ཕྱི་ལོ་ ༢༠༡༦ ལོའི་འོས་བསྡུ་ཆེན་མོའི་ཁྲོད་བདམས་ཐོན་བྱུང་བའི་བཀའ་ཤག་སྐབས་བཅོ་ལྔ་པའི་སྲིད་སྐྱོང་མཆོག་དང་སྐབས་བཅུ་དྲུག་པའི་བོད་མི་མང་སྤྱི་འཐུས་ ༤༥ ཡི་མཚན་གཞུང་གསལ་བསྒྲགས་གནང་སོང་།
དེ་རིང་སྔ་དྲོའི་ཆུ་ཚོད་ ༩།༣༠ ཐོག་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། དབུས་འོས་བསྡུ་ལས་ཁང་གིས་ཕྱི་ལོ་ ༢༠༡༦ ལོའི་འོས་བསྡུ་ཆེན་མོའི་དངོས་གཞིའི་གྲུབ་འབྲས་གསལ་བསྒྲགས་གནང་སོང་བ་དང་། ཐེངས་འདིའི་འོས་བསྡུའི་ཁྲོད་སྲིད་སྐྱོང་འོས་མི་སྤེན་པ་ཚེ་རིང་མཆོག་ལ་འོས་གྲངས་ ༢༤༨༦༤ དང་། སྲིད་སྐྱོང་འོས་མི་བློ་བཟང་སེང་གེ་མཆོག་ལ་འོས་གྲངས་ ༣༣༨༧༦ ཐོབ་སྟེ་ཡང་བསྐྱར་སྲིད་སྐྱོང་དུ་བདམས་ཐོན་བྱུང་ཡོད་པ་དང་། དེ་བཞིན་ཆོལ་ཁ་རེ་ནས་སྤྱི་འཐུས་ ༡༠ རེ་དང་ཆོས་བརྒྱུད་རེ་ནས་སྤྱི་འཐུས་གཉིས་རེ། ཡུ་རོབ་དང་ཨ་ཧྥེ་རི་ཁ་ཁུལ་ནས་སྤྱི་འཐུས་གཉིས། ལྷོ་བྱང་ཨ་རི་ཁུལ་ནས་སྤྱི་འཐུས་ ༢། རྒྱ་བལ་འབྲུག་གསུམ་ཕུད་པའི་ཨེ་ཤ་ཡ་དང་ཨོ་སི་ཊོ་ལི་ཡའི་ཁུལ་ནས་སྤྱི་འཐུས་གཅིག་བཅས་ཁྱོན་སྤྱི་འཐུས་ ༤༥ བདམ་ཐོན་བྱུང་བ་གསལ་བསྒྲགས་གནང་སོང་།
དབུས་འོས་བསྡུ་ལས་ཁང་གི་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་ཀྱིས་གྲུབ་འབྲས་གསལ་བསྒྲགས་ཡི་གེ་སྒྲོག་སྦྱངས་གནང་སྐབས། ཐེངས་འདིའི་འོས་བསྡུའི་ཁྲོད་སྲིད་སྐྱོང་ལ་འོས་འཕེན་མཁན་ ༥༩༣༥༣ བྱུང་ཡོད་པའི་ནང་ནས་འོས་ཤོག་ ༦༡༣ རྩིས་མེད་དུ་ཕྱིན་པ་དང་། བོད་མི་མང་སྤྱི་འཐུས་ལ་འོས་འཕེན་མཁན་ ༥༨༦༡༥ བྱུང་ཡོད་པའི་ནང་ནས་འོས་ཤོག་ ༥༩༡ རྩིས་མེད་དུ་ཕྱིན་ཡོད་ལ། ད་ལོར་འོས་འཕེན་མཁན་སྔར་ལས་ཇེ་མང་དུ་ཕྱིན་ཡོད་སྐོར་བརྗོད་སོང་།
ཡང་ད་རེས་ཀྱི་འོས་བསྡུ་དང་འབྲེལ་བའི་གནས་ཚུལ་སྙིང་བསྡུས་ཤིག་སྒྲོག་སྦྱངས་གནང་བའི་ནང་། ད་ལོའི་སྲིད་སྤྱི་འོས་བསྡུ་ཆེན་མོའི་ཁྲོད་འོས་མི་དང་དེའི་རྒྱབ་སྐྱོར་ཚོས་དྲིལ་བསྒྲགས་བྱེད་སྟངས་དང་། ལྷག་པར་དུ་སྤྱི་ཚོགས་དྲ་ལམ་ཁག་ཏུ་ཆ་ཤས་ལེན་མཁན་སྔར་ལས་མང་བ་བྱུང་ཡོད་པ་དེ་ལེགས་པའི་ཕྱོགས་ལ་ངོས་འཛིན་བྱེད་ཀྱི་ཡོད་པ་དང་། འོས་བསྡུའི་ལས་རིམ་ཁྲོད་ལྟ་ཕྱོགས་ལངས་ཕྱོགས་འཁྱེར་སྟངས་དང་བཅའ་ཁྲིམས། འོས་སྒྲིག་གི་ནང་དོན་ཇི་བཞིན་མ་རྟོགས་པ་དང་རང་གི་འདོད་བློ་ཁེངས་མིན་སོགས་ཀྱིས་ཞུ་གཏུག་སྙན་ཞུ་འབུལ་མཁན་མང་པོ་བྱུང་ཡོད་ཀྱང་། འོས་སྒྲིག་དང་དངོས་སུ་འགལ་བའི་བདེན་དཔང་དངོས་ར་འཕྲོད་པའི་ཞུ་གཏུག་བྱེད་མཁན་མ་བྱུང་བར་བརྟེན། དབུས་ས་གཉིས་ནས་ཁྲིམས་འགལ་ཉེས་ཆད་གཅོད་དགོས་པ་དེ་འདྲ་མ་བྱུང་བ་དེ་བས་ཀྱང་ལེགས་པའི་ཕྱོགས་ལ་ངོས་འཛིན་ཞུ་ཡི་ཡོད་སྐོར་དང་།
རང་འགུལ་གྱིས་དང་བླངས་འོས་མིར་ལངས་མཁན་དང་། ཕྱོགས་གཏོགས་བ་མི་ཉུང་བ་ཞིག་གིས་དྲིལ་བསྒྲགས་བྱེད་སྟངས་དང་ཆ་ཤས་ལེན་སྟངས་། ལྷག་པར་སྤྱི་ཚོགས་དྲ་ལམ་ཁག་ཏུ་འགན་མེད་འཆལ་གཏམ་སྣ་ཚོགས་སྤེལ་སྟངས། ད་དུང་འོས་བསྡུ་ལས་ཁང་ལ་ཁ་གཏད་ནས་དྲང་བདེན་དང་གཞི་འཛིན་མེད་པའི་གསར་འགོད་གསལ་བསྒྲགས་སྤེལ་བ་སོགས་ལ་བལྟས་ཡོང་དུས། བརྩི་བཀུར་དང་ཆེ་མཐོང་ཆུང་བ། བཀའ་དྲིན་ལ་བསམ་ཤེས་མེད་པ། རང་མཐོང་རང་ཤེད་དང་། དགོས་མེད་ཕྱོགས་ཞེན་ཆེ་བ་སོགས་ཀྱི་དབང་དུ་སོང་སྟེ་ཡང་དག་པའི་མང་གཙོའི་ཁྱད་ཆོས་དང་མཐུན་ཞིང་། བོད་མིའི་རྩ་དོན་སྒྲུབ་ཐབས་ལ་ཕན་པ། ལྷག་དོན་བོད་མིའི་བཟང་སྤྱོད་དང་ལྡན་པའི་སྒོ་ནས་ཆ་ཤས་ལེན་ཐུབ་མ་སོང་སྙམ་པའི་སེམས་འཚབ་དང་བློ་ཕམ་ཆེན་པོ་ཡོད་སྐོར་དང་།
ཆབ་སྲིད་ཀྱི་དབུ་ཁྲིད་རྣམས་བོད་མིའི་རྩ་དོན་སྒྲུབ་མཁན་གྱི་སྲོག་ཤིང་ལྟ་བུ་ཡིན་སྟབས། འོས་འདེམས་བྱེད་ཕྱོགས་ཐད་དུས་ཀྱི་འགྱུར་འགྲོས་དང་བསྟུན་ནས་འོས་བསྡུའི་སྒྲིག་གཞིར་བསྐྱར་བཅོས་ཆེན་པོ་མང་དག་ཅིག་བྱེད་དགོས་པ་མཐོང་བ་དང་། ད་ལན་གྱི་འོས་བསྡུའི་སྔོན་འགྲོ་དང་དངོས་གཞི་སོ་སོར་ཨེ་ཤ་ཡ་མང་གཙོ་འབྲེལ་མཐུད་ཁང་དང་ཨེ་ཤ་ཡ་རང་དབང་འོས་བསྡུའི་འབྲེལ་མཐུད་ཁང་། རྒྱལ་སྤྱིའི་གྲོས་ཚོགས་འཐུས་མི་ལས་གྲུབ་པའི་རྟོག་ཞིབ་ཚོགས་ཆུང་བཅས་ནས་རྟོག་ཞིབ་གནང་བ་བརྒྱུད་བསམ་ཚུལ་བྱུང་བ་དང་། མང་ཚོགས་ནང་བསམ་ཚུལ་ཡོད་པ། ལྷག་པར་དུ་ད་ལན་གྱི་ཉམས་མྱོང་གཞི་རྩར་བཟུང་ནས་འོས་སྒྲིག་བསྐྱར་བཅོས་ཀྱི་ཐད་གོ་བསྡུར་ཞིབ་ནན་གྱིས་བསྐྱར་བཅོས་འཆར་འབུལ་ཞུ་འཆར་ཡོད་སྐོར་སོགས་བརྗོད་སོང་།
སྲིད་སྤྱི་གཉིས་ཀྱི་འོས་བསྡུའི་གྲུབ་འབྲས།
ཕྱི་ལོ་ ༢༠༡༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་འོས་བསྡུ་ཆེན་མོའི་ཕྱོགས་བསྡོམས་གནས་སྟངས།
གསར་འགོད་པ། པདྨ་མཚོ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
སྲིད་དོན་ལ་མ་བྱང་བའི་བོད་པ་ཚང་གི་སྙན་ལམ་དུ་ཞུ་གསོལ། སྲིད་སྐྱོང་གིས་སྲིད་དོན་མ་འཁྲབ་ན། སྲིད་སྐྱོང་གི་གོ་གནས་ཇི་ལྟར་ཐོབ། སྲིད་སྐྱོང་གི་གོ་གནས་མ་ཐོབ་ན། མི་རིགས་ཀྱི་ཁ་ཕྱོགས་ཇི་ལྟར་སྒྱུར། སྦྱོར་བ་ལ་མ་བལྟ་ཀུན་སློང་ལ་བལྟ། གཙོ་བོ་སེམས་པ་ཀུན་སློང་ལ་རག་ལས། སྔོན་དུས་ཀྱི་དགེ་འདུན་ཆོས་འཕེལ་དང་ཅིག བར་སྐབས་ཀྱི་ཟམ་གདོང་བླ་མ་དང་གཉིས། དེང་དུས་ཀྱི་བློ་བཟང་སྲིད་སྐྱོང་དང་གསུམ། ཕྱི་ནང་གི་བར་ཆད་མང་ན་ཡང་། མི་རིགས་ལ་བཅངས་པའི་ལྷག་བསམ་དང་། སྙིང་སྟོབས་ལ་ནམ་ཡང་ཞུམ་པ་མེད།
ད་འཁྲབ་འདོད་མཁན་ཚོས་འཁྲོབས། ལས་དོན་བསྒྲུབ་འདོད་མཁན་ཚོས་སྒྲུབས། ག་རེ་བྱ་འདོད་ཡོད་པ་དེ་ལྟར་བྱོས། གྲོགས་པོ་ཚོ་གོ་སྐབས་རེད་ཏ། གོ་སྐབས་བཟང་པོ་རེད།
འོན་ཀྱང་སྲིད་སྐྱོང་གིས་མི་ཤི་བའི་རོ་ཐོག་ལ་སེང་གེ་མ་འཁྲབས། ལྷག་ཏུ་རང་རིགས་རྒྱལ་གཅེས་དཔའ་བོ་ཚོས་རང་ལུས་མེ་བསྲེགས་གཏོང་སྐབས་རོ་ཐོག་ལ་དཔལ་ལྡན་སྲིད་སྐྱོང་གིས་སེང་འཁྲབ་མ་བྱེད་མ་གཏོགས། གཟི་བརྗིད་ཁོག་སྟོང་ཆགས་ངེས་རེད་ཏ།
སྲིད་སྐྱོང་མ་གཏོགས་གཞན་ཚོས་ག་རེ་འཁྲབ་འདོད་ཀྱང་འདྲ། ག་དུས་འཁྲབ་འདོད་ཀྱང་ཁྱོད་ཚོ་ལ་རང་དབང་ཡོད་ཏ།
འོ་ཡ། ད་ཁྱོད་འབྱུང་འགྱུར་ལོ་ལྔ་ནང་ཁ་ཆག་སྣ་རལ་མེད་པ་ཞིག་བྱོས་ཤོག་ཨཱ། བདམས་ཐོན་སྤྱི་འཐུས་ཚོ་ཁ་རོག་མ་འདུག་ཨཱ། སྤྱི་པའི་ལས་དོན་ག་པར་འཐུས་ཤོར་འགྲོའི་ཡོད་ས་དེར་ཐེར་འདོན་ཡོ་སྲོང་གནང་དགོས་པ་ལས་རྒྱུ་འབྲས་མི་རྩི་མཁན་ལུང་ཚན་དང་། ཆོལ་ཁ། ཆོས་ལུགས་ཐེན་འཁྱེར་འདྲ་བྱེད་བསྡད་ན་ངོ་མ་ཐབས་སྡུག་རེད་ཨཱ། སྤྱང་པོ་ཡིན་མ་བསམ་ཚང་མ་ཧ་གོ་ལེ་རེད། དཱ་ཡག་པོ་བྱོས་ཨཱ། སྲིད་དོན་འཁྲབ་ཡ་དུས་ཚོད་མ་རེད། བོད་རྒྱ་ཆེ་མི་མང་རེ་བ་འགྲུབ་དགོས་ལེ་རེད། དེ་སེམས་ལ་བཞག་ངས་ཁ་ཏ་ཡིན།
སྲིད་སྐྱོང་སློབ་བཟང་སེང་གེ་སླར་ཡང་ཐོབ་པར་འཚམས་འདྲི་ཞུ། ད་གཟབ་གཟབ་གནང་ཤོག་ཨང་། འདས་པའི་ལོ་ལྔ་ཚན་དེའི་ནང་སྔར་བྱུང་མྱོང་མེད་པའི་རྙོག་དྲ་ལུང་པ་གང་་བྱུང་སོང་བར་བལྟས་ན་གང་ལྟར་གཅིག་འགྲིག་གི་མེད་པ་དེ་གསལ་པོ་རེད་འདུག དཔེར་ན་རང་བཙན་ལག་དེབ་ཀྱི་མིང་དེ་ཡང་ནོར་བཅོས་བྱ་རྒྱུའི་གོ་སྐབས་ཐེངས་གཅིག་བོད་མི་སྐྱབས་བཅོལ་བ་ཚང་མར་ཡོང་རུང་། ཉིད་ནས་ད་བར་ལོ་ངོ་ ༡༣ རིང་རྒྱ་ཡན་དུ་བཏང་སྟེ་སྲིད་སྐྱོང་གི་འོས་འགྲན་ལ་ཐེངས་གཉིས་ཞུགས་པ་དེ་སྒྲིག་འཛུགས་ལ་རང་འགན་མ་འཁུར་བ་དང་མཐོང་ཆུང་བྱས་པ་རང་རེད། རང་བཙན་ལག་དེབ་ཀྱི་མིང་དང་དག་ཆ་སོགས་ཡིག་ཆ་གཞན་དང་མི་མཐུན་མཁན་གྱི་མི་སེར་དཀྱུས་མ་དག་ལ་ལག་དེབ་སེར་པོ་བཟོ་རྒྱུར་ཁྱེད་ཀྱིས་མཚན་རྟགས་མ་ཐོབ་སྟེ་ངོས་སྦྱོར་མ་རག་པ་ག་ཚོད་བྱུང་ཡོད་མེད་ནི་མཁྱེན་གསལ་རེད། རང་བཙན་ལག་དེབ་ལ་ནོར་འཁྲུལ་ཡོད་ན་མི་མང་དཀྱུས་མར་ལས་དོན་ཆུང་ཙག་ཅིག་ཡིན་ཡང་སྒྲུབ་ཐབས་གོམ་པ་གང་མེད་པ་དང་། མི་དབང་སྲིད་སྐྱོང་ལ་ས་གསུམ་གྱི་སྒྲུབ་་ཐབས་ཡོད་པ་ཅི་ཡིན་ནམ་སྙམ་པ་དང་། སྲིད་སྐྱོང་འོས་མིང་བློ་བཟང་སེང་གེ་དང་། འོས་བླུག་མཁན་གྱི་མིང་སློབ་བཟང་སངས་རྒྱས་ཅེས་གང་ཟག་གཅིག་ལ་གནས་སྟངས་མི་འདྲ་བ་གཉིས་ལ་མིང་གཉིས་འདུག་པ་དེ་རིགས་པ་ཡིན་ནམ་སྙམ་པ་སོགས་ཀྱི་དྲི་བ་འདི་འདྲ་བ་མང་པོ་རང་བཞིན་གྱིས་སླེབས་ཡོང་གི་འདུག
ད་ནས་བརྩིས་པའི་ལོ་ལྔ་ཚན་གཅིག་གི་རྗེས་སྐུ་ངོ་མཆོག་གངས་སྐྱིད་རྭ་བ་ནས་ག་ལེར་ཕེབས་རྒྱུ་ཡིན་པར་བརྟེན་ད་ནི་གོ་སྐབས་མཐའ་མ་དེ་ཡིན་སྙམ་ནས་སེང་གེ་འཁྲབ་སྟངས་མ་ནོར་བ་གནང་རོགས། སྤྱིར་བཏང་ནས་བོད་ཀྱི་རིག་གཞུང་ནང་སེང་གེ་ནི་བཀྲ་ཤིས་པའི་དུས་སྟོན་སྐབས་སུ་བཀྲ་ཤིས་པའི་མཚོན་དོན་དུ་འཁྲབ་ཀྱི་ཡོད་ཀྱང་། སྐུ་ངོ་མཆོག་གི་སེང་གེའི་འཁྲབ་ཚན་ནི་སྐབས་རེ་འགར་རྒྱལ་གཅེས་དཔའ་བོའི་རོ་ཐོག་ཏུ་ཡང་འཁྲབ་པ་མཐོང་བྱུང་། མ་ཟད་སེང་གེ་འཁྲབ་སྐབས་ཀྱི་སྒྲ་དབྱངས་ནི་”ཏེང་ཏེ་རེང་ཏེ་ཏེང་”ཡིན་པ་ལས་”གསུངས་དང་ལད་མོ་སོ་”མ་རེད། མ་གཞི་ནས་སེང་གེ་མིན་ནའི་སེང་གེ་ཡིན་མདོག་ཀྱིས་འཁྲབ་ཙང་བྱས་པས་ཡིན་གྱི་རེད། འཁྲབ་སྟོན་སྐབས་ཐེངས་མང་པོར་སྡིངས་ཆའི་ཐོག་འགྱེལ་གྲབས་བྱས་ཏེ་ལྟད་མོ་མང་པོ་ཁྲེལ་རྒོད་ཤོར་དུ་བཅུག ཡིན་ནའི་རང་སྐྱོན་ངོས་ལེན་མ་བྱས་པར་འགྱེལ་གྲབས་བྱས་ནས་ཏོག་ཙམ་མ་གཏོགས་རང་གཟུགས་མངོན་གྲབས་བྱས་པ་དེ་འཁྲབ་སྟོན་སྐབས་ཀྱི་རྣམ་དཔྱོད་ཅིག་ཡིན་མདོག་གིས་མུ་མཐུད་དེ་འཁྲབ་པས་མི་མང་གད་མོ་དེ་ལས་མང་བ་ཤོར།
དངོས་གནས་”ཨཱིཛ་ཏ་བྷ་ཅི་”(save dignity) བྱ་དགོས་ན་རང་གཟུགས་གང་ཡིན་གསལ་པོར་བསྟན་ཏེ་”ཨ་ནེ་སྙི་མོ”དང་འདྲ་བ་ཞིག་ལས་མ་བྱུང་ཡང་རང་བཞིན་གསལ་བའི་འཁྲབ་སྟོན་ཞིག་འཁྲབ་ན་ལེགས་པར་མཐོང་། གལ་ཏེ་དེ་ལས་ལྡོག་ན་ལོ་ལྔའི་རྗེས་སུ་ཁྱེད་ཀྱི་གྲུབ་འབྲས་ནི་”ཕན་རི་བོང་གི་རིལ་མ་ཙམ་ཡང་མི་ཐོགས་པར། གནོད་དྲེད་མོང་གི་སྐྱག་པ་ལས་ཆེ་ཙམ་ཞིག་བསྐྱལ” ཞེས་པའི་གཏམ་དཔེའི་དོན་སྙིང་ལས་མ་འདས། དེས་ན་ཁྱེད་ཀྱི་མི་ཚེའི་ནང་བྱས་བཟང་ལས་བྱས་ཉེས་མང་བ་དང་། མི་ཚེ་ལས་གཏམ་ཚེ་རིང་བ་ཞིག་ཡོང་རྒྱུའི་སྔ་ལྟས་མང་པོ་ཚད་མས་གྲུབ་འདུག དེ་དུས་ཁྱེད་རང་བཙན་བྱོལ་བོད་མིའི་མང་གཙོའི་འཕེལ་རིམ་དང་། སྒྲིག་འཛུགས་ཀྱི་ལོ་རྒྱུས་ཟིན་ཐོའི་ནང་གི་མི་ནག་ཉེས་ཆེ་ཤོས་དེ་ཆགས་ངེས།
ཁྱེད་གཟི་བརྗིད་ནི་ཆེན་པོ་འདུག བྱས་ཙང་སྐུ་མཁྱེན་སྐུ་མཁྱེན། ད་རེས་ཀྱི་ལོ་ལྔ་ཚན་འདིའི་ནང་ཁྱེད་ཀྱི་ཁོག་པ་དང་ཀླད་པ་གཉིས་ལྷག་བསམ་དང་། དྲང་ཚུགས། ལས་འབྲས་བཅས་ཀྱི་རྣམ་གཞག་གིས་དམར་ཐར་བརྒྱ་ཆ་ ༣༥ ཡིས་ཁེངས་པ་བཟོ་རོགས། འདི་ནི་རྒས་པོ་ང་ཤི་ཁའི་རེ་བ་ཡིན།
ལྟད་མོ-ལྟད་མོ་བ་དང་། དམར་ཐར-དམའ་མཐར་་་བཅོས་རོགས།
འདེམས་ཐོན་སོང་བའི་སྲིད་སྤྱི་ལྷན་རྒྱས་ལ་མཚམས་འདྲི་དང་། ད་ནི་ང་ཚོ་བོད་མི་སྤྱི་བོ་གནམ་བསྟན་ཡོངས་ཀྱི་ལས་དབང་ཤིན་ཏུ་ཛ་དྲག་ངོས་སུ་བསྐྱོད་མུས་ཡིན་ལ། གང་ལྟར་རང་དོན་ཁོག་བཅུག་མིན་པར་བོད་མི་རིགས་ཀྱི་ཕུགས་བསམ་དང་འཚོ་གནས་ཐོག་ངེས་པར་བསམ་ཞིབ་བྱེད་དགོས་ལ། ང་ཚོའི་ཐབ་རྩོད་ཀྱི་གསོན་ཁྲག་ནི་རྡོག་རྩ་ཆིག་སྒྲིལ་ཡིན་ལ། དགྲ་གུང་ཁྲན་ཡང་སྐྲག་དགོས་པ་ཆོལ་གསུམ་བོད་མའི་ཆིན་སྒྲིལ་ཡིན། དེ་མིན་ང་དབུས་གཙང་དང་། ང་ཁམས་པ། ང་ཨ་མདོ་ཞེས་ངུས་སྐད་རྒྱབ་ཀྱང་དེ་ཙམ་བསམ་བློ་ལྷུག་པོ་མེད་པའི་མཚན་ཉིད་རེད། རང་ཉིད་ཀྱི་མགོ་བོའི་སྟེང་ཆོལ་ཞེན་དང་ཀླད་རྙིང་གི་ཁུར་པོ་འདེགས་པ་ལས་མི་རིགས་ཀྱི་ཡོངས་ཀྱི་བདེ་རྩར་དགོངས་བཞེས་ཐུབ་ཚེ་ང་ཚོའི་ནུས་པ་མཉམ་རུབ་ཡོང་བའི་རེ་བ་ཡོད། བོད་རྒྱལ་ལོ།
མང་གཙོའི་ལམ་བཟང་གིས་ཐོག་ནས་འདེམས་ཐོན་བྱུང་བའི་བཀུར་འོས་དཔལྡན་སྲིད་སྐྱོང་མཆོག་དང་། སྐབས་ ༡༦ པའི་བོད་མི་མང་སྤྱི་འཐུས་རྣམ་པ་ལྷན་རྒྱས་ལ་འཚམས་འདྲིའི་བཀྲིས་བདེ་ལེགས་དང་སྦྲགས་བོད་ཀྱི་རྩ་དོན་ཐོག་སྔར་ལྷག་ཧུར་བརྩོན་གནང་གལ་ཆེ་བའི་གསོལ་འདེབས་ཞུ།།
བོད་རྒྱལ་ལོ་།སྲིད་སྐྱོང་རྒྱལ་ལོ་།བདེན་པ་རྒྱལ་ལོ། བཀའ་སྤྱི་ལྷན་རྒྱས་ལ་འཚམས་འདྲི་བཀྲིས་བདེལེགས་ཞུ་།
སྔོན་འགྲོ་དང་དངོས་གཞིའི་འོས་གྲངས་ཀྱི་ཁྱད་པར།
དང་པོ། སྔོན་འགྲོའི་སྐབས་སྲིད་སྐྱོང་ལས་ཐོག་བློ་བཟང་སེང་གེ་མཆོག་ལ་འོས་གྲངས་ ༣༠༥༠༨ ཡིན་ལ། དངོས་གཞིའི་སྐབས་ཀྱི་འོས་གྲངས་༣༣༨༧༦ ཡིན། སྔོན་འགྲོ་ལས་དངོས་གཞིའི་སྐབས་འོས་གྲངས་༣༣༦༨ འཕར་ཡོད།
གཉིས་པ། དཔལ་ལྡན་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་འོས་གྲངས་ ༡༠༧༣༢ ཡིན་ལ། དངོས་གཞིའི་སྐབས་ཀྱི་འོས་གྲངས་༢༤༨༦༤ ཡིན། སྔོན་འགྲོ་ལས་དངོས་གཞིའི་སྐབས་འོས་གྲངས་༡༤༡༣༢ འཕར་ཡོད།
གསུམ་པ། ད་དུང་དུས་ཡུན་ཅུང་རིང་པོ་ཡོད་པ་དང་གནད་དོན་མང་པོ་ཞིག་གི་སྐོར་ལ་གསལ་བཤད་མཐིལ་ཕྱིན་པ་བྱེད་པའི་གོ་སྐབས་ལྡན་ཡོད་ཚེ། འོས་གྲངས་སུ་མཐོ་དང་རྒྱལ་ཁ་སུ་ལ་ཐོབ་ལབ་ཁག་པོ་ཆགས་ས་རེད་བསམ་བསམ་ཅིག་མི་འདུག་གམ།
བཞི་པ། འོན་ཀྱང་ད་ཁྱད་པར་ཡོད་པ་མ་རེད། སྲིད་སྐྱོང་བློ་བཟང་སེངྒེལམ་སློབ་བཟང་སངས་རྒྱས་གང་ཡིན་ཡང་བོད་མི་མང་ལ་ངོས་འཛིན་བྱེད་སྟངས་དང་། ཕྱག་ལས་གནང་ཕྱོགས། སྤྱི་ཡོངས་ལ་དགོངས་པ་བཞེས་ཕྱོགས་སོགས་ཀྱི་ཐད་བསླབ་བྱ་མང་པོ་ཞིག་རག་ཡོད་པ་རེད། མང་ཚོགས་ཀྱིས་ཀྱང་ཕྱར་གྲུ་མཉམ་འདེགས་གནང་ན་བོད་སྤྱི་ལ་ཕན་རླབས་ཆེ་ངེས་རེད་སྙམ།
སྲིད་སྐྱོང་དང་སྤྱི་འཐུས་བདམས་ཐོན་རྣམས་ལ་འཚམས་འདྲི་བཀྲ་ཤིས་བདེ་ལེགས་ཞུ།
དབུས་གཙང་གི་སྤྱི་འཐུས་རྒན་གཞོན་ཆ་མཉམ་པ་སྟེ་ཉམས་མྱོང་ཅན་རྒན་པའི་གྲས་དང་ཤེས་ཡོན་དང་ལྷག་བསམ་ཅན་གཞོན་སྐྱེས་ཀྱང་སླེབས་འདུག་པས་དགའ་མགུ་ཡི་རང་ཞུ་རྒྱུ་ཡིན།
མདོ་སྟོད་ཚང་གིས་་་ཤེས་ཡོན་དེ་ཙམ་མེད་པའི་ “ཁྱིམ་ཚང་ངམ་རུས་པའི་མིང་ཅན་”འཇུ་ཅན་དཀོན་མཆོག་སོགས་འགོར་བསྐྱལ་བ་དང་ཤེས་ཡོན་དང་ལྷག་བསམ་གྱིས་ཕྱུག་པའི་བཀུར་འོས་ཤིག་མཇུག་ཏུ་སླེབས་པ་དེས་བློ་ཕམ་གྱི་གནས་རེད་འདུག
དངོས་གཞི་འོས་བསྡུས་སླེབས་གྲབས་སུ་དགེ་བཤེས་སོགས་རྒན་པའི་གྲས་འགའ་ཤས་ཤིག་གི་ངོ་དེབ་སོགས་དྲྭ་ལམ་ནས་གཞན་ལ་སྐུལ་མ་སྟེ་་་རྒྱ་རི་བུ་ཕྲུག་སོགས་ཅིག་ཅིག་གཉིས་གཉིས་ལ་ཡིན་གཅིག་མན་གཉིས་འོས་སླུགས་དགོས་རེད་ཅེས་བཤད་པ་དེའི་ལན་པ་ཞིག་མིན་ནམ་སྙམ། དེ་མིན་ཤེས་འཇོན་ལྷག་བསམ་ཅན་འགོར་སླེབས་དགོས་ངེས་རེད་བཱ།།
བསྒྲུབ་རྒྱུ་མེད་པའི་སྨོན་ལམ་འདེབས་མཁན་དེ་འདྲ་འདུག་ག་དུས་ཚོད་འཕྲོ་བརླག་མ་གཏོང་ལོ།
སྲིད་སྐྱོང་དང་སྤྱི་འཐུས་གསར་པ་རྣམས་ལ་འཚམས་འདྲི་དང་ཆབས་གཅིག ལོ་ལྔའི་རིང་སྤྱི་དོན་གཙོ་བཟུང་གིས་གང་ཟག་ལས་སྒྲིག་འཛུགས་གལ་ཆེ་བ་དང་། ཁྲིམས་སྒྲིག་གོང་བཀུར་གྱིས་གཡས་ཁ་གཡོན་དཀྲི་མེད་པར་བོད་ཀྱི་དོམ་དམ་པའི་རྩ་དོན་ཐོག་ནུས་པ་སྤུངས་རོགས་ཞུ་རྒྱུ་ཡིན།
དེ་དང་ཆབས་ཅིག་སྲིད་སྐྱོང་སློབ་བཟང་སངས་རྒྱས་དང་། བློ་བཟང་སེང་གེ་གང་ཡིན་ཁ་གསལ་བཟོ་རོགས་གནང་ཞེས་འོས་བསྡུ་ལས་ཁུངས་སུ་འབོད་བསྐུལ་ཞུ་རྒྱུ་ཡིན།
བཀྲི་བདེ་ལེགས།
སྲིད་སྐྱོང་བློ་བཟང་སེང་གེ་མཆོག་གཙོས་སྤྱི་འཐུས་གསར་བ་རྣམ་ལ་ལྷག་བསམ་དག་པས་འཚམས་འདྲི་གྲངས་མེད་ཡོད། བྱ་བ་ལམ་འགྲོ་ཡོང་བར་སྨོན།སྤྱི་འཐུས་ནང་ཕྱོགས་རིས་ཀྱི་དྲི་ངན་མེད་པར་ཤོག