རྒྱལ་སྤྱིའི་ཉེས་ཡངས་ཚོགས་པ་ཧོང་ཀོང་ནས་གནས་སྤོར་བྱ་དགོས་བྱུང་ཡོད་འདུག

ཧོང་ཀོང་ནང་བདེ་འཇགས་ཁྲིམས་ཟེར་བ་ལག་བསྟར་གྱིས་རང་དབང་དང་འདྲ་མཉམ། འགྲོ་བ་མིའི་ཐོབ་ཐང་སོགས་སྲུང་སྐྱོབ་བྱེད་མཁན་གྱི་ཚོགས་སྡེ་ཁག་ལ་གནོད་ཤུགས་ཐེབས་ཀྱི་ཡོད་པ་ལྟར། ཧོང་ཀོང་ནང་ཡོད་པའི་རྒྱལ་སྤྱིའི་ཉེས་ཡངས་ཚོགས་པའི་ཡན་ལག་ལས་ཁུངས་གནས་སྤོར་བྱ་གཏན་འཁེལ་ཡོད་པ་རེད།

Amnesty International said its local office in Hong Kong would close this month while its regional office will close by the end of the year. (AFP)

ཧོང་ཀོང་རང་དབང་གསར་ཁང་གིས་གནས་ཚུལ་སྤེལ་བ་ལྟར་ན། འདི་ལོའི་ལོ་མཇུག་ཙམ་ལ་ཧོང་ཀོང་ནང་ཡོད་པའི་རྒྱལ་སྤྱིའི་ཉེ་ཡངས་ཚོགས་པའི་ཧོང་ཀོང་ཡན་ལག་ལས་ཁུངས་དང་དེ་འབྲེལ་གྱི་རྒྱལ་སྤྱིའི་ལས་གཞི་ཁག་མཚམས་འཇོག་བྱ་རྒྱུ་ཡིན་པ་དང་། ཚོགས་པ་དེའི་འགན་འཛིན་ལྷན་ཚོགས་ཀྱིས། ཧོང་ཀོང་ནང་གི་ཉེས་ཡངས་ཚོགས་པའི་ལས་དོན་མཚམས་བཞག་བྱེད་དོན་ནི། ཧོང་ཀོང་ནང་གི་རྒྱལ་ཁབ་བདེ་འཇགས་ཀྱི་ཁྲིམས་ལག་བསྟར་བྱེད་བཞིན་པའི་གནས་སྟངས་འོག འགྲོ་བ་མིའི་ཐོབ་ཐང་གི་ཚོགས་སྡེ་ཁག་ནས་ལས་དོན་སྒྲུབ་རྒྱུ་མི་སྲིད་པ་ལྟ་བུ་ཆགས་ཡོད་སྐོར་བརྗོད་ཡོད་པ་རེད།

དེ་འབྲེལ་ཐད། རྒྱལ་སྤྱིའི་ཉེས་ཡངས་ཚོགས་པའི་འགན་འཛིན་ལྷན་ཚོགས་ཀྱི་ཚོགས་གཙོ་ (Anjhula Mya Singh Bais ) ལགས་ཀྱིས། ང་ཚོས་ལས་དོན་མཚམས་འཇོག་བྱ་རྒྱུའི་ཐག་གཅོད་འདི་ནི། སེམས་ངལ་དང་བཅས་བླངས་པ་ཞིག་ཡིན། རྒྱུ་མཚན་ནི་རྒྱལ་ཁབ་བདེ་འཇགས་ཟེར་བའི་ཁྲིམས་དེའི་འོག ཧོང་ཀོང་ནང་འགྲོ་བ་མིའི་ཐོབ་ཐང་གི་ཚོགས་སྡེ་ཁག་ནས་རང་དབང་ལྡན་ཞིང་སྲིད་གཞུང་གི་དྲག་གནོན་མེད་པར་ལས་དོན་སྒྲུབ་རྒྱུ་ནི་མི་སྲིད་པ་ཞིག་ཆགས་བསྡད་ཡོད། ཅེས་བརྗོད་ཡོད་པ་དང་། རྒྱལ་སྤྱིའི་ཉེས་ཡངས་ཚོགས་པའི་ཧོང་ཀོང་གི་ལས་ཁུངས་དང་རྒྱལ་སྤྱིའི་ལས་གཞི་ཡོངས་མཚམས་འཇོག་གིས། ཨེ་ཤ་ཡའི་རྒྱལ་ཁབ་ཁག་ཏུ་ཡོད་པའི་ཚོགས་པའི་ལས་ཁུངས་གཞན་གྱི་ནང་གནས་སྤོར་བྱ་འཆར་ཡོད་པ་རེད།

ཡང་རྒྱལ་སྤྱིའི་ཉེས་ཡངས་ཚོགས་པས། ཧོང་ཀོང་ནི་མིག་དཔེར་འོས་པའི་རྒྱལ་སྤྱིའི་ཚོགས་སྡེ་འདུས་སྡོད་བྱེད་ས་ཞིག་ཡིན་ཡང་། ཉེ་ལམ་ནས་ས་གནས་འགྲོ་བ་མིའི་ཐོབ་ཐང་ཚོགས་པ་དང་ཚོགས་འབྲེལ་མཐུན་ཚོགས་ཁག་ལ་སྲིད་གཞུང་གིས་དམ་དྲགས་དང་དམིགས་འབེན་དུ་འཛིན་གྱི་ཡོད་པས། བདེ་འཇགས་མེད་པའི་ཁོར་ཡུག་དེ་འདྲ་ཞིག་གི་འོག་ནས་ང་ཚོས་མུ་མཐུད་ལས་དོན་སྒྲུབ་པར་དཀའ་ངལ་ཇེ་ཆེར་ཕྱིན་ཡོད། ཅེས་བརྗོད་ཡོད་པ་དང་། འདས་ལོའི་ཕྱི་ཟླ་ ༧ ཚེས་ ༡ ཉིན་རྒྱ་ནག་གཞུང་གིས་ཧོང་ཀོང་ནང་བདེ་འཇགས་ཁྲིམས་ཟེར་བ་ལག་བསྟར་གྱིས། ཧོང་ཀོང་མི་མང་གི་སྨྲ་བརྗོད་རང་དབང་དང་གསར་འགོད་རང་དབང་། འགྲོ་བ་མིའི་ཐོབ་ཐང་སོགས་ལ་བཀག་སྡོམ་ཤུགས་ཆེར་བྱེད་མུས་ཡིན་པ་མ་ཟད། ད་ལྟ་ཧོང་ཀོང་ནང་རྒྱ་ནག་གཞུང་གི་ལྟ་ཕྱོགས་དང་འགལ་བའམ་ཡང་ན་སྲིད་གཞུང་གི་སྒེར་གཅོད་རིང་ལུགས་ལ་ཞི་བས་ངོ་རྒོལ་ཙམ་བྱས་པ་ཡིན་ན་འཛིན་བཟུང་བཀག་ཉར་གྱིས་ཉེས་ཆད་གཅོད་ཀྱི་ཡོད་པ་རེད།

གཞན་ཡང་འདས་ལོ་ནས་ཨ་རིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གི་གཙོའི་ཧོང་ཀོང་ནང་ཡོད་པའི་སྤྱི་དམངས་ཐོབ་ཐང་གཏུགས་བཤེར་དང་རྩོད་ལེན་དང་འབྲེལ་བའི་ཚོགས་སྡེ་ཁག་དང་མང་གཙོ་དང་རང་དབང་གི་ཆབ་སྲིད་ཚོགས་པ་ཁག་སོགས་ཧོང་ཀོང་ནང་གི་དྲང་བདེན་དང་འདྲ་མཉམ་གྱི་གཞི་རྩར་ལངས་པའི་ཚོགས་སྡེ་ཁག་མང་པོ་ཞིག་བདེ་འཇགས་ཁྲིམས་ལག་བསྟར་གྱི་གནས་སྟངས་འོག ཧོང་ཀོང་དང་ཁ་གྱེས་དགོས་བྱུང་ཡོད་པ་རེད།

གསར་འགོད་པ། སྐལ་བཟང་སྦྱིན་པ།