རྒྱ་གར་དང་བལ་ཡུལ་ནང་བོད་མི་ ༡༡༧༥ ལ་ཏོག་དབྱིབས་གཉན་རིམས་ན་བཞིན་འདུག

བདུན་ཕྲག་འདིའི་ནང་རྒྱ་གར་དང་བལ་ཡུལ་ནང་ནད་གཞི་ཕོག་པའི་བོད་མི་གྲངས་ ༤༤༣ བྱུང་བ་དང་འདས་གྲོངས་སུ་ཕྱིན་པ་ ༢༢། མི་ ༡༣༤ ལ་སེམས་ཁམས་ཀྱི་ནད་གཞི་ཕོག་ཡོད་འདུག

ཁ་སང་ཕྱི་ཚེས་ ༡༣ ཉིན་གྱི་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་རྒྱུན་ལྡན་གསར་འགོད་གསལ་བསྒྲགས་ཐོག་འཕྲོད་བསྟེན་ལས་ཁུངས་ཀྱི་དྲུང་ཆེ་བསྟན་འཛིན་ཀུན་བཟང་ལགས་ཀྱིས། ད་ལྟའི་ཆར་ནད་རླབས་གཉིས་པའི་སྐབས་སུ་མི་གཅིག་ན་བ་ཡིན་ན། དེའི་ནང་མི་དང་གྲོགས་པོ་ཆ་ཚང་ན་བ་སོགས་ཁྱབ་བརྡལ་ཆེན་པོ་ཕྱིན་གྱི་འདུག  དེར་བརྟེན་རང་ཉིད་གྲོགས་པོ་གྲོགས་མོ་དང་ལས་ཁུངས་སོགས་ལ་མ་འཛོམས་ན་ཡག་པོ་འདུག  གལ་སྲིད་འཛོམས་པ་ཡིན་ན་ཁ་རས་གྱོན་པ་དང་ལག་པ་ཡང་སེ་འཁྲུད་པ། ཅ་ལག་གང་བྱུང་ལ་ལག་པ་མ་འཆང་བ་སོགས་ལག་ལེན་བསྟར་རོགས་གནང་། རང་ཉིད་ན་ཚར་བའི་རྗེས་སུ་དེ་ལ་ནད་རྟགས་ཆུང་ཆུང་མ་གཏོགས་མེད་རུང་སྣང་མེད་དང་མཐོང་ཆུང་མ་གཏང་བར་སྨན་པ་སོགས་ལ་འབྲེལ་བ་བྱས་ཏེ་སྨན་ཁང་དུ་དུས་ཐོག་ཏུ་བརྟག་དཔྱད་བྱེད་དགོས་ཀྱི་འདུག  ཅེས་བརྗོད་སོང་།

དེ་ནས་སྨན་པ་མཚམས་གཅོད་ལགས་ཀྱིས། ད་ལྟའི་ཆར་རྒྱ་གར་ནང་བོད་མི་འདུས་སྡོད་ཀྱི་ས་གནས་གྲངས་ ༢༧ དང་། བལ་ཡུལ་ནང་ས་གནས་གྲངས་ ༦ ལ་བསྡོམས་པའི་རང་ཁྱིམ་ཟུར་བཀག་ནང་བཞུགས་པའི་བོད་མི་ ༡༡༡༣ ཡོད་པ་དང་། ཚོགས་སྡེའི་ཟུར་བཀག་ནང་བཞུགས་པའི་མི་ ༥༨༢ ཡོད་ལ། ད་ལྟ་བར་དུ་བོད་ཀྱི་སྨན་རྩིས་ཁང་དང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ལུས་སེམས་ནུས་གསོའི་སྨན་ ༣༤.༠༤༥ རིན་མེད་ཐོག་གནང་ཡོད་སྐོར་དང་།  ཉེ་བའི་ཆར་ལུས་སེམས་ནུས་གསོའི་སྨན་འདི་དེ་སྔ་ཕྱི་ཟླ་ ༣ ནང་གཏན་འབེབས་གནང་བ་རེད། དེ་ནས་བར་ལམ་དམིགས་བསལ་ནད་རྟགས་མེད་པ་དང་ཚབས་ཆུང་བ་ཡོད་པའི་གནས་སྟངས་ཀྱིས་བསྐྱར་ཞིབ་གནང་བ་རེད། ད་ལྟའི་ཆར་རྒྱ་གར་ནང་དུ་ནད་རླབས་གཉིས་པའི་རྐྱེན་གྱིས་མི་མང་པོར་འབྲེལ་གཏུགས་བྱུང་བ་དང་། ཡར་མར་འགྲུལ་བཞུད་བྱས་པ་དེ་ཚོའི་ནང་དུ་ནད་རྟགས་མངོན་པ་དང་ཚབས་ཆེན་ནད་རྟགས་མངོན་པ་སོགས་མང་པོ་འབྱུང་གི་འདུག  དེ་ཚོ་ལ་བརྟེན་ནས་ད་ལྟའི་ཆར་ལུས་སེམས་ནུས་གསོའི་སྨན་ཡང་བསྐྱར་བསྐྱར་ཞིབ་བྱེད་པའི་ཐོག་ནས་མི་མང་ལ་བགོ་འགྲེམ་ཞུ་དགོས་པ་ཆགས་ཀྱི་འདུག  སེམས་ཁམས་འཕྲོད་བསྟེན་དང་འབྲེལ་བའི་ཐོག་ནས་བདུན་ཕྲག་འདིའི་ནང་མི་ ༡༣༤ ལ་སེམས་ཁམས་ཀྱི་ནད་གཞི་ཕོག་འདུག  ནད་གཞི་ཕོག་པ་དེ་ཚོ་ལ་གནས་སྟངས་རྒྱུས་ལོན་བྱས་པའི་ཐོག་ནས་མང་པོ་ཞིག་ལ་དངངས་སྐྲག་དང་གཉིད་མ་ཁུག་པ་སོགས་ཀྱི་དཀའ་ངལ་ཡོད་པ་དེ་འདྲའི་ཐོག་ལ་སེམས་ཁམས་འཕྲོད་བསྟེན་གྱི་ངོས་ནས་སློབ་གསོ་གནང་ཐུབ་པ་བྱུང་ཡོད་ཅེས་བརྗོད་འདུག

དེ་བཞིན་མཚམས་གཅོད་ལགས་ཀྱིས་བདུན་ཕྲག་འདིའི་ནང་གི་ནད་པའི་གནས་སྟངས་འགྲེལ་བརྗོད་གནང་བ་ལྟར་ན། བདུན་ཕྲག་འདིའི་ནང་རྒྱ་གར་དང་བལ་ཡུལ་ནང་ནད་གཞི་ཕོག་པའི་བོད་མི་གྲངས་ ༤༤༣ བྱུང་བའི་ནང་སྐྱེས་པ་གྲངས་ ༢༡༨ དང་བུད་མེད་ ༢༢༥ ཡོད་པ་དང་། ནད་པ་ལོ་མཐོ་ཤོས་ ༩༣ དང་ཆུང་ཤོས་ལོ་གཅིག་ཡིན་འདུག དེ་བཞིན་བདུན་ཕྲག་འདིའི་ནང་མི་གྲངས་ ༢༢ རྐྱེན་འདས་སུ་ཕྱིན་ཡོད་འདུག ད་ལྟ་བར་དུ་བོད་པའི་སྤྱི་ཚོགས་ནང་ནད་གཞི་ཕོག་པའི་མི་གྲངས་ ༣༣༧༧ དང་། དྲག་སྐྱེད་སོང་བའི་མི་གྲངས་ ༢༡༡༩། འདས་གྲོངས་སུ་སོང་བའི་མི་གྲངས་ ༨༣ ཆགས་འདུག  ད་ལྟའི་ཆར་རྒྱ་གར་ནང་ས་གནས་ ༢༩ དང་བལ་ཡུལ་ནང་ས་གནས་ ༤ རྣམས་བསྡོམས་པའི་ད་ལྟ་ནད་མནར་བཞིན་པ་ ༡༡༧༥ ཆགས་འདུག་ལ། ད་ལྟའི་ནད་ཡམས་འདི་ལ་ཁ་ཟས་མངར་མོ་རིགས་བསྟེན་རྒྱུ་མེད་པ་དང་། ཐོག་མར་ནད་རྟགས་ཡོད་པའི་སྐབས་སུ་འོ་མ་དང་ཞོ་རིགས་སོགས་འཐུང་རྒྱུ་མེད་སྐོར་བརྗོད་འདུག

བདེ་ལེགས་སྨན་ཁང་གི་སྨན་པ་བརྩོན་འགྲུས་ལགས་ཀྱིས། འཛམ་གླིང་ནང་ཏོག་དབྱིབས་གཉན་རིམས་ཀྱི་ནད་ཡམས་དེ་འཕར་གྱི་འདུག  དེ་ཡང་དམིགས་བསལ་རྒྱ་གར་ནང་དུ་ནད་ཡམས་འཕར་གྱི་ཡོད་པ་རེད། འཛིན་གྲྭ་དང་ལས་ཁུངས་ཁག་གི་སྒོ་དང་སྒེའུ་ཁུང་སོགས་ཕྱེས་ཏེ་རླུང་ཡག་པོ་འགྲོ་དགོས་པ་བཟོ་རྒྱུ་དེ་གལ་ཆེན་པོ་རེེད་འདུག  ད་ལྟའི་ཆར་རྒྱ་གར་རྒྱལ་ཡོངས་ནང་དུ་སྔོན་འགོག་སྨན་ཁབ་རག་རྒྱུ་ཁག་པོ་ཡིན་ཙང་། ཚང་མས་ཁ་རས་གྱོན་པ་དང་། ནད་རྟགས་ཐོན་པ་དང་སྨན་ཁང་དུ་བརྟག་དཔྱད་བྱེད་དགོས་ཀྱི་འདུག  ནད་གཞི་ཕོག་མཁན་ཚོར་ཁ་པར་བརྒྱུད་འབྲེལ་བ་བྱས་ཏེ་རོགས་སྐྱོར་གནང་ཐུབ་ན་ཡག་པོ་འདུག  ད་ལྟའི་གནས་སྟངས་ཛ་དྲག་ཆགས་ཀྱི་ཡོད་པས་དོ་བདག་སོ་སོ་དང་གཞུང་འབྲེལ་མ་ཡིན་པའི་ཚོགས་པ་སོགས་ཀྱིས་གདོང་ལེན་བྱེད་དགོས་རྒྱུ་གལ་ཆེན་པོ་རེད་འདུག  དེ་བཞིན་དྭང་བླངས་ཞབས་ཞུ་གནང་ཐུབ་ན་གནང་རོགས་གནང་ཞེས་འབོད་སྐུལ་ཞུ་ཡི་ཡིན། ཞེས་བརྗོད་སོང་།

གསར་འགོད་པ། བསྟན་འཛིན་ཕུར་བུ།