ཧྥ་རན་སིའི་རྒྱལ་ས་ཕ་རི་སིའི་ལྷོ་ཕྱོགས་སུ་རྟེན་གཞི་བྱས་པའི་གཤེན་བསྟན་དར་རྒྱས་གླིང་དུ་རྒྱལ་སྤྱིའི་བོན་གྱི་བགྲོ་གླེང་ཚོགས་འདུ་ཐེངས་བཞི་པ་འཚོཊ་བཞིན་ཡོད་འདུག
འདི་གར་འབྲེལ་ཡོད་ཅིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཁ་སང་ཕྱི་ཚེས་ ༢༩ ནས་བཟུང་ཉིན་གྲངས་ ༣ རིང་ཧྥ་རན་སིའི་རྒྱལ་ས་ཕ་རི་སིའི་ལྷོ་ཕྱོགས་གྲོང་ཁྱེར་བྷུ་ལོ་(Blou)རུ་ཡོད་པའི་གཡུང་དྲུང་བོན་ཚོགས་གཤེན་བསྟན་དར་རྒྱས་གླིང་དུ། རྒྱལ་སྤྱིའི་བོན་གྱི་བགྲོ་གླེང་ཚོགས་འདུ་ཐེངས་བཞི་པ་འཚོགས་བཞིན་ཡོད་པ་དང་། ཐེངས་འདིའི་ཚོགས་ཆེན་ཐོག་ཨ་རི་དང་ཁ་ན་ཌ། ཅེག་སྤྱི་མཐུན་རྒྱལ་ཁབ། ཨོ་སི་ཊོ་རི་ཡ། དེ་བཞིན་རྒྱ་གར་དང་བལ་པོ། བོད་སོགས་ནས་བོན་གྱི་མཁས་དབང་དང་ཞིབ་འཇུག་པ། སློབ་གཉེར་པ་བཅས་ཁྱོན་མི་གྲངས་ ༤༠ ལྷག་འཛོམས་ཡོད་འདུག
ཐེངས་འདིའི་ཚོགས་འདུ་དེར་མཁན་རིན་པོ་ཆེ་ལུང་རྟོགས་བསྟན་པ་གཡུང་དྲུང་མཆོག་གིས་གཙོ་འགན་བཞེས་ཏེ། རྒྱལ་སྤྱིའི་བོད་རིག་པའི་ཚོགས་གཙོ་ཟུར་པ་མཁས་དབང་མཁར་རྨེའུ་བསམ་གཏན་རྒྱལ་མཚན་ལགས་དང་། མཁས་དབང་ཆར་སི་རམ་བྷོ་(Prof. Charles Ramble)ལགས་གཉིས་ཀྱིས་གོ་སྒྲིག་གནང་ཡོད་པ་དང་། ད་རེས་ཀྱི་ཚོགས་འདུའི་ཐོག་གནའ་བོའི་བོད་ཀྱི་ཡུལ་སྲོལ་གོམས་གཤིས་དང་། ཆོ་ག་ཕྱག་ལེན། ཞང་ཞུང་གི་རྒྱལ་རབས་དང་ས་ཁྲ། བོན་གྱི་དཔེ་རྙིང་གཤིབ་བསྡུར། བླ་མ་རིག་འཛིན་སྐྱེས་ཆེན་ཁག་གི་ལོ་རྒྱུས་དཔྱད་བསྡུར་བཅས་བརྗོད་གཞི་འདྲ་མིན་གྱི་ཐོག་གཏམ་བཤད་དང་དྲི་བ་དྲིས་གནང་བཞིན་ཡོད་འདུག
རྒྱལ་སྤྱིའི་བོན་གྱི་བགྲོ་གླེང་ཚོགས་འདུ་ཐེངས་དང་པོ་ཕྱི་ལོ་ ༡༩༩༩ ལོར་ཉི་ཧོང་གི་གྲོང་ཁྱེར་ཨོ་ས་ཀ་(Osaka)རུ་ཚོགས་ཡོད་པ་དང་། ཐེངས་གཉིས་པ་ཕྱི་ལོ་ ༢༠༠༨ ལོར་ཧྥ་རན་སིར་ཡོད་པའི་གཤེན་བསྟན་དར་རྒྱས་གླིང་དུ་ཚོགས། ཐེངས་གསུམ་པ་ཕྱི་ལོ་ ༢༠༡༢ ལོར་བལ་ཡུལ་བོན་གྱི་ལྟེ་གནས་དཔལ་ཁྲི་བརྟན་ནོར་བུ་རྩེ་རུ་ཚོགས་ཡོད་འདུག
གསར་འགོད་པ། པདྨ་མཚོ།
པར་དུ་བལྟས་ཚེ་བསྡུ་འཛོམས་པ་ཕལ་ཆེར་མགོ་སེར་རེད་འདུག
བོད་རིག་པའི་ཚོགས་ཆེན་གྱི་མི་སྣ་ཡང་མང་ཆེ་བ་མགོ་སེར་རེད།
བཟང་ངན་གྱི་རྟགས་གང་ཡིན་མི་ཤེས་པར་འདུག