རྨ་སྟོད་སོགས་སུ་བསྐྱར་དུ་ས་ཡོམ་ཡོང་བར་ཞེད་ནས་རྩྭ་ནང་དུ་གུར་ཕུབ་ནས་བསྡད་འདུག
མདང་དགོང་བོད་ནང་གི་ནམ་གུང་ཡོལ་ཆུ་ཚོད་ ༢།༠༤ ཐོག་བོད་མཚོ་སྔོན་ཞིང་ཆེན་མགོ་ལོག་ཁུལ་རྨ་སྟོད་རྫོང་ནང་ཚད་རིམ་ ༧. ༤ ཙམ་གྱི་ས་ཡོམ་ཞིག་བརྒྱབས་ཏེ། ཉུང་མཐར་བོད་མི་གཅིག་ལ་རྨས་སྐྱོན་ཆེན་པོ་བྱུང་ཡོད་པ་དང་། སྡོད་ཁང་དང་ཟམ་པ་སོགས་ལ་རྡིབ་སྐྱོན་ཐེབས། དེ་བཞིན་ལུག་སོགས་སེམས་ཅན་མང་པོར་འཆི་སྐྱོན་བྱུང་ཡོད་འདུག་ལ། ས་འགུལ་གྱི་ཤུགས་རྐྱེན་ཟི་ལིང་དང་། མཚོ་བྱང་། རྨ་ལྷོ། མཚོ་ལྷོ། མཚོ་ནུབ་སོགས་ཀྱི་ནང་དུའང་བྱུང་ཡོད་འདུག་ལ། རྨ་སྟོད་ཕྱོགས་སུ་མུ་མཐུད་ས་ཡོམ་ཆུང་རིགས་འབྱུང་མུས་ཡིན་པར་བརྟེན། མི་ཚོ་རང་ཁྱིམ་ནས་སྡོད་མ་ཕོད་པར་རྩྭ་ཐང་དུ་གུར་ཕུབ་ནས་བསྡད་ཡོད་འདུག
རྒྱ་ནག་གཞུང་གིས་ས་ཡོམ་སྐོར་གྱི་པར་དང་བརྙན་སོགས་སྤྱི་ཚོགས་བརྒྱུད་ལམ་དུ་གཏོང་རྒྱུར་བཀག་འགོག་བྱེད་ཀྱི་ཡོད་སྟབས། ས་ཡོམ་གྱིས་གནོད་སྐྱོན་ཇི་ཐེབས་སོགས་ཤེས་རྟོགས་ཐུབ་ཁག་པོ་ཆགས་འདུག་ཀྱང་། སྤྱི་ཚོགས་བརྒྱུད་ལམ་དུ་བརྙན་དང་པར་ཁག་ཅིག་ཐོན་པའི་ནང་། བོད་མི་ཞིག་ཁང་པའི་ཞིག་རོའི་འོག་ཏུ་མནན་ཏེ། བོད་མི་ཁག་ཅིག་གིས་མྱུར་སྐྱོར་བྱེད་བཞིན་པའི་བརྙན་ཐུང་ཞིག་འགྲོ་བཞིན་འདུག འདི་གའི་གསར་འགོད་པས་མགོ་ལོག་གི་བོད་མི་ཁག་ཅིག་ལ་བརྙན་དེ་དེ་རིང་གི་ཡིན་མིན་འདྲི་སྐབས། དེ་རིང་གི་བརྙན་ཞིག་ཡིན་པ་དང་། གྱང་རོས་མནན་པའི་བོད་མི་དེ་ནི་རྨ་སྟོད་རྫོང་ཁོངས་ནས་ཡིན་སྐོར་བརྗོད་བྱུང་ཡང་། ཁོང་གི་ད་ལྟའི་གནས་སྟངས་ག་འདྲ་ཡིན་སོགས་རྒྱུས་ལོན་ཐུབ་མ་སོང་།
ཡང་བོད་ནང་གི་བོད་མི་ཞིག་གིས་འདི་གའི་རྒྱ་གར་ལྷོ་ཕྱོགས་ཀྱི་གསར་འགོད་པར་འགྲེལ་བརྗོད་བྱས་པ་ལྟར་ན། ཐེངས་འདིའི་ས་ཡོམ་ཁྲོད་ས་གནས་ཀྱི་བོད་མི་གྲངས་ ༡༨ ལ་རྨས་སྐྱོན་བྱུང་སྟེ་སྨན་ཁང་དུ་ཡོད་པ་དང་། བོད་མི་ ༨ རྐྱེན་འདས་སུ་ཕྱིན་ཡོད་སྐོར་བརྗོད་འདུག་ཀྱང་གྲངས་ཀ་དེར་ངེས་གཏན་མི་འདུག ཡང་བོད་མི་དེས་རྨ་སྟོད་དང་སྐྱེ་རྒུ་གཉིས་བར་གྱི་གཞུང་ལམ་མང་པོ་ཞིག་ཆད་ཡོད་པ་དང་། ལྷག་པར་དུ་ཉེ་ལམ་བཟོས་ཚར་བའི་མཛོ་རྒན་ར་བ་ཁུལ་གྱི་གཞུང་ལམ་ཟམ་ཆེན་ཞིག་བརྡིབས་ཏེ། འགྲོ་འོང་ལ་དཀའ་ངལ་ཆེན་པོ་འཕྲད་བཞིན་ཡོད་ཀྱང་། རྒྱ་ནག་གཞུང་གིས་ཟམ་པ་ཆད་པའི་གནས་ཚུལ་སོགས་ཀྱི་བརྙན་དང་པར་སོགས་ཡར་མར་གཏོང་མི་ཆོག་པའི་བཀའ་བཏང་ཡོད་སྐོར་བརྗོད་བྱུང་།
ཡང་མགོ་ལོག་གི་བོད་མི་ཞིག་གིས་འདི་གའི་གསར་འགོད་པར་མཚན་གྱི་ཆུ་ཚོད་གཉིས་ཙམ་གྱི་ཐོག་ས་ཡོམ་བྱུང་སོང་བ་དང་། ད་ལྟ་མགོ་ལོག་ཁུལ་ཐོག་ཏུ་ཆར་བ་འབབ་བཞིན་ཡོད་ནའང་། ས་གནས་ཡུལ་མི་བརྒྱ་ཆའི་བརྒྱད་ཅུ་ཙམ་ཞིག་རང་ཁྱིམ་དུ་འདུག་མ་བཟོད་པར་ཁུལ་ཐོག་གི་རྟ་རྒྱུག་ཐང་སོགས་སུ་རླངས་འཁོར་སོགས་ཀྱི་ནང་སྡོད་ཀྱི་ཡོད་པ་དང་། དེ་རིང་མགོ་ལོག་ཁུལ་ཐོག་ཏུ་རྒྱ་ནག་གཞུང་ཞབས་ལས་བྱེད་ཡིག་རྒྱུགས་ལེན་གྱི་ཡོད་པ་དང་། ས་གནས་ཡུལ་མི་ཁྲི་གཅིག་ཙམ་ཡིག་རྒྱུགས་ནང་མཉམ་ཞུགས་བྱེད་ཀྱི་ཡོད་སྟབས། དེ་རིང་ས་ཡོམ་བྱུང་ཡོད་པས་ཡིག་རྒྱུགས་ཀྱི་དུས་ཚོད་ཕྱིར་འགྱང་དགོས་པའི་རེ་འདུན་བཏོན་ཡོད་ནའང་། དེར་སྣང་མེད་ཀྱིས་ཡིག་རྒྱུགས་བཏང་ཡོད་པ་དང་། ཡིག་རྒྱུགས་སྐབས་ས་ཡོམ་ཐེངས་གཉིས་ཙམ་ལ་བྱུང་ཡང་མུ་མཐུད་ཡིག་རྒྱུགས་གཏོང་བཞིན་སྐོར་འགྲེལ་བརྗོད་བྱས་བྱུང་ལ། ཡང་ཁོང་གིས་རྨ་ཆེན་ཡུལ་ཚོ་དང་རྨ་ཆེན་རྫོང་ཐོག་གི་ཁང་པ་མང་པོ་ཞིག་ལ་གས་ཁ་ཤོར་ཡོད་པ་དང་། དེ་བཞིན་སྐྱེ་རྒུ་དང་རྨ་སྟོད་གཉིས་བར་གྱི་གཞུང་ལམ་མང་པོ་ཞིག་ཆད་དེ་གྲི་ཡིས་ཞོག་ཁོག་གཏུབ་པ་ལྟ་བུ་ཞིག་ཆགས་ཡོད་སྐོར་འགྲེལ་བརྗོད་གནང་བྱུང་།
འདི་གའི་གསར་འགོད་པས་བོད་ནང་གི་བོད་མི་མང་པོ་ཞིག་ལ་འབྲེལ་བ་བྱེད་སྐབས། སྐྱེ་རྒུ་ནས་ཡིན་པའི་བོད་མི་གཉིས་ཀྱིས་འགྲེལ་བརྗོད་བྱས་པ་ལྟར་ན། ཁུལ་དེར་ས་ཡོམ་བྱུང་སོང་ནའང་། ཁང་པར་སེར་ག་གས་པ་སོགས་མི་རྒྱུ་གཉིས་ལ་གོ་ཆག་བྱུང་བ་གང་ཡང་གོ་ཐོས་བྱུང་མེད་སྐོར་འགྲེལ་བརྗོད་གནང་བྱུང་ལ། མཚོ་ལྷོ་ཁུལ་དུ་ས་ཡོམ་ཆེན་པོ་བྱུང་ནའང་མི་རྒྱུ་གཉིས་ཀྱི་གོད་ཆག་བྱུང་བ་གོ་ཐོས་མ་བྱུང་སྐོར་འགྲེལ་བརྗོད་གནང་བྱུང་། དེ་བཞིན་མཚོ་བྱང་ཁུལ་དང་རྨ་ལྷོ་སོགས་སུའང་གོད་ཆག་བྱུང་བའི་གནས་ཚུལ་གང་ཡང་མཐོང་ཐོས་མི་འདུག
འདི་གའི་གསར་འགོད་པས་ཟི་ལིང་གྲོང་ཁྱེར་གྱི་བོད་མི་ཞིག་ལ་ས་གནས་དེར་ས་ཡོམ་གྱི་གནས་སྟངས་གང་འདྲ་བྱུང་མིན་དྲིས་པར་ཁོང་མོས། ང་རང་མཚན་མོའི་ལས་རེས་ལ་འཁེལ་ཡོད་སྟབས། སྨན་ཁང་གི་ནད་པ་རྣམས་ལ་ཞབས་ཕྱི་སྒྲུབ་སྐབས་གློ་བུར་དུ་ས་ཡོམ་བྱུང་བ་ཚོར་བྱུང་ནའང་། ས་ཡོམ་ཆེན་པོ་ཞིག་མིན་སྟབས་ས་ཡོམ་གྱི་འཇིགས་པར་གཡོལ་ཐབས་བྱས་མེད་པ་དང་། སྨན་ཁང་དེའི་མཚན་མོའི་ལས་རེས་ལ་འཁེལ་བའི་སྨན་པ་དང་སྨན་ཞབས་པ་ཕལ་མོ་ཆེས་ས་ཡོམ་བྱུང་བ་ཚོར་ཡོད་སྐོར་བརྗོད་བྱུང་ལ། ཡང་ཟི་ལིང་གི་བོད་མི་གཞན་ཞིག་གིས་མཚན་གུང་ལ་ཕ་ཡུལ་ནས་གཉེན་ཉེ་ཡི་ཁ་པར་འབྱོར་ནས་བདེ་འཚམས་ཡིན་མིན་དྲིས་བྱུང་བས་ས་ཡོམ་བྱུང་བ་ཤེས་རྟོགས་བྱུང་བ་ལས་གཞན་ས་ཡོམ་བྱུང་བ་ཚོར་མ་བྱུང་སྐོར་འགྲེལ་བརྗོད་བྱས་བྱུང་།
ཡང་རྒྱ་ནག་གི་གཞུང་འབྲེལ་ཤིན་ཧྭ་གསར་ཁང་གི་གནས་ཚུལ་ལྟར་ན། ཁ་སང་ཕྱི་ཚེས་ ༢༡ ཉིན་གྱི་ཕྱི་དྲོའི་ས་གནས་ཀྱི་ཆུ་ཚོད་ ༩།༤༨ ཙམ་གྱི་ཐོག ཡུན་ནན་གྱི་ (Dali Bai) རང་སྐྱོང་ཁུལ་གྱི་ནང་ཚད་རིམ་ ༦།༤ ཅན་གྱི་ས་ཡོམ་ཞིག་བྱུང་སྟེ་ཉུང་མཐར་མི་ ༣ རྐྱེན་འདས་སུ་ཕྱིན་པ་དང་། མི་ ༢༧ ལ་རྨས་སྐྱོན་བྱུང་ཡོད་འདུག
འདི་གའི་གསར་འགོད་པས་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་རྫོང་དུ་གནས་སྡོད་བོད་མི་ཞིག་ལ་ས་ཡོམ་དང་འབྲེལ་ནས་ས་གནས་ཀྱི་གནས་སྟངས་སྐོར་ལ་འདྲི་སྐབས། ས་ཡོམ་འབྱུང་ས་དེ་དང་བདེ་ཆེན་རྫོང་གཉིས་ཀྱི་བར་ཐག་རིང་པོ་ཡིན་པ་དང་ས་གནས་སུ་རྨས་སྐྱོན་སོགས་གང་ཡང་བྱུང་བ་གོ་ཐོས་མ་བྱུང་སྐོར་འགྲེལ་བརྗོད་གནང་བྱུང་།
གསར་འགོད་པ། ཀླུ་མགོན་ཐར།
