པཱ་ཀི་སི་ཐན་ནང་མེ་འཁོར་གདོང་ཐུག་བྱུང་།

པཱ་ཀི་སི་ཐན་གྱི་ལྷོ་མའི་གྲོང་སྡེ་ཞིག་ཏུ་མེ་འཁོར་གདོང་ཐུག་བྱུང་སྟེ་འགྲུལ་བ་མང་པོར་ཤི་རྨས་བྱུང་འདུག

རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་བཞིན་པར་ལྟར་ན། དེ་རིང་ཞོགས་པ་རྒྱ་གར་གྱི་ཁྱིམ་མཚེས་རྒྱལ་ཁབ་པཱ་ཀི་སི་ཐན་གྱི་ལྷོ་མའི་གྲོང་སྡེ་དྷར་ཀི་(Dharki) ཉེ་ཁུལ་དུ། སྤྱི་དམངས་འགྲིམ་འགྲུལ་མེ་འཁོར་གཉིས་གདོང་ཐུག་བརྒྱབ་སྟེ་ད་བར་ཉུང་མཐར་འགྲུལ་བ་ ༣༣ རྐྱེན་འདས་དང་། མི་གྲངས་ ༡༢༠ ལས་མང་བར་རྨས་སྐྱོན་ཚབས་ཆེན་བཏང་འདུག་ཅིང་། ད་ལྟའང་གོད་ཆག་བྱུང་ཡུལ་དུ་མྱུར་སྐྱོབ་ཉེན་སྲུང་གི་བྱ་འགུལ་སྤེལ་མུས་ཡིན་འདུག

ཐེངས་འདིའི་མེ་འཁོར་གོད་ཆག་དང་འབྲེལ་ནས་ཡུལ་དེའི་སྲིད་བློན་ཨིམ་རཱན་ཁཱན་(Imram Khan) གྱིས་རང་གི་ཊུ་ཝི་ཊར་དྲ་ལམ་སྟེང་། དེ་རིང་ཞོགས་པ་གྷོཌ་ཀི་ཁུལ་དུ་མེ་འཁོར་བརྡབ་སྐྱོན་ཚབས་ཆེན་ཞིག་བྱུང་སྟེ་འགྲུལ་བ་ ༣༠ རྐྱེན་འདས་སོང་བའི་གནས་ཚུལ་དེར་བློ་འཚབ་བྱུང་། ངས་མེ་འཁོར་བློན་ཆེན་ཡུལ་དངོས་སུ་བསྐྱོད་དེ་འདས་པོའི་ནང་མི་དང་རྨས་སྐྱོན་ཐེབས་པ་རྣམས་ལ་རོགས་འདེགས་དགོས་སྐོར་ཞུས་ཡོད། དེ་བཞིན་མེ་འཁོར་བདེ་འཇགས་ཐད་ཀྱི་ནོར་འཛོལ་ལ་ཞིབ་འཇུག་དགོས་པའི་བཀའ་བཏང་ཡོད། ཅེས་བརྗོད་འདུག་ལ། ཡུལ་དེའི་དམག་གིས་མེ་འཁོར་བརྡབ་སྐྱོན་བྱུང་སར་དམག་མིའི་ཉེན་སྐྱོབ་ཐད་འཕུར་གནམ་གྲུ་དང་། ཆེད་ལས་མྱུར་སྐྱོབ་མི་སྣང་ཆེད་གཏོང་བྱས་ཡོད་སྐོར་བསྒྲགས་འདུག

ད་ལན་གྱི་མེ་འཁོར་བརྡབ་སྐྱོན་གྱི་རྐྱེན་རྩ་གང་ཡིན་ད་ལྟ་ཤེས་རྟོགས་བྱུང་མེད་ནའང་། ས་གནས་ཀྱི་མགོ་འཁྲིད་ཚོས་བཤད་པ་ལྟར་ན། དེ་རིང་ཞོགས་པ་པཱ་ཀི་སི་ཐན་གྱི་གྲོང་ཁྱེར་ཆེ་གྲས་ཀ་ར་ཆི་ (Karachi) ནས་སིན་དྷི་མངའ་ཁུལ་དུ་སྐྱོན་བཞིན་པའི་མེ་འཁོར་ Millat Express ཟེར་བའི་ལྕགས་ལམ་འཆུས་ཏེ་ལྕགས་ལམ་གཞན་ཐོག་མར་ཟགས་པ་དང་། ཡུལ་དེའི་གྲོང་ཁྱེར་ར་ཝ་པིན་དྷི་ (Rawalpindi) ཕྱོགས་ནས་ཡོང་བཞིན་པའི་མེ་འཁོར་ The Sir Syed Express ཟེར་བའི་མེ་འཁོར་དེ་མར་ཟགས་པའི་མེ་འཁོར་དེར་གདོང་ཐུང་བརྒྱབ་སྟེ་མགོ་རྟིང་ལོག་ཡོད་འདུག

སྤྱིར་པཱ་ཀི་སི་ཐན་ནང་རྒྱུན་ལྡན་དུ་མེ་འཁོར་བརྡབ་སྐྱོན་གྱི་གནས་ཚུལ་མང་པོ་ཐོན་གྱི་ཡོད་ཅིང་། དེ་དག་གི་རྐྱེན་རྩ་གཙོ་བོ་ནི་ལྕགས་ལམ་ལ་དོ་དམ་སྟངས་འཛིན་ནན་པོ་བྱེད་ཀྱི་མེད་པ་དང་། ལྕགས་ལམ་གྱི་བརྡ་གཏོང་འཕྲུལ་རིག་གི་གནད་དོན། དེ་བཞིན་མེ་འཁོར་གྱི་མ་ལག་རྣམས་རྙིང་པ་ཡིན་པ་བཅས་ལ་བརྟེན་ནས་འབྱུང་གི་ཡོད་སྐོར་བརྗོད་འདུག པཱ་ཀི་སི་ཐན་ནང་གི་མེ་འཁོར་གོད་ཆག་གི་དོན་རྐྱེན་མི་ཉུང་བའི་ཁྲོད་ནས། ཕྱི་ལོ་ ༢༠༡༩ ལོར་མེ་འཁོར་ཞིག་ནང་མེ་སྐྱོན་ཤོར་བའི་རྐྱེན་གྱིས་འགྲུལ་བ་ ༧༣ རྐྱེན་འདས་ཕྱིན་ཡོད་པ་རེད།

གསར་འགོད་པ། པ་སངས་ཚེ་རིང་།