ཤེས་ཡོན་གྱི་ཐོག་ནས་ཁ་གཏད་གཅོག་དགོས་པ་དེ་སྐབས་བབ་ཀྱི་ང་ཚོའི་ལས་འགན་རེད།

དྷ་ས་རིགས་ལམ་སློབ་གཉེར་ཁང་དང་ས་རཱ་མཐོ་སློབ་ཀྱི་མཐར་ཕྱིན་སློབ་མའི་མཛད་སྒོའི་ཐོག་ཤེས་རིག་བཀའ་བློན་མཆོག་ནས་མཐར་ཕྱིན་སློབ་མ་ཚོས་མུ་མཐུད་ཤེས་ཡོན་གྱི་ཚད་མཐོན་པོ་ལེན་པར་འབད་བརྩོན་གནང་རྒྱུ་གལ་ཆེན་པོ་ཡིན་སྐོར་སྐུལ་མ་གནང་སོང་།

དེ་རིང་སྔ་དྲོའི་ཆུ་ཚོད་ ༩ ཐོག ས་རཱ་བོད་ཀྱི་མཐོ་རིམ་སློབ་གཉེར་ཁང་དུ། དྷ་ས་རིགས་ལམ་སློབ་གཉེར་ཁང་གི་རིས་མེད་དགེ་བཤེས་ཀྱི་བསླབ་པ་མཐར་ཕྱིན་པ་དང་། ས་རཱ་མཐོ་སློབ་ཀྱི་སྐབས་དང་པོའི་གཙུག་ལག་རབ་འབྱམས་པ་དང་སྐབས་བཅོ་ལྔ་པའི་མཐོ་རིམ་རིག་གནས་རབ་འབྱམས་པའི་མཐར་ཕྱིན་གྱི་མཛད་སྒོ་ཚོགས་སོང་བ་དང་། མཛད་སྒོའི་སྟེང་༧གོང་ས་མཆོག་དབུ་བཞུགས་ཐོག་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་ཆོས་རིག་བཀའ་བློན་པདྨ་ཆོས་འབྱོར་མཆོག་རྣམ་གཉིས་ཀྱི་དབུས་ཤེས་རིག་དྲུང་ཆེ་དང་ཆོས་རིག་དྲུང་ཆེ་རྣམ་གཉིས། དེ་བཞིན་ཕྱི་རྒྱལ་ཡུལ་གྲུ་ཁག་ནས་ཕེབས་པའི་སྦྱིན་བདག་ཁག་ཅིག་དང་དྷ་ས་ཁུལ་གྱི་ཤེས་ཡོན་ཚོགས་སྡེ་ཁག་གི་སྐུ་ཚབ་རྣམ་པ། གཞན། རིགས་ལམ་སློབ་གཉེར་ཁང་གི་ངེས་སྟོན་པ་དགེ་བཤེས་དམ་ཆོས་ལགས་ཀྱི་དབུས་རིགས་སློབ་མ་ལག་གཉིས་ཀྱི་སྤྱི་ཁྱབ་འགན་འཛིན་དགེ་བཤེས་སྐལ་བཟང་དགྲ་འདུལ་ལགས་དང་ས་རཱ་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་སོགས་དགེ་ལས་སློབ་ཕྲུག་དང་སློབ་ཟུར་རྣམ་པ་བཅས་སེར་སྐྱ་མི་མང་ ༥༠༠ ཡས་མས་འཛོམས་འདུག

མཛད་སྒོའི་ཐོག་མར་རིགས་སློབ་མ་ལག་གི་མཁན་པོ་དང་མཚན་ཉིད་མཁན་སྤྲུལ་རིན་པོ་ཆེ་མཆོག ས་རཱ་མཐོ་སློབ་ཀྱི་སློབ་སྤྱི་བཅས་ནས་མཎྜལ་རྟེན་གསུམ་འདེགས་འབུལ་ཞུས་པ་དང་བསྟུན། རིགས་སློབ་མ་ལག་གཉིས་ཀྱི་འགན་འཛིན་དགེ་བཤེས་སྐལ་བཟང་དགྲ་འདུལ་ལགས་ནས་ལས་བསྡོམས་སྙན་སྒྲོན་ཞུས་སོང་བ་དང་། དེ་ནས་ཆོས་རིག་བཀའ་བློན་མཆོག་དང་ཤེས་རིག་བཀའ་བློན་མཆོག་རྣམ་གཉིས་ནས་རིས་མེད་དགེ་བཤེས་ཐོན་པའི་གྲྭ་བཙུན་རྣམ་པ་དང་། ལོ་རྒྱུས་ཐོག་གཙུག་ལག་རབ་འབྱམས་ཐོན་པའི་སློབ་མ་ ༧ དང་། རྩོམ་རིག་ཐོག་གཙུག་ལག་རབ་འབྱམས་ཐོན་པའི་སློབ་མ་ ༦། དེ་བཞིན། མཐོ་རིམ་རིག་གནས་རབ་འབྱམས་ཐོན་པའི་སློབ་ཕྲུག་རྣམས་ལ་སློབ་ཐོན་ཕྱག་འཁྱེར་གནང་རྗེས། ༧གོང་ས་མཆོག་ནས་རིགས་སློབ་མ་ལག་གཉིས་སུ་ལོ་ངོ་ ༢༠ ཡན་ཞབས་ཕྱི་ཞུ་མཁན་ཚོར་གཟེངས་བསྟོད་ཕྱག་ཁྱེར་གསོལ་བསྩལ་གནང་བ་དང་འབྲེལ། ལྷག་བསམ་བརྩེགས་པའི་དུས་དེབ་དང་ཚན་རིག་གི་འོད་སྡེར་ཞིག་དབུ་འབྱེད་གནང་སོང་ལ། མཛད་སྒོ་གྲོལ་རྗེས་སློབ་གཉེར་ཁང་གི་དབུ་དགེ་དམ་པ་རྒན་བློ་བཟང་རྒྱ་མཚོ་ལགས་ཀྱི་མཚན་ཅན་དཔེ་མཛོད་ཁང་དུ་རབ་གནས་བཅས་ཀྱི་བཀའ་དྲིན་བསྐྱངས་སོང་།

སྤྱི་ཁྱབ་འགན་འཛིན་དགེ་བཤེས་སྐལ་བཟང་དགྲ་འདུལ་ལགས་ནས་རིགས་སློབ་མ་ལག་གཉིས་ཀྱི་ལས་བསྡོམས་མདོར་བསྡུས་སྙན་སྒྲོན་ཞུ་སྐབས་ཁོང་གིས། ༧གོང་ས་མཆོག་ནས་ཕྱི་ལོ་ ༡༩༧༣ ལོར་གཏན་ཉིན་སློབ་གྲྭ་ཁག་ནས་རབ་བྱུང་གྲངས་ ༢༠ ཐམ་པའི་ཐོག་ཕྱོགས་མཐའ་ཁག་ནས་ཡོང་བའི་སློབ་གཉེར་བ་བཅས་ཁྱོན་སློབ་གཉེར་བ་ ༢༩ ཡོད་པའི་དྷ་ས་རིགས་ལམ་སློབ་གྲྭ་གསར་འཛུགས་གནང་བ་དང་སྦྲགས། རྒན་བློ་བཟང་རྒྱ་མཚོ་དམ་པ་མཆོག་དབུ་དགེ་གཅིག་ལྕོགས་སུ་བསྐོ་བཞག་གནང་ཡོད་པ་དང་། རིམ་གྱིས་སློབ་གཉེར་བ་མང་དུ་བཏང་སྟེ་འཛིན་གྲྭ་དབུ་མ་བར་ལོ་བཅུའི་རིང་སློབ་གཉེར་བྱེད་པའི་ཆ་རྐྱེན་བསྐྲུན་ཡོད་ལ། ཕྱི་ལོ་ ༡༩༨༨ ལོ་ནས་བཟུང་སྟེ་མཛོད་དང་དབུ་མར་སྔ་འགྱུར་རྙིང་མ་དང་མཉམ་མེད་དྭགས་པོ། མཉམ་མེད་བཀའ་བརྒྱུད། དཔལ་ས་སྐྱ་བཅས་ཀྱི་གཞུང་ཆེན་ཁག་གི་བསླབ་གཞི་གཏན་འབེབས་བྱས་ཏེ་རིས་མེད་ཀྱི་སློབ་ཚན་གསར་དུ་བཅུག་ཡོད་པ་དང་། ལོ་བཞིའི་རིས་མེད་སློབ་དཔོན་ཐོན་ཟིན་པ་རྣམས་ཀྱིས་ནང་པའི་གསང་སྔགས་ལ་སློབ་གཉེར་བྱ་རྒྱུ་གལ་ཆེན་པོ་ཡིན་སྟབས། ཕྱི་ལོ་ ༢༠༠༣ ལོར་དུས་ཡུན་ལོ་གཉིས་རིང་གསང་སྔགས་ཀྱི་སློབ་ཚན་གཏན་འབེབས་གནང་སྟེ་གསང་སྔགས་འཛིན་གྲྭ་གསར་འཛུགས་གནང་ཐུབ་ཡོད་པ་ལྟར། མདོར་ན་མདོ་སྔགས་གཉིས་ཀྱི་ཐོག་དུས་ཡུན་ལོ་ ༡༦ རིང་བསླབ་པ་སློབ་གཉེར་ལེགས་པར་ཐོན་པ་རྣམས་ལ་རིས་མེད་དགེ་བཤེས་ཀྱི་ཕྱག་འཁྱེར་གནང་གི་ཡོད་པ་དང་། ཕྱི་ལོ་ ༢༠༠༤ ནས་ད་ལྟའི་བར་རིས་མེད་དགེ་བཤེས་ཐེངས་བཞི་ཐོན་ཡོད་ལ། དེ་བཞིན། བོད་ཀྱི་ཆོས་དང་རིག་གཞུང་། ལྷག་པར་དུ་བོད་ཀྱི་སྐད་ཡིག་དང་རིག་གནས་སྲུང་སྐྱོབ་ཆེད་སྐུ་སྒེར་ཡིག་ཚང་ནས་མཐུན་འགྱུར་རོགས་རམ་གནང་བ་བརྒྱུད་དབུ་དགེ་དམ་པ་རྒན་བློ་བཟང་རྒྱ་མཚོ་མཆོག་ནས་ཐུགས་ཁུར་ཆེ་བཞེས་ཀྱིས་ཕྱི་ལོ་ ༡༩༩༡ ལོར་ས་རཱ་མཐོ་སློབ་གསར་འཛུགས་གནང་ཡོད་པ་དང་། མཐོ་སློབ་ནས་ཐོན་པའི་སློབ་ཕྲུག་ཚོས་དགོན་སྡེ་ཁག་གི་མཁན་པོ་དང་བོད་མིའི་སྒྲིག་འཛུགས་ཀྱི་ལས་བྱེད། དེ་བཞིན་གཞུང་འབྲེལ་མ་ཡིན་པའི་ཚོགས་སྡེ་ཁག་གི་འགན་འཛིན་དང་སློབ་གྲྭ་ཁག་གི་དགེ་རྒན། གཞན་ཡང་། རྩོམ་པ་པོ་དང་གསར་འགོད་པ་སོགས་བྱས་ཏེ། བོད་ཀྱི་ཆོས་དང་རིག་གཞུང་ཐོག་ཞབས་འདེགས་ནུས་པ་ཐོན་པ་ཞུས་དང་ཞུ་བཞིན་ཡོད་སྐོར་གསུངས་བ་དང་འབྲེལ། མ་འོངས་པར་རིགས་སློབ་མ་ལག་གཉིས་ཀྱི་དགེ་སློབ་རྣམས་ནས་ལྷག་བསམ་དང་སེམས་ཤུགས་སྔར་ལྷག་གིས་འབད་བརྩོན་གནང་རྒྱུར་འབོད་སྐུལ་བཅས་གནང་སོང་།

ཤེས་རིག་བཀའ་བློན་མཆོག་ནས་བསླབ་པ་མཐར་ཕྱིན་པ་རྣམས་ཀྱིས་མུ་མཐུད་དུ་སློབ་སྦྱོང་ཚད་མཐོན་པོ་གནང་གལ་ཆེ་བ་དང་། ཤེས་རིག་ལས་ཁུངས་ཀྱི་ངོས་ནས་སྔར་ལས་སློབ་ཡོན་མང་བ་འབུལ་ཐུབ་པ་གནང་རྒྱུ་ཡིན་སྐོར་གསུངས་དོན། དེ་རིང་འདིར་ཆེད་དུ་གཉེར་བའི་བོད་ཀྱི་བདག་པོ་འདྲ་པོ་དེ་བསླབ་པ་མཐར་སོན་གནང་མཁན་མང་པོ་ཞིག་གིས་དངོས་གནས་དྲང་གནས་རིས་མེད་དགེ་བཤེས་ཀྱི་བསླབ་པ་མཐར་སོན་པ་དང་གཙུག་ལག་རབ་འབྱམས་པའི་བསླབ་པ་མཐར་སོན། མཐོ་རིམ་རིག་གནས་ཀྱི་བསླབ་པ་མཐར་སོན་པ་བཅས་བསླབ་གཞི་གསུམ་གྱི་ཐོག་ནས་གཟེངས་བསྟོད་ཀྱི་ཕྱག་ཁྱེར་དེ་༧སྐྱབས་མགོན་རིན་པོ་ཆེ་དབུ་བཞུགས་ཀྱི་ཐོག་ནས་བཞེས་ཐུབ་པ་དེ་དཔེ་མི་སྲིད་པའི་བཀྲ་ཤིས་པའི་ཉིན་མོ་ཞིག་ཆགས་བསྡད་ཡོད་ལ། རྣམ་པ་ཚོའི་མི་ཚེའི་ནང་དངོས་གནས་དྲང་གནས་ག་དུས་ཡིན་ནའང་ངོམ་ཆོག་པའི་དུས་ཚོད་ཅིག་ཆགས་ཡོད་སྟབས། རྣམ་པ་ཚོར་དམིགས་བསལ་གྱིས་དེ་རིང་ངས་བཀྲ་ཤིས་བདེ་ལེགས་ཞེས་ཞུ་འདོད་བྱུང་། དེ་དང་ཆབས་ཅིག་ཏུ་རིས་མེད་དགེ་བཤེས་ཐོན་པ་ཚོར་དམིགས་བསལ་གྱིས་ཅི་ཞུ་རྒྱུ་མི་འདུག་ཀྱང་། རིག་གནས་རབ་འབྱམས་པ་ཐོན་པ་ཚོས་མུ་མཐུད་གཙུག་ལག་རབ་འབྱམས་པ་འཐོན་པར་འབད་བརྩོན་གནང་རྒྱུ་དང་། དེ་བཞིན་གཙུག་ལག་རབ་འབྱམས་པ་དེ་ང་ཚོས་འདིར་ངོས་འཛིན་ཞུས་ཏེ་ལོ་གཉིས་མ་གཏོགས་འགྲོ་ཡི་མེད་ཀྱང་། དེ་རིང་འདིར་གཙུག་ལག་རབ་འབྱམས་པའི་བསླབ་པ་མཐར་སོན་ཡོང་གི་ཡོད་པ་རེད། རྣམ་པ་ཚོ་ཡིན་ནའང་དེའི་སྒང་ལ་འབུམ་རམས་པའི་སློབ་སྦྱོང་ཐོག་ལ་འབད་བརྩོན་གནང་དགོས་པ་རེད། གཙོ་བོ་༧སྐྱབས་མགོན་རིན་པོ་ཆེ་མཆོག་ནས་དུས་རྒྱུན་དུ་རིགས་གཅིག་རྐང་འཛིན་གྱི་སྒང་ལ་ཤུགས་རྒྱག་དགོས་པ་དེ་སྔ་མོ་ནས་ང་ཚོར་བཀའ་ཕེབས་བསྡད་ཀྱི་ཡོད་པ་དང་། དོན་དངོས་ཐོག་ཆ་བཞག་པ་ཡིན་ནའང་། དངོས་གནས་དྲང་གནས་ང་ཚོའི་ཁ་གཏད་ལ་དཔུང་དང་དྲག་པོའི་ཐོག་ནས་རེད། མི་འབོར་དང་དཔལ་འབྱོར་གྱི་ཐོག་ནས་ཡིན་ནའང་རེད་ལྕོགས་པ་ཞིག་མེད་དུས། ང་ཚོའི་རྣམ་དཔྱོད་དང་ཤེས་ཡོན་གྱི་ཐོག་ནས་ཁ་གཏད་གཅོག་དགོས་པ་དང་། སྤུས་ཚད་ཡག་པོའི་ཐོག་ནས་གཏན་འབེབས་བྱེད་དགོས་པ་དེ་སྐབས་སུ་བབས་པའི་ང་ཚོའི་ལས་འགན་གྱི་གནས་སྟངས་དེ་ཚོར་དངོས་སུ་བལྟས་པ་ཡིན་ནའང་དེ་འདྲ་ཞིག་ཆགས་འགྲོ་ཡི་ཡོད་པ་འདྲ་པོ་ཞིག་འདུག དེར་བརྟེན་ཤེས་ཡོན་ཐོག་ནས་ཚད་མཐོན་པོར་ཕེབས་ཐུབ་པར་ངེས་པར་དུ་དགོངས་བཞེས་གནང་རོགས་ཞུ་བ་དང་། ཤེས་རིག་ལས་ཁུངས་ཀྱི་ཐོག་ནས་ད་ལྟའི་ཆར་གཙུག་ལག་རབ་འབྱམས་པའི་ཐོག་ལ་སློབ་ཡོན་གཉིས་མ་གཏོགས་ཕུལ་ཐུབ་མེད་ཀྱང་། ཉེ་བའི་གཙུག་ལག་རབ་འབྱམས་པའི་ཐོག་སྤྱི་ཡོངས་ལ་སློབ་ཡོན་ཕུལ་དང་འབུལ་བཞིན་པ་རེད་ལ། མ་འོངས་པར་ཡིན་ནའང་གཙུག་ལག་རབ་འབྱམས་པ་དང་འབུམ་རམས་པའི་སློབ་སྦྱོང་ཐོག་ང་ཚོས་ད་ལྟ་ལས་ཀྱང་ཤུགས་ཆེ་བའི་སློབ་ཡོན་འབུལ་ཐུབ་པ་ཞུ་ཡི་ཡིན། ཞེས་དང་། ད་ལྟའི་ཆར་སྒྲིག་ཞུགས་ནང་འབུམ་རམས་པར་སློབ་སྦྱོང་བྱེད་བཞིན་པའི་སློབ་ཕྲུག་ ༣༢ དང་ཐོན་ཚར་བ་ ༤༡ བཅས་བསྡོམས་པའི་སློབ་མ་ ༧༣ ཡོད་པ་དང་། (M.phil)ཐོག་སློབ་སྦྱོང་བྱེད་བཞིན་པའི་སློབ་མ་ ༣༠ ཡོད་པ་དང་། དེ་བཞིན། སྒྲིག་ཞུགས་མ་ཡིན་པར་སྒེར་གྱི་ཐོག་ནས་བརྗོད་གཞི་འདྲ་མིན་ཐོག་རིགས་གཅིག་རྐང་འཛིན་གྱི་སློབ་སྦྱོང་བྱེད་མཁན་ ༤༣ ལ་ཤེས་རིག་ལས་ཁུངས་ནས་སློབ་ཡོན་ཕུལ་ཐུབ་ཡོད་ལ། ལོ་རེ་བཞིན་སློབ་ཡོན་འབུལ་བའི་གྲངས་འབོར་མང་དུ་འགྲོ་བཞིན་ཡོད་པ་ལྟར། ཕྱི་ལོ་ ༢༠༡༡ ལོར་༢༠༢ དང་ཕྱི་ལོ་ ༢༠༡༣ ལོར་ ༣༤༣། ཕྱི་ལོ་ ༢༠༡༤ ལོར་ ༥༠༧། ཕྱི་ལོ་ ༢༠༡༥ ལོར་ ༦༣༨ ལ་སློབ་ཡོན་ཕུལ་ཐུབ་པ་བྱུང་ཡོད་སྐོར་སོགས་གསུངས་བ་དང་འབྲེལ། ༧གོང་ས་མཆོག་གི་བླ་ན་མེད་པའི་ཐུགས་རྗེ་བཀའ་དྲིན་ལ་བརྟེན་ཏེ་རྒྱལ་སྤྱིའི་ཐོག་ནས་བོད་མི་ཚོར་ཆེ་མཐོང་དང་གཟིགས་སྐྱོང་ཐོབ་ཀྱི་ཡོད་སྟབས། ༧མགོན་པོ་གང་ཉིད་སྐུ་ཚེ་ཡུན་རིང་བརྟན་དགོས་པ་དེ་ཤིན་ཏུ་གལ་ཆེན་པོ་ཡིན་པས་བོད་མིའི་སྒྲིག་འཛུགས་དང་ཤེས་རིག་ལས་ཁུངས། དེ་བཞིན་ཤེས་རིག་བཀའ་བློན་སྐུ་སྒེར་བཅས་ཀྱི་ངོས་ནས་༧གོང་ས་མཆོག་སྐུ་ཚེ་ཡུན་དུ་བཞུགས་དགོས་པའི་སྐྱབས་འཇུག་གསོལ་འདེབས་ཞུས་སོང་།

མཇུག་ཏུ་༧གོང་ས་སྐྱབས་མགོན་ཆེན་པོ་མཆོག་ནས་བླང་དོར་གྱི་བཀའ་སློབ་གནང་སྐབས། ཧ་ཅང་ཛ་དྲག་ཅིག་གི་གནས་སྟངས་འོག་ཕྱི་ལོ་ ༡༩༥༩ ཟླ་ ༣ ཚེས་ ༡༧ ཉིན་གྱི་དགོང་མོར་བོད་ཀྱི་རྒྱལ་ས་ལྷ་ས་ནས་རྒྱ་གར་ནང་བཙན་བྱོལ་དུ་ཕེབས་དགོས་བྱུང་བ་དང་། རྒྱ་གར་གཞུང་གི་བཀའ་དྲིན་ལ་བརྟེན་ནས་སྤྱིར་བཏང་གི་སྐྱབས་བཅོལ་བ་ལྟར་འཕྲལ་སེལ་གྱི་འཚོ་ཐབས་འགྲིག་ཙམ་མ་ཡིན་པར་རང་དབང་ལུང་པའི་ནང་མི་རིགས་ཤིག་གསོ་སྐྱོང་བྱས་པ་ལྟར། གཞིས་ཆགས་དང་སློབ་གྲྭ་ཁག་བཅས་བཙུགས་ཏེ་ལོ་ངོ་ ༥༧ ཕྱིན་རྗེས་གང་འཚམ་ཚགས་ཚུད་པོ་དང་བོད་མི་བཙན་བྱོལ་བ་ཟེར་དུས་སྒྲིག་འཛུགས་ཀྱི་གོང་བུ་གཅིག་ཆགས་ཏེ་བསྡད་ཡོད་ལ། མི་རབས་རྒན་པ་ཚོར་དེང་དུས་ཀྱི་ཤེས་ཡོན་མེད་ཀྱང་འདས་པའི་ལོ་ངོ་བཅུ་ཕྲག་ལྔ་ལྷག་རིང་ལྷག་བསམ་རི་བརྩིགས་པ་ལྟར་སྒེར་སེམས་ཁྱོན་ནས་མེད་པའི་ཐོག་ནས་སྐུ་ལས་ཞེ་དྲག་བསྐྱོན་ནས་ད་ལྟའི་གྲུབ་འབྲས་འདི་བྱུང་ཡོད་སྟབས། གཞོན་སྐྱེས་ཚོས་མི་རབས་རྒན་པ་རྣམས་ཀྱི་བཀའ་དྲིན་རྗེས་སུ་དྲན་པའི་ཐོག་ནས་སྨོན་ལམ་ཞིག་མ་གཏོགས་མ་བྱུང་བ་ཡིན་ནའང་རྒྱག་དགོས་སྐོར་དང་། བོད་པས་ལོ་ངོ་སྟོང་ཕྲག་མང་པོར་བདག་པོ་བརྒྱབ་བསྡད་པའི་ཤེས་ཡོན་དེ་བོད་པ་གཅིག་པུ་ཙམ་མ་ཡིན་པར་འཛམ་བུ་གླིང་སྤྱི་ཡོངས་ལ་ཕན་ཐོགས་ཐུབ་པ་ཞིག་དང་། བློ་གཟུ་བོར་གནས་པའི་མཁས་དབང་ཚོས་རེ་བ་རྒྱག་ས་ཞིག་ཆགས་ཡོད་པ་དེ་སེམས་ལ་ངེས་པ་བྱེད་དགོས་པ་མ་ཟད། ད་ལྟ་བོད་ཀྱི་ཤེས་ཡོན་དེས་འཛམ་གླིང་སྤྱི་ལ་ཞབས་འདེགས་སྒྲུབ་པའི་དུས་ཚོད་ཅིག་ལ་སླེབ་བསྡད་ཡོད་པ་དང་། དེ་བཞིན་སེམས་ཁམས་རིག་པ་དང་ཚད་མ། ལྟ་གྲུབ་བཅས་དེང་སང་འཛམ་གླིང་ཐོག་རྙེད་པར་དཀའ་བ་ཞིག་ཏུ་གྱུར་བའི་བརྗོད་བྱ་ཟབ་མོ་དེ་ཚོའི་སྒང་ལ་བསླེབས་སྐབས་བོད་ཡིག་ལ་དངོས་གནས་དྲང་གནས་ཀྱིས་ངོ་མཚར་སྐྱེས་དགོས་པ་ཞིག་དང་། བོད་ཡིག་ལ་མཐོང་སླེབ་པ་ཞིག་ཡིན་ལ། བོད་ཡིག་ལ་མཐོང་བསླེབས་པ་དང་མཉམ་དུ་སོ་སོའི་མི་རིགས་ལ་སྤོབས་པ་སྐྱེས་པ་ཞིག་ཡིན་སྐོར་གསུངས་བ་དང་འབྲེལ།  སློབ་ཐོན་པ་རྣམ་ལ་བཀྲ་ཤིས་བདེ་ལེགས་ཀྱི་འཚམས་འདྲི་གནང་བ་དང་བཅས་ཤེས་ཡོན་ཚད་མཐོན་པོ་ཡོད་ནའང་སེམས་མ་འདུལ་ན་སྐྱིད་པོ་ཡོང་རྒྱུ་མེད་པ་དང་། དེང་སང་སྤྱི་ཚོགས་ནང་རྙོག་དྲ་དང་བརྡབ་གསིག་བཟོ་མཁན་མང་ཆེ་བ་ཞིག་ཤེས་ཡོན་ཅན་ཚོ་ཡིན་ལ། ཤེས་ཡོན་ཡོད་པ་དེ་ཉོན་མོངས་དུག་གསུམ་གྱི་བྲན་ཡོག་ཏུ་འགྱུར་བཞིན་ཡོད་སྟབས། ལྷག་བསམ་རྣམ་དག་དང་དྲང་པོ་དྲང་བཞག མངོན་ལྐོག་རྒྱབ་མདུན་མེད་པ་ཞིག་བྱེད་གལ་ཆེ་སྐོར་གྱི་བླང་དོར་བཀའ་སློབ་གནང་གྲུབ་རྗེས། ས་རཱ་མཐོ་སློབ་ཀྱི་སློབ་སྤྱི་ལགས་ནས་རིགས་སློབ་མ་ལག་གི་དགེ་སློབ་ཡོངས་ནས་༧གོང་ས་སྐྱབས་མགོན་ཆེན་པོ་མཆོག་གི་ཇི་གསུང་བཀའ་བཞིན་བསྒྲུབ་པར་དམ་བཅའ་དང་བཅས་མཛད་སྒོའི་ཐོག་ཆིབས་བསྒྱུར་བཀའ་དྲིན་བསྐྱངས་ཏེ་བླང་དོར་གྱི་བཀའ་སློབ་ཟབ་མོ་གནང་བར་ཐུགས་རྗེ་ཆེ་ཞེས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་སོང་།

གསར་འགོད་པ། པདྨ་མཚོ།