རྒྱ་ནག་གཞུང་གིས་བོད་མཐོ་སྒང་དུ་རྡོ་སོལ་སྔོག་འདོན་དང་ཨར་ལས་འཛུགས་སྐྲུན་ཚད་ལས་བརྒལ་བ་བྱེད་བཞིན་ཡོད་པའི་རྐྱེན་གྱིས་སའི་གོ་ལའི་ཁྱོན་ཡོངས་ཀྱི་གནམ་གཤིས་འགྱུར་ལྡོག་ཐད་ཤུགས་རྐྱེན་ཐེབས་བཞིན་ཡོད་པའི་ཞིབ་འཇུག་སྙན་ཐོ་བཏོན།
ཁ་སང་ཕྱི་ཚེས་ ༡༢ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱིས་སྣ་མང་སྐྱེས་དངོས་སྐོར་གྱི་ལྷན་ཚོགས་ (UN Biodiversity Summit)བསྡུས་ཏེ་ཞིབ་འཇུག་སྙན་ཐོ་བཏོན་པ་ལྟར་ན། འཛམ་གླིང་ཐོག་རྡོ་སོལ་ (Coal) མང་ཤོས་བཟོ་མཁན་དང་། རྡོ་སོལ་དང་ཨར་འདམ་ (Cement)། ངར་ལྕགས་སོགས་བེད་སྤྱོད་ཤུགས་ཆེ་ཤོས་གཏོང་མཁན་རྒྱ་ནག་ཆགས་ཡོད་པར་བརྟེན། འཛམ་གླིང་གི་སྣེ་མོ་གསུམ་པར་ངོས་འཛིན་བྱེད་བཞིན་པའི་བོད་མཐོ་སྒང་གི་གནམ་གཤིས་ལ་འགྱུར་ལྡོག་ཐེབས་བཞིན་ཡོད་པ་རེད། དངོས་པོ་ཆུང་ཆུང་ཞིག་བཟོ་སྐྲུན་བྱས་པ་ཡིན་ནའང་གནམ་གཤིས་འགྱུར་ལྡོག་ལ་ཤུགས་རྐྱེན་ཡོང་གི་ཡོད་སྟབས། གནམ་གཤིས་འགྱུར་ལྡོག་གིས་འགྲོ་བ་མིའི་རིགས་དང་སེམས་ཅན་སྲོག་ལྡན་ཡོངས་ཀྱི་འཚོ་བའི་གནས་སྟངས་ལ་ཤུགས་རྐྱེན་ཆེན་པོ་ཐེབས་ཀྱི་ཡོད་པ་རེད། རྒྱ་ནག་གཞུང་གིས་བར་གྱི་སྐམ་ས་(water-shed) ་སོགས་ལ་རྒྱལ་ཁབ་ཀྱི་སྐྱེད་མོས་ཚལ་ (National Parks)ཟེར་བ་བཟོས་ཏེ་གནམ་གཤིས་འགྱུར་ལྡོག་ལ་ལེགས་བཅོས་གཏང་རྒྱུ་ཡིན་སྐོར་བསྒྲགས་ཡོད་ཀྱང་། རྒྱ་ནག་གཞུང་གིས་བོད་ས་བེད་སྤྱོད་བཏང་སྟེ་བཟོ་གྲྭ་སྣ་མང་བཙུགས་ནས་ཐོན་སྐྱེད་ཀྱི་ལས་གཞི་འབོར་ཆེན་བརྩམས་དང་རྩོམ་མུས་ཡིན་པའི་རྐྱེན་གྱིས། མཁའ་དབུགས་དང་ཁོར་ཡུག་ལ་འབག་བཙོག་ཆེན་པོ་ཐེབས་བཞིན་ཡོད་ལ། བོད་མཐོ་སྒང་གི་གནམ་གཤིས་འགྱུར་ལྡོག་གིས་གོ་ལ་ཧྲིལ་པོའི་གནམ་གཤིས་འགྱུར་ལྡོག་ལ་ཤུགས་རྐྱེན་ཐེབས་ཀྱི་ཡོད་པས། མ་འོངས་པར་གོ་ལ་འཇིག་པའི་ཉེན་གནས་སུ་ལྷུང་སྲིད་སྐོར་བཀོད་འདུག
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ (Tibetan Centre of Human Rights and Democracy) གི་སྙན་ཐོ་ལུང་འདྲེན་བྱས་པའི་ནང་། རྒྱ་ནག་གིས་དུག་རླུང་གི་ཉེན་འགོག་དང་རང་བྱུང་ཁོར་ཡུག་སྲུང་སྐྱོབ་ལ་ཁ་གཡར་ནས་བོད་མཐོ་སྒང་གི་འབྲོག་མི་རྣམས་བཙན་དབང་གིས་གྲོང་དུ་གནས་སྤོ་བཅུག་པ་མ་ཟད། བོད་མི་ཚོར་རྒྱལ་སྤྱིའི་ཁོར་ཡུག་གུན་གསབ་ཀྱི་ཁྲིམས་སྲོལ་དང་མཐུན་པར་ཁོར་ཡུག་གི་གུན་གསབ་ཚུལ་བཞིན་སྤྲོད་ཀྱི་མེད་པའི་དཔང་རྟགས་ཁུངས་འདོན་གནང་འདུག རྒྱ་ནག་གི་ཁོར་ཡུག་གུན་གསབ་སྲིད་ཇུས་ལ་བརྟེན་ནས་འགྲོ་བ་མིའི་ཐོབ་ཐང་དང་ཡུན་གནས་དར་སྤེལ་ཐོག་གནོད་ཚབས་འབྱུང་བཞིན་ཡོད་པའི་དོགས་གཞི་མང་པོ་བྱུང་ཡོད། བོད་མཐོ་སྒང་གི་ས་ཁྱོན་ཧ་ཅང་ཆེ་བས་སའི་གོ་ལའི་ས་ཁྱོན་གྱི་བརྒྱ་ཆ་ ༢ ཙམ་དང་ནུབ་ཡུ་རོབ་ཀྱི་ས་ཁྱོན་དང་མཉམ་པ་ཡོད། མ་ཟད་གོ་ལ་བྱང་མའི་རླུང་གི་རྒྱུན་འཁོར་དང་། གཙང་ཆུའི་བབ་རྒྱུན། ནམ་དུས་ཀྱི་འགྱུར་ལྡོག་སོགས་ལ་ཐད་ཀར་ཤུགས་རྐྱེན་སྤྲོད་ཀྱི་ཡོད་པས་བོད་མཐོ་སྒང་གི་ཁོར་ཡུག་གིས་ད་བར་མིའི་རིགས་ལ་ཕན་བདེ་རླབས་ཆེན་བསྒྲུབས་ཡོད། བོད་མཐོ་སྒང་གི་གནམ་གཤིས་འགྱུར་ལྡོག་ལ་བརྟེན་ནས་བོད་མི་ཚོའི་འཚོ་བར་ཤུགས་རྐྱེན་ཆེན་པོ་ཐེབས་བཞིན་ཡོད། བོད་མིའི་སྲོལ་རྒྱུན་གྱི་བཟོ་ལས་ཐོན་ཁུངས་ལས་གནམ་གཤིས་ལ་གནོད་འཚེ་གཏོང་བ་ཧ་ཅང་དཀོན་པོ་ཡིན་པས་བོད་ནང་གི་གནམ་གཤིས་འགྱུར་ལྡོག་གི་འབྱུང་རྐྱེན་གཙོ་བོ་ནི་འཛམ་བུ་གླིང་ཁྱོན་ཡོངས་ཀྱི་རྡོ་སོལ་དང་ས་བག ཟངས། ཧ་ཡང་། ཁྲོ་སོགས་ཀྱི་བཟོ་ལས་ཕོན་ཆེ་ཤོས་བྱེད་མཁན་གྱི་རྒྱལ་ཁབ་སྟེ་རྒྱ་ནག་ཡིན། རྒྱ་ནག་གི་བཟོ་གྲྭས་བོད་ཀྱི་རི་ཆུ་ནགས་གསུམ་གཙོས་རང་བྱུང་ཁོར་ཡུག་དང་གནམ་གཤིས་འགྱུར་ལྡོག་ལ་ངན་ཕྱོགས་ནས་ཤུགས་རྐྱེན་ཤིན་ཏུ་ཆེན་པོ་སྤྲད་ཡོད། དུག་རླུང་གི་འབྱུང་ཁུངས་དངོས་ལ་སྔར་བཞིན་ཚོད་འཛིན་མི་བྱེད་པར་གནམ་གཤིས་འགྱུར་ལྡོག་གི་གནོད་འཚེ་འགོག་པར་བསྙད་ནས་རྒྱ་ནག་གིས་བོད་མཐོ་སྒང་གི་གཙང་ཆུའི་འགོ་ཁུངས་སོགས་སུ་རྒྱལ་ཁབ་ཀྱི་སྤྱི་གླིང་བཙུགས་ཏེ་དོ་དམ་བྱེད་ཀྱིན་ཡོད་སྐོར་བཀོད་འདུག
དབྱིན་ཡུལ་དང་ཨི་ཊ་ལི་མཉམ་སྦྲེལ་ཐོག་འདི་ལོའི་ཕྱི་ཟླ་ ༡༡ ཚེས་ ༡ ནས་ ༡༢ བར་དབྱིན་ཡུལ་རྒྱལ་ཁབ་ཀྱི་སི་ཀོ་ཊི་ལན་ཌི་(Scotland) ནང་གི་རྒྱལ་ས་ (Glassgow) རུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་མི་རྣམས་ནས་གནམ་གཤིས་འགྱུར་ལྡོག་གི་བགྲོ་གླེང་ཐེངས་ ༢༦ པ་ (COP26 Green Zone) ཞེས་པའི་བགྲོ་གླེང་ལྷན་ཚོགས་དེ་འཚོག་འཆར་ཡོད་འདུག་ལ། བགྲོ་གླེང་དེ་ནི། འཛམ་གླིང་སྟེང་གནམ་གཤིས་འགྱུར་ལྡོག་གི་གནད་དོན་ ༢༠༠ ལྷག་བྱུང་བ་རྣམས་འགྲེམས་སྟོན་དང་བགྲོ་གླེང་། དེ་བཞིན་རིག་གཞུང་གི་འཁྲབ་སྟོན་དང་གློག་བརྙན་གཟིགས་འབུལ་སོགས་ཀྱི་བྱེད་སྒོ་སྣ་མང་གི་ཐོག་ནས་སའི་གོ་ལའི་ཐོག་འཚོ་ཞིང་གཞིས་པའི་མི་རྣམས་ལ་གོ་རྟོགས་སྤེལ་རྒྱུ་ཡིན་འདུག་ལ། སྐབས་དེར་མི་མང་ནས་མཉམ་ཞུགས་བྱས་ཚེ་འཛིན་བྱང་རིན་མེད་ཡིན་སྐོར་བསྒྲགས་འདུག
གསར་འགོད་པ། བསྟན་འཛིན་ཕུར་བུ།
