ད་ནི་བློ་སྤོབས་ཆེན་པོས་འགྱུར་བ་གཏོང་རན་རེད།

      རྙོག་དྲ་ཆེན་པོ་ཡོང་དུས་འགྱུར་བ་ཆེན་པོ་གཏོང་བ་ནི་ཡར་རྒྱས་ཀྱི་ལམ་ཁ་ཡག་ཤོས་དེ་ཡིན། རྙོག་དྲ་གང་ནས་ཡོང་ན་དེ་ལ་ལྷན་པོ་རེ་བརྒྱབ་ནས་ནམ་རིང་སྒྲུང་གིས་འཁྱོལ་ཐབས་མེད། དེར་བརྟེན། སྐབས་འདིར་འགྱུར་བ་ཆེན་པོ་གཏོང་རྒྱུ་ལས་གདམ་ག་གཞན་མེད། སྤྱི་ཚོགས་འཁྲུག་འདུག ཡོད་ཚད་ཀྱིས་དཀྲུག་པར་རེམ་གྱིན་པའི་སྣང་བ་ཞིག་འདུག སྐབས་འདིར་དཀོན་མཆོག་དཔང་ལ་བཙུགས་ནས་དྲང་བདེན་གྱི་རྩོམ་ཡིག་ཅིག་བྲིས་ནའང་ཕྱོགས་གཅིག་ལ་ཟགས་ཚར་འདུག སྐབས་འདིར་སྤྱི་ཚོགས་ཀྱི་མིག་ལམ་ནས་ཁ་དོག་ལ་དཀར་ནག་གང་རུང་གིས་ཁྱབ་པ་ཡོད་པས། ལན་རེར་དགོད་བྲོ་ཞིང་མཚམས་རེར་ཧང་སངས་པ་ཞིག་ཀྱང་རེད། ངས་ངོ་མས་བཤད་ཀྱིན་ཡོད།

དཀྲུག་རྒན་ཚོས་ཡི་གེ་གཏོང་རེས་བྱས། སྐྱག་པ་རང་ཉིད་ཀྱིས་གཏོང་གིན་གཏོང་གིན་འགན་ཁུར་ཅིག་ལ་ཡོད། ཉིག་ལ་ཡོད་ཅེས་ནག་ཉེས་གཡོག་རེས་བྱས། ལག་རྡོ་ཚོས་སྐྱེས་ཐོབ་ཀྱི་རྣམ་རིག་དང་སྨྲ་ལྕེ་རང་ཉིད་ལ་དབང་བའང་མ་ཚོར་བར། ཆབ་སྲིད་པ་ཚོའི་འུར་རྡོ་བྱས་ནས་ངོ་དེབ་ནང་དུ་ཁ་ཤོམ་འཐེན་རེས་བྱས་ནས་ལོ་གཅིག་འགོར་ལ་ཉེ། ད་ནི་ཧ་ཅང་ཐང་ཆད་ཀི་འདུག རྙོག་དྲ་འདིའི་རིགས་རྣ་བས་ཐོས་པར་ཉོབ་ཀྱིན་འདུག ཡིན་ནའང་། རིགས་ཀྱི་ཞེན་པ་འདིས་ངས་ངག་ཐུན་འཛིན་ཐུབ་ཀྱི་མི་འདུག གང་ལྟར་སྒྲིག་འཛུགས་འདི་བོད་མི་རིགས་ཀྱི་ཡིན་པ་ལས་དཀྲུག་རྒན་ཁྱོད་ཚོའི་མིན། སྒྲིག་འཛུགས་འདི་ལ་ཤ་ཚ་ཞིང་སྙིང་ཉེ་ན། ད་ནི་མཚམས་འཇོག་པར་གྱིས།

སྐྱབས་མགོན་ཡིད་བཞིན་ནོར་བུས་བྱ་མས་བེའུ་ཕྲུག་གཉོར་གཉོར། ཕ་མས་བུ་ཕྲུག་གཉོར་གཉོར་བྱས་ནས། བཙན་པོའི་དུས་རིམ་གྱི་ཁྱབ་ཚད་དང་དམིགས་རྒྱང་ཅན་གྱི་སྒྲིག་འཛུགས་ཤིག་བོད་པ་ཚོར་གནང་བ་འདི། དཀྲུག་རྒན་ཁྱོད་ཚོའི་རྩེད་ཆས་མ་རེད། རྒྱལ་སྤྱིའི་འགྱུར་འགྲོས་ཀྱི་འཁྲུག་ཆ་འཚུབ་པོའི་སྐབས་སུ། དུས་ཚོད་སྐར་ཆ་རེ་བཞིན་སྒྲིག་འཛུགས་ཀྱི་ལས་དོན་འཐུས་ཤོར་ལ་འགྲོ་མི་རུང་། རྒྱལ་སྤྱིའི་སྟེང་གི་གོ་སྐབས་ཤོར་མི་རུང་། རྒྱལ་བའི་ཐུགས་སུན་པོ་བཟོ་མི་རུང་། མི་མང་རྣམས་སྒྲིག་འཛུགས་ལ་ཡིད་ཆད་འཇུག་མི་རུང་། ད་ནི་འོས་བསྡུ་ལས་ཁུངས་ཀྱིས་ངེས་པར་འགན་ཁུར་བའི་དུས་ལ་སླེབས་ཡོད།

སྤྱོད་འཇུག་ཆེན་མོ་ལས། གལ་ཏེ་བཅོས་སུ་ཡོད་ན་ནི། །དེ་ལ་མི་དགར་ཅི་ཞིག་ཡོད། །གལ་ཏེ་བཅོས་སུ་མེད་ན་ནི། །དེ་ལ་མི་དགར་བྱེད་ཅི་ཕན། །ཞེས་གསུངས་པ་ལྟར། ད་རེས་འདམས་ཐོན་སྤྱི་འཐུས་ཞེ་ལྔ་བོར་ཁྲིམས་སྒྲིག་གི་དགོངས་དོན་ལྟར་བཅོས་སུ་ཡོད་ན། དེ་ལ་མི་དགའ་གང་ལ་དགའ། བཅོས་སུ་མེད་ན་བསྐྱར་དུ་འོས་བསྡུ་བྱེད་རྒྱུ་ལས་གདམ་ག་གཞན་ཅི་ཞིག་ཡོད། འོས་བསྡུ་ལས་ཁུངས་ནས་དུས་བཅད་བྱེད་རྒྱུ་དང་། དུས་བཅད་ལྟར་འདུམ་འགྲིག་བྱེད་རྒྱུ་མེད་ན། འགྲོ་སོང་ག་ཚོད་གཏོང་དགོས་ཀྱང་བསྐྱར་དུ་འོས་འདེམས་བྱེད་རྒྱུ་ལས་ཐབས་གཞན་མེད་པ་རེད།

སྤྱི་འཐུས་ཞེ་ལྔ་བོ་ལ་དཀར་ནག་གི་དབྱེ་བ་མེད་པར་ཆ་ཚང་ཕྱིར་བསྡུ་བྱས་ཏེ། འོས་བསྡུ་བྱེད་དགོས་པ་རེད། མི་མང་གིས་འདི་ལྟར་འོས་བསྡུ་ལས་ཁུངས་ལ་ནན་སྐུལ་ཞུ་དགོས་ལ་འོས་བསྡུ་ལས་ཁུངས་ནས་ལག་བསྟར་བྱེད་ཕོད་དགོས། འགྱུར་བ་གཏོང་དགོས་དུས་མ་བཏང་ན་རྗེས་ལུས་རེད། འཐུས་ཤོར་རེད།

བསྐྱར་དུ་གསར་འདེམས་བྱས་པའི་སྤྱི་འཐུས་ཚོའང་འདི་ལྟར་གྱེས་ནས་ཡིག་ཆ་གཏོང་རེས་དང་ནག་ཉེས་གཡོག་རེས་ཀྱིས་ཉི་མ་སྐྱེལ་མགོ་བཙུགས་ན། ད་གཟོད་དེ་ལས་ཆེ་བའི་འགྱུར་བ་གཏོང་དགོས་པ་རེད། མི་མང་ཚོགས་ཆེན་བསྡུས་ནས་བཅའ་ཁྲིམས་བསྐྱར་འབྲི་བྱེད་རྒྱུ་ལས་ལམ་གཞན་ཡོད་པ་མ་རེད། སྤྱི་འཐུས་ཀྱི་སྒྲོམ་གཞི་དང་བཅས་པར་འགྱུར་བ་གཏོང་དགོས་པ་རེད། ཆོས་བརྒྱུད་དང་ཆོལ་ཁ་གཉིས་ཀ་ཕྱིར་བསྡུ་བྱེད་དགོས་ཐུག་ནའང་ཕྱིར་བསྡུ་བྱེད་དགོས་པ་རེད།  དུས་ལ་བབ་པའི་འགྱུར་བ་གཏོང་བ་ལས་གཡོལ་རྒྱུ་མེད། གཡོལ་ན་རྗེས་ལུས་ཡིན། ཆག་སྒོ་ཡིན།

མང་གཙོའི་སྤྱི་ཚོགས་ནང་དོན་གྱི་བདག་པོ་མི་མང་རེད། མི་མང་གི་ཚབ་བཅའ་ཁྲིམས་རེད། མི་མང་གི་སྐུ་ཚབ་ཚོ་ཁྲིམས་བཟོ་ལྷན་ཚོགས་སུ་གཏན་ལ་ཕབ་པ་ལྟར་མི་མང་ལ་ཁྲིམས་དང་ཁྲིམས་བཟོ་གཉིས་ཀ་བརྗེ་ལེན་གྱི་དབང་ཚད་ལྡན་པ་ཡིན། ངས་དེ་ལྟར་འདོད།

བཅའ་ཁྲིམས་སྦོ་ལུགས་ནའང་རེད། མི་མང་གི་སྐུ་ཚབ་ཚོ་སྦོ་ལུགས་ནའང་རེད། མི་མང་སྦོ་མ་ལུགས་ན་འགྲིག་པ་རེད་སྙམ། བཅའ་ཁྲིམས་གོང་ན་སུའང་མེད་ཀྱང་བཅའ་ཁྲིམས་ཀྱི་བདག་པོ་མི་མང་རེད། མི་མང་ལ་རུང་ན་བཅའ་ཁྲིམས་ལ་རུང་བ་ཡིན། བཅའ་ཁྲིམས་གོང་ན་སུ་གང་མེད་ཅེས་པ་ནི། མི་སྒེར་རེ་རེ་བཞིན་མེད་ཅེས་པ་ལས་མི་མང་མེད་ཅེས་པ་མིན། མང་གཙོའི་སྤྱི་ཚོགས་ནང་མི་མང་སྦོ་མ་ལུགས་པར་སུ་སྦོ་ལུགས་ནའང་སེམས་ཁྲལ་བྱེད་དགོས་དོན་མི་འདུག  ངས་འདི་ལྟར་ཡང་བསམ་མོད། འདི་དག་ག་ལེར་དུས་ལ་བབས་ན་གླེང་ཆོག་པ་ཞིག་རེད།

མཆན། གོང་དུ་བཀོད་པའི་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།