ཊི་རུམ་ཕི་དང་ཚའེ་ཡེན་ཝན་གཉིས་ཁ་པར་ནས་ཁ་བརྡ་བྱས་རྗེས་པེ་ཅིན་གཞུང་གིས་ཐའེ་ཝན་མཚོ་འགག་གི་གླིང་ཕྲན་ཁག་ཅིག་ནང་དྲག་པོའི་མཁའ་དམག་ཇེ་མང་དུ་བཏང་སྟེ་ཐའེ་ཝན་ལ་འཇིགས་སྣང་སྐུལ་བཞིན་ཡོད་འདུག
དེ་རིང་རྒྱ་ནག་ལྷོ་རྒྱུད་ཞོགས་པའི་ཚགས་པར་ཁང་གིས་གནས་ཚུལ་སྤེལ་བ་ལྟར་ན། ད་ཆར་པེ་ཅིན་གཞུང་གིས་ཐའེ་ཝན་མཚོ་འགག་གི་ཉེ་འགྲམ་གླིང་ཕྲན་ཁག་ཏུ་རྒྱ་ནག་མི་མང་བཅིངས་འགྲོལ་དམག་ཁུལ་གྱི་མཁའ་དམག་ཇེ་མང་དུ་བཏང་སྟེ་ཐའེ་ཝན་མཚོ་འགག་གི་གླིང་ཕྲན་ཁག་ཏུ་འཕུར་སྐྱོད་ཀྱིས་ཐའེ་ཝན་ལ་འཇིགས་སྐུལ་གཏོང་བཞིན་ཡོད་པ་དང་། རྒྱལ་སྤྱིའི་སྲིད་དོན་དབྱེ་ཞིབ་པ་ཚོས། དེ་ནི་ཟླ་འདིའི་ཕྱི་ཚེས་ ༢ ཉིན་ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝན་དང་སྐུ་ཞབས་ཊི་རུམ་ཕི་གཉིས་ཀྱིས་ཁ་པར་སྐུད་ལམ་ནས་རྒྱལ་ཁབ་གཉིས་ཀྱི་ཕྱི་འབྲེལ་དང་བདེ་འཇགས་སྐོར་ལ་གླེང་མོལ་བྱས་པར། ཨ་རིའི་ཕྱོགས་ནས་དེ་སྔོན་ཐའེ་ཝན་མཚོ་འགག་རྒྱ་ནག་གི་ཆ་ཤས་སུ་ངོས་འཛིན་བྱེད་པའི་ལངས་ཕྱོགས་དེར་ད་ཆར་ལྷོད་ཡངས་འགྲོ་བཞིན་པར་རྒྱ་ནག་གཞུང་གིས་བློ་འཚུབ་བྱེད་བཞིན་ཡོད་སྐོར་བརྗོད་འདུག
གནས་ཚུལ་འདིའི་ནང་། པེ་ཅིན་དམག་དོན་དབྱེ་ཞིབ་པ་ལི་ཇི་ (Li Jie) ཟེར་བ་ཞིག་གིས། ཚའེ་ཡེན་ཝན་གཞུང་གིས་ཊི་རུམ་ཕི་ཡི་རོགས་རམ་འཚོལ་བཞིན་ཡོད་སྟབས། ཊི་རུམ་ཕི་ཡིས་ཁོང་མོའི་གཞུང་དང་མཉམ་འབྲེལ་བྱ་སྲིད་པར་པེ་ཅིན་གཞུང་ལ་བློ་འཚུབ་ལང་གི་ཡོད་པ་དང་། དེའི་རྒྱུ་མཚན་ནི། ཊི་རུམ་ཕི་ཡིས་རྒྱ་ནག་ཐོག་འཛིན་པའི་ལངས་ཕྱོགས་དེ་ཨ་རིའི་ཆབ་སྲིད་པ་གཞན་དག་དང་འདྲ་བོ་མེད་པ་དང་། ཐའེ་ཝན་གཞུང་གིས་གཞན་གྱི་དམག་རོགས་ལ་བརྟེན་ནས་རྒྱ་ནག་སྐམ་ས་ཆེན་མོར་འཇིགས་སྐུལ་སློང་གི་ཡོད་སྟབས། པེ་ཅིན་གཞུང་ཕྱོགས་ནས་ཀྱང་རང་རྒྱལ་གྱི་མངའ་ཁོངས་མཚོ་ཁུལ་ཁག་ཏུ་དྲག་པོའི་དམག་སྦྱོང་བྱས་ཏེ་ཚའེ་ཡེན་ཝན་གྱི་རང་བཙན་ལངས་ཕྱོགས་ལ་ཡ་ལན་རྣོ་ངར་ལྡན་པ་ཞིག་སྤྲོད་སྲིད། ཅེས་བཤད་འདུག
རྒྱ་ནག་བཅིངས་འགྲོལ་དམག་ཁུལ་གྱི་མགྲིན་ཚབ་པ་ཧྲིན་ཅིན་ཁི་ (Shen Jinke) ཟེར་བ་ཞིག་གིས། འཛམ་གླིང་དམག་ཆེན་གཉིས་པའི་གྲང་དམག་རྗེས་སུ། ཨ་རིའི་མཁའ་དམག་ཉི་ཧོང་དང་ཐའེ་ཝན་གྱི་གླིང་ཕྲན་ཁག་ཅིག་དང་འབྲེལ་བའི་ཨེ་ཤ་ཡའི་ཤར་རྒྱུད་གླིང་ཕྲན་ (First Island Chain) སྟེང་དུ་བཅའ་སྡོད་བྱས་ཡོད་སྟབས། ད་ལོའི་ཕྱི་ཟླ་ ༩ ཚེས་ ༢༦ ཉིན་རྒྱ་ནག་གི་འགད་རྫས་དང་མེ་ཤུགས་འཕུར་མདེལ། དྲག་ཆས་སྐྱེལ་འདྲེན་གནམ་གྲུ་སོགས་ཁྱོན་མཁའ་དམག་གནམ་གྲུ་ ༤༠ ལྷག་གིས་གླིང་ཕྲན་དེའི་སྟེང་དུ་དྲག་པོའི་དམག་སྦྱོང་བྱས་ཡོད། ཅེས་བཤད་འདུག
ཨོ་མན་ (Macau) རང་སྐྱོང་ཁུལ་གྱི་དམག་དོན་རྟོགས་ཞིབ་པ་ཝོང་ཏུང་ (Wong Dong) ཟེར་བ་ཞིག་གིས། དེ་སྔོན་རྒྱ་ནག་མི་མང་བཅིངས་འགྲོལ་དམག་ཁུལ་གྱི་མཁའ་དམག་གིས་ཐའེ་ཝན་གྱི་གླིང་ཕྲན་ཁག་ཏུ་རྟོགས་ཞིབ་བྱེད་དོན་ནི། ཐའེ་ཝན་མཚོ་འགག་ལ་ཨུ་རུ་སུའི་ (Tu-154M) ལྟ་བུའི་གསང་ཉུལ་གནམ་གྲུ་ཡོད་པས་ཡིན་ནའང་། ད་ཆར་པེ་ཅིན་གཞུང་ལ་དེ་ལས་ལྷག་པའི་སྔོན་ཐོན་མཁའ་དམག་དྲག་ཆས་འབོར་ཆེན་ཡོད་པ་རེད། ཅེས་འཇིགས་སྐུལ་བཏང་ཡོད་འདུག
རོའུ་ཊར་གསར་ཁང་གིས་སྤེལ་བའི་གནས་ཚུལ་ཞིག་གི་ནང་། འབྱུང་འགྱུར་ཕྱི་ཟླ་ ༡ ཚེས་ ༡༡ ནས་ ༡༢ ཉིན་གཉིས་རིང་ཐའེ་ཝན་སྲིད་འཛིན་ལྕམ་ཚའེ་ཡེན་ཝན་ཨ་རིའི་དབུས་རྒྱུད་རྒྱལ་ཁབ་གྷུ་ཊི་མ་ལ་ (Guatemala) ནང་བསྐྱོད་དེ། རྒྱལ་ཁབ་དེའི་སྲིད་འཛིན་ཇེ་མེ་མོ་ར་ལི་ (Jimmy Morales) ལགས་སུ་ཐུག་འཕྲད་དང་བསྟུན་ཏེ། ལམ་བར་དུ་ཁོང་མོ་ནེའུ་ཡོག་གྲོང་ཁྱེར་དུ་ཞག་སྡོད་བྱས་ཏེ། གསར་དུ་བདམས་ཐོན་བྱུང་བའི་ཨ་རིའི་སྲིད་འཛིན་སྐུ་ཞབས་ཊི་རུམ་ཕི་མཆོག་ལ་མཇལ་འཕྲད་བྱ་འཆར་ཡོད་པ་དང་། གནས་ཚུལ་དེའི་ཐད་ཕྱི་ཚེས་ ༥ ཉིན་ཨ་རིའི་རྒྱལ་སྲིད་ལྷན་ཁང་གི་མགྲིན་ཚབ་པ་མར་ཁི་ཊོ་ནིར་ (Mark Toner) ཟེར་བ་ཞིག་གིས། ཨ་རིའི་ཕྱོགས་ནས་ལྕམ་ཚའེ་ཡེན་ཝན་ཨ་རིའི་དབུས་རྒྱུད་དུ་སྐོར་སྐྱོད་སྐབས། ཁོང་མོ་ཨ་རིའི་དཔོན་རིགས་ཚོར་ཐུག་འཕྲད་བྱ་འཆར་ཡོད་པའི་གསལ་བསྒྲགས་ད་སྔ་གང་ཡང་སྤེལ་མེད་ཀྱང་། ཐའེ་ཝན་དང་ཨ་རི་གཉིས་བར་གྱི་དུས་ཡུན་རིང་བོའི་འབྲེལ་འདྲིས་དང་བསྟུན་ཏེ། ལྕམ་ཚའེ་ཡེན་ཝན་སྐབས་དེར་གཞུང་འབྲེལ་མ་ཡིན་པའི་ཐོག་ནས་ནེའུ་ཡོག་གྲོང་ཁྱེར་དུ་ཞག་སྡོད་ཀྱིས་ཨ་རིའི་དཔོན་རིགས་ཚོར་འབྲེལ་འདྲིས་བྱ་སྲིད་སྐོར་བརྗོད་ཡོད་པ་རེད། ཁ་སང་ཕྱི་ཚེ་ ༦ ཉིན་རྒྱ་ནག་ཕྱི་སྲིད་ལྷན་ཁང་གིས། ཨ་རིའི་གཞུང་ཕྱོགས་ནས་ལྕམ་ཚའེ་ཡེན་ཝན་གྱི་སྐོར་སྐྱོད་སྐབས་ནེའུ་ཡོག་གྲོང་ཁྱེར་དུ་གནས་སྡོད་བྱེད་དུ་བཅུག་སྟེ་ཨ་རིའི་དཔོན་རིགས་ཚོར་ཐུག་འཕྲད་བྱེད་འཆར་ཡོད་པ་དེ་ནི་རྒྱ་ནག་གི་ཚོར་བ་རྣོ་བའི་གནད་དོན་ཞིག་ལ་ཐེ་གཏོགས་བྱེད་ཀྱིན་ཡོད་སྟབས། ཐེངས་འདིའི་ཚའེ་ཡེན་ཝན་གྱི་སྐོར་སྐྱོད་སྐབས་ཨ་རིའི་དཔོན་རིགས་ཚོར་ཐུག་འཕྲད་མ་བྱས་ལ་ལེགས་པའི་འབོད་སྐུལ་ཞུས་ཡོད་འདུག
གསར་འགོད་པ། པདྨ་རྒྱལ།
མང་གཙོར་གཙིགས་ཆེར་འཛིན་ཞིང་མཐའ་གཅིག་ཏུ་མང་གཙོའི་ལམ་ལ་བསྐྱོད་ཅིང་འགྲོ་བ་མིའི་ཐོབ་ཐང་དང་། གསར་འགོད་ཀྱི་རང་དབང་། འདུ་འཛོམས་ཀྱི་རང་དབང་། ཆོས་དད་ཀྱི་རང་དབང་དང་། ཁྲིམས་ཁང་དུ་ཞུ་གཏུགས་ཆོག་པའི་རང་དབང་སོགས་རྒྱ་གར་དང་། ཡུརོབ། ཨ་རི་དང་ཁེ་ན་ཌ། ཉི་ཧོང་དང་ཨོ་གླིང་སོགས་ཀྱི་གཞུང་མང་དང་མཐུན་པར་རང་དབང་ཡོད་པའི་རྒྱལ་ཁབ་ཐའེ་ཝན་དང་། རང་ས་ཤོར་ཡང་བྱེས་སུ་༧གོང་ས་མཆོག་གི་ཡང་དག་པའི་དབུ་ཁྲིད་དང་ལམ་སྟོན་གཞིར་བཟུང་གོང་གསལ་རྣམས་ཆ་ཚང་བཟང་སྤྱོད་ལྡན་པའི་ངང་ལོངས་སུ་སྤྱོད་མཁན་བོད་མིའི་དབུ་ཁྲིད་༧གོང་ས་མཆོག་དང་སྒྲིག་འཛུགས་ལ་ཡང་གོང་གསལ་རྒྱལ་ཁབ་རྣམས་ཀྱིས་ངོས་ལེན་དང་རྒྱབ་སྐྱོར་སྤྱི་མཚུངས་གནང་དགོས་པ་ཡིན།