རྒྱ་ནག་གཅིག་གི་སྲིད་བྱུས་དགོས་ན། རྒྱ་གར་གཅིག་གི་སྲིད་བྱུས་ཅིའི་ཕྱིར་མི་དགོས།

ད་ལོའི་ཕྱི་ཟླ་ ༤ པའི་ཚེས་ ༡༣ ཕའི་ཉིན་༧གོང་ས་མཆོག་ཨཱ་རུ་ན་ཅལ་མངའ་སྡེའི་མོན་རྟ་དབང་དུ་ཆིབས་སྒྱུར་བསྐྱང་རྒྱུ་ཡིན་པ་མ་ཟད། སྐབས་དེར་རྒྱ་གར་ནང་སྲིད་བློན་ཆེན་གཞོན་པ་དང་ཨཱ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་སོགས་དང་མཇལ་འཕྲད་གནང་རྒྱུ་ཡིན་སྟབས། རྒྱ་ནག་པེ་ཅིན་གཞུང་གིས་ཏཱ་ལའི་བླ་མ་ཨཱ་རུ་ན་ཅལ་མངའ་ཁུལ་དུ་ཕེབས་བཅུག་པ་དེས་རྒྱ་དཀར་ནག་གི་འབྲེལ་ལམ་ལ་དོ་ཕོག་བཟོ་རྒྱུ་ཡིན་ལུགས་བཤད་འདུག

རུའུ་ཊིར་(REUTERS)གསར་ཁང་གི་གནས་ཚུལ་ནང་བཀོད་དོན། རྒྱ་གར་བྱང་ཤར་ཨཱ་རུ་ན་ཅལ་མངའ་སྡེ་ནི་ད་ལྟ་རྒྱ་གར་མངའ་ཁོངས་སུ་ཡོད་ཀྱང་། རྒྱ་ནག་གཞུང་གིས་མངའ་ཁུལ་དེ་རྒྱ་ནག་གི་མངའ་ཁོངས་ཡིན་ལུགས་བཤད་ཀྱི་ཡོད་སྟབས། རྒྱ་དཀར་ནག་བར་གྱི་རྣོ་ངར་ལྡན་པའི་རྩོད་རྙོག་ཅིག་ཆགས་ཡོད། རྒྱ་ནག་ཕྱོགས་ནས་ཧི་མ་ལ་ཡའི་ཤར་རྒྱུད་མངའ་སྡེ་ལ་ “ལྷོ་བོད”ཞེས་རྒྱ་ནག་གི་མངའ་ཁོངས་ཡིན་པར་རྗོད་ཀྱི་ཡོད་པ་མ་ཟད། ཕྱིའི་རྒྱལ་ཁབ་ཁག་དང་། ཐ་ན་རྒྱ་གར་གྱི་དཔོན་རིགས་ཚོ་མངའ་ཁུལ་དེའི་ནང་སྐོར་སྐྱོད་བྱེད་པར་ངོ་རྒོལ་བྱེད་ཀྱིན་ཡོད།

རྒྱ་དཀར་ནག་གི་མཐའ་མཚམས་སྲུང་སྐྱོབ་དང་དམག་དོན། དེ་བཞིན། པེ་ཅིན་གཞུང་དང་པ་ཀི་སི་ཐན་བར་གྱི་འབྲེལ་ལམ་སོགས་ལ་བརྟེན་ཏེ། རྒྱ་གར་ལྡི་ལི་གཞུང་དང་རྒྱ་ནག་པེ་ཅིན་གཞུང་གཉིས་བར་གྱི་འབྲེལ་ལམ་ཇེ་སྡུག་ཏུ་འགྲོ་བཞིན་ཡོད་པའི་སྐབས་འདིར། ༧གོང་ས་ཏཱ་ལའི་བླ་མ་མཆོག་ཨ་རུ་ན་ཅལ་མངའ་ཁུལ་ཕེབས་རྒྱུ་ཡིན་སྟབས་རྒྱ་དཀར་ནག་གཉིས་བར་གྱི་རྩོད་གླེང་ཆེ་རུ་འགྲོ་སྲིད། རྒྱ་ནག་གཞུང་གིས་དུས་རྒྱུན་༧གོང་ས་རྒྱལ་བ་རིན་པོ་ཆེ་མཆོག་ནི། ཉེན་ཁ་ཆེ་བའི་ཁ་བྲལ་རིང་ལུགས་པ་ཞིག་ཡིན་ལུགས་དྲིལ་བསྒྲགས་ཤུགས་ཆེན་བྱེད་ཀྱིན་ཡོད།

པེ་ཅིན་གཞུང་གི་གནོན་ཤུགས་འོག རྒྱ་གར་གཞུང་སྔོན་མ་དག་གིས་༧གོང་ས་མཆོག་ལ་གཞུང་འབྲེལ་ཐོག་ནས་མཇལ་འཕྲད་གནང་རྒྱུར་ཐེ་ཚོམ་བྱེད་ཀྱིན་ཡོད་ནའང་། ད་ལྟའི་རྒྱ་གར་སྲིད་བློན་ནཱ་རིན་ཌ་ར་མོ་ཌེ་གཞུང་གིས་ཕྱི་གསལ་ནང་གསལ་ཐོག་༧གོང་ས་ཏཱ་ལའི་བླ་མ་མཆོག་ལ་མཇལ་འཕྲད་ཞུ་རྒྱུ་ཡིན་སྐོར་གསལ་བཤད་བྱས་ཡོད་སྟབས་པེ་ཅིན་གཞུང་ལ་ཁོང་ཁྲོ་ཆེན་པོ་བསླངས་ཡོད་འདུག

རྒྱ་གར་ནང་སྲིད་བློན་ཆེན་གཞོན་པ་སྐུ་ཞབས་ཀེ་རིན་རེ་རྗེ་རྗུ་ (Kiren Rijiju) ལགས་ཀྱིས། རོའུ་ཊར་གསར་འགོད་པའི་བཅར་འདྲིའི་སྐབས་བརྗོད་དོན། “ང་ཚོས་མཐོང་གསལ་ལྟར། འདི་ནི་ད་ལྟའི་རྒྱ་གར་གཞུང་གི་འགྱུར་བ་ཆེན་པོ་ཞིག་རེད་ལ། རྒྱ་གར་གཞུང་གི་གདེང་སྤོབས་ཀྱང་ཆེ་རུ་ཕྱིན་ཡོད།” ཅེས་བརྗོད་འདུག

སྐུ་ཞབས་རེ་རྗེ་རྗུ་ལགས་ནི་རྒྱ་གར་བྱང་ཤར་ཨཱ་རུ་ན་ཅལ་མངའ་སྡེ་ནས་ཡིན་ཞིང་། ཁོང་ནི་སྲིད་བློན་མོ་ཌེ་ཡི་ཐད་བསྐོས་བོད་དོན་འབྲེལ་གཏུག་པ་ཡིན། ཁོང་ཐེངས་འདིར་༧གོང་ས་ཏཱ་ལའི་བླ་མ་མཆོག་རྟ་དབང་དགོན་པར་ཆིབས་སྒྱུར་བསྐྱང་སྐབས་མཇལ་འཕྲད་ཞུ་རྒྱུ་ཡིན་འདུག

སྐུ་ཞབས་རེ་རྗེ་རྗུ་ལགས་ཀྱིས། “ཨཱ་རུ་ན་ཅལ་མངའ་སྡེ་ནང་གི་དད་ལྡན་མི་མང་གིས་༧གོང་ས་ཏཱ་ལའི་བླ་མ་མཆོག་ཆིབས་སྒྱུར་བསྐྱང་བར་གསོལ་འདེབས་ཞུས་པ་བཞིན་ཐེངས་འདིར་ཕེབས་ཀྱི་ཡོད་པ་དང་། ༧གོང་ས་ཏཱ་ལའི་བླ་མ་མཆོག་ནས་ཆོས་ཕྱོགས་ཀྱི་མཛད་འཕྲིན་སྐྱོང་གི་ཡོད་སྟབས། རྒྱ་གར་ཕྱོགས་ནས་ཁོང་གི་ཆིབས་སྒྱུར་ལ་བཀག་འགོག་བྱེད་དོན་ཡོད་མེད་ལ། ཁོང་ཉིད་བླ་མ་ཞིག་ཡིན་སྟབས་སུ་གང་ལའང་ཐོག་ཕོག་བཟོ་སྲིད་པ་མ་རེད།” ཅེས་བརྗོད་འདུག

གཟའ་པ་སངས་ཉིན། རྒྱ་ནག་ཕྱི་སྲིད་བློན་ཆེན་ནས་༧གོང་ས་ཏཱ་ལའི་བླ་མའི་ཆིབས་སྒྱུར་དེས་རྒྱ་དཀར་ནག་གི་འབྲེལ་ལམ་ལ་ཉེན་ཁ་ཆེན་པོ་བཟོ་སྲིད་སྟབས། ལྡི་ལི་གཞུང་གིས་རྒྱ་ནག་ལ་རྒོལ་བའི་སྡིངས་ཆ་སྤྲོད་མི་རུང་བའི་ཉེན་བརྡ་བཏང་ཡོད་འདུག རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་གིང་ཧྲང་ (Geng Shuang) གིས་རྒྱ་ནག་ཉིན་རེའི་གསར་འགྱུར་ཁང་གི་གསར་འགོད་པར། “དུས་ཡུན་རིང་བོར་ཏཱ་ལའི་རུ་ཚོགས་ཀྱིས་མེས་རྒྱལ་ཁ་བྲལ་གྱི་ལས་འགུལ་སྤེལ་ཡོད་ལ། རྒྱ་དཀར་ནག་གི་མཐའ་མཚམས་རྩོད་གླེང་དེ་ནི་ལོ་རྒྱུས་རང་བཞིན་གྱི་རྩོད་རྙོག་ཅིག་ཆགས་ཡོད།” ཅེས་བཤད་འདུག

རྒྱ་ནག་གིས་ཁྱིམ་མཚེས་རྒྱལ་ཁབ་ཁག་ནང་དཔལ་འབྱོར་འཛུགས་སྐྲུན་བྱེད་བཞིན་ཡོད།

འཆར་ཟླ་ ༤ ཚེས་ ༡༣ ཉིན་༧གོང་ས་ཏཱ་ལའི་བླ་མ་མཆོག་ཨ་རུ་ན་ཅལ་མངའ་ཁུལ་དུ་ཆིབས་སྒྱུར་བསྐྱང་རྒྱུའི་དུས་བཅད་བཟོས་པར་བརྟེན་ཏེ། རྒྱ་དཀར་ནག་བར་གྱི་མཐའ་མཚམས་རྩོད་གླེང་ཤུགས་ཇེ་རུ་འགྲོ་བཞིན་ཡོད་འདུག ཡིན་ནའང་། རྒྱ་ནག་གི་དཔལ་འབྱོར་དང་ཆབ་སྲིད་རླུང་འཚུབ་ལྷོ་ཨེ་ཤ་ཡའི་ནང་ལྡིང་བཞིན་པའི་སྐབས་འདིར། ༧གོང་ས་མཆོག་ཨ་རུ་ན་ཅལ་མངའ་ཁུལ་དུ་ཆིབས་སྒྱུར་བསྐྱང་རྒྱུའི་དུས་བཅད་བཟོས་པ་དེས། སྲིད་བློན་མོ་ཌེ་གཞུང་གིས་རྒྱ་ནག་ཐོག་ཕྱི་འབྲེལ་སྲིད་ཇུས་གང་འདྲ་ཞིག་འཛིན་དགོས་མིན་ལ་གྲ་སྒྲིག་ཡོད་པ་བསྟན་ཡོད།

ད་ལྟ་རྒྱ་ནག་གིས་པ་ཀི་སི་ཐན་གཙོས་པའི་རྒྱ་གར་གྱི་ཁྱིམ་མཚེས་རྒྱལ་ཁབ་ཁག་ནང་ཚོང་འབྲེལ་གསར་དུ་འཛུགས་བཞིན་ཡོད་ལ། རྒྱ་ནག་གིས་སི་རི་ལན་ཁ་ (Sri Lanka) དང་བྷང་ལ་ཌེ་ཤཱི་ (Bangladesh) སོགས་ནང་དཔལ་འབྱོར་འཛུགས་སྐྲུན་བྱས་པར་བརྟེན་ཏེ། མཐའ་འཁོར་གྱི་ཁྱིམ་མཚེས་རྒྱལ་ཁབ་མང་པོ་ཞིག་གིས་ཁོ་ཚོར་རྒྱ་ནག་གི་དཔལ་འབྱོར་དབང་སྒྱུར་ཐེབས་སྲིད་པའི་དངངས་འཚུབ་བྱེད་ཀྱིན་ཡོད། རྒྱ་ནག་གིས་ཐའེ་ཝན་མཚོ་འགག་ནི་རྒྱ་ནག་སྐམ་ས་ཆེན་མོའི་མངའ་ཁོངས་ཞིང་ཆེན་ཞིག་ཡིན་ལུགས་བཤད་ཀྱིན་ཡོད་སྟབས། ཟླ་སྔོན་མར་ཐའེ་ཝན་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་རྒྱ་གར་ནང་སྐོར་སྐྱོད་བྱས་པ་དེས་པེ་ཅིན་གཞུང་ལ་ཕོག་ཐུག་ཆེན་པོ་བསླངས་ཡོད་པ་རེད།

འདས་མ་ཐག་ལོའི་ཕྱི་ཟླ་ ༡༢ ནང་རྒྱ་གར་གྱི་སྲིད་འཛིན་ཕ་ར་ནབ་མུ་ཀིར་རྗེ་ (Pranab Mukherjee) ལགས་ཀྱིས། ༧གོང་ས་ཏཱ་ལའི་བླ་མ་གཙོས་པའི་ནོ་བྷིལ་ཞི་བདེ་གཟེངས་རྟགས་བཞེས་མཁན་འགའ་མགྲོན་འབོད་ཞུས་ཡོད་པ་དང་། དེ་ནི་འདས་པའི་ལོ་ངོ་ ༦༠ རིང་རྒྱ་གར་དབུས་གཞུང་གིས་ཕྱི་གསལ་ནང་གསལ་གྱི་ཐོག་ནས་༧གོང་ས་ཏཱ་ལའི་བླ་མ་མཆོག་ལ་མཇལ་འཕྲད་ཞུས་པ་ཐེངས་དང་པོ་དེ་ཆགས་ཡོད།

རྒྱ་གར་གཞུང་གི་དཔོན་རིགས་ཁ་ཅིག་གིས་ད་ལྟའི་རྒྱ་གར་གཞུང་གི་གློ་བུར་བའི་འགྱུར་ལྡོག་དེས་རྒྱ་གར་གྱིས་བོད་ཐོག་འཛིན་པའི་སྲིད་ཇུས་ཁ་གསལ་མེད་པ་དང་། སྲིད་བློན་མོ་ཌེ་ཡིས་རྒྱ་ནག་གི་སེམས་ཁྲལ་ལ་ཁ་ཡ་བྱེད་དོན་མེད་པའི་རྣམ་འགྱུར་བསྟན་ཡོད། བདུན་ཕྲག་སྔོན་མར་རྒྱ་གར་ཕྱི་སྲིད་དྲུང་ཆེ་རྗེ་ཤཱན་ཀར་ (Subrahmanyam Jaishankar) ལགས་རྒྱ་ནག་རྒྱལ་ས་པེ་ཅིན་དུ་སྐོར་སྐྱོད་བྱས་པའི་ཐད་ལ། སྲིད་དོན་དབྱེ་ཞིབ་པ་ཚོས་དེ་ནི་ཕྱོགས་གཉིས་བར་གྱི་འབྲེལ་ལམ་སྲ་བརྟན་ཡོང་བར་དམིགས་པ་ཞིག་ཡིན་པའི་ཚོད་དཔག་བྱེད་ཀྱིན་ཡོད།

དངོས་བྱུང་འགྱུར་ལྡོག

ཉེ་ལམ་རྒྱ་གར་ཕྱི་སྲིད་བློན་ཆེན་ལྕམ་ས་ཝ་ར་རྗེ་ (Sushma Swaraj)དང་རྒྱ་ནག་གི་ཕྱི་སྲིད་བློན་གཉིས་ཐུག་འཕྲད་སྐབས། ལྕམ་ས་ཝ་ར་རྗེ་ཡིས་རྒྱ་ནག་གི་ཕྱི་སྲིད་བློན་ཆེན་ལ་རྒྱ་ནག་གཞུང་གིས་ “རྒྱ་གར་གཅིག” གི་སྲིད་ཇུས་ལ་ངོས་ལེན་བྱེད་མིན་དོགས་འདྲི་བྱས་ཡོད་པ་དང་། དོགས་འདྲི་དེ་ནི་པེ་ཅིན་གཞུང་ཕྱོགས་ནས་འབྲེལ་ཡོད་རྒྱལ་ཁབ་ཁག་གིས་ “རྒྱ་ནག་གཅིག” གི་སྲིད་ཇུས་ལ་ངོས་ལེན་བྱེད་དགོས་པའི་དགོས་འདུན་འདོན་བཞིན་པར་བརྟེན་ཏེ་བྱུང་བ་ཞིག་ཡིན། “རྒྱ་གར་གཅིག”གི་སྲིད་ཇུས་ཟེར་བ་དེ་ནི། རྒྱ་གར་དང་པ་ཀི་སི་ཐན་གཉིས་བར་རྩོད་ཉོག་ཆགས་ཡོད་པའི་ཀ་ཤཱི་མེར་ (Kashmir) དང་། བྱང་ཤར་མཐའ་མཚམས་ཀྱི་ཨ་རུ་ན་ཅལ་མངའ་སྡེ་སོགས་རྒྱ་གར་གྱི་མངའ་ཁོངས་ཡིན་པར་རྒྱ་ནག་གིས་ངོས་ལེན་བྱེད་དགོས་པ་དེ་ཡིན།

པེ་ཅིན་གཞུང་གིས་དུས་ཡུན་རིང་པོར་བཙན་འཛུལ་བྱས་མཐར་བོད་ཕམ་ཉེས་བྱུང་རྗེས་ ༡༩༥༩ ལོར་རྒྱ་གར་གཞུང་ཕྱོགས་ནས་༧གོང་ས་ཏཱ་ལའི་བླ་མ་མཆོག་སྐྱབས་བཅོལ་དུ་ཕེབས་པར་སྣེ་ལེན་ཞུས་ཡོད་ཀྱང་། ད་བར་རྒྱ་གར་སྲིད་བློན་རིམ་པས་ཕྱི་གསལ་ནང་གསལ་ཐོག་༧གོང་ས་ཏཱ་ལའི་བླ་མ་མཆོག་ལ་མཇལ་འཕྲད་ཞུ་རྒྱུར་འཛེམ་དོགས་བྱས་ཡོད།

བཅར་འདྲི་ཞིག་གི་ཐོག རྒྱ་གར་དྷ་རམ་ས་ལར་རྟེན་གཞི་བྱས་པའི་བཙན་བྱོལ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས། སྔོན་ཆད་རྒྱ་གར་དབུས་གཞུང་དང་༧གོང་ས་ཏཱ་ལའི་བླ་མའི་བར་མཇལ་འཕྲད་ཐེངས་མང་བྱུང་ཡོད་ཀྱང་། ཐེངས་འདིའི་མཇལ་འཕྲད་ནི་ཕྱི་གསལ་ནང་གསལ་ཞིག་ཡིན་སྐོར་བརྗོད་འདུག

སྲིད་སྐྱོང་བློ་བཟང་སེང་གེ་མཆོག་ནས། “ངས་རྒྱ་གར་གྱི་སྲིད་ཇུས་ལ་འགྱུར་བ་ཕྱིན་ཡོད་པར་དོ་སྣང་བྱུང་སོང་། རྒྱ་ནག་གིས་ཁྱིམ་མཚེས་རྒྱལ་ཁབ་ཁག་ནང་དཔལ་འབྱོར་འཛུགས་སྐྲུན་བྱེད་བཞིན་པའི་ཐད་རྒྱ་གར་ནང་གླེང་གཞི་ཆེན་པོ་ཆགས་ཡོད།” ཅེས་བརྗོད་འདུག

ན་ནིང་ཕྱི་ཟླ་ ༡༠ ནང་། རྒྱ་གར་རྒྱལ་ས་ལྡི་ལིར་ཨཱ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་༧གོང་ས་ཏཱ་ལའི་བླ་མར་མཇལ་འཕྲད་ཞུས་སྐབས། ཁོས་༧གོང་ས་ཏཱ་ལའི་བླ་མ་མཆོག་ཨཱ་རུ་ན་ཅལ་མངའ་སྡེ་ནང་གདན་འདྲེན་ཞུས་ཡོད། ༢༠༠༩ ལོར་༧གོང་ས་ཏཱ་ལའི་བླ་མ་མཆོག་ཨཱ་རུ་ན་ཅལ་མངའ་ཁུལ་དུ་ཕེབས་སྐབས། སྐབས་དེའི་མངའ་སྡེ་བློན་ཆེན་༧གོང་ས་ཏཱ་ལའི་བླ་མར་མཇལ་འཕྲད་གནང་ཡོད་པ་དང་། ཐེངས་འདིར་ཨཱ་རུ་ན་ཅལ་མངའ་སྡེའི་བློན་ཆེན་མཆོག་དང་རྒྱ་གར་ནང་སྲིད་བློན་ཆེན་གཞོན་པ་སྐུ་ཞབས་ཀེ་རིན་རེ་རྗེ་རྗུ་གཉིས་ལྷན་དུ་༧གོང་ས་ཏཱ་ལའི་བླ་མ་མཆོག་ལ་མཇལ་འཕྲད་ཞུ་འཆར་ཡོད་སྟབས། རྒྱ་ནག་གཞུང་གིས་ཐེངས་འདིའི་༧ཏཱ་ལའི་བླ་མའི་ཆིབས་སྒྱུར་དེ་རྒྱ་གར་གཞུང་གིས་ཆེད་དུ་གོ་སྒྲིག་བྱས་པ་ཞིག་ལ་མཐོང་ངེས་རེད།

ཉེ་ལམ་རྒྱ་ནག་གིས་རྒྱ་གར་རྒྱལ་སྤྱིའི་རྡུལ་ཕྲན་ཚོང་གཉེར་སྔོན་འགོག་ཚོགས་པའི་ (NSG) ཁོངས་སུ་ཞུགས་རྒྱུར་འགོག་རྐྱེན་བཟོས་ཡོད་སྟབས་ལྡི་ལི་གཞུང་ལ་ཕོག་ཐུག་ཆེན་པོ་བཏང་ཡོད། རྒྱ་གར་གཞུང་གིས་པ་ཀི་སི་ཐན་གྱི་དྲག་ཆས་དམག་དཔུང་མཉམ་འབྲེལ་རྒྱལ་ཚོགས་བདེ་འཇགས་ལྷན་ཁང་གི་ཐོ་གཞུང་ནག་པོའི་ནང་བཞག་སྟེ་བཀག་སྡོམ་བྱེད་དགོས་པའི་རེ་འདུན་བཏོན་པ་དེར་པེ་ཅིན་གཞུང་གིས་འགོག་རྐྱེན་བྱས་ཡོད་ལ། སྐབས་དེར་རྒྱ་གར་གཞུང་གིས་ཀྱང་པེ་ཅིན་གཞུང་གི་འགོག་རྐྱེན་དེར་སྐྱོན་བརྗོད་བྱས་ཡོད།

ཨོ་སི་ཊིར་ལེ་ཡའི་རྒྱལ་ཡོངས་གཙུག་ལག་སློབ་ཆེན་གྱི་རྒྱལ་ཡོངས་བདེ་སྲུང་ཚན་པའི་འགན་འཛིན་སྐུ་ཞབས་མི་ཌ་ཁལ་ཧྥི་(Rory Medcalf) ལགས་ཀྱིས། སྲིད་བློན་མོ་ཌེ་ཡིས་རྒྱ་གར་གྱི་སྲིད་དབང་བཟུང་སྟེ་རྒྱ་གར་གྱི་བདེ་སྲུང་དམ་འཛིན་བྱས་པ་ནས་བཟུང་། རྒྱ་ནག་གི་མཁྲེགས་འཛིན་སྲིད་ཇུས་ཀྱིས་ལྡི་ལི་གཞུང་ཧ་ལས་སུ་བཅུག་ཡོད་སྐོར་བརྗོད་འདུག སྐུ་ཞབས་མི་ཌ་ཁལ་ཧྥིས་བརྗོད་དོན། “རྒྱ་གར་གཞུང་གིས་ཆབ་སྲིད་ཤོ་རྡེའུ་མང་བོ་ཕྱོགས་གཅིག་ཏུ་སྤུངས་ཏེ་ཉར་ཚགས་དང་བེད་སྤྱོད་ལ་དམིགས་ཡོད། ༧ཏཱ་ལའི་བླ་མ་དང་བཙན་བྱོལ་སྤྱི་ཚོགས་གཉིས་ཤོ་རྡེའུ་དེ་དག་ཁྲོད་ཀྱི་གཅིག་རེད” ཅེས་བརྗོད་ཡོད་སྐོར་སོགས་བཀོད་འདུག

གསར་འགོད་པ། པདྨ་རྒྱལ།