ཁྱེད་བཟའ་ཚོ་གཉིས་ཀྱིས་ཧུར་ཐག་རྦད་ཐག་གནང་བར་ཐུགས་རྗེ་ཆེ་ཞུ་རྒྱུ་ཡིན།

ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་ད་ལྟ་ལས་བྱེད་དང་སློབ་ཕྲུག་ཁྱོན་ ༤༨༤ ཙམ་ཡོད་པ་དང་ད་ཆར་རོབ་རྩིས་བྱས་ན་ལོ་རེའི་ཡོང་འབབ་ཧིན་སྒོར་ས་ཡ་ ༡༢༠.༣༨ དང་འགྲོ་སོང་སྒོར་ས་ཡ་ ༡༡༦.༤༦ ཡིན་འདུག

ཟླ་འདིའི་ཕྱི་ཚེས་ ༩ ཉིན། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དབུ་བརྙེས་ཏེ་ལོ་ངོ་ ༢༡ འཁོར་བ་དང་། རྒྱལ་བའི་འཁྲུངས་རབས་ཀྱི་ཞལ་ཐང་ཉེར་ལྔ་གསར་བཞེངས་ལེགས་འགྲུབ་བྱུང་བའི་མཛད་སྒོ་ཞིག་ཚོགས་ཡོད་པ་དང་། མཛད་སྒོའི་ཐོག་༧གོང་ས་མཆོག་དབུ་བཞུགས་ཐོག་མཁན་བླ་དགེ་འདུན་པ་རྣམ་པ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཞོན་གྱི་གཙོས་སྤྱི་འཐུས་རྒྱུན་ལས་རྣམ་པ། གཞན། ཕྱོགས་ཡོང་སྐུ་མགྲོན་རྣམ་པ་དང་། གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ། ནོར་གླིང་རིག་གཞུང་གཅེས་སྐྱོང་ཁང་གི་ངེས་སྟོན་པ་བཀའ་ཟུར་སྐལ་བཟང་ཡེ་ཤེས་མཆོག་གི་གཙོས་མགོ་ལས་སློབ་ཕྲུག ནོར་གླིང་ཁུལ་དུ་གནས་སྡོད་མི་མང་བཅས་འཛོམས་འདུག

མཛད་སྒོའི་སྟེང་སྲིད་སྐྱོང་བློ་བཟང་སེང་གེ་མཆོག་ནས་རིག་གཞུང་གཅེས་སྐྱོང་ཁང་ནས་དཔར་སྐྲུན་ཐོག་མ་ཞུས་པའི་གངས་ཅན་ཤེས་རིག་བང་མཛོད་དེབ་ཕྲེང་ ༡༡ ཅན་ཞིག་དབུ་འབྱེད་གནང་རྗེས། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་ནོར་གླིང་འགན་འཛིན་ལྷན་ཚོགས་དེབ་སྐྱེལ་གནང་སྟེ་མི་ལོ་ ༢༠ རིང་ཚོགས་མི་གནང་བ་དང་། བཀའ་ཟུར་སྐལ་བཟང་ཡེ་ཤེས་མཆོག་གི་སྐུ་ཟླ་ཀེམ་ཡེ་ཤེས་ཀྱིས་ ༢༠༠༨ ལོའི་བར་སྤྱི་ཁྱབ་འཛིན་སྐྱོང་འགན་འཛིན་གནང་བ་དང་ལྷན་ཚོགས་ཀྱི་ཚོགས་མི་གནང་མུས་བཅས་ལ་༧གོང་ས་མཆོག་གི་ཕྱག་ནས་ཐུགས་རྗེ་ལེགས་འབུལ་གྱི་གཟེངས་རྟགས་གནང་བ། ནོར་གླིང་མཐོ་སློབ་སྐབས་དང་པོ་ནས་དྲུག་པའི་བར་གྱི་སློབ་ཟུར་ཐུན་མོང་ནས་བཀའ་ཟུར་སྐལ་བཟང་ཡེ་ཤེས་མཆོག་དང་སྐུ་ཟླ་ཀེམ་ཡེ་ཤེས་ལགས་རྣམ་གཉིས་ལ་ཐུགས་རྗེ་ཆེ་ཞུའི་གཟེངས་རྟགས་ཤིག་དང་། བཀའ་ཟུར་སྐལ་བཟང་ཡེ་ཤེས་མཆོག་ནས་བོད་ཀྱི་རིག་གཞུང་འཛིན་སྐྱོང་སྤེལ་གསུམ་ཐད་ཞབས་འདེགས་རླབས་ཆེན་སྒྲུབ་པ་དང་། ལྷག་པར་ནོར་གླིང་མི་མང་ཡོངས་ལ་གཟིགས་སྐྱོང་གནང་མུས་ལ་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་བཀའ་རྒྱུད་དོན་འགྲུབ་མཆོག་ནས་ཐུགས་རྗེ་ཆེ་ཞུའི་གཟེངས་རྟགས་བཅས་ཕུལ་སོང་། གཞན། རིག་གཞུང་གཅེས་སྐྱོང་ཁང་ནས་ཞབས་ལོ་ ༡༠ དང་ ༢༠ འཁོར་བའི་ལས་བྱེད་རྣམས་ལ་གཟེངས་བསྟོད་ཕྱག་འཁྱེར་དང་། ནོར་གླིང་མཐོ་སློབ་ཀྱི་སྐབས་དྲུག་པའི་སློབ་ཕྲུག་རྣམས་ལ་བསླབ་པ་མཐར་སོན་པའི་ལག་འཁྱེར་བཅས་གནང་སོང་།

ངེས་སྟོན་པ་བཀའ་ཟུར་སྐལ་བཟང་ཡེ་ཤེས་མཆོག་ནས་མཛད་སྒོ་དང་འབྲེལ་བའི་གསུང་བཤད་གནང་སྐབས། དེང་སྐབས་ཅོལ་ཆུང་འགས་མགོན་པོ་གང་གི་ཐུགས་སྐྱེད་དང་འགལ་བའི་བསོད་དམན་གྱི་གླེང་སྒྲ་སྒྲོག་བཞིན་ཡོད་པའང་ཀུན་གསལ་དང་། དེ་ལ་འདིར་རྩལ་འདོན་གྱིས་བརྗོད་རྒྱུར་ཚུལ་མིན་ལོག་སྒྲུབ་བྱེད་པོ་དག་གིས་གླེང་གཏམ་བསྒྲགས་ཐུབ་པའི་གོ་སྐབས་ཐོབ་པ་འདི་སུའི་དྲིན་ལས་བྱུང་བ་ཤེས་ཚོར་དགོས་པ་གལ་ཆེའི་ཁར། བོད་ཀྱི་སྤྱི་ཚོགས་ནང་ཀླད་མེད་ཀྱིས་གཏམ་འཆལ་སྤེལ་བར་སྤྱི་ལ་སྨན་པའི་དགོས་གལ་མེད་པའི་ཚུལ་བསམ་ཤེས་བྱེད་ཤེས་པ་ཞིག་དགོས། ཞེས་དང་། ཐེངས་འདིར་ནོར་གླིང་གིས་༧རྒྱལ་བའི་འཁྲུངས་རབས་ཞལ་ཐང་ ༢༥ ཙམ་བཞེངས་སྐྲུན་བྱས་པ་འདི་ལྟ་བུའི་སྒྱུ་རྩལ་གྱི་མངོན་པར་ཕྱུག་པ་ཞིག་བོད་ཕྱི་ནང་གཉིས་སུ་མེད་པ་དང་། སྤྱིར་ནོར་གླིང་ལ་ལས་དོན་མང་པོ་ཡོད་པ་ལས། དེ་དག་གི་ཁྲོད་ནས་འདི་གའི་མགོ་མང་ཡོངས་ཀྱི་སྙིང་གི་དུམ་བུ་ལྟར་ཤིན་ཏུ་གཙིགས་སུ་བྱེད་པ་ནི་རྒྱལ་བའི་འཁྲུངས་རབས་བཞེངས་བསྐྲུན་ཞུ་རྒྱུ་དང་མཛད་རྣམ་གཉིས་ཡིན་སྐོར་སོགས་གསུངས་སོང་།

མཛད་སྒོའི་ཐོག་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་སྤྱི་ཁྱབ་འགན་འཛིན་བདེ་ཆེན་རྣམ་རྒྱལ་ལགས་ཀྱིས་འདས་པའི་ལོ་ངོ་ ༢༡ རིང་གི་ལས་བསྡོམས་མདོར་བསྡུས་སྙན་སྒྲོན་ཞུས་པ་ལྟར་ན། ཕྱི་ལོ་ ༡༩༩༥ ལོར་ལག་ཤེས་སྒྱུ་རྩལ་ཁྱབ་ཁོངས་སུ་སྡེ་ཚན་ ༤ ཆེད་འཛུགས་གནང་ཡོད་པ་དང་། རྟེན་བཞེངས་སྡེ་ཚན་ནང་སློབ་ཕྲུག་ ༣༣ ཙམ་སྐྱེད་སྲིང་གནང་བ་དང་། གསེར་ཟངས་ལས་གྲུབ་པ་སྐུ་བརྙན་ཆེ་ཆུང་ ༡༥༠༠ ཙམ་བཞེངས་བ་དང་། ལྷ་བྲིས་སྡེ་ཚན་ནང་སློབ་ཕྲུག་ ༨༠ ཙམ་སྐྱེད་སྲིང་དང་ལྷ་སྐུའི་ཞལ་ཐང་གྲངས་ ༡༧༠༠ གསར་བཞེངས། གོས་ཐང་སྡེ་ཚན་གྱིས་ལྷ་སྐུ་ ༡༢༠༠ ལྷག་བཞེངས་བ། ཤིང་བརྐོས་སྡེ་ཚན་ནང་སློབ་ཕྲུག་ ༥༥ སྐྱེད་སྲིང་དང་། ཤིང་བརྐོས་ཐོན་རྫས་གྲངས་ ༢༢༠༠ ལྷག་བཟོས་ཡོད་འདུག

ཤེས་ཡོན་དང་རིག་གཞུང་ཁྱབ་ཁོངས་དྲུག་ཡོད་པ་དང་། ཕྱི་ལོ་ ༢༠༠༠ ལོར་ནོར་གླིང་མཛད་རྣམ་སྡེ་ཚན་བཙུགས་ཏེ། ད་ལྟའི་བར་རྩོམ་སྒྲིག་པ་ ༢༢ ལྷག་གིས་ད་བར་༼མཛད་རྣམ་རྒྱ་ཆེན་སྙིང་རྗེའི་རོལ་མཚོ།༽ཞེས་པ་གླེགས་བམ་ ༡༤ དཔར་འགྲེམས་ཞུས་ཡོད་པ་དང་། ཕྱི་ལོ་ ༡༩༩༧ ལོར་རིག་གཞུང་ཞིབ་འཇུག་སྡེ་ཚན་བཙུགས་ཏེ་ད་བར་རྩོམ་སྒྲིག་པ་ ༥༣ གྱིས་ཕྱག་ལས་གནང་བ་བརྒྱུད། ཟླ་རེའི་ཚགས་ཤོག་དང་ཕྱག་དེབ་ཁག་ ༡༥ ཙམ་དཔར་སྐྲུན་ཟིན་པ་མ་ཟད། གངས་ཅན་ཤེས་རིག་བང་མཛོད་ཅེས་པ་གླེགས་བམ་ ༡༡ དཔར་བསྐྲུན་གནང་སྟེ་མུ་མཐུད་གླེགས་བམ་ ༢༥ བར་འདོན་འཆར་ཡོད་པ། ཕྱི་ལོ་ ༡༩༩༣ ལོར་རིག་གནས་ཆེས་མཐོའི་སློབ་གྲྭ་བཙུགས་ཏེ་ད་བར་སློབ་མ་ ༡༥༤ བསླབ་པ་མཐར་ཕྱིན་ཡོད་འདུག ༡༩༩༣ ལོར་བྱིས་བཅོལ་ཁང་དང་སྔོན་འགྲོའི་སློབ་གྲྭ་བཙུགས་ཏེ། ད་ལྟ་སྔོན་འགྲོའི་ནང་སློབ་ཕྲུག་ ༨༤ དང་། དགེ་ལས་ ༢༠ ཡོད་པ་རེད།

སྤྱི་ཚོགས་བདེ་དོན་ཁྱབ་ཁོངས་སུ་ནོར་གླིང་བདེ་ལྡན་གཙུག་ལག་ཁང་དང་ནོར་གླིང་འཕྲོད་བསྟེན་སྨན་ཁང་། ནོར་གླིང་ལས་སློབ་གསོལ་ཐབ་ཁང་བཅས་གསུམ་ཡོད་པ་དང་། དཔལ་འབྱོར་འདུ་འགོད་ཁྱབ་ཁོངས་སུ་ཐོན་སྐྱེད་ཇུས་འགོད་སྡེ་ཚན་དང་ལག་འཚེམ་སྡེ་ཚན། འཁོར་འཚེམ་སྡེ་ཚན། ཤིང་བཟོ་སྡེ་ཚན། ཤིང་ཚོན་སྡེ་ཚན། འཐག་ལས་སྡེ་ཚན། རས་ཚོན་སྡེ་ཚན། ཐོན་རྫས་དཔར་ཁང་སྡེ་ཚན། རྡུང་ཚགས་སྡེ་ཚན། ཆོས་ནོར་མགྲོན་ཁང་དང་ཟ་ཁང་། ནོར་གླིང་མགྲོན་ཁང་དང་ཟ་ཁང་། ནོར་གླིང་གསེར་སྐོང་མགྲོན་ཁང་དང་ཟ་ཁང་། ནོར་གླིང་ཐོན་སྐྱེད་སྒྱུ་རྩལ་ཚོང་ཁང་། ནོར་གླིང་ཐོན་སྐྱེད་སྒྱུ་རྩལ་ཕྱིར་ཚོང་སྡེ་ཚན་བཅས་སྡེ་ཚན་ ༡༤ ཡོད། འཛིན་སྐྱོང་ཁྱབ་ཁོངས་སུ་སྤྱི་ཁྱབ་འཛིན་སྐྱོང་ཡིག་ཚང་དང་སྤྱི་ཁྱབ་རྩིས་ཁང་དང་སྔོན་རྩིས་སྡེ་ཚན། ཐོན་སྐྱེད་འཛིན་སྐྱོང་སྡེ་ཚན། ཐོན་སྐྱེད་ཅ་དངོས་མཁོ་སྒྲུབ་སྡེ་ཚན། ཅ་དངོས་ཟོག་གཉེར་སྡེ་ཚན། ཚོང་འབྲེལ་སྡེ་ཚན། ཉམས་གསོ་དང་འཆར་འགོད་སྡེ་ཚན། འབྲེལ་མཐུད་དང་སྣེ་ཤན་སྡེ་ཚན་བཅས་སྡེ་ཚན་ ༨ ཡོད་ལ། ད་ལྟའི་ཆར་རིག་གཞུང་གཅེས་སྐྱོང་ཁང་ལ་ལས་བྱེད་དང་ལས་མི་ ༣༥༥ དང་། རིག་གནས་དང་ལག་ཤེས་སྒྱུ་རྩལ་སློབ་ཕྲུག་ ༤༤། བྱིས་པ་ ༨༤ བཅས་ཁྱོན་བསྡོམས་མི་གྲངས་ ༤༨༤ ཡོད། རོབ་རྩིས་བྱས་ན་ནོར་གླིང་རིག་གཞུང་གཅེས་སྐྱོང་གི་ད་ལྟའི་ལོ་རེའི་ཡོང་འབབ་ཧིན་སྒོར་ས་ཡ་ ༡༢༠.༣༨ དང་། ལོ་རེའི་འགྲོ་སོང་སྒོར་ས་ཡ་ ༡༡༦.༤༦། ཟླ་རེའི་ལས་བྱེད་དང་ལས་མིའི་གླ་ཕོགས་སྒོར་ས་ཡ་ ༥.༡༣ བཅས་ཟླ་རེའི་ཁྱོན་ཡོངས་ཀྱི་འགྲོ་སོང་ས་ཡ་ ༩.༧ ཡིན་འདུག

མཇུག་ཏུ་༧གོང་ས་མཆོག་གིས་བཀའ་སློབ་གནང་སྐབས། དེ་རིང་འདིར་བོད་ཀྱི་རིག་གཞུང་ཉམས་པ་སོར་ཆུད་དང་མི་ཉམས་གོང་སྤེལ་གྱི་ལས་དོན་མང་པོ་ཞིག་བྱེད་སྡོད་པའི་ཚོགས་པ་འདི་ལོ་ཉེར་གཅིག་འཁོར་བའི་དུས་དྲན་གནང་གི་ཡོད་པ་རེད། དང་པོ་དེ་ལ། དུས་ཡུན་འདིའི་རིང་སྐལ་བཟང་ཡེ་ཤེས་ལགས་ཁྱེད་རང་བཟའ་ཚོ་གཉིས་ལོ་ན་བརྒས་འགྲོ་བཞིན་ཡོད་ཀྱང་། ད་བར་ཧུར་ཐག་འབད་ཐག་གནང་སོང་། དེ་སྔ་གངས་ཅན་སྐྱིད་གཤོང་སྒྲིག་འཛུགས་ནང་དུའང་ལས་ཀ་ལོ་མང་པོར་བྱས་པ་རེད། ཧུར་ཐག་རྦད་ཐག་བྱས་སོང་། འདིར་གཤམ་འོག་གི་ལས་རིགས་སྡེ་ཚན་སོ་སོའི་ནང་དུ་འགན་འཁུར་མཁན་ཚོས་ཀྱང་ཧུར་ཐག་རྦད་ཐག་བྱས་པ་རེད། དེ་བཞིན། འདིར་སློབ་སྦྱོང་བྱེད་མཁན་ཚོས་ཀྱང་སེམས་ཤུགས་སྐྱེད་དེ་ཧུར་ཐག་བྱས་པ་རེད། ཁྱེད་རང་ཚོ་མགོ་ལས་འབྲེལ་ཡོད་ཚང་མར་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་གསུངས་སོང་།