ཁ་སང་ཕྱི་ཚེས་ ༦ ཉིན་འཛམ་གླིང་མཉམ་འབྲེལ་རྒྱལ་ཚོགས་གྱི་འཕྲོད་བསྟེན་འགན་འཛིན་དྷི་རོ་སི་ཨ་དྷི་ནོམ་ (Tedros Adhanom) གྱིས། རྒྱ་ནག་གཞུང་གིས་འཕྲོད་བསྟེན་སྒྲིག་འཛུགས་ཀྱི་ཆེད་ལས་ཞིབ་འཇུག་ཚོགས་ཆུང་ལ་ཏོག་དབྱིབས་གཉན་རིམས་ཀྱི་འབྱུང་ཁུངས་དང་འབྲེལ་ཏེ། རྒྱ་ནག་ནང་ཞིབ་འཇུག་བྱེད་པར་བསྐྱོད་རྒྱུར་ཆོག་མཆན་སྤྲད་མེད་པ་དང་། དེ་ལ་ཧ་ཅང་བློ་ཕམ་ཆེན་པོ་བྱུང་སྐོར་བརྗོད་འདུག
ཡང་འཕྲོད་བསྟེན་འགན་འཛིན་དྷི་རོ་སི་ཨ་དྷི་ནོམ་གྱིས། འདས་པའི་ཆུ་ཚོད་ ༢༤ ནང་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་གཅོད་བྱ་ཆེད་དུ་རྒྱལ་སྤྱིའི་ཚན་རིག་ཆེད་ལས་ཞིབ་འཇུག་པ་རྒྱ་ནག་གྱི་གྲོང་ཁྱེར་ཝུ་ཧན་དུ་བསྐྱོད་རྒྱུ་ཐག་གཅོད་བྱུང་ཡོད་ཀྱང་། རྒྱ་ནག་གཞུང་གིས་ཁོང་ཚོ་རྒྱ་ནག་ཏུ་འཛུལ་རྒྱུར་མཐོང་མཆན་སྤྲད་མེད་སྟབས། དེར་ཧ་ཅང་བློ་ཕམ་བྱུང་སྐོར་དང་། རྒྱ་ནག་ནང་ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་གཅོད་ཀྱི་ལས་དོན་སྤེལ་རྒྱུ་ནི། འཕྲོད་བསྟེན་སྒྲིག་འཛུགས་དང་ཆེད་ལས་ཞིབ་འཇུག་ཚོགས་ཆུང་གི་ལས་དོན་གཙོ་གྲས་ཤིག་ཡིན་པ་གསལ་པོར་བཟོ་རྒྱུ་ཡིན་སྐོར་དང་། རྒྱ་ནག་གཞུང་གིས་གང་མགྱོགས་རམ་འདེགས་ཡོང་བའི་རེ་བ་བྱེད་ཀྱི་ཡོད་སྐོར་བརྗོད་འདུག
དེ་དང་འབྲེལ་ནས་རྒྱ་ནག་གཞུང་གི་མགྲིན་ཚབ་མ་ཧྭ་ཁྲིན་ཡེན་ (Hua Chunying) གྱིས། ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་གཅོད་ཀྱི་ལས་དོན་ཐོག རྒྱ་ནག་ནི་རྟག་ཏུ་གུ་ཡངས་དང་ཕྱི་གསལ་ནང་གསལ། ཚན་རིག་དང་མཐུན་པའི་འཕྲོད་བསྟེན་སྒྲིག་འཛུགས་ཀྱི་ཞིབ་འཇུག་ལ་འགན་ལེན་བྱེད་མཁན་ཞིག་ཡོན་སྐོར་དང་། རྒྱ་ནག་གཞུང་དང་འཕྲོད་བསྟེན་སྒྲིག་འཛུགས་གཉིས་བར་གནད་དོན་དེའི་ཐོག་འབྲེལ་མོལ་བྱེད་བཞིན་ཡོད་སྐོར་ལས་ཆོག་མཆན་མ་སྤྲད་པའི་རྒྱུ་མཚན་གསལ་ཁ་བརྗོད་མེད་པ་རེད།
རྒྱ་ནག་གཞུང་དང་འཕྲོད་བསྟེན་སྒྲིག་འཛུགས་ཀྱི་ཆེད་ལས་ཞིབ་འཇུག་པའི་བར་གྲོས་མོལ་ཐེངས་མང་བྱས་ཡོད་པ་དང་། འདས་པའི་ཟླ་ཤས་རིང་དྲ་ལམ་བརྒྱུད་ཚོགས་འདུ་ཐེངས་བཞི་ཙམ་ལ་ཚོགས་ཡོད་ནའང་། འཕྲོད་བསྟེན་སྒྲིག་འཛུགས་ཀྱི་ཛ་དྲག་ཚོགས་ཆུང་གི་འགན་འཛིན་མེག་རི་ཡན་ (Mike Ryan) གྱིས་བརྗོད་པ་ལྟར་ན། ཉེ་ཆར་ཆེད་ལས་ཞིབ་འཇུག་ཚོགས་ཆུང་གི་སྡེ་ཁག་གཉིས་རྒྱ་ནག་ལ་བསྐྱོད་མགོ་བཙུགས་ཡོད་ནའང་། རྒྱ་ནག་གཞུང་གིས་ཆོག་མཆན་མ་སྤྲད་པ་ལ་བརྟེན། སྡེ་ཁག་གཅིག་ཕྱིར་ལོག་ཡོད་པ་དང་། གཞན་དེ་ད་དུང་རྒྱལ་ཁབ་གཞན་ཞིག་གི་ནང་ལྷག་ཡོད་འདུག
རྒྱ་ནག་གཞུང་གིས་ཏོག་དབྱིབས་གཉན་རིམས་ཀྱི་འབྱུང་ཁུངས་ཞིབ་འཇུག་ཚོགས་ཆུང་ལ་བཀག་འགོག་བྱས་པའི་གནས་ཚུལ་ཐོན་པ་དང་འབྲེལ། ཨོ་གླིང་གི་ཕྱི་སྲིད་བློན་ཆེན་མཱ་རེ་སི་པི་ཡན་ (Marise Payn) མཆོག་གིས། རྒྱ་ནག་གཞུང་གི་ངོས་ནས་ཞིབ་འཇུག་ཚོགས་ཚུང་གི་ལས་དོན་ལ་ཕྱིར་འགྱངས་མི་བྱེད་པར་འཕྲལ་དུ་རྒྱ་ནག་ལ་བསྐྱོད་ཆོག་པའི་ཆོག་མཆན་སྤྲོད་དགོས་པའི་ནན་སྐུལ་བྱས་འདུག་པ་དང་། འཕྲོད་བསྟེན་སྒྲིག་འཛུགས་ཀྱི་ཞིབ་འཇུག་དེ་བཞིན་ཧ་ཅང་གལ་ཆེན་ཡིན་པ་དང་། ཨོ་གླིང་གཞུང་གིས་རྒྱལ་སྤྱིའི་རང་བཞིན་གྱི་ཞིབ་འཇུག་དེའི་གྲུབ་དོན་ལ་རེ་སྒུག་བྱེད་བཞིན་ཡོད་སྐོར་བརྗོད་འདུག
ཨ་རི་དང་ཨོ་གླིང་ནི་འཛམ་གླིང་གི་རང་དབང་ལྡན་པའི་ཆེད་ལས་ཞིབ་འཇུག་སྡེ་ཚན་ཞིག་རྒྱ་ནག་ནང་བཏང་སྟེ། ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་གཅོད་བྱེད་དགོས་པའི་དགོས་འདུན་འདོན་མཁན་གཙོ་གྲས་གཉིས་ཡིན་པ་དང་། དེ་ལ་བརྟེན་ནས་ཨ་རྒྱ་གཉིས་ཀྱི་འབྲེལ་ལམ་སྡུག་ཏུ་ཕྱིན་ཡོད་པ་མ་ཟད། ཉེ་ལམ་རྒྱ་ནག་ནང་ཨོ་གླིང་གི་གླང་ཤ་ཉོ་བར་ཚད་བཀག་བཟོས་ཡོད་པ་དང་། རྒུན་ཆང་ནང་འདྲེན་ལ་རྒྱལ་ཁྲལ་སྤར་བ། དེ་བཞིན་རྒྱ་ནག་གི་ཚོང་བ་ཚོར་ཨོ་གླིང་གི་བལ་རིགས་མི་ཉོ་བར་སྐུལ་བ་སོགས་ཀྱི་གནད་དོན་བྱུང་སྟེ། ཨོ་གླིང་དང་རྒྱ་ནག་གཉིས་ཀྱི་འབྲེལ་ལམ་ལའང་དོ་ཕོག་ཆེན་པོ་འབྱུང་བཞིན་ཡོད་པ་རེད།
ཏོག་དབྱིབས་གཉན་རིམས་ཀྱི་འབྱུང་ཁུངས་ཐད་གླེང་གཞི་འདྲ་མིན་བྱུང་ཡོད་པ་དང་། རྒྱ་ནག་གཞུང་གིས་དེའི་འབྱུང་ཁུངས་ཨ་རི་དང་རྒྱ་གར་སོགས་ཡིན་ཚུལ་བརྗོད་ཀྱི་ཡོད་ནའང་། རྒྱ་ནག་གི་ཝུ་ཧན་གྲོང་ཁྱེར་ནང་འདིའི་ལོའི་ཕྱི་ཟླ་ ༡ ཚེས་ ༡༡ ཉིན་ལོ་ན་ ༦༡ ཡིན་པའི་རྒད་པོ་ཞིག་ཐོག་མར་རྐྱེན་འདས་སུ་ཕྱིན་པའི་གནས་ཚུལ་ཐོན་ཡོད་པ་རེད། འཕྲོད་བསྟེན་སྒྲིག་འཛུགས་ཀྱི་བརྗོད་པ་ལྟར་ན། ད་ལྟའི་ཆེད་ལས་ཞིབ་འཇུག་ཚོགས་པས་ཝུ་ཧན་མཚོ་ཟས་ཁྲོམས་ར་དང་འབྲེལ་བ་དམ་པོ་ཡོད་ཅིང་། ཝུ་ཧན་ནང་ཐོག་མར་ངོས་འཛིན་བྱུང་བའི་ཏོག་དབྱིབས་ནད་པའི་ནད་འབུ་ཇི་ལྟར་ས་གནས་གང་དུ་ནམ་ཞིག་ལ་འགོས་ཁྱབ་བྱུང་བའི་སྐོར་གྱི་གནས་ཚུལ་ཤེས་རྟོགས་ཕྲན་བུ་ལས་མེད་པ་དང་། ཁྲོམས་ར་དེ་ཡུན་རིང་སྒོ་བརྒྱབ་པ་དང་དེར་འགྱུར་བ་མང་པོ་ཐེབས་ཏེ། ཞིབ་ཕྲའི་གནས་ཚུལ་ཤེས་རྟོགས་དཀའ་བའི་གནས་སུ་ལྷུང་ཡོད་ནའང་། ཆེད་ལས་ཞིབ་འཇུག་པ་རྣམས་ས་གནས་སུ་བསྐྱོད་ངེས་རྒྱུ་ཡིན་འདུག
གསར་འགོད་པ། ཀླུ་མགོན་ཐར།
