མངོན་ལྐོག་རྒྱབ་མདུན་མཚུངས་པ་གནང་རོགས།

དེ་རིང་བོད་ཀྱི་སྨན་རྩིས་ཁང་ལོ་བརྒྱ་འཁོར་བའི་མཛད་སྒོ་ཚོགས་པའི་སྟེང་སྨན་རྩིས་ཁང་གི་འགན་འཛིན་མཆོག་གིས་མ་འོངས་པའི་ལོ་གཅིག་རིང་ཕྱི་རྒྱལ་ཁག་ཏུ་བོད་པའི་སྨན་རྩིས་འགྲེམ་སྟོན་དང་ཚོང་སྒྱུར་སོགས་ཞུ་རྒྱུ་ཡིན་སྐོར་བརྗོད་སོང་།

དེ་རིང་སྔ་དྲོའི་ཆུ་ཚོད་ ༩།༣༠ སྟེང་བཞུགས་སྒར་ཐེག་ཆེན་གཙུག་ལག་ཁང་དུ་བོད་ཀྱི་སྨན་རྩིས་ཁང་དབུ་བརྙེས་ཏེ་མི་ལོ་བརྒྱ་ (༡༩༡༦ – ༢༠༡༦) འཁོར་བའི་དུས་དྲན་མཛད་སྒོ་སྲུང་གཙི་གནང་སོང་ལ། མཛད་སྒོའི་སྐུ་མགྲོན་གཙོ་བོ་༧གོང་ས་མཆོག་གི་གཙོས་པའི་རྒྱ་གར་ཧི་མ་ཅལ་མངའ་སྡེའི་ནགས་ཚལ་བློན་ཆེན་སྐུ་ཞབས་ཤཱ་རེ་ཐ་ཀུར་སེན་ཧ་བྷར་མུ་རེ་ (Shri Thakur Singh Bharmouri) དང་། ཨ་ཡུར་ཝེ་དྷའི་བློན་ཆེན་སྐུ་ཞབས་ཤཱ་རེ་ཀ་རན་སེན་ཧ་ (Shri Karan Singh) མཆོག ཧི་མ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཤཱ་རེ་ར་བེ་ཐ་ཀུར་ (Shri Ravi Thakur) མཆོག དེ་བཞིན། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག དེ་བཞིན། དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། བོད་མི་མང་སྤྱི་འཐུས་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ། དྷ་ས་ཁུལ་གྱི་སེར་སྐྱ་མང་ཚོགས་སོགས་ཁྱོན་མི་གྲངས་ ༢༠༠༠ ཙམ་འཛོམས་འདུག

མཛད་སྒོའི་ཐོག་མར་བོད་རྒྱ་གཉིས་ཀྱི་རྒྱལ་གླུ་རྔ་རོལ་དང་བཅས་པ་ཕུལ་བ་དང་། བོད་ཀྱི་སྨན་རྩིས་ཁང་གི་དགེ་ལས་སློབ་ཕྲུག་ཚོས་བོད་ཀྱི་སྨན་རྩིས་ཁང་གསར་འཛུགས་གནང་སྟེ་མི་ལོ་བརྒྱ་འཁོར་བའི་དུས་དྲན་མཛད་སྒོར་གསར་རྩོམ་གནང་བའི་མཉམ་གཞས་བཏང་རྗེས། ༧གོང་ས་མཆོག་གིས་སྨན་རྩིས་ཁང་གི་སྨན་པ་ཟུར་བ་དང་སྐུའི་བླ་སྨན་ཟུར་བ་སྨན་པ་ཡེ་ཤེས་དོན་ལྡན་ལགས་དང་། ཧི་མ་ཅལ་མངའ་སྡེའི་བློན་ཆེན་དང་ཨུ་རུ་སུའི་གྲོས་ཚོགས་འཐུས་མི་རྣམ་པར་ཕྱག་རྟགས་དང་གཟེངས་རྟགས་སོགས་བསྩལ་སོང་།

སྨན་རྩིས་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱིས་བོད་ཀྱི་སྨན་རྩིས་ཁང་གི་ལོ་རྒྱུས་ངོ་སྤྲོད་གནང་བའི་ནང་། ཕྱི་ལོ་ ༢༠༡༦ ལོ་ནི་༧རྒྱལ་མཆོག་ལྔ་པ་ཆེན་པོ་མཆོག་གིས་ལྕགས་པོ་རི་སྨན་པ་གྲྭ་ཚང་ཕྱག་བཏབ་ནས་མི་ལོ་ ༣༢༠ འཁོར་ཡོད་པ་དང་། ༧རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་ནས་ལྷ་ས་སྨན་རྩིས་ཁང་ཕྱག་བཏབ་ནས་མི་ལོ་ ༡༠༠ འཁོར་བའི་དུས་ཚིགས་ཤིག་ཏུ་འཁེལ་ཡོད་སྟབས། འབྱུང་འགྱུར་ཕྱི་ཟླ་ ༤ པ་ནས་ཚོགས་བཟུང་ཆུང་དྲུག་ཏུ་ས་ཆ་ཆ་བགོས་བྱས་ཏེ་རྒྱལ་ཁབ་འདྲ་མིན་ནང་བོད་ལུགས་གསོ་བ་རིག་པ་དང་སྐར་རྩིས་རིག་པའི་འགྲེམ་སྟོན་དང་གཏམ་བཤད། ཟས་སྤྱོད་ལམ་སྟོན་དང་བགྲོ་གླེང་། སྨན་རྫས་ཐོན་སྐྱེད་ཚོང་བསྒྱུར་སོགས་ཀྱི་ལས་འཆར་སྒྲིག་ཡོད་སྐོར་དང་། དེ་ལ་བོད་ཀྱི་སྨན་རྩིས་ཁང་གི་ལས་བྱེད་དང་ལས་མི་རྣམས་ཀྱིས་ཆུ་ཚོད་ ༡༠༠ ཡི་ཕོགས་དང་གླ་ཆ་ཕུལ་ཡོད་པ་དང་། སློབ་ཕྲུག་རྣམས་ནས་ཆུ་ཚོད་ ༡༠༠ རིང་དང་བླངས་ལས་ཀ་བྱས་པ། སྨན་རྩིས་ཁང་གི་ལས་བྱེད་ཟུར་བ་དང་རྒྱ་གར་གྲོང་ཁྱེར་ཁག་ནང་ཡོད་པའི་ནད་པ་རྣམས་ནས་ཞལ་འདེབས་བྱུང་བ་སོགས་ད་བར་ཧིན་སྒོར་འབུམ་ ༧༥ ཙམ་འབྱོར་ཡོད་སྐོར་སོགས་བརྗོད་སོང་།

༧གོང་ས་མཆོག་གིས་གསུང་བཤད་གནང་དོན། ང་ཚོ་འདིར་བཙན་བྱོལ་ལ་བསླེབས་ནས་གནས་སྟངས་རྣམ་པ་དྲག་པོ་ཞིག་གི་འོག་ནས་ང་ཚོ་ཚང་མས་རིག་པ་སྒྲིམ་ནས་གང་ཡོང་ཅི་ཡོང་བྱས་ཡོད་པ་རེད། ད་བར་མི་ལོ་ང་བདུན་ཕྱིན་ཡོད་པ་རེད། སྨན་རྩིས་ཁང་ཡང་དེའི་ཆ་ཤས་ཤིག་རེད། ང་ཚོ་ཚང་མས་དཀའ་ལས་བརྒྱབ། དངོས་གནས་བསམ་པ་རྣམ་དག དྲང་མོ་དྲང་བཞག རྒྱབ་མདུན་ངོ་རྒོལ་མེད་པ། རང་དོན་ཁོག་བཅུག་མ་ཡིན་པར། རྒྱུ་འབྲས་དྲང་བདེན་གྱི་ཐོག་ནས་བཀའ་ལས་བརྒྱབ་ནས་འབྲས་བུ་གང་ལ་གང་འཚམ་བྱུང་བསྡད་ཡོད་པ་རེད། ཅེས་དང་། ཁོང་གིས་ནང་ཆོས་ཀྱི་ཕྱོགས་ནས། བོད་རྒྱ་ཆེའི་མི་མང་སངས་རྒྱས་པའི་ཆོས་པ་རེད། སངས་རྒྱས་པའི་ཆོས་ཟེར་ན་ག་རེད་ལབ་ན། ཁ་ལ་མཛུབ་མོ་བཙུགས་ནས་སྡོད་པ་ལས་བཤད་རྒྱུ་མི་འདུག་གཱ ཧི་མ་ལ་ཡའི་རི་རྒྱུད་ཀྱང་དེ་འདྲ་རེད། གཡུ་ཐོག་ཡོན་ཏན་མགོན་པོའི་གཞུང་ནང་། གཡུ་ཐོག་ཡོན་ཏན་མགོན་པོར་བདུན་ཕྲག་གཅིག་ལ་གསོལ་བ་བཏབ་ན་ཞེ་དྲག་ཅིག་ཡོང་གི་ཟེར་བ་དེར་ང་ཡིད་ཆེས་མེད། བཅོམ་ལྡན་འདས་ལའང་ལོ་དང་ཟླ་བ་བསྟུད་ནས་གསོལ་བ་བཏབ་ཀྱང་སོ་སོས་མ་སྦྱང་ན་ཡོང་རྒྱུ་མི་འདུག་གཱ ཅེས་གསུང་སོང་།

ཁོང་གིས་བོད་ཀྱི་གསོ་བ་རིག་པའི་ཐོག་དེང་སང་དུས་དང་འཚམ་པའི་ཡར་རྒྱས་གཏོང་རྒྱུ་གལ་ཆེན་ཡིན་སྐོར་གསུངས་དོན། ང་ཚོ་བོད་རང་གི་གསོ་བ་རིག་པ་འདི་གཡུ་ཐོག་ཏོན་ཏན་མགོན་པོ་ནས་ཡིན་ན་འདྲ། དེ་ནས་ད་ལྟའི་བར་ང་ཚོས་ལག་ལེན་བསྟར་སྡོད་པ་དེ་རྒྱ་ནག་གི་གསོ་བ་རིག་པའི་ཐོག་ནས་ལེགས་བཤད་བླངས། གཙོ་བོ་རྒྱ་གར་གྱི་ཨ་ཡོ་བ་དྷེ་ཐོག་ནས་ལེགས་བཤད་བླངས། དེ་བཞིན། ཡུ་ན་ནེ་ཟེར་བ་དེ་ནས་ལེགས་བཤད་བླངས། དེ་ལྟར་བྱུང་བ་རེད། ད་ལྟ་ང་ཚོ་དུས་རབས་ཉེར་གཅིག་པར་བསླེབས་བསྡད་ཡོད་དུས། ང་ཚོར་གསོ་བ་རིག་པ་ཡོད་བསྡད་པ་དེའི་ཐོག་ལ་དེང་དུས་ཀྱི་ཚན་རིག་གི་ཐོག་ནས་ཡར་རྒྱས་ཕྱིན་བསྡད་པའི་གསོ་བ་རིག་པ་དེ་འདྲའི་མཉམ་དུ་དཔྱད་བསྡུར་བྱེད་རྒྱུ་ཞེ་དྲགས་གལ་ཆེན་པོ་རེད། ཅེས་གསུངས་འདུག

ཡང་ཁོང་གིས་ང་ཚོར་ཅིག་ཡོད་བསམ་ནས་འདི་ལྟར་བསྡད་བསྡད་པ་ཡིན་ན་ནོར་འཁྲུལ་རེད། གོང་དུ་ཞུས་པ་བཞིན་ནང་དོན་རིག་པར་ཆ་བཞག་ནའང་། ངས་གདན་ས་ཁག་ལ་ནམ་རྒྱུན་དེ་སྔ་བོད་དུ་ང་ཚོ་ས་ཁུག་ལུང་ཁུག་ནང་བསྡད་པ་རེད། ད་ཆ་ང་ཚོ་འཛམ་བུ་གླིང་གི་སྡིངས་ཆའི་སྒང་ལ་བསླེབས་བསྡད་ཡོད་སྟབས། ང་ཚོས་ཕྱོགས་ཡོངས་ཀྱི་གནས་ཚུལ་ཤེས་པར་བྱས་པའི་ཐོག་ནས་ང་ཚོས་ལེགས་སྐྱེས་འབུལ་ཐུབ་པ་ག་རེ་འདུག ང་རང་ཚོའི་ལག་ཏུ་ཡོད་པའི་ནང་དོན་རིག་པ་ད་དུང་ཡར་རྒྱས་གཏོང་དགོས་པ་ག་རེ་འདུག དེ་ལ་བསམ་བློ་གཏོང་དགོས་པ་རེད་ཅེས་ཤོད་ཀྱི་ཡོད། གསོ་བ་རིག་པ་ཡིན་ནའང་དེ་དེ་བཞིན་བྱེད་དགོས་པ་རེད། ང་རང་ཚོས་འཆར་ཅན་ངའི་རྒན་ལགས་ཀྱིས་གསུངས་བྱུང་། ཅིག་གིས་དེ་འདྲ་གསུངས་ཡོད་པ་རེད་ཟེར་བ་གཅིག་པུར་ཆ་མི་འཇོག་པར་གོ་བསྡུར་བྱས་ཏེ། ཚན་རིག་པའི་ཐོག་ནས་བརྟག་དཔྱད་བྱས་ཏེ་ཡར་རྒྱས་གཏོང་ཐུབ་པ་ཞིག་དགོས་པ་རེད། དེ་ནས་ང་ཚོར་སྔོ་སྨན་མང་པོ་ཞིག་ཡོད་པ་དང་། དེ་བཞིན་རིན་ཆེན་རིལ་བུ་མང་པོ་ཞིག་ཡོད་པ་རེད། དེ་ཚོའི་ནུས་པ་གཞུང་ནས་གསུང་བཞག་པ་དེ་ཚོ་ཏག་ཏག་ཅིག་འགྲོ་ཡི་ཡོད་མེད་ཚན་རིག་པའི་ཐོག་ནས་བརྟག་དཔྱད་བྱས་པ་ཡིན་ན། ཚང་མས་ཡིད་ཆེས་དང་བརྩི་འཇོག་བྱེད་པ་ཞིག་ཡོང་གི་རེད། ངས་གསོ་བ་རིག་པ་དེ་འདྲ་ཞིག་ལ་ངོས་འཛིན་བྱེད་ཀྱི་ཡོད། གང་ལྟར་བོད་ཀྱི་གསོ་བ་རིག་པ་དེ་ཞེ་དྲགས་ཡག་པོ་ཞིག་རེད་འདུག ཅེས་གསུངས་སོང་།

ཡང་ཁོང་གིས་མངོན་ལྐོག་རྒྱབ་མདུན་མཚུངས་བའི་ཐོག་ནས་ཕྱག་ལས་གནང་དགོས་སྐོར་གསུངས་དོན། བོད་ཀྱི་སྨན་རྩིས་ཁང་ནས་ད་ལྟའི་བར་དུ་བྱས་རྗེས་གྲུབ་འབྲས་ཡག་ཐག་ཆོད་བྱུང་ཡོད་པ་རེད། ཡིན་ནའང་ད་དུང་ང་ཚོ་གཞིས་ཆགས་ཁག་ཏུ་ཕྱིན་སྐབས་ནད་པ་མང་པོ་ཞེ་དྲགས་འདུག ནད་རིགས་སྔོན་འགོག་ཐོག་ལ་འཐུས་ཤོར་ཕྱིན་པའི་རྟགས་གསལ་བོ་ཞེ་དྲགས་དྲགས་འདུག འཕྲོད་བསྟེན་ལས་ཁུངས་ནས་ཀྱང་འཐུས་ཤོར་ཞེ་དྲགས་ཕྱིན་པ་འདྲ་པོ་འདུག་ལ། སྨན་རྩིས་ཁང་གི་བོད་སྨན་སྡེ་ཚན་ཁོང་ནས་ཀྱང་འཐུས་ཤོར་ཕྱིན་པའི་བཟོ་ལྟ་འདུག་གཱ། ང་ཚོ་འདིར་འདྲ་ཆགས་པོ་བཤད། རྒྱས་རྒྱས་སྤྲོས་སྤྲོས་བྱས། ས་གནས་ས་ཐོག་ལ་ནད་པ་དང་དབུལ་ཕོངས། སྐྱབས་མེད་མགོན་མེད་ལྷག་བསྡད་པ་དེ་ཚོའི་གྲས་དེ་ང་ཚོའི་རྒྱབ་མདུན་མངོན་ཀློག་མ་མཚུངས་པའི་རྟགས་རེད། མདུན་ལ་འདྲ་ཆགས་པོ་བྱས་ཏེ། རྒྱབ་ལོགས་ལ་འཐུས་ཤོར་ཕྱིན་བསྡད་པ་ཡིན་ན། ང་ཚོས་འདིར་འདྲ་ཆགས་པོ་ཞེ་དྲགས་བྱས་ཀྱང་གཟི་བརྗིད་ཁོག་སྟོང་ཟེར་བ་དེ་ཆགས་པ་རེད། དེར་བརྟེན། ང་ཚོ་འདྲ་ཆགས་པོའི་ཐོག་ལ་འགྲོ་རྒྱུ་མི་འདུག ཁ་ཡོད་ལག་ཡོད་ཐོག་འགྲོ་དགོས་པ་རེད་མ་གཏོགས་འདྲ་ཆགས་ཆགས་ཤིག་གི་ཐོག་ཕྱིན་པ་ཡིན་ན། ད་ལྟའི་བར་དུ་དེ་འདྲ་དེ་འདྲ་བྱས་ཏེ་ཁུངས་འཁྱོལ་བ་རེད། ང་ནི་ཉི་མ་ལ་བརྒལ་མཚམས་ཆགས་བསྡད་ཡོད་པ་རེད། ལོ་བཅུ་དང་བཅོ་ལྔའི་འཕྲོ་ནས་ཤི་འགྲོ་བ་རེད། དེ་ནས་ཁྱེད་རང་ཚོའི་སྒང་ལ་འགན་བསླེབས་བསྡད་ཡོད་པ་རེད། གཟབ་གཟབ་བྱས་ན་མ་གཏོགས། ད་ལྟའི་བར་ཁུངས་འཁྱོལ་ཚམ་འཁྱོལ་ཙམ་བྱུང་སོང་། ད་དུང་ཁུངས་འཁྱོལ་འགྲོ་བ་རེད་བསམ་ན་ནོར་འཁྲུལ་རེད་དཱ། དེ་ཁྱོད་རང་ཚོ་ཚང་མས་སེམས་ལ་ངེས་པ་བྱོས། ང་རང་ཚོའི་སྤྱི་ཚོགས་ནང་ལ་ཡ་རབས་སྤྱོད་བཟང་ཟེར་བ་དེ་ཚོ་ཁ་ནས་བཤད། ལག་ལེན་ངོ་མའི་ཐོག་ལ་ཚད་དམར་རུ་དམར་རུ་འགྲོ་བཞིན་ཡོད་པའི་བཟོ་ལྟ་འདུག དེ་ཚོར་གཟབ་གཟབ་བྱེད་དགོས་པ་རེད། དེ་ངས་བཤད་འདོད་བྱུང་སོང་། ཞེས་གསུངས་སོང་།

སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་ལགས་ཀྱི་ཡིག་ཐོག་གི་གཏམ་བཤད་ནང་འཁོད་དོན། འབྱུང་འགྱུར་རྒྱག་ནག་སྐམ་ས་ཆེན་མོར་བོད་ལུགས་གསོ་བ་རིག་པས་ཞབས་འདེགས་ཞུ་རྒྱུའི་གོ་སྐབས་འཐོབ་སྲིད་པ་རེད་ཅེས་༧གོང་ས་སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་སྟབས། སྔོན་འགྲོའི་གྲ་སྒྲིག་ཏུ་རྒྱ་ཡིག་སྡེ་ཚན་གསར་འཛུགས་ཀྱིས་རྒྱ་ཡིག་ཤེས་པའི་སྨན་པ་བཞི་ལ་བཀོད་ཁྱབ་བྱས་པ་དང་། རྒྱ་ཡིག་གི་དྲ་རྒྱ་དང་ཡིག་ཆ་བཟོས་པ་ཁག་ཕྱི་མིས་ཚད་ལྡན་ངོས་ལེན་གནང་གི་ཡོད་ཅིང་། ད་ལྟ་སྨན་པ་བཞི་ཐའེ་ཝན་དུ་སྐམ་ཁབ་སློབ་སྦྱོང་དང་ལས་དོན་འཆར་འགོད་ངོ་བོར་ཆེད་གཉེར་ཞུས་ཡོད།

ཕྱི་ལོ་ ༢༠༡༢ ནས་ ༢༠༡༣ བར་བོད་སྨན་གྱི་ཐོན་སྐྱེད་ཐུན་གྲངས་ས་ཡ་ ༣༧།༥ ཡིན་པ་དང་། ༢༠༡༥ ནས་ ༢༠༡༦ བར་ཐུན་གྲངས་ས་ཡ་ ༤༧།༨ ཡིན་པ་འཕར་ཚད་བརྒྱ་ཆ་ ༢༧།༥ ཟིན་གྱི་ཡོད་པ་དང་། རྒྱ་གར་གྲོང་ཁྱེར་ཁག་ནང་སྨན་ཁང་གསར་འཛུགས་ཀྱི་སྦྱིན་བདག་ཡོད་ཀྱང་སྨན་དང་སྨན་པ་མ་འདེང་བའི་དཀའ་ངལ་རིམ་པས་སེལ་ཐབས་བྱས་ཏེ་སྨན་ཁང་ཁ་ཤས་གསར་འཛུགས་བྱ་རྒྱུ་ཡིན།

ཕྱི་ལོ་ ༢༠༡༥ ནས་ ༢༠༡༦ བར་དེབ་སྐྱེལ་བྱས་པའི་ནད་པ་འབུམ་ ༧ ཙམ་བྱུང་བ་ལས་ནད་པ་བརྒྱ་ཆ་ ༨༠ ཙམ་རྒྱ་གར་བ་ཡིན་པ་དང་། ད་ལྟའི་ནད་པ་ཡོང་སྟངས་ལ་ཞིབ་འཇུག་བྱས་སྐབས། འབྱུང་འགྱུར་ལོ་ངོ་གཉིས་གསུམ་ནང་རྒྱ་གར་ནད་པ་བརྒྱ་ཆ་ ༩༠ ནས་༩༥ འཕར་སྲིད་པར་ཚོད་དཔག་བྱེད་ཀྱི་ཡོད།

རྒྱ་གར་ནགས་ཚལ་བློན་ཆེན་ཤཱ་རེ་ཐ་ཀུར་སེན་ཧ་བྷར་མུ་རེ་མཆོག་གིས། འདས་པའི་མི་ལོ་དྲུག་བཅུ་ཙམ་གྱི་སྔོན་ལ་༧གོང་ས་མཆོག་རྒྱ་གར་དུ་ཕེབས་དུས་ང་རང་ལོ་བཅུ་དྲུག་ལ་སོན་པའི་སློབ་ཕྲུག་ཅིག་ཡིན་སྐོར་དང་། སྐབས་དེ་ནས་བཟུང་༧གོང་ས་མཆོག་དང་བཙན་བྱོལ་བོད་མི་ཚོས་ཞི་བའི་ལམ་ནས་བོད་ཀྱི་རྩ་དོན་མུ་མཐུད་བརྩོན་ལེན་གནང་བཞིན་པ་དེ་ཧ་ལས་དགོས་པ་ཞིག་ཡིན་པ། ༧གོང་ས་མཆོག་གིས་རྒྱ་གར་ནང་བོད་ཀྱི་སྨན་རྩིས་ཁང་གསར་འཛུགས་གནང་བ་དེ་ནི་བཙན་བྱོལ་བོད་མི་དང་རྒྱ་གར་མི་མང་ཙམ་མ་ཟད། འཛམ་གླིང་སྟེང་གི་འགྲོ་བའི་མི་རིགས་ཀྱི་འཕྲོད་བསྟེན་བདེ་ཐང་ལ་ཕན་པའི་མཛད་པ་རླབས་ཆེན་ཞིག་ཡིན་སྐོར་སོགས་བརྗོད་སོང་།

རྒྱ་གར་ཧི་མ་ཅལ་གྲོས་ཚོགས་འཐུས་མི་སྐུ་ཞབས་ཤཱ་རེ་ར་བེ་ཐ་ཀུར་ལགས་ཀྱིས། ཁོང་ལ་ཨ་ལགས་བཀྲ་ཤིས་ཕུན་ཚོགས་ཟེར་བའི་རྩ་བའི་བླ་མ་ཞིག་ཡོད་པ་དང་། ཨ་ལགས་བཀྲ་ཤིས་ཕུན་ཚོགས་ལགས་སྔོན་ཆད་པཎ་ཆེན་རིན་པོ་ཆེ་དང་ལྷན་དུ་རྒྱ་ནག་གི་བཙོན་ཁང་དུ་སྡོད་སྐབས། པཎ་ཆེན་མཆོག་གིས་ཁོང་ལ་གལ་སྲིད་རྒྱ་ནག་གིས་ངེད་གཉིས་ལ་གཅར་རྡུང་བཏང་སྟེ་ངེད་ཀྱི་མགོ་ནས་ཁྲག་ཐོན་པ་ཡིན་ན། ཁྲག་དེས་བོད་ཀྱི་ལོ་རྒྱུས་འབྲི་རྒྱུ་དང་། ཁྲག་གི་ལོ་རྒྱུས་དེ་མི་རབས་ནས་མི་རབས་བར་ཉམས་མི་སྲིད་ཅེས་སོགས་གསུངས་ཡོད་སྐོར་དང་། བོད་ཀྱི་བདེན་པའི་འཐབ་རྩོད་ཆེད་བོད་མི་ཚོས་ད་ལྟའི་བར་ལུས་སྲོག་ཡན་ཆད་བློས་གཏོང་གནང་བར་གྲུབ་འབྲས་ཤིག་ཏན་ཏན་འབྱུང་ངེས་ཡིན་སྐོར་སོགས་བརྗོད་སོང་།

དེའི་རྗེས་སྲིད་སྐྱོང་བློ་བཟང་སེང་གེ་མཆོག་དང་ཚོགས་གཙོ་སྤེན་པ་ཚེ་རིང་རྣམ་པ་གཉིས་ནས་བོད་ཀྱི་སྨན་རྩིས་ཁང་གི་དགེ་ལས་ཁ་ཅིག་གི་དཔེ་དེབ་གསར་བ་ལྔ་དབུ་འབྱེད་གནང་བ་དང་། བོད་ཀྱི་སྨན་རྩིས་ཁང་དབུ་བརྙེས་ནས་མི་ལོ་ ༡༠༠ འཁོར་བའི་དུས་དྲན་མཛད་སྒོ་མཇུག་བསྡུས་ཡོད་པ་རེད།

གསར་འགོད་པ། པདྨ་རྒྱལ།