤེས་ཡོན་འགན་འཛིན་སྨན་ཤེར་བློ་གྲོས་ལགས། བོད་དོན་ལས་འགུལ་བ་དང་རྩོམ་པ་པོ་བསྟན་འཛིན་བརྩོན་འགྲུས་ལགས། ཆབ་སྲིད་བཙོན་ཟུར་མགོན་པོ་འཕྲིན་ལས་ལགས། རྒྱ་གར་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་རྡོར་རྗེ་ཚེ་བརྟན་ལགས་ཀྱི་གཙོས། གཏམ་བཤད་ཉན་མཁན་ཕྱི་རྒྱལ་བ་དང་བོད་རིགས་ཤེས་ཡོན་པ་ཁག་ཅིག་འཛོམས་སོང་།
བགྲོ་གླེང་དབུ་འཛུགས་མ་ཞུས་སྔོན་ལ་བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་ཚེ་ལྷ་ལགས་ཀྱིས་བགྲོ་གླེང་ཚོགས་དགོས་དོན་གང་ཡིན་ངོ་སྤྲོད་གནང་རྗེས། བོད་དོན་ལས་འགུལ་བ་དང་རྩོམ་པ་པོ་བསྟན་འཛིན་བརྩོན་འགྲུས་ལགས་ཀྱིས་རྒྱལ་སྤྱིའི་སྟེང་གི་བོད་དོན་གནད་དོན་སྐོར་བརྗོད་དོན། ད་ལྟ་ང་ཚོ་བོད་པའི་སྤྱི་ཚོགས་ནང་ལ་ང་ཚོར་རྒྱལ་སྤྱིའི་རྒྱབ་སྐྱོར་ཡོད་ཟེར་བའི་བསམ་བློ་འདི་འདྲ་ཞིག་ཡོད་པ་རེད། ལྷག་པར་དུ་བསམ་བློ་དེའི་བརྒྱུད་རིམ་དེ་ཕལ་ཆེར་ལོ་ ༤༠ ནས་ ༥༠ ནང་ང་ཚོར་སྦྱིན་བདག་ཤུགས་ཆེན་པོ་རག་ཡོད་སྟབས། དེའི་རྐྱེན་པས་ང་ཚོར་རྒྱལ་སྤྱིའི་ཐོག་རྒྱབ་སྐྱོར་ཤུགས་ཆེན་པོ་ཞིག་ཡོང་གི་ཡོད་པའི་བཀའ་མོལ་དེ་བསླེབས་བསྡད་ཡོད་པ་རེད། ད་ལྟ་དང་སྔོན་ཆད་རྒྱལ་ཁབ་སུ་འདྲ་ཞིག་ཡིན་རུང་རྒྱལ་ཁབ་སོ་སོའི་ཁེ་ཕན་ཨང་དང་པོར་བཞག་སྟེ། དེ་ནས་སོ་སོའི་དོན་དག་བསྒྲུབ་དང་མི་བསྒྲུབ་ལྟ་བའི་དུས་ཚོད་ཅིག་ཆགས་ཡོད་པ་མ་ཟད། ལྷག་པར་དུ་ད་ལྟའི་དུས་ཚོད་འདི་ལ་རྒྱལ་སྤྱིའི་ཐོག་རྒྱ་ནག་གིས་ཅ་དངོས་གོང་ཁེ་པོ་ཞེ་པོ་ཞིག་བཟོ་ཐུབ་ཀྱི་ཡོད་པར་བརྟེན། ད་ལྟ་དམངས་གཙོ་དང་འགྲོ་བ་མིའི་ཐོབ་ཐང་སྤྲོད་དགོས་ཟེར་མཁན་གྱི་སྟོབས་ཆེན་རྒྱལ་ཁབ་དང་ནུབ་ཕྱོགས་རྒྱལ་ཁབ་ཚོས། རྒྱ་ནག་གཞུང་གིས་བོད་གཙོས་པའི་ཤར་ཏུར་ཀི་སི་ཐན་དང་ནང་སོག་ལ་རང་དབང་རྩ་ནས་མ་སྤྲད་པར་དམ་དྲག་བྱས་ནས་རྡོ་སྣུམ་དང་གཏེར་ཁ་རིགས་སྔོག་འདོན་བྱེད་ཀྱི་ཡོད་ཀྱང་སྣང་འཇོག་མ་བྱས་པར། རྒྱ་ནག་གཞུང་དང་ཚོང་བརྒྱབ་ཀྱི་ཡོད་སྟབས། ད་ལྟ་ང་ཚོས་ང་རང་ཚོའི་འཐབ་རྩོད་འདི་དངོས་ཡོད་གནས་ཚུལ་ཐོག་ནས་ག་པར་སླེབ་ཀྱི་ཡོད་མེད་ལ་ལྟ་རྒྱུ་དཔེ་མི་སྲིད་པའི་གལ་ཆེན་པོ་ཆགས་ཡོད་པ་རེད་བསམ་གྱི་འདུག ཅེས་བརྗོད་སོང་།
སྨན་ཤེར་བློ་གྲོས་ལགས་ཀྱིས་ད་ལྟའི་བོད་ནང་གི་སྒྱུ་རྩལ་བའི་བརྩམས་ཆོས་སྐོར་བརྗོད་དོན། ད་ལྟའི་ཆར་བོད་ནང་གི་རྩོམ་པ་པོ་དང་སྒྱུ་རྩལ་པའི་སྡེ་ཁག་བོད་མི་རིགས་ཀྱི་མགྲིན་ཚབ་པ་ཚད་མཐོ་ཤོས་དེ་རེད། ཁོ་ཚོ་མི་རིགས་ཀྱི་དཀའ་སྡུག་དང་རེ་བ། ཕུགས་བསམ་གླེང་མཁན་ཞིག་ཆགས་ཡོད་པ་རེད། ད་ལྟའི་བོད་ཀྱི་གནས་བབ་དང་ལོ་རྒྱུས། རིག་གཞུང་ཆ་ཚང་ཞིག་ཤེས་རྟོག་བྱ་ཐུབ་པའི་ཁོར་ཡུག་གཙོ་བོ་དེའང་བོད་ནང་གི་བརྩམས་ཆོས་དང་རྩོམ་པ་པོ་ཆགས་ཡོད་པ་རེད། བོད་ནང་གི་འཐབ་རྩོད་པ་དང་ལས་འགུལ་པ་ཚོར་དཀའ་ངལ་ག་འདྲ་ཞིག་འཕྲད་པ་ཡིན་ན། དེ་ཚོར་རྟོག་ཞིབ་བྱེད་མཁན་དང་དཀར་འདོན་བྱེད་མཁན། སྲུང་སྐྱོབ་བྱེད་མཁན་ཆ་ཚང་ད་ལྟའི་ཆར་བོད་ནང་གི་རྩོམ་པ་པོ་དེ་ཚོའི་བརྩམས་ཆོས་ཆགས་ཡོད་པ་མ་ཟད། བོད་ནང་གི་རྩོམ་པ་པོ་ཚོས་སྡོམ་རྒྱག་སྟངས་ག་འདྲ་ཞིག་རེད་ཅེ་ན། རྒྱ་ནག་གིས་བོད་ཀྱི་འཐབ་རྩོད་པ་ཚོ་བཙོན་འཇུག་བྱེད་ཀྱི་ཡོད་ཀྱང་། རྩོམ་པ་པོ་ཚོས་རྒྱ་ནག་གཞུང་བཙོན་ལ་འཇུག་གི་ཡོད་པ་རེད་ཟེར་གྱི་ཡོད་པ་རེད། གང་ཡིན་ཞེ་ན། ད་ལྟའི་ཆར་སྒེར་སྤྱོད་པ་དེ་ཚོ་ལོ་རྒྱུས་ཀྱི་བརྩམས་ཆོས་ནང་ནག་ཉེས་ཅན་ཞེ་བོ་ཞིག་ཆགས་ཡོད་པ་རེད། ཁྲིམས་ཀྱི་ཐོག་ནས་རྒྱ་ནག་རྒྱལ་ཁབ་ཀྱི་རྩ་ཁྲིམས་དང་བཅའ་ཁྲིམས་གང་ཡིན་ཡང་མི་རིགས་རང་སྐྱོང་གི་བཅའ་ཁྲིམས་ཡིན་བསྡད་ཡོད་པ་རེད། དེ་བཞིན་རྒྱལ་སྤྱིའི་སྟེང་གི་ཆེ་མཐོང་དང་འགྲོ་བ་མིའི་ཐོབ་ཐང་ཚོགས་པ་སོགས་ཀྱི་ཞིབ་འཇུག་ནང་དུ། བོད་ནང་གི་འབོད་སྒྲ་དང་འཐབ་རྩོད་ཀྱི་ངོ་བོ། འཐབ་རྩོད་ཀྱི་ལངས་ཕྱོགས་དང་རྩ་དོན་ཆ་ཚང་དཀར་འདོན་བྱེད་མཁན་བརྩམས་ཆོས་ཁོ་ན་ཆགས་ཀྱི་ཡོད་པ་རེད། འདི་མཐའ་སྡོམ་ལྟ་བུ་ཡིན། རྒྱུ་མཚན་རྒྱ་ནག་ཕྱོགས་ནས་ང་ཚོའི་བོད་ནང་གི་འཐབ་རྩོད་དེ་བསད་རྡུང་འཕྲོག་བཅོམ། འཇིགས་སྐུལ། གཏོར་བཤིག མི་རིགས་རང་ལུགས་དེ་འདྲའི་ནག་ཉེས་ཆེན་པོ་ཞིག་ལ་གཡུག་བཞིན་པའི་སྐབས་དེར། ང་ཚོའི་རྒྱུ་མཚན་མཐའ་ཐུག་དང་བརྟན་ཚིག་ཆེ་ཤོས་དེ་བོད་ནང་གི་བརྩམས་ཆས་ཁོ་ན་ཆགས་ཀྱི་ཡོད་པ་རེད། ཅེས་བརྗོད་སོང་།
ཚེ་རིང་མཚོ་མོ་ལགས་ཀྱིས་ད་ལྟའི་བོད་ནང་གི་ཆབ་སྲིད་གནས་སྟངས་སྐོར་བརྗོད་དོན། ང་ཚོའི་ཚོགས་པས་ཉམས་ཞིབ་བྱས་པའི་ད་ལྟའི་བོད་ནང་གི་ཆབ་སྲིད་བཙོན་པའི་མིང་གཞུང་ནང་མི་ ༢༠༨༢ ཙམ་ཡོད་པ་བཤད་ཀྱི་ཡོད་ཀྱང་དེ་ཚོ་བརྒྱ་ཆ་བྱས་ན་ཧ་ཅང་ཆུང་ཆུང་རེད། གང་ཡིན་ཟེར་ན། ང་ཚོས་ཧ་མ་གོ་བར་རྒྱ་ནག་གཞུང་གིས་ཆབ་སྲིད་བཙོན་པ་བསད་པ་དང་བཙོན་འཇུག་བྱས་ནས་གར་སོང་ཆ་མེད་དུ་འགྱུར་བ་ག་ཚོད་ཡོད་མེད་ད་བར་རྒྱ་ནག་གཞུང་གིས་གྲངས་ཐོ་གང་ཡང་བཏོན་ཡོད་པ་མ་རེད། ཡིན་ཡང་ང་ཚོས་གྲངས་འབོར་ལ་མ་བལྟས་པར་ད་ལྟའི་བོད་ནང་གི་ཆབ་སྲིད་བཙོན་པའི་ལོ་རྒྱུས་ཀློག་དུས། རྒྱ་ནག་གཞུང་གིས་ཁོ་ཚོར་མི་སྤྱོད་ལས་འདས་པའི་སྡུག་གཅོང་མནར་གཅོད་བཏང་ནས་རྩ་མེད་གཏོང་བ་དང་གཉའ་བཅག་ནས་ཡར་ལངས་བཅུག་གི་མེད། འདི་ལོ་རྒྱ་ནག་གཞུང་གིས་ཆབ་སྲིད་བཙོན་པ་ ༣༠ ཀློད་གྲོལ་བཏང་ཡོད་ཀྱང་། ང་ཚོས་ཧ་མ་གོ་བར་འདས་གྲོངས་སོང་བ་དང་། འདས་གྲོངས་ཕྱིན་ནས་ཕུང་པོ་ག་པར་གཡུགས་ཡོད་མེད་ནི་ད་ལྟ་དྲི་རྟགས་ཆེན་པོ་ཞིག་ཆགས་ཡོད་པ་མ་ཟད། འདས་པའི་ལོ་གཉིས་ནང་སྨན་པས་བཙོན་སྲུང་བ་དང་ཁྱི་སྤྱང་ལག་སྦྲེལ་བྱས་ཏེ། བཙོན་པར་སྨན་སྤྲད་པ་དང་སྨན་ཁབ་རྒྱག་ཁུལ་བྱས་ནས་དུག་འདྲེན་ཏེ་ག་ལེ་ག་ལེར་གསོད་ཀྱི་ཡོད་པའི་གནས་ཚུལ་ཡང་མང་པོ་བྱུང་གི་ཡོད་པ་རེད། ཅེས་བརྗོད་སོང་།
ཆབ་སྲིད་བཙོན་ཟུར་མགོན་པོ་འཕྲིན་ལས་ལགས་ཀྱིས་རྒྱའི་བཙོན་འོག་གི་མྱོང་ཚོར་སྐོར་བརྗོད་དོན། དེང་སང་མི་མང་པོ་ཞིག་གིས་རྒྱ་ནག་གཞུང་གིས་ཆབ་སྲིད་གུ་ཡངས་བཏང་ནས་ཆབ་སྲིད་བཙོན་པ་ཀློད་གྲོལ་གཏོང་གི་ཡོད་པའི་སྣང་བ་འདྲ་པོ་ཞིག་ཤར་གྱི་འདུག དེ་རྩ་བ་ཉིད་ནས་མ་རེད། གང་ཡིན་ཟེར་ན། རྒྱ་ནག་གཞུང་གིས་ཁོ་ཚོར་བཙོན་འཇུག་ཁྲིམས་ཆད་ལོ་བརྒྱད་བཅད་ཡོད་ན། ཁོ་ཚོས་དུས་ཆད་དེ་དག་ཆ་ཚང་བསྡད་དེ་མར་ཀློད་གྲོལ་བཏང་བ་ཞིག་ཡིན་པ་ལས། རྒྱ་ནག་གཞུང་གིས་ཆབ་སྲིད་ཀྱི་གུ་ཡངས་བཏང་བ་ཞིག་མ་རེད། དེང་སང་རྒྱ་ནག་གཞུང་གིས་ཆབ་སྲིད་བཙོན་པ་ཀློད་གྲོལ་བཏང་བ་ཡིན་ཡང་། ཁོ་ཚོས་ཆབ་སྲིད་བཙོན་པ་རེད་ཟེར་ནས་ཞྭ་མོ་ནག་པོ་ཞིག་གཡོགས་ཏེ། བཙོན་འཇུག་ཀྱི་དུས་ཆད་ལྟར་ཉིན་མཚན་མེད་པར་སོ་ལྟ་བྱེད་ཀྱི་རེད། ང་འདྲ་པོ་ཡིན་ན་དཀར་མཛེས་རྫོང་ལ་འགྲོ་རྒྱུའི་ཐོབ་ཐང་མེད་པ་མ་ཟད། བདུན་ཕྲག་རེར་ཤང་དང་རྫོང་གི་ཉེན་རྟོག་སར་ཕྱིན་ནས་ས་ཡིག་རྒྱག་དགོས་ཀྱི་ཡོད་སྟབས། ཉེན་རྟོག་པས་གལ་སྲིད་ངས་མ་འོངས་པར་མང་ཚོགས་ལ་ཆབ་སྲིད་ཀྱི་སྐད་ཆ་བཤད་པ་ཡིན་ན། སྔོན་མ་བཙོན་ཁང་ནང་ལོ་ལྔ་བསྡད་པ་ཡིན་ན། ལོ་དེ་ལས་མང་བ་ཁོ་ཚོར་བཙོན་འཇུག་བྱ་རྒྱུའི་ཐོབ་ཐང་ཡོད་པའི་སྐད་ཆ་བཤད་ཀྱི་འདུག་སྟབས། ད་ལྟ་རྒྱ་ནག་གཞུང་གིས་ཆབ་སྲིད་བཙོན་པ་ཀློད་གྲོལ་བཏང་བ་ཡིན་ཡང་ཁོ་ཚོར་འགུལ་སྐྱོད་བྱེད་ས་གང་ཡང་ཡོད་པ་མ་རེད། ཅེས་བརྗོད་སོང་།
རྡོར་རྗེ་ཚེ་བརྟན་ལགས་ཀྱིས་ཕྱི་ལོ་ ༢༠༡༥ ལོའི་བོད་ནང་གི་ལས་འགུལ་སྐོར་བརྗོད་དོན། ཉེ་བའི་ཆར་བོད་ནང་སྐུ་ལུས་མེར་བསྲེགས་ཀྱི་ལས་འགུལ་ཤུགས་ཆེན་པོ་སྤེལ་ཏེ། ཛ་དྲག་གནས་སྟངས་ཆགས་ནས་རྒྱལ་གཅེས་དཔའ་བོ་དཔའ་མོ་མང་པོ་ཞིག་གིས་ཚེ་སྲོག་ཤོར་གྱི་ཡོད་ཀྱང་། ཕྱི་ལོ་ ༢༠༡༥ ལོར་སྐུ་ལུས་མེར་བསྲེགས་གནང་མཁན་ཉུང་དུ་ཕྱིན་འདུག འདི་ལོ་ཆ་བཞག་ན་བོད་ནང་སྐུ་ལུས་མེར་བསྲེགས་གནང་མཁན་མི་བདུན་བྱུང་ཡོད་ཁོངས་ནས། རྒྱལ་གཅེས་པ་བཞི་བུད་མེད་ཆགས་ཀྱི་ཡོད་སྟབས། བོད་ཀྱི་འཐབ་རྩོད་ནང་ལ་བུད་མེད་ཀྱིས་འགན་ཁུར་རྒྱུ་དང་འཛུལ་ཞུགས་བྱེད་ཀྱི་ཡོད་པའི་རྣམ་པ་ཞིག་མཐོང་བསྡད་ཀྱི་འདུག་བསམ་གྱི་འདུག དེ་བཞིན། ད་ལྟའི་ཆར་སྐུ་ལུས་མེར་བསྲེགས་གནང་མཁན་ནང་ནས་ཤུགས་ཆེ་བ་མི་སྐྱ་ཆགས་ཀྱི་འདུག སྔོན་མ་མགོ་ཚུགས་དུས་གྲྭ་པ་དང་བཙུན་མ་མང་པོ་ཞིག་གིས་སྐུ་ལུས་མེར་བསྲེགས་གནང་བའི་གནས་སྟངས་བྱུང་ཡོད་ཀྱང་། འདི་ལོ་སྐུ་ལུས་མེར་བསྲེགས་གནང་མཁན་མང་ཆེ་བ་ལོ་མགོར་བྱུང་ཡོད་ཀྱང་། ལོ་མཇུག་ལ་མི་སྒེར་གྱིས་ཁྲོམ་ལ་ཐོན་ནས་རྒྱ་གཞུང་ལ་ངོ་རྒོལ་སྐད་འབོད་བརྒྱབ་པ་སོགས་ཀྱི་ལས་འགུལ་ཁག་མི་འདྲ་བ་ཧ་ལམ་ ༡༥ ནས་ ༡༦ ཙམ་བྱུང་སྟེ། མི་མང་པོ་ཞིག་འཛིན་བཟུང་དང་བཙོན་འཇུག་ཁྲིམས་ཆད་བཅད་པ་སོགས་ཀྱི་གནས་ཚུལ་མང་པོ་ཞིག་ཐོན་ནས། བོད་ནང་གི་ཆབ་སྲིད་ལས་འགུལ་དེ་ཤུགས་ཆེ་རུ་དང་རྣམ་པ་མི་འདྲ་བ་ཞིག་ཏུ་ཁ་ཕྱོགས་ཡོད་པ་རེད། ཅེས་བརྗོད་སོང་།
ཐེངས་འདིའི་རྗེས་དྲན་བགྲོ་གླེང་ཐོག་ཆབ་སྲིད་བཙོན་པ་དང་རྩོམ་པ་པོ་སྒྲོལ་མ་སྐྱབས་ཀྱི་སྙན་ངག་དང་། རྩོམ་པ་པོ་བཀྲ་ཤིས་རབ་བརྟན་ལགས་ཀྱི་སྙན་ངག་བོད་དབྱིན་གཉིས་ཐོག་ནས་གྱེར་འདོན་གནང་སོང་།
གསར་འགོད་པ། དོན་གྲུབ།
