ཕྱི་ལོ་ ༢༠༡༧ ཟླ་ ༤ ཚེས་ ༡ ཉིན་ཧོང་ཀོང་རང་དབང་གསར་ཁང་གིས་སྤེལ་བའི་གནས་ཚུལ།
གདོང་ལ་ཚོན་རྩི་དཀར་པོ་དང་སེར་པོ་འབྱུག་ཅིང་། སྐྲ་སླས་མ་རྣམས་ཕྲག་སྟེང་དུ་ཕྱུང་ཡོད་པའི་གྱོན་གསར་འགྲེམ་སྟོན་མ་ཞིག་གི་སྐུ་གཟུགས་སྐྱ་མདོག་གི་གྱོན་ཆས་ཤིག་གིས་བརྒྱན་ཏེ། གར་སྟེགས་སྟེང་ཡར་འགྲོ་མར་འགྲོ་བྱེད་བཞིན་པ་དེ་ནི། གཟི་ཉམས་ལྡན་པའི་བོད་པའི་སྣང་བརྙན་ཞིག་རྒྱ་ནག་གི་ཆབ་སྲིད་སྙིང་དབུས་ནས་བཞད་པ་མ་ཡིན་ནམ།
འདི་ནི་རྒྱ་ནག་རྒྱལ་ས་པེ་ཅིན་དུ་ལོ་རེར་ཐེངས་གཉིས་རེར་འཚོགས་བཞིན་པའི་གྱོན་གསར་འགྲན་བསྡུར་གར་སྟེགས་སྟེང་། ཆེས་ཐོག་མར་རྒྱ་ནག་གི་གྲངས་ཉུང་མི་རིགས་བོད་མི་ཞིག་གི་གསར་གཏོད་འཆར་འགོད་བསླེབས་ཡོད་པ་དང་། འདི་ནི་གྱོན་གསར་འགྲན་བསྡུར་ཚོགས་ཐེངས་ཉི་ཤུ་བ་དེ་རེད།
བོད་པའི་བུ་མོ་དེང་རབས་གྱོན་གསར་འཆར་འགོད་མ་ཁོང་ནི་རྒྱ་ནག་ལྷོ་ནུབ་ཀྱི་ཟི་ཁྲོན་ཞིང་ཆེན་དུ་འཚར་ལོངས་བྱུང་ཞིང་། ཁོ་མོའི་མིང་ལ་ཨ་ཅག་ན་མོ་ཞེས་འབོད་ཅིང་ས་ཁུལ་དེའི་ཡོངས་གྲགས་ཀྱི་གཞས་མ་ཞིག་ཀྱང་ཡིན་འདུག་པ་མ་ཟད། ཕྱི་སུ་ཁོ་མོས་གྱོན་ཆས་འཆར་འགོད་ཐོག་ཏུའང་སློབ་སྤྱོང་གནང་ཡོད་འདུག
དེང་སྐབས་ཁོང་མོར་པེ་ཅིན་དུ་མིང་གྲགས་ཡོད་པའི་ཨ་ཅག་ན་མོ་ཞེས་བའི་གྱོན་ཆས་བཟོ་གྲྭ་ཞིག་ཡོད་པ་དང་། ཁོ་མོ་ནམ་རྒྱུན་པེ་ཅིན་དུ་སྡོད་ཀྱིན་ཡོད་འདུག
ཐེངས་དེའི་གྱོན་གསར་འགྲན་ཚོགས་ཁང་དེ་ནི། རྒྱ་ནག་གི་ཆབ་སྲིད་སྙིང་དབུས་པེ་ཅིན་གནམ་སྡེ་སྒོ་མོ་ཆེའི་ཉེ་འགྲམ་དུ་ཡོད་པའི་མི་དམངས་ཚོགས་ཁང་ཆེན་མོའི་ནང་ཡིན་པ་དང་། འགྲན་སྟེགས་དེར་བོད་དང་རྒྱ་ནག་གི་འགྲེམ་སྟོན་མ་ཚོས་ཚོན་ཁྲ་སྣ་ཚོགས་ཀྱི་དེང་རབས་གྱོན་ཆས་འགྲན་བསྡུར་བྱས་པའི་སྟེང་། བོད་པའི་ཁྱད་ཆོས་ལྡན་པའི་ཨ་ཅག་ན་མོའི་གསར་གཏོད་བོད་ཆས་ལ་རྒྱལ་ཁ་ཐོབ་ཡོད།
སྐབས་དེར་ཨ་ཅག་ན་མོ་ལ་མཚོན་ན། ཟུར་དཔང་པ་ཚོས་ཁོ་མོའི་གསར་གཏོད་ལ་ངོས་ལེན་བྱས་པ་དེར་སེམས་འགུལ་ཆེན་པོ་ཐེབས་ཏེ་མི་དམངས་ལ་གུས་འདུད་ཞུས་ཡོད། ད་དུང་རྗེས་སུ་མི་མང་པོ་ཞིག་གར་སྟེགས་སྟེང་ཡོང་ནས་ཁོ་མོའི་སྐེ་ལ་བོད་པའི་སྲོལ་རྒྱུན་གྱི་ཁ་བཏགས་བསྒྲོན་ཏེ་རྟེན་འབྲེལ་ཞུས་ཡོད།
ཨ་ཅག་ན་མོ་ལགས་སུ་རྒྱལ་ཁ་ཐོབ་རྗེས་ཕྱི་ཚེས་ ༣༠ ཉིན་འདི་ག་ཧོང་ཀོང་རང་དབང་གསར་ཁང་ལ་ “བོད་མིའི་ཁྲོད་ཕུལ་བྱུང་གི་འཆར་འགོད་པ་མང་པོ་ཡོད་ཀྱང་། ཁོ་ཚོར་འགྲེམ་སྟོན་གྱི་གར་སྟེགས་དང་གོ་སྐབས་རག་གི་ཡོད་པ་མ་རེད།”ཅེས་བརྗོད་བྱུང་།
ད་ལྟའི་ཀྲུང་གོའི་འོག་ཏུ་གྲངས་ཉུང་མི་རིགས་ ༥༦ ཡོད་ཀྱང་། མི་འབོར་མང་ཤོས་ཧན་མི་རིགས་ཆགས་ཏེ། ད་ལྟ་རྒྱ་ནག་ཁྱོན་ཡོངས་ཀྱི་མི་འབོར་ཐེར་འབུམ་ ༡་༣ ལྷག་ཧན་མི་རིགས་ཡིན།
བོད་རིགས་ཀྱི་མི་འབོར་རོབ་རྩིས་བྱས་ན་ཕལ་ཆེ་ས་ཡ་ ༦་༣ ཙམ་ཡོད་པ་དང་། ཁོ་ཚོ་མང་ཆེ་བ་རྒྱ་ནག་གི་ནུབ་ཕྱོགས་བོད་རང་སྐྱོང་ལྗོངས་དང་ཀན་སུའུ། མཚོ་སྔོན། ཟི་ཁྲོན། ཡུན་ནན་སོགས་ཀྱི་ཞིང་ཆེན་ཁག་ནང་ཡོད།
རྒྱ་ནག་གི་གྲངས་ཉུང་མི་རིགས་མང་ཆེ་བ་ཡུལ་མཐའ་འཁོབ་དང་ས་ཆ་ཁུག་ཀྱོག་དག་ཏུ་གནས་ཡོད་པ་དང་། རྒྱ་ནག་གཞུང་གིས་གྲངས་ཉུང་མི་རིགས་ཀྱི་སྐད་ཡིག་ཐོག་དམ་དྲག་དང་སློབ་གསོར་ཚད་བཀག་བཟོ་བཞིན་ཡོད་པ་མ་ཟད། ཁོ་ཚོའི་ན་གཞོན་མང་ཆེ་བས་ཞིང་ལས་དང་ཚོང་ལས་ཙག་ཙིག་བྱས་ཏེ་མི་ཚེ་སྐྱེལ་བཞིན་ཡོད།
ཨ་ཅག་ན་མོས། “ངའི་རེ་བར་ཐེངས་འདིའི་ང་རང་གི་ལེགས་འགྲུབ་འདི་བརྒྱུད་དེ་བོད་རིགས་སྤུན་ཟླ་ཚོ་གཙོས་བྱས་ཏེ་གྲངས་ཉུང་མི་རིགས་ཁག་དང་། དམིགས་བསལ་གྱིས་གྱོན་གསར་འགྲེམ་སྟོན་པ་ཚོར་སེམས་ཤུགས་སྤར་ཐུབ་པའི་རེ་བ་ཡོད།”ཅེས་བརྗོད་ཡོད།
བོད་པའི་ཐུན་མོང་མ་ཡིན་པའི་སྲོལ་རྒྱུན་མང་པོ་ཞིག་རྒྱ་ནག་ནང་དར་ཁྱབ་ཆེན་པོ་ཆགས་ཀྱིན་ཡོད་སྟབས། རྒྱ་ནག་གཞུང་གིས་ ༡༩༥༡ ལོར་ནས་བཟུང་བོད་ཞི་བའི་བཅིང་གྲོལ་བཏང་ཡོད་ཟེར། འོན་ཀྱང་། བོད་མི་ཚོས་རྒྱ་ནག་གཞུང་གིས་ཆོས་ལུགས་རང་དབང་བཀག་སྡོམ་དང་རིག་གཞུང་རྩ་གཏོར་བྱེད་ཀྱིན་འདུག་ཅེས་སྐྱོན་བརྗོད་བྱེད་ཀྱིན་ཡོད།
བོད་ཀྱི་དབུ་ཁྲིད་༧གོང་ས་ཏཱ་ལའི་བླ་མ་མཆོག་ ༡༩༥༩ ལོ་ནས་རྒྱ་གར་ནང་སྐྱབས་བཅོལ་དུ་བཞུགས་ཡོད་པ་མ་ཟད། ཁོང་གིས་དུས་རྒྱུན་རྒྱ་ནག་གཞུང་གིས་བོད་མིའི་ཆོས་དང་རིག་གཞུང་། མངོན་འདོད་སོགས་ལ་རྩ་གཏོར་གཏོང་གི་འདུག་ཅེས་སྐྱོན་བརྗོད་གནང་གི་ཡོད།
