དེང་སྐབས་བོད་གི་རོང་འབྲོག་གཉིས་ཀའི་དཔལ་འབྱོར་ཡར་རྒྱས་གང་འཚམས་འགྲོ་བཞིན་ཡོད་ཀྱང་། དཔལ་འབྱོར་དང་ཤེས་ཡོན་སློབ་གསོ་དོ་མཉམ་མ་ཡོང་བའི་རྐྱེན་གྱིས་མིའི་ཀུན་སྤྱོད་ཉམས་གུད་ཆེན་པོ་འགྲོ་བཞིན་ཡོད་འདུག
ཁ་སང་འདི་གའི་གསར་འགོད་པ་དྷ་རམ་ས་ལའི་ཉེ་འཁྲིས་སུ་ཡོད་པའི་དབུས་སྣེ་ལེན་ཁང་དུ་བསྐྱོད་དེ། བོད་ནས་སྐྱབས་བཅོལ་དུ་ཡོང་མཁན་དང་གནས་མཇལ་བ་བཅས་མི་གྲངས་ ༢༣ ཙམ་ཡོད་པ་ལས་ཁག་ཅིག་ལ་བོད་ནང་གི་ད་ལྟའི་གནས་སྟངས་སྐོར་ལ་གླེང་མོལ་བྱས། མགོ་ལོག་རྟ་རུ་རྫོང་དུ་སྔོན་ཆད་དང་བསྡུར་ན་དེང་སྐབས་འབྲོག་ཕྱོགས་ཀྱི་འཚོ་གནས་སོགས་ཕྱོགས་གང་ཐད་དུ་ཡར་རྒྱས་ཀྱི་རྣམ་པ་ལྟ་བུ་ཡོད་ཀྱང་། གཞི་རིམ་མང་ཚོགས་ཀྱི་ཤེས་ཡོན་སློབ་གསོའི་གནས་སྟངས་སྔར་བཞིན་ཧ་ཅང་སྐྱོ་བོ་ཡིན་པ་དང་། སྤྱིར་བཏང་ས་ཆ་དེའི་སློབ་གྲྭ་ཁག་ནང་བོད་རྒྱ་དབྱིན་གསུམ་ལ་སློབ་གཉེར་བྱེད་མཁན་མང་ནའང་བསམ་བློའི་གོ་རྟོགས་ཧ་ཅང་ཞན་པ་དང་། ས་གནས་རེ་འགར་སློབ་གྲྭའི་ནང་སློབ་ཕྲུག་ཚོར་གཅར་རྡུང་གཏོང་གི་ཡོད་སྟབས། བྱིས་པ་ཚོ་སློབ་གྲྭར་འགྲོ་བ་ནི་བཙོན་ཁང་ལ་འགྲོ་གི་ཡོད་པ་ལྟ་བུའི་ཞེད་སྣང་དང་དངངས་ཚུབ་ཡོད་སྐོར་དང་། དེང་སྐབས་བོད་ཁུལ་སྤྱིའི་འཚོ་གནས་ཅུང་ཡར་རྒྱས་ཕྱིན་ཡོད་ཀྱང་མི་མང་གི་ཤེས་ཡོན་སྔར་བཞིན་སྐྱོ་བོ་ཡོད་སྟབས། གྲོང་པ་ཕན་ཚུན་དང་ཕ་མ་སྤུན་ཆད། ཐ་ན་ཁྱོ་ཤུག་ཕན་ཚུན་བར་དུའང་དཔལ་འབྱོར་འགྲན་རྩོད་ཀྱི་དཀའ་རྙོག་མང་པོ་ཡོང་བཞིན་ཡོད་སྐོར་བརྗོད་སོང་།
གནས་མཇལ་བ་གཞན་ཞིག་གིས། རེབ་གོང་སྒོ་དམར་ས་ཆར་མཚོན་ན། དེང་གི་དཔལ་འབྱོར་འགྲན་རྩོད་ཀྱི་གནས་བབ་འོག་ཤེས་ཡོན་སློབ་གསོའི་ཕྱོགས་ལ་འཇུག་མཁན་ཧ་ལམ་མེད་པ་ལྟ་བུ་ཆགས་ཡོད་པ་དང་། ལྷག་པར་དུ་དེང་སྐབས་མཐར་ཕྱིན་སློབ་མ་མང་པོར་ལས་གནས་རག་གི་མེད་སྟབས། མང་ཚོགས་ཀྱིས་དཔལ་འབྱོར་འཚོལ་སྒྲུབ་བྱེད་རྒྱུ་མ་གཏོགས། ཤེས་ཡོན་སློབ་གསོར་ཁ་ཕྱོགས་མཁན་ཉུང་རུ་འགྲོ་བཞིན་ཡོད་པ་དང་། དཔེར་ན། དེང་སྐབས་ཚོང་པ་དང་ཤེས་ཡོན་པ་གཉིས་ལས་ཚོང་པར་བརྩི་མཐོང་བྱེད་ཀྱིན་ཡོད་པ་དང་། ས་ཆ་དེར་མི་མང་གི་འཚོ་རྟེན་གཙོ་བོ་ཐང་ག་འབྲི་བཞེངས་དང་རྡོ་བཟོ་ཤིང་བཟོ་སོགས་ཀྱི་ལས་རིགས་ཡིན་པ་དང་། རྒྱལ་ཁབ་ཀྱི་སློབ་གསོའི་སྒྲིག་ཁྲིམས་འོག་སློབ་གྲྭ་ཁག་གི་དགེ་རྒན་མང་ཆེ་བ་རྒྱ་རིགས་ཡིན་པ་དང་། ཡུལ་མི་ཚོའི་ཁྲོད་དུ་བོད་སྐད་ལས་རྒྱ་སྐད་བཤད་མཁན་མང་པོ་ཡོད་སྐོར་སོགས་བརྗོད་བྱུང་།
གཞིས་སྡོད་བོད་མི་ཞིག་གིས། རྒྱ་ནག་གཞུང་གིས་བོད་ནང་འཛུགས་སྐྲུན་བྱས་ཏེ་བོད་མིའི་འཚོ་གནས་ཡར་རྒྱས་གོང་སྤེལ་གཏོང་རྒྱུར་ཁ་གཡར་ནས་འབྲོག་པ་མང་པོ་བཙན་གྱིས་ས་གནས་སྤོར་དུ་འཇུག་པ་དང་། བོད་མི་ཚོའི་རྩྭ་ས་བཙན་འཕྲོག་བྱེད་པ་དང་། རྒྱ་ནག་ནང་གི་རྒྱ་རིགས་མང་པོ་བོད་ཁུལ་དུ་གནས་སྤོ་བྱས་ཏེ་རྒྱ་རིགས་མང་ཚོགས་ཀྱི་འཚོ་གནས་དང་ཁེ་ཕན་ཁོ་ན་སྒྲུབ་ཀྱིན་ཡོད་པ་དང་། རྒྱ་ནག་གཞུང་གིས་འབྲོག་ཁུལ་གྱི་རྩྭ་ས་བགོས་ནས་ལྕགས་ར་བསྐོར་བར་བརྟེན་ནས། འབྲོག་པ་མང་པོ་སྔོན་ཆད་བཞིན་དབྱར་ས་དགུན་སར་རང་དབང་གིས་སྤར་མི་ཆོག་པ་དང་། དེ་ལ་བརྟེན་ནས་སྡེ་བ་ཁྱིམ་མཚེས་ཕན་ཚུན་བར་རྩྭ་ས་རྩོད་གླེང་གི་དཀའ་རྙོག་འབྱུང་གི་ཡོད་པ་དང་། ལྷག་པར་དུ་དེང་སྐབས་འབྲོག་ཁུལ་དུ་སྔོན་ཆད་ལྟར་ཕྱུག་ཟོག་འཚོ་སྐྱོང་བྱེད་དུ་འགྲོ་མི་དགོས་པར། ཕྱུག་ཟོག་ལྕགས་རའི་ནང་བཅུག་སྟེ་ཕྱུགས་རྫི་རྣམས་དོན་མེད་ལ་རྒྱ་སྲང་ཉུལ་ཏེ། རྒྱན་འཛུགས་ཤོ་རྒྱག་གི་ལས་ལ་འཇུག་མཁན་ཇེ་མང་དུ་འགྲོ་བཞིན་ཡོད་པ་དང་། དེང་སྐབས་དཔལ་འབྱོར་གྱི་འགྲན་རྩོད་དང་དེའི་ཤུགས་རྐྱེན་ལ་བརྟེན་ཏེ་བཟའ་ཐོར་དང་། མི་དང་མིའི་བར་ཡིད་ཆེས་དང་བརྩེ་བ་རླག་གི་ཡོད་པ་མ་ཟད། ས་ཆ་ལ་ལར་འགའ་རེ་ཨུ་ཐུགས་ཏེ་ཁྱིམ་ཚང་དང་བུ་ཕྲུག་བསྐྱུར་ནས་ཡར་མར་འཁྱམ་སྡོམ་བྱེད་མཁན་དང་། གྲྭ་བ་དང་སྔགས་པ་འདྲ་བོ་བཟོས་ཏེ་རི་ཁྲོད་སོགས་སུ་འགྲོ་མཁན་ཡང་མང་དུ་འགྲོ་བཞིན་ཡོད་སྐོར་སོགས་བརྗོད་སོང་།
གསར་འགོད་པ། པདྨ་རྒྱལ།
