ཧྥ་རན་སིའི་སྲིད་འཛིན་ཟུར་བ་སར་ཀོ་ཙེ་ཡིས་ལས་ཁུར་ཡུན་རིང་རྒྱལ་ནང་གི་ཆབ་སྲིད་དཔལ་འབྱོར་བཅོས་བསྒྱུར་ཐད་ཀྱི་འཐུས་ཤོར་དང་གྲུབ་འབྲས་གང་བྱུང་སྐོར་གྱི་དཔེ་དེབ་གསར་བ་ཞིག་དཔར་འགྲེམ་གནང་ཡོད་འདུག
དབྱིན་ཇིའི་རྒྱལ་ཡོངས་ནངས་མོའི་གསར་ཤོག་རང་དབང་ (independent) ཞེས་པའི་སྟེང་གནས་ཚུལ་སྤེལ་བ་ལྟར་ན། ཁ་སང་ཧྥ་རན་སིའི་སྲིད་འཛིན་ཟུར་བ་སར་ཀོ་ཙེ་ (Sarkozy) མཆོག་གིས་བརྩམས་པའི་ (La France pour la vie)(France for life) ཞེས་པ་དངོས་སུ་སྤྱི་ཚོགས་སྟེང་དཔར་འགྲེམ་བྱས་ཡོད་པ་དང་། དཔེ་དེབ་དེ་ཧྥ་རན་སིའི་ཆེས་མིང་དུ་གྲགས་པའི་ཕ་ལོན་ (Plon) དཔེ་སྐྲུན་ཁང་གིས་པར་སྐྲུན་བྱས་འདུག་ལ། རྒྱ་ཆེའི་མི་མང་གིས་དཔེ་དེབ་དེ་ཀློག་འདུན་ཆེན་པོ་ཡོད་སྟབས། དཔར་གྲངས་ཁྲི་ཉི་ཤུ་ལྷག་འགྲེམ་འཚོང་ཐུབ་པར་ཚོད་དཔག་བྱེད་ཀྱི་འདུག
དཔེ་དེབ་དེའི་ནང་སར་ཀོ་ཙེ་ཡིས་རང་ཉིད་ཆབ་སྲིད་ལས་དོན་ཁྲོད་ཞུགས་ཡུན་རིང་རྒྱལ་ནང་གི་ཆབ་སྲིད་དཔལ་འབྱོར་བཅོས་བསྒྱུར་ཐད་ཀྱི་འཐུས་ཤོར་དང་གྲུབ་འབྲས་ཅི་བྱུང་སྐོར་དང་། ལྷག་པར་དུ་ཕྱི་ལོ་ ༢༠༠༧ ལོར་སྲིད་འཛིན་གྱི་རྒྱལ་ཁ་ཐོབ་རྗེས་རྒྱལ་ནང་གི་ཆབ་སྲིད་དཔལ་འབྱོར་བཅོས་བསྒྱུར་ཐད་ཀྱི་ནོར་འཁྲུལ་ཆེན་པོ་གཉིས་བཟོས་པར་འགྱོད་བཤགས་གནང་བའི་སྐོར་ལ་ཁོང་གིས། དེ་གླེན་རྟགས་ཤིག་རེད། དེང་སྐབས་ང་འགྱོད་པ་སྐྱེས་ཀྱི་འདུག ངས་སྲིད་འཛིན་གྱི་ཆེ་མཐོང་བརླག་བཅུག་སོང་། ཞེས་སོགས་བརྗོད་ཡོད་འདུག
ཧྥ་རན་སིའི་མི་མང་གི་བསམ་ཚུལ་བསྡུ་རུབ་བྱས་པའི་ནང་། འདས་ལོའི་ཕྱི་ཟླ་ ༡༡ ནང་སྔོན་འགྲོའི་སྲིད་འཛིན་འོས་བསྡུའི་སྐབས་སུ། ཁོང་གི་འོས་གྲངས་དེ་སྔའི་སྲིད་བློན་ཟུར་བ་ཨ་ལཱེན་ཇེ་ཕི་ (Alain Juppé) ལས་ཉུང་བ་ཡོད་པ་དང་། འདི་ལོའི་རེས་གཟའ་སྔོན་མའི་འོས་འདེམས་སྐབས་སུ། མི་མང་བརྒྱ་ཆ་ ༢༣ གྱིས་སར་ཀོ་ཙེ་ལོ་རྗེས་མའི་ཕྱི་ཟླ་ ༤ ནས་ ༥ བའི་སྐབས་ཀྱི་སྲིད་འཛིན་འོས་གཞིར་འདེམ་འདོད་ཡོད་པའི་འདོད་འདུན་བསྟན་ཡོད་འདུག
ཧྥ་རན་སིའི་སྲིད་དོན་དབྱེ་ཞིབ་པ་ཁ་ཅིག་གིས་སར་ཀོ་ཙེ་ཡིས་རང་ཉིད་ཕྱི་ལོ་ ༢༠༡༧ ལོར་བསྐྱར་དུ་ཧྥ་རན་སིའི་སྲིད་འཛིན་འོས་འདེམས་ཁྲོད་རྒྱལ་ཁ་ཐོབ་ཆེད་དཔེ་དེབ་དེ་པར་སྐྲུན་བྱས་པ་ཞིག་ཡིན་ཚུལ་རྗོད་ཀྱི་ཡོད་ནའང་། ཧྥ་རན་སིའི་བརྙན་འཕྲིན་ཁང་གིས་སར་ཀོ་ཙེ་ལ་བཅར་འདྲི་ཞུས་སྐབས་ཁོང་གིས། དཔེ་དེབ་དེ་ནི་ང་རང་ཆབ་སྲིད་ཁྲོད་ཞུགས་རྗེས་ཀྱི་མི་ཚེའི་བསམ་བློའི་སྐོར་ཡིན་པ་མ་གཏོགས། ཕྱི་ལོ་ ༢༠༡༧ ལོའི་སྲིད་འཛིན་རྒྱལ་ཁ་ཐོབ་ཆེད་རང་ཉིད་ཁྱབ་བསྒྲགས་བྱས་པ་ཞིག་གཏན་ནས་མིན་ཚུལ་བརྗོད་ཡོད་པ་རེད།
གནས་ཚུལ་ལྟར་ན། ཧྥ་རན་སིའི་སྲིད་འཛིན་ཟུར་བ་སར་ཀོ་ཙེ་མཆོག་ནི་ཕྱི་ལོ་ ༢༠༠༧ ནས་ ༢༠༡༢ བར་ཧྥ་རན་སིའི་སྲིད་འཛིན་གནང་བ་དང་། ཁོང་སྲིད་འཛིན་ལས་ཐོག་སྐབས་སུ་རྒྱ་ནག་གིས་བོད་ཐོག་འཛིན་པའི་སྲིད་ཇུས་ལ་སྐྱོན་བརྗོད་དང་རྒྱ་ནག་ནང་ཨོ་རྩེད་འགྲན་ཚོགས་ཚུགས་པར་བཀག་འགོག་གནང་ཡོད་པ་དང་། ལྷག་པར་དུ་ཕྱི་ལོ་ ༢༠༠༨ ལོའི་ཕྱི་ཟླ་ ༡༢ ཚེས་ ༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་འཕྲད་གནང་སྟབས། རྒྱ་ནག་གཞུང་གིས་ཁོང་ལ་སྐྱོན་བརྗོད་དྲག་པོ་བྱས་ཡོད་པ་དང་། དུས་སྐབས་དེར་ཧྥ་རན་སི་དང་རྒྱ་ནག་བར་གྱི་སྲིད་དོན་དང་དཔལ་འབྱོར་འབྲེལ་ལམ་སྡུག་ཏུ་ཕྱིན་ཡོད་འདུག
གསར་འགོད་པ། པདྨ་རྒྱལ།
འགྱེད་པ་གཉིས་དེ་བོད་དོན་མིན་པ་ཤོག
ངེས་པར་ཁོང་ལ་རྒྱལ་ཁ་ཐོབ་མིན་རང་ཉིད་ནུས་པ་དང་འཇོན་ཐང་མི་མང་གི་འདོད་འདུན་སྐོང་ཐུབ་མིན་ལ་ཐུག་ཡོད་པ་ཡིན་དུས་གསལ་བཤད་གནང་བ་འདི་གྲུབ་འབྲས་ཤིག་གིས་ཁ་ཕྱོགས་རེད་ཟེར་ཆོག་པ་ཞིག་རེད་འདོད།