མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

བཙན་བྱོལ་བོད་མིའི་ཆོས་ཚོགས་ཐེངས་ ༡༤ པ་དབུ་འཛུགས་གནང་།

བོད་ཀྱི་དུས་བབ།
༢༠༡༩/༡༡/༢༧
Share on FacebookShare on TwitterShare on EmailShare on Whatsapp

བཙན་བྱོལ་བོད་མིའི་ཆོས་ཚོགས་ཐེངས་ ༡༤ པ་དབུ་འཛུགས་གནང་བ་དང་སྦྲགས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཐད་དམིགས་བསལ་གྲོས་ཆོད་དོན་ཚན་གསུམ་གཏན་འབེབས་གནང་སོང་།དེ་རིང་ཕྱི་ཚེས་ ༢༧ ནས་ ༢༩ བར་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག དྷ་རམ་ས་ལའི་གངས་ཅན་སྐྱིད་གཤོངས་ཀྱི་བོད་ཐོག་ཁང་ཆེན་མོའི་ཚོགས་ཁང་ནང་བཙན་བྱོལ་བོད་མིའི་ཆོས་ཚོགས་ཐེངས་ ༡༤ པ་འཚོགས་བཞིན་ཡོད་ལ། ཐེངས་འདིའི་ཚོགས་ཆེན་ཐོག་༧སྐྱབས་མགོན་ས་སྐྱ་༧གོང་མ་ཁྲི་འཛིན་རིན་པོ་ཆེདང་། ༧སྐྱབས་རྗེ་དགའ་ལྡན་ཁྲི་རིན་པོ་ཆེ། ༧སྐྱབས་རྗེ་སྨན་རི་ཁྲི་འཛིན་རིན་པོ་ཆེ། ༧སྐྱབས་མགོན་འབྲི་གུང་ཆེ་ཚང་རིན་པོ་ཆེ། ༧རྒྱལ་དབང་ཀརྨ་པ་རིན་པོ་ཆེའི་སྐུ་ཚབ་༧སྐྱབས་རྗེ་མཚུར་ཕུ་རྒྱལ་ཚབ་གཽ་ཤྲཱི་རིན་པོ་ཆེ། ༧སྔ་འགྱུར་རྙིང་མའི་སྐུ་ཚབ་སྤྲུལ་སྐུ་ཆོས་དར་རིན་པོ་ཆེ། ༧སྐྱབས་མགོན་འབྲུག་རིན་པོ་ཆེའི་སྐུ་ཚབ་མཁན་པོ་ངེས་དོན་བསྟན་འཛིན་རིན་པོ་ཆེ། ༧སྐྱབས་རྗེ་སྟག་ལུང་ཞབས་དྲུང་རིན་པོ་ཆེའི་སྐུ་ཚབ་༧སྐྱབས་རྗེ་སྟག་ལུང་མ་སྤྲུལ་རིན་པོ་ཆེ། དེ་བཞིན། ༧སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་བཅས་ཀྱི་དབུས་པའི་སྔ་འགྱུར་རྙིང་མའི་བླ་སྤྲུལ་དང་དགོན་པའི་སྐུ་ཚབ་ ༢༦ དང་། བཀའ་བརྒྱུད་ཀྱི་བླ་སྤྲུལ་དང་སྐུ་ཚབ་ ༢༤། ས་སྐྱའི་བླ་སྤྲུལ་དང་སྐུ་ཚབ་ ༢༢ ། དགེ་ལུགས་ཀྱི་བླ་སྤྲུལ་དང་སྐུ་ཚབ་ ༣༠ ། གཡུ་དྲུང་བོན་གྱི་བླ་སྤྲུལ་དང་སྐུ་ཚབ་ ༡༡ ། དེ་བཞིན།  ཇོ་ནང་པའི་བླ་སྤྲུལ་དང་སྐུ་ཚབ་ ༤ །  བོ་དོང་དང་བོ་ལུགས། གཞིས་བྱེས་བཅས་བླ་སྤྲུལ་དང་སྐུ་ཚབ་རེ་རེ་བཅས་མི་གྲངས་ ༣ ། རིས་མེད་དགོན་སྡེའི་སྐུ་ཚབ་ ༡ ། བཙུན་དགོན་ཁག་ ༡༢ ནས་སྐུ་ཚབ་བཙུན་མ་ ༡༦ ། ཧི་མ་ལ་ཡའི་རི་བརྒྱུད་ཀྱི་བླ་སྤྲུལ་དང་སྐུ་ཚབ་ ༡༢། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གི་དབུས་པའི་བཀའ་བློན་རྣམ་པ་དང་། མཛད་གཙོ་རྣམ་པ་སོགས་གདན་ཞུའི་མི་གྲངས་ ༡༦༧ ཡོད་པ་ལས། དངོས་སུ་ཚོགས་བཅར་གནང་མཁན་གྲངས་ ༡༡༧ བྱུང་འདུག་ལ། ཚོགས་ཆེན་དབུ་འཛུགས་ཐོག་ཆོས་བརྒྱུད་ཁག་གི་དབུ་བླ་རྣམ་པས་རིམ་བཞིན་གསུང་བཤད་གནང་རྗེས་གྲོས་གཞི་གྲོས་འཆར་ཁག་གི་ཐོག་བཀའ་སྡུར་གནང་བཞིན་ཡོད་པ་རེད།

ཆོས་ཚོགས་ཀྱི་བྱུང་རིམ་སྐོར་ལ་ཆོས་རིག་བཀའ་བློན་ཀརྨ་དགེ་ལེགས་མཆོག་གིས། ཆོས་ཚོགས་ཀྱི་གྲངས་བཤེར་ཐད་ལ་གསལ་བཤད་བསྡུས་ཙམ་ཞིག་ཞུ་དགོས་པ་ཆགས་འདུག འདས་པའི་ཆོས་ཚོགས་རྣམས་ཀྱི་ནང་ལ་བཞུགས་མོལ་ཚོགས་འདུ་དང་ཚོགས་འདུ་ཧྲག་བསྡུས། རྒྱས་འཛོམས། ཚོགས་ཆེན། དམིགས་བསལ་ལྷན་ཚོགས་བཅས་བྱུང་འདུག་པ་ནས། ཕྱི་ལོ་ ༢༠༠༨ ལོར་ཉིན་གྲངས་ ༢ རིང་དབུ་འཁྲིད་བླ་ཆེན་དང་སྐུ་ཚབ་རྣམ་པ་ ༡༢ ལྷན་འཛོམས་ཀྱིས་དམིགས་བསལ་ལྷན་འཛོམས་གལ་ཆེན་ཞིག་བསྐྱངས་འདུག་པ་དེ། ཆོས་ཚོགས་ཀྱི་སྤྱི་འགྲོས་གྲངས་འབོར་དུ་མི་རྩིས་པར་ཟུར་དུ་བཞག་གནང་འདུག་ཀྱང་། ལྷན་ཚོགས་དེའི་དགོངས་དོན་དང་ཚོགས་མི་། གྲོས་གཞི་བཅས་གང་ས་ཅི་ཐད་ནས་ཆོས་ཚོགས་གལ་གནད་ཅན་ཞིག་ཏུ་གྱུར་འདུག་པས། ཆོས་ཚོགས་སྤྱི་འགྲོས་གྲངས་འབོར་ནང་འཇུག་འོས་མཐོང་བ་ལྟར་བཅུག་པར་བརྟེན། ད་ལྟའི་ཆོས་ཚོགས་འདི་ཆོས་ཚོགས་ཐེངས་བཅུ་བཞི་པ་ཆགས་པ་རེད། དེ་བཞིན། ད་ལན་ཆོས་ཚོགས་ཀྱི་མཚན་བྱང་ལ་འགྱུར་བ་ཕྲན་བུ་ཞིག་གཏོང་དགོས་བྱུང་སོང་།  དེར་གཙོ་བོ་དེང་སང་གི་འགྲོ་ལུགས་སྤྱི་དང་འབྲེལ་བའི་རྒྱུ་མཚན་གནད་འགག་གཉིས་ཡོད། ཆོས་ཚོགས་སྔ་མ་ཁག་ཅིག་གི་བརྗོད་ཚིག་ལྟར། བོད་ཀྱི་ཆོས་ལུགས་དང་ཆོས་བརྒྱུད་ཅེས་བཀོད་ཚེ། བོད་ནས་ཚོགས་མི་གདན་ཞུ་བྱ་དཀའ་བས་ཅུང་ཟད་ཁྱབ་ཆེ་བའི་སྐྱོན་ཡོད་པ་ལྟ་བུ་དང་། ཡང་ཆོས་ཚོགས་ཐེངས་བརྒྱད་པ་མན་ཆད་ཀྱི་བརྗོད་ཚིག་ལྟར། བོད་ཀྱི་ཆོས་བརྒྱུད་ཆེན་པོ་བཞི་དང་གཡུ་དྲུང་བོན་བཅས་ཀྱི་ཆོས་ཚོགས་ཅེས་བཀོད་ཚེ། གོང་གི་ཁྱབ་ཆེ་བའི་སྐྱོན་ཡོད་པའི་སྒང་ལ་ཆོས་ལུགས་གཞན་ཁག་ཅིག་ལ་མི་ཁྱབ་པའི་དཀའ་ངལ་ཡོད་པ་ལ་བརྟེན་ནས། བཙན་བྱོལ་བོད་མིའི་ཆོས་ཚོགས་ཞེས་བཀོད་ན། སྐྱོན་ཆ་དེ་གཉིས་ཡོང་གཞི་ཆུང་བའི་སྒང་ལ་རང་རེའི་དངོས་ཡོད་གནས་སྟངས་དང་འཚམས་པའི་མཚན་བྱང་བསྒྱུར་བཀོད་ཞུ་དགོས་བྱུང་བ་ཞིག་ཡིན།  ཞེས་སོགས་གསུངས་སོང་།མཛད་སྒོའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་ཆོས་ཚོགས་དང་འབྲེལ་ནས་གསུང་བཤད་གནང་སྐབས། ཉེ་ཆར་ང་ཚོས་དམིགས་བསལ་ཚོགས་ཆེན་ཚོགས་ཏེ། གྲོས་ཆོད་ནང་སྤྱན་རས་གཟིགས་དང་བོད་བྲལ་ཐབས་མེད་པ་དང་། དེ་བཞིན། ༧རྒྱལ་དབང་སྐུ་ཕྲེང་རིམ་བྱོན་དང་བོད་མིའི་དབར་གྱི་འབྲེལ་བ་བྲལ་ཐབས་མེད་པ་རེད། དེར་བརྟེན། སྐུ་ཕྲེང་རིམ་བྱོན་ཕེབས་དགོས་ཀྱི་འདུག་ཅེས་གསོལ་བ་ཕུར་ཚུགས་སུ་བཏབས་པའི་གྲོས་ཆོད་བཞག་ཡོད་པ་རེད། གྲོས་ཆོད་དེ་ལོ་རྒྱུས་དང་རྩ་དོན་གང་གི་ཐོག་ནས་ཡིན་ཡང་ཧ་ཅང་གལ་ཆེན་པོ་ཆགས་ཀྱི་འདུག གཞི་རྩའི་འདིར་ཕེབས་མཁན་ཚང་མའི་མཁྱེན་གསལ་ལྟར། ཕྱི་ལོ་ ༢༠༠༧ ལོར་རྒྱ་ནག་གཞུང་གིས་ཡིག་ཆ་ ༥ བ་ཞེས་པ་གསལ་བསྒྲགས་བྱས་ཏེ། བླ་སྤྲུལ་ངོས་འཛིན་བྱེད་སྟངས་ཐོག་ལམ་སྟོན་བྱས་པ་ཙམ་མ་ཟད་ལག་བསྟར་བྱས་པ་རེད། སྤྱིར་བཏང་ལོ་རྒྱུས་དང་སྲོལ་རྒྱུན་ལྡན་པ་བྱས་པ་ཡིན་ན། བླ་སྤྲུལ་ངོས་འཛིན་བྱེད་སྟངས་དེ། བླ་སྤྲུལ་དང་དགོན་སྡེ་ཁག་རང་གིས་བྱེད་ཀྱི་ཡོད་པ་རེད། འོན་ཀྱང་། ཐབས་ཇུས་ངན་པ་བཏིང་སྟེ་བླ་སྤྲུལ་གྱི་ཡང་སྲིད་ངོས་འཛིན་གྱི་མཐའ་མའི་ཐག་གཅོད་གུང་ཁྲན་ཏང་གིས་བྱེད་རྒྱུ་ཡིན་ཟེར་གྱི་ཡོད་པ་ནང་བཞིན། ཕྱི་ལོ་ ༢༠༠༧ ནས་བཟུང་དང་པོ་བླ་སྤྲུལ་ ༣༠༠ ངོས་འཛིན་བྱས་པ་ཡིན་ལབ་ཡོད། རྗེས་སུ་ཕྱི་ལོ་ ༢༠༡༦ ལོར་རྒྱ་ནག་གིས་བླ་སྤྲུལ་ ༨༠༠ ངོས་འཛིན་བྱས་ཡོད། དེ་བཞིན། ཉེ་བའི་ཆར་གོ་ཐོས་བྱུང་བ་ལྟར་ན། བླ་སྤྲུལ་ ༡༣༠༠ ངོས་འཛིན་བྱས་ཡོད་ལབ་ནས་འགྲོ་བསྡད་ཡོད་པ་རེད། རྒྱ་ནག་གི་བྱེད་སྟངས་དེ་ལོ་རྒྱུས་དང་འགལ་ཟླ་ཆགས་ཀྱི་ཡོད་པ་མ་ཟད། རྒྱལ་སྤྱིའི་ཁྲིམས་ཐོག་ནས་ཀྱང་འགལ་ཟླ་ཆགས་ཡོད་ལ། ཆོས་ཕྱོགས་ཀྱི་ཐོག་ནས་ཀྱང་མི་འགྲིག་པའི་ཇུས་ངན་འཐེན་ནས་ལག་བསྟར་བྱས་ནས་འགྲོ་ཡི་ཡོད། ཆོས་དད་རང་དབང་ཐོག་ནས་ཀྱང་ང་ཚོའི་སྲོལ་རྒྱུན་གྱི་འགྲོ་སྟངས་ཆོས་དད་རང་དབང་ལ་རྡོག་རོལ་གཏོང་གི་ཡོད་པ་རེད། ང་ཚོས་བླ་སྤྲུལ་ངོས་འཛིན་བྱེད་སྟངས་དེ་བོད་ཀྱི་ཐུན་མོང་མ་ཡིན་པའི་ལམ་ལུགས་ཤིག་ཆགས་བསྡད་ཡོད་སྟབས། དེའི་བདག་དབང་དང་འགན་ཆ་ཚང་བོད་པའི་ནང་བསྟན་ཆོས་བརྒྱུད་རང་ལ་ཡོད་པ་རེད། བླ་སྤྲུལ་ངོས་འཛིན་བྱེད་སྟངས་དེ་བླ་སྤྲུལ་དང་དགོན་སྡེ་ཁག་རང་ནས་ངོས་འཛིན་བྱས་ནས་འགྲོ་དགོས་རེད་མ་གཏོགས་འགྲིག་གི་མ་རེད་ཅེས་དམིགས་བསལ་ཚོགས་ཆེན་ཐོག་ནས་བརྡ་ལན་གཏོང་དགོས་ཀྱི་ཡོད་པ་རེད་ལ། བརྡ་ལན་ཡང་བཏང་ཡོད་པ་རེད་ཅེས་ཞུ་རྒྱུ་ཡིན། ཞེས་གསུངས་སོང་།

ཡང་ནང་པ་སངས་རྒྱས་པའི་ཆོས་དེ་འཛམ་གླིང་ནང་དར་ཁྱབ་འབྱུང་བཞིན་ཡོད་སྐོར་ལ་ཁོང་གིས། འཛམ་གླིང་ཡོངས་ནང་ནང་པ་སངས་རྒྱས་པའི་ཆོས་དར་འཕེལ་བྱུང་སྟེ། རླབས་ཆེན་གྱི་མཛད་འཕྲིན་ཆགས་བསྡད་ཡོད་པ་རེད། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ནང་བང་མཛོད་ནས་འགྲོ་གྲོན་གཏོང་དགོས་ས་ཆུང་ཤོས་དེ་ཆོས་རིག་ལས་ཁུངས་ཆགས་བསྡད་ཡོད། དེ་གང་ཡིན་ཟེར་ན། ང་ཚོའི་དགོན་སྡེ་ཁག་གིས་སྐུ་ལས་ཧ་ཅང་བསྐྱོན་ཏེ། སོ་སོའི་དགོན་པ་དང་གྲྭ་བཙུན་རྣམས་ཀྱི་འགྲོ་གྲོན་མང་ཆེ་བ་སོ་སོ་རང་གི་འབད་པ་ལ་བརྟེན་ནས་གཏོང་གི་ཡོད་སྟབས། བོད་མིའི་སྒྲིག་འཛུགས་ངོས་ནས་རོགས་སྐྱོར་དང་འགྲོ་གྲོན་ཆུང་ཤོས་ཆོས་རིག་ལས་ཁུངས་ཆགས་ཀྱི་ཡོད། དེར་བརྟེན། ད་ལྟ་བར་དུ་སྐུ་ལས་སྐྱོན་མཁན་དགོན་སྡེ་ཁག་གི་སྐུ་ཚབ་དང་དགེ་འདུན་པ་རྣམ་པ་ཚང་མར་བོད་མིའི་སྒྲིག་འཛུགས་ངོས་ནས་ཐུགས་རྗེ་ཆེ་ཞུ་རྒྱུ་ཡིན། སྤྱི་ཡོངས་ནས་འཛམ་གླིང་ནང་བལྟས་པ་ཡིན་ན། ང་ཚོ་བཙན་བྱོལ་ནང་འབྱོར་རྗེས་ནང་པ་སངས་རྒྱས་པའི་ཆོས་བསྐྱར་གསོ་བྱུང་ཐུབ་ཡོད་པ་མ་ཟད། དར་འཕེལ་གཏོང་ཐུབ་པ་བྱུང་ཡོད། འོན་ཀྱང་། འཛམ་གླིང་སྤྱི་ཡོངས་ཀྱི་འགྲོ་སྟངས་ལ་བལྟས་པ་ཡིན། ཕྱོགས་གཅིག་ནས་ནང་པ་སངས་རྒྱས་པའི་ཆོས་བྱེད་མཁན་རྒྱལ་ཁབ་  ༡༤ དང་རྒྱལ་ཁབ་ ༥༢ ནང་ནང་པ་སངས་རྒྱས་པའི་ཆོས་བྱེད་པའི་མི་འབོར་མང་དག་ཅིག་ཡོད་པ་དང་། རྒྱལ་ཁབ་ཁག་ ༡༥༠ ནང་སངས་རྒྱས་པའི་ཆོས་བྱེད་མཁན་མང་ནས་མང་དུ་འགྲོ་བཞིན་ཡོད་པ་གསལ་བོ་ཞེ་དྲགས་རེད་འདུག དེར་བརྟེན། འཛམ་གླིང་རྒྱལ་ཁབ་ ༡༥༠ ལྷག་ནང་ཆོས་བྱེད་མཁན་ཆགས་འདུག ཕྱོགས་གཅིག་ནས་ནང་པ་སངས་རྒྱས་པའི་ཆོས་འཛམ་གླིང་ཡོངས་ནང་དར་འཕེལ་ཡོང་གི་ཡོད་པ་གསལ་བོ་རེད་འདུག ཕྱོགས་གཞན་ཞིག་ནས་བལྟས་པ་ཡིན་ན། འཛམ་གླིང་ནང་ཆོས་དད་ཡོད་མཁན་དང་མེད་མཁན་གཉིས་ལས་ཆོས་དད་མེད་པའི་མི་འབོར་ཇེ་མང་དུ་འགྲོ་བཞིན་ཡོད་པ་དང་། ཆོས་དད་ཅན་གྱི་མི་འབོར་ཇེ་ཉུང་དུ་འགྲོ་ཡི་འདུག དཔེར་ན། ཡུ་རོབ་ནང་ཁྱེད་རང་གིས་ཆོས་བྱེད་ཀྱི་ཡོད་དམ་ཞེས་དྲིས་པ་ཡིན་ན་མེད་ཟེར་མཁན་གྱི་མི་འབོར་མང་བ་ཆགས་ཀྱི་ཡོད། ཅེས་དང་། བོད་ཀྱི་བླ་སྤྲུལ་རྣམ་པས་འཛམ་གླིང་ནང་ཆོས་དད་རིང་ལུགས་པ་ཇེ་ཉུང་འགྲོ་བཞིན་པའི་སྐབས་འདིར་བོད་བརྒྱུད་ནང་བསྟན་ཆོས་ལུགས་དར་སྤེལ་གྱིས། མ་འོངས་པའི་ལོ་བརྒྱ་ཕྲག་རིང་ནང་བསྟན་ཆོས་ལུགས་ཡུན་ནས་ཡུན་དུ་གནས་ཐུབ་ཐབས་ཀྱི་འཆར་གཞི་དགོས་སྐོར་སོགས་གསུངས་སོང་།དེ་རིང་ཆོས་ཚོགས་ཀྱི་ཉིན་དང་པོའི་སྔ་དྲོར། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཐད་དམིགས་བསལ་གྲོས་ཆོད་དོན་ཚན་གསུམ་ཅན་ཞིག་གཏན་འབེབ་གནང་སོང་། ༡༽ སྔ་མའི་ཐུགས་བསྐྱེད་དམ་བཅའ་དང་གདུལ་བྱ་འདུལ་བྱེད་ཀྱི་རྟེན་འབྲེལ་གྱི་དབང་གིས་འཕགས་མཆོག་འཇིག་རྟེན་དབང་ཕྱུག་མིའི་རྣམ་པར་རོལ་བ་ྋརྒྱལ་དབང་སྐུ་ཕྲེང་རིམ་པ་དང་བོད་མི་རྣམས་ནམ་ཡང་ཁ་འབྲལ་ཐབས་མེད་པ་དང་། ཁྱད་པར་བོད་གངས་ཅན་གྱི་སྐྱེ་འགྲོ་རྣམས་གཉན་འཕྲང་གི་འགག་ཆེན་ལ་ཐུག་པའི་དུས་སྐབས་འདིར། ༧གོང་ས་ཏཱ་ལའི་བླ་མའི་ཡང་སྤྲུལ་ལམ་ལུགས་སྔར་མུས་བཞིན་རྒྱུན་གནས་ངེས་པར་དགོས་པ་དང་། ྋརྒྱལ་བའི་ཡང་སྲིད་འཁྲུལ་བྲལ་རིན་པོ་ཆེ་མུ་མཐུད་ངེས་འབྱོན་དགོས་པ་བོད་མི་ཡོངས་ཀྱི་བཅོས་མིན་མངོན་འདོད་ཡིན་པར་བརྟེན། སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ལ་དེ་དོན་གསོལ་འདེབས་རྩེ་གཅིག་ཏུ་ཞུ་རྒྱུ།

༢༽ ྋརྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཡང་སྲིད་ཕེབས་ཕྱོགས་ཐག་གཅོད་གནང་རྒྱུའི་དབང་ཆ་ཡོངས་རྫོགས་༧གོང་ས་ྋསྐྱབས་མགོན་ྋརྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་རང་ཉིད་གཅིག་པུར་ཡོད་པ་ལས། གཞན་སྲིད་གཞུང་སོགས་སུ་ལའང་མེད། གལ་སྲིད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་གིས་སྲིད་དོན་གྱི་དགོས་མཁོ་ལ་བརྟེན་ནས་ྋརྒྱལ་བའི་ཡང་སྤྲུལ་ངོས་འཛིན་དང་འདེམས་སྒྲུག་བྱས་པ་བྱུང་ཚེ། ཡང་སྤྲུལ་དེར་བོད་མི་རྣམས་ནས་ངོས་འཛིན་དང་དད་མོས་བྱ་རྒྱུ་མིན།

༣༽ ྋགོང་ས་ཏཱ་ལའི་བླ་མའི་ཡང་སྲིད་ངོས་འཛིན་བྱེད་ཕྱོགས། ནང་པ་སངས་རྒྱས་བའི་གཞི་རྩའི་ལྟ་གྲུབ་ཡང་དག་ལ་བརྟེན་ཞིང་། མི་ལོ་བརྒྱད་བརྒྱ་ལྷག་ཙམ་སྔོན་ནས་བྱུང་བའི་བོད་ལུགས་ནང་བསྟན་གྱི་ཐུན་མོང་མ་ཡིན་པའི་ལམ་སྲོལ་ད་ལྟའི་བར་རྒྱུད་འཛིན་ལག་ལེན་བྱས་དང་བྱེད་མུས་ཡིན་པའི་བྱེད་ཐབས་དེ་ཉིད་ལ་བརྟེན་ནས་ངོས་འཛིན་བྱ་རྒྱུ་ཡིན་པ་བཅས་རེད།

དེ་བཞིན་ཐེངས་འདིའི་ཆོས་ཚོགས་ཐེངས་བཅུ་བཞི་བར་གྲོས་གཞི་ཁག་ ༥ ཡོད་པ་དག་ནི། གཅིག་བོད་ཀྱི་དགོན་སྡེ་རྣམས་སུ་དུས་བསྟུན་བཤད་སྒྲུབ་ཆོས་སྤྱོད་རྒྱུན་འཛིན་དང་གོང་སྤེལ་གནང་ཕྱོགས་ཇི་དགེ་བཀའ་བསྡུར་གནང་རྒྱུ་དང་། གཉིས། ཆོས་ལུགས་གཞན་དང་ནང་པའི་ཆོས་བརྒྱུད་གཞན་དང་ལྷན་དུ་མཐུན་འབྲེལ་དང་མཉམ་ལས་ཡར་རྒྱས་གཏོང་ཕྱོགས་ཇི་དགེ་བཀའ་བསྡུར་གནང་རྒྱུ། གསུམ་གཞུང་ཆེན་རིགས་གཅིག་རྐང་འཛིན་གྱི་ལས་གཞི་རྒྱུན་སྐྱོང་དང་གོང་སྤེལ་གནང་ཕྱོགས་ལ་བསྐྱར་ཞིབ་དང་འབྲེལ་བཀའ་བསྡུར་གནང་རྒྱུ། བཞི་དགོན་སྡེ་སོ་སོའི་གྲྭ་བཙུན་རྣམས་ཀྱི་འཕྲོད་བསྟེན་ཐོག་གཟིགས་སྐྱོང་དང་འགན་འཁུར་གནང་ཕྱོགས་ཇི་དགེའི་སྐོར་བཀའ་བསྡུར་གནང་རྒྱུ། དེ་བཞིན། གྲོས་གཞི་མཐའ་མ་གོང་གསལ་གྲོས་གཞིར་མ་འཁོད་པའི་དོན་གནས་གཞན་ཐོག་དགོངས་འཆར་དང་བཀའ་བསྡུར་གནང་འོས་གནང་རྒྱུ་བཅས་རེད་འདུག

གསར་འགོད་པ། དོན་འགྲུབ་བཀྲ་ཤིས་དང་སྐལ་བཟང་སྦྱིན་པ།

འབྲེལ་ཡོད་གསར་འགྱུར།

བོད་ནང་གི་ན་གཞོན་གཞས་པ་ཨ་སངས་ལགས། པར་དུས་བབ་ཀྱིས་ཕྱོགས་སྒྲིག་བྱས།
Mobile App

གཞས་པ་ཨ་སངས་ལགས་མུ་མཐུད་བཀག་ཉར་འོག་ཡོད་འདུག

༢༠༢༥/༡༠/༡༨
Zhang Youxia (front), newly-elected Vice Chairman of the Central Military Commission of the People's Republic of China, swears an oath with members of the Central Military Commission (L-R) Zhang Shengmin, Liu Zhenli, He Weidong, Li Shangfu, and Miao Hua, after they were elected during the fourth plenary session of the National People's Congress (NPC) at the Great Hall of the People in Beijing. photo credit: Reuter
Mobile App

རྒྱ་ནག་གཞུང་གིས་དམར་ཤོག་དཔོན་རིགས་དགུ་ཕྱིར་ཕུད་བཏང་།

༢༠༢༥/༡༠/༡༨
མོན་ཡུལ་འཕགས་བོད་མཛའ་འབྲེལ་ཚོགས་པས་༧གོང་ས་མཆོག་ལ་མནྜལ་བརྟན་གསུམ་འདེགས་འབུལ་ཞུས། ༢༠༢༥།༡༠།༡༨ དུས་བབ་ཀྱི་པར།
Mobile App

མོན་ཡུལ་འཕགས་བོད་མཛའ་འབྲེལ་ཚོགས་པས་༧གོང་ས་མཆོག་ལ་མནྜལ་རྟེན་གསུམ་འདེགས་འབུལ་ཞུས།

༢༠༢༥/༡༠/༡༨
Richard Gere receiving the Human Rights First Visionary Award. Photo: ICT
Mobile App

བོད་དོན་རྒྱབ་སྐྱོར་བ་རེ་ཆར་ཌི་གྷེ་རེ་ལགས་སུ་འགྲོ་བ་མིའི་ཐོབ་ཐང་གི་གཟེངས་རྟགས་ཐོབ།

༢༠༢༥/༡༠/༡༧
Mobile App

སེར་བྱེས་མཁས་སྙན་གྲྭ་ཚང་གིས་༧སྐུའི་གོ་སྟོན་གྱི་བྱམས་བརྩེའི་ལོ་སྲུང་གཙི་ཞུས།

༢༠༢༥/༡༠/༡༧
Mobile App

བོད་ནང་ཤོག་སྦག་གི་སྒྱུ་རྩལ་འགྲེམས་སྟོན་བྱེད་མཁན་ལ་ཉེས་ཆད་བཅད།

༢༠༢༥/༡༠/༡༦

མཆན། 0

  1. Buewang Ngawangjangchub says:
    ལོ་ 6 སྔོན།

    ལོ་རབ་ ༧༠ ནང་དུ་༧གོང་ས་མཆོག་གི་བཀའ་སློབ་ཏུ་ང་ཏཱ་ལའི་བླ་མ་ཐ་མ་དེ་ཡིན་སྲིད། མ་འོང་པ་ན་ཏཱ་ལའི་བླ་མའི་དགོས་མཁོ་ཡོད་མེད་བོད་རྒྱ་ཆེའི་མི་མང་ནས་ཐག་གཅོད་བྱ་གི་རེད་ཞེས་ལན་འགའ་ཤས་བསྩལ་ཡོད། ད་ལྟ་བར་དུ་བོད་མི་མཐོ་དམའ་སུས་ཀྱང་གསོལ་འདེབས་འདི་འདྲ་ཞུ་མྱོང་མེད། རྩ་བའི་༧གོང་ས་མཆོག་དགུང་ལོ་ ༡༡༣ བར་སྐུ་ཚེ་བརྟན་རྒྱུའི་ཞལ་བཞེས་གནང་ཟིནའང་། མ་འོང་པའི་སྐུ་ཕྲེང་རྗེས་མའི་ཆེད་ད་ལྟ་ནས་གསོལ་འདེབས་ཞུས་པ་དང་། གྲོས་ཆོད་ཀྱང་འཇོག་གནང་མཛད་པར་རང་གཞུང་གི་མཛད་གཙོ་རྣམས་པར་བཀའ་དྲིན་ཆེ་ཞུ་རྒྱུ་ཡིན། རྒྱ་དམར་གཞུང་ནས་༧གོང་ས་མཆོག་གི་ཡང་སྲིད་ཕེབས་དགོས་པ་དང་། དེ་ཡང་རྒྱ་དམར་གཞུང་གི་ཁྲིམ་ལུག་དང་མཐུན་པའི་ངོས་འཛིན་ཞུ་གི་ཡིན་ཚུལ་དྲིལ་སྒྲག་རྒྱ་ཆེ་བྱ་བཞིན་པ་དེར་གདོང་ལེན་གནད་ཁེལ་ཞིག་བྱུང་ཡོད། ཨ་རིས་གཙོས་པའི་དྲང་བདེན་རྒྱལ་ཁབ་མང་པོས་ཀྱང་རྒྱབ་སྐྱོར་གནང་བའང་དགའ་སྤྲོའི་རང་བཞིན་ཡིན། རྒྱ་དམར་ཆོས་མེད་ཀླ་ཀློའི་ལུགས་ངན་འཛིན་པས་༧གོང་ས་མཆོག་གི་ཡང་སྲིད་ལ་ཐེ་བྱུས་བྱེད་པ་དེ་དད་པས་མ་ཡིན་པར་ཆབ་སྲིད་ཀྱི་ལག་ཆར་སྦེད་སྤྱོད་བྱ་ཆེད་ཡིན་པ་བོད་མི་ཙམ་མ་ཟད། འཛམ་གླིང་མི་མང་ཚང་མས་ཤེས་བསལ་ཡིན། དེར་རྟེན་ད་རེས་ཀྱི་མཛད་ཕྱོགས་འདི་ནི་ཧ་ཅང་དགོས་གལ་དུས་ཐུག་ལྟ་བུར་བྱུང་སོང་བས་བཀའ་སྤྱི་གཉིས་དང་ཆོས་བརྒྱུ་ཀྱི་བསྟན་བདག་རྣམས་བཀའ་དྲིན་བླ་མེད་ཆེ་ཞ་ལགས་སོ།།

    Reply
  2. གཞུང་པ་ཚེ་དབང་བསོད་ནམས says:
    ལོ་ 6 སྔོན།

    གོང་མཆོག་ནས་ཁོང་དགུང་གྲངས་113བར་བཞུགས་རྒྱུའི་ཞལ་བཞེས་བཟང་པོ་ཕེབས་ཡོད་ན་ཡང་སྲིད་སྐོར་བྲེལ་བ་དེ་ག་ནས་བྱུང་བ་རེད་མི་མང་ལ་རྣམ་དཱོགས་མ་བཟོས་ན་ཡག་ལེ་རེད་དོ།

    Reply
  3. jimme baharu@yahoo. says:
    ལོ་ 6 སྔོན།

    ༄༅། རྒྱ་དམར་པོ་ཆོས་ཀྱི་དགྲ་བོ་རེད། ཆོས་བྱེད་མཁན་རྣམ་པ་རྩ་བ་བཀོག།
    རྒྱ་དམར་པོ་བྱམས་བརྕེ་དྲི་མེདརེད། བྱམས་སྙིང་རྗེ་མེད་ན་འདི་ཕྱི་ཕུང།
    རྒྱ་དམར་པོ་ཆོས་མེད་ཀླ་ཀློ་རེད། ཆོས་མེད་པར་ཡང་སྲིད་བྱུས་གཏོགས་མེད།
    བྱུས་བྱས་ཀྱང་ཡིད་ཆེ་མོས་གུས་མེད། འདི་འཛམ་གླིང་ཀུན་གྱི་མཁྱེན་ཤག་རེད།

    Reply
  4. གཞུང་པ་ཚེ་དབང་བསོད་ནམས་གཞུང་པ་ཚེ་དབང says:
    ལོ་ 6 སྔོན།

    ཆོས་ཚོགས་ཐེངས་བཅུ་བཞིའི་ཐོག་བཞག་པའི་གྲོས་ཆོད32དེ་དག་ཤོག་སྟེང་དུ་མ་ལྷག་པར་དུས་ཐོག་ལག་ལེན་འཁེལ་བ་གནང་རོགས་ཐུགས་རྗེའི་གཟིགས།

    Reply
  5. འབྲོང་བུ་སོག་ཚ། says:
    ལོ་ 6 སྔོན།

    རྒྱལ་བའི་ཡང་སྲིད་རྫུན་མ་བཟོས་ཀྱང་མཐའ་ཁྱོལ་བར་དཀའ། སྔར་རྒྱལ་དབང་སྐུ་ཕྲེང་ ༦ ཚངས་དབྱངས་རྒྱ་མཚོ་སྐུ་འཚོ་བཞུགས་སྐབས་སོག་པོ་ལྷ་བཟང་ཧན་གྱིས་ཇུས་ངན་དང་། ཨ་མདོ་འཇམ་དབྱངས་བཞེད་པའི་རེ་བ་སྟོང་པ་གཉིས་ཟུང་དུ་སྦྲེལ་ནས། རྒྱལ་བའི་ཡང་སྲིད་རྒྱ་ནག་ཏུ་བརྫངས། སོག་པོ་ལྷ་བཟང་ཧན་གྱི་བུ་ཞིག་འཇམ་བཞེད་ཀྱིས་རྒྱལ་དབང་ལྔ་པའི་ཡང་སྲིད་འཕྲུལ་བྲལ་དུ་བསྙེད་དེ་ངོས་འཛིན་གྱིས་མིང་ལ་པད་དཀར་འཛིན་པ་ཡེ་ཤེས་རྒྱ་མཚོ་ཞེས་མཚན་གསོལ་དང་ཁྲིར་འདོན་གནང་སྟེ་ལོ་ངོ་བཅུ་ལྷག་རྒྱལ་བའི་ཡང་སྲིད་ཀྱི་གོ་བབས་སྟེང་བཞུགས་ནའང་བོད་མི་མང་ནས་ངོས་ལེན་ཚུལ་བཞིན་མ་བྱུང་སྟབས་མཐའ་མ་རང་མོས་ཀྱིས་ཁྲི་ལས་བབས་པའི་ལོ་རྒྱུས་ཤིག་འདུག་པ་དེ་བཞིན་འགྱུར་རྒྱུ་ལས་གཞན་མ་འདས།

    Reply
  6. བསོད་ནམས་རྒྱལ་མཚན། says:
    ལོ་ 6 སྔོན།

    སྲིད་སྐྱོང་མཆོག་ལ་་་ ཟབ་ཟབ་གནང་། ནང་ཆོས་དར་འཕེལ་གཏོང་ཐུབ་པ་བྱུང་ཡོད། Exactly Wrong. མ་རེད་ཏོ། འཛམ་གླིང་ནང་ བོད་ཀྱི་ནང་ཆོས་ལ་ དོ་སྣང་དང་དགའ་མོས་བྱེད་མཁན་བྱུང་བཞིན་ཡོད། རེད་ད། བླ་མའི་ཡང་སྲིད་ ནང་པའི་ལྟ་སྒྲུབ་མ་རེད་ཏོ། སྔ་མོ་བོད་ཀྱི་ལམ་སྲོལ་ཞིག་རེད་ད། ཉེ་ཆར་ རྒྱ་གར་རྒྱལ་ས་དེལ་ལི་དུ་ 2019/11/19 ཉིན་ ༧གོང་ས་མཆོག་ནས་ ཡང་སྲིད་ འགལ་ཆེན་པོ་ མ་རེད། བདག་ཅག་སྟོན་པ་དང་མགོན་པོ་ཀླུ་སྒྲུབ་ཡབ་སྲས་སོགས་ཡང་སྲིད་ནི་མཇལ་རྒྱུ་མེད། དེ་ལས་ཁོང་རྣམས་པའི་གསུངས་དེ་རྩ་ཆེན་པོ་དང་སློབ་སྦྱོང་བྱེད་རྒྱུ་དེ་རེད། དེ་ལས་ལྷག་པ་ཞིག་མེད། གསུངས་ཡོད།

    Reply
  7. བསོད་ནམས་རྒྱལ་མཚན། says:
    ལོ་ 6 སྔོན།

    རྒྱ་དམར་གྱི་༧རྒྱལ་བའི་ཡང་སྲིད་ལ་ བོད་མི་རྣམས་ཀྱི་ངོས་ལེན་བྱེད་ཡང་བྱེད་ཀྱི་མ་རེད། གང་ལ་ཞུས་ན་་་ རྒྱ་དམར་ ཆོས་དུག སྐྱེད་བ་སྔ་ཕྱི་མེད་པ་རིང་ལུགས་རེད། གལ་སྲིད་ རྒྱ་དམར་གྱི་༧རྒྱལ་བའི་ཡང་སྲིད་བཀོད་བཞག་བྱེད་པ་དེ་ལ་ ང་བོད་པ་ཡིན་ཟེར་མཁན་ངོས་ལེན་བྱེད་མཁན་བྱུང་ན་ འདི་བོད་པ་མ་རེད་ལ་ མཇུག་མ་མེད་པའི་ཁྱི་རྒན་དང་། རྒྱུག་ཁྱི་ཡིན་པ་ཐག་བཅོད། ༧རྒྱལ་བའི་ཡང་སྲིད་༧རྒྱལ་བའི་རང་གི་ཕྱག་ལ་ཡོད་པ་དང་ བོད་མི་མངོན་འདོད་ལ་རག་ལས། འདི་བརྗོད་མི་དགོས་པ་བྱེད། སྔ་མོ་ མན་ཅུ་དཔུང་ཤུག་སྐབས་ བོད་ཀྱི་བླ་མའི་ཡང་སྲིད་ལ་ཐེ་གཏོགས་བྱེད་པ་བྱུང་ཡོད། ཡིན་ནས་རྒྱ་ནག་མ་རེད། དེའི་སྐབས་རྒྱ་ནག་ མན་ཅུ་འོག་ ལོ་ངོ་ཧྲིལ་པོ་ ༢༥༠ ཡིན། 1911 ལོར་ རྒྱ་ནག་ མན་ཅུ་འོག་ནས་རང་བཙན་ལེན། ཡིན་ནས་ད་ལྟ་གུང་ཁྲན་སྔོན་ལ་ གོ་མིན་ཏང་ཡིན། གོ་མིན་ཏང་གི་ཆོས་མཁས་ལེན། བོད་ཀྱི་བླ་མའི་ཡང་སྲིད་ལ་ཐེ་གཏོགས་བྱེད་པ་ལོ་རྒྱུད་མེད། ད་ལྟ་རྒྱ་དམར་གུང་ཁྲན་ཆོས་དང་སྐྱེད་བ་སྔ་ཕྱི་མཁས་མི་ལེན་ བོད་ཀྱི་བླ་མའི་ཡང་སྲིད་ལ་ཐེ་གཏོགས་བྱེད་པ་དེ་ འཛམ་གླིང་ཡོངས་ཀྱི་ཤིན་ཏུ་ཡ་མཚན་པ་ཞིག་དང་དགོད་བྲོ་པོ་ཞིག་རེད། ????? འགོ་ལ་སྡོད་མཁན་ཚོ་བཀའ་སློབ་གནང་དུས་་་ རྒྱ་དམར་གྱི་༧རྒྱལ་བའི་ཡང་སྲིད་ལ་ངོས་ལེན་གཏན་ནས་མེད་བཤད་མི་དགོས་པ་རེད། རྒྱ་མི་པཎ་ཆེན་རིན་པོ་ཆེ་ལ་སུ་གཅིག་གི་ངོས་ལེན་བྱེད་ཀྱི་མེད་པ། དེ་ལས་ ༧རྒྱལ་བའི་ཡང་སྲིད་ ཁོང་ཚོའི་ལག་པ་ལ་མ་འཐེབ་པ་བྱེད་རྒྱུ་དང་ ཡང་སྲིད་ བེད་སྤྱོད་ག་པ་བཏང་གི་ཡོད་མེད་ རྩད་གཅོད་དང་ཞིབ་འཇུག་བྱེད་ཡ་གལ་ཆེའོ།

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese