འདས་པའི་བདུན་གཅིག་ནང་བོད་མི་ ༤༤ ལ་ཏོག་དབྱིབས་འགོས་ཁྱབ་བྱུང་།

འདས་པའི་བདུན་ཕྲག་གཅིག་རིང་བོད་མི་ ༤༤ ཙམ་ལ་ཏོག་དབྱིབས་རིམས་ནད་འགོས་ཡོད་པ་དང་བོད་མི་ ༡ ཙམ་རྐྱེན་འདས་སུ་ཕྱིན་ཡོད་པ་རེད་འདུག

ཁ་སང་ཉིན་རྒྱབ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསར་བསྒྲགས་ཐེངས་ ༨༦ སྤེལ་བ་ལྟར་ན། འདས་པའི་བདུན་ཕྲག་ནང་རྒྱ་གར་ནང་གི་ས་གནས་ ༩  དང་བལ་ཡུལ་གྱི་ས་གནས་གྲངས་ ༡ ནང་རང་ཁྱིམ་ལ་ཟུར་བཀག་ཏུ་སྡོད་མཁན་བོད་མི་ ༦༤  དང་། ཚོགས་སྡེའི་ཟུར་བཀག་ཁང་དུ་མི་གྲངས་ ༡༢༨ བཅས་ཁྱོན་བསྡོམས་ཟུར་བཀག་ཏུ་སྡོད་མཁན་མི་གྲངས་ ༡༩༢ ཡོད་པ་དང་། འདས་པའི་བདུན་ཕྲག་ནང་མི་གྲངས ༤༤ ལ་ཏོག་དབྱིབས་རིམས་ནད་ཀྱི་ནད་གཞི་གསར་བ་འགོས་ཡོད་པ་དང་མི་གཅིག་འདས་གྲོངས་སུ་ཕྱིན་ཡོད་འདུག

གསར་འགོད་གསལ་བསྒྲགས་སྐབས་སྨན་པ་མཚམས་གཅོད་ལགས་ཀྱིས། འདས་པའི་བདུན་ཕྲག་ནང་གཞི་རིམ་འོག་མ་དང་བར་མའི་སློབ་གྲྭ་ཁག་མགོ་བཙུགས་ཡོད་སྟབས། སློབ་གྲྭ་ཁག་གི་འཛིན་སྐྱོང་དང་། དགེ་རྒན། ཕ་མ་རྣམས་ཀྱིས་འགན་ཁུར་དང་ལེན་གྱི་ཐོག་ནས། ཏོག་དབྱིབས་རིམས་ནད་ཁྱབ་གདལ་འགྲོ་བར་དོགས་གཟབ་དང་དོ་སྣང་བྱ་དགོས་པ་དང་། ཉེ་ལམ་བོད་པའི་སྤྱི་ཚོགས་ཀྱི་ཁྲོད་དུ་ཟས་རིགས་བསྟེན་སྟངས་ནོར་ནས། གཅིན་ཉི་ནད་པ་མང་པོ་ཞིག་བྱུང་གི་ཡོད་སྟབས། འབྲུ་རིགས་ཀྱི་ཟས་རིགས་དང་། ཚལ་གྱི་རིགས་སོགས་ཟས་བཅུད་ལ་བསྟེན་ཏེ། ཟས་རིགས་བཅུད་ལྡན་ལ་བསྟེན་དགོས་པ་ལས།  ཆང་དང་ཟས་རྙིང་སོགས་ལ་བསྟེན་མི་རུང་བ་དང་། ལུས་རྩལ་རིགས་གང་མང་རྩེད་ནས་འཕྲོད་བསྟེན་ཡག་པོ་བྱ་དགོས་པའི་ལམ་སྟོན་སོགས་གནང་སོང་།

དེའི་རྗེས་ཕྱི་ལུགས་སྨན་པ་བསྟན་འཛིན་རྣམ་གྲོལ་ལགས་ཀྱིས། འཛམ་གླིང་སྤྱི་དང་ལྷག་པར་རྒྱ་གར་ནང་ཏོག་དབྱིབས་གཉན་རིམས་ཁྱབ་གདལ་ཇེ་ཆུང་དུ་ཕྱིན་ནས། ནད་པའང་ཇེ་ཉུང་དུ་འགྲོ་ཡི་ཡོད་ཀྱང་། ཉེ་ལམ་ཨུ་རུ་སུ་དང་ཇན་མན་སོགས་སུ་ནད་པ་ཇེ་མང་དུ་འགྲོ་མུས་ཡིན་པས། ཆེད་མཁས་པ་རྣམས་ཀྱིས་ནད་ཡམས་ཀྱིས་མནར་ནས་དུས་ཚོད་ཡུན་རིང་ཡིན་སྟབས། མི་རྣམས་ཀྱིས་སྔོན་འགོག་གི་ཐབས་ལམ་སོགས་ལ་སུན་གཟེར་དང་ལྷོད་གཡེང་དུ་ཕྱིན་ཡོད་པའི་ཚོད་དཔག་བྱེད་ཀྱི་ཡོད། དེར་བརྟེན་བོད་པའི་སྤྱི་ཚོགས་ཀྱི་ཁྲོད་དུ་ནད་ཡམས་ཀྱི་སྔོན་འགོག་ཐབས་ལམ་ལ་ལྷོད་གཡེང་མ་ཤོར་བ་བྱ་དགོས་པ་དང་། བོད་པའི་སྤྱི་ཚོགས་ཀྱི་ཁྲོད་དུ་སྔོན་འགོག་སྨན་ཁབ་བརྒྱབ་མེད་པའི་རིགས་ཡོད་ཚེ། སྤྱི་སྒེར་གཉིས་ཀྱི་བདེ་འཇགས་དང་འཕྲོད་བསྟེན་གྱི་སླད་དུ། ངེས་པར་འགོག་ཁབ་བརྒྱབ་སྟེ་མུ་མཐུད་སྔོན་འགོག་གི་ཐབས་ལམ་ལ་ཡིད་གཟབ་བྱས་ནས་ལྷོད་གཡེང་མ་འགྲོ་བར་བྱ་དགོས་སྐོར་དང་། བོད་པའི་སློབ་གྲྭ་ཁག་ཏུ་རིམས་ནད་ཀྱི་དཀའ་ངལ་འཕྲད་ཀྱི་ཡོད་སྟབས། ཚང་མས་ཏོག་དབྱིབས་རིམས་ནད་ཁྱབ་གདལ་མི་འགྲོ་བའི་ཐབས་ཤེས་བྱ་དགོས་པའི་ལམ་སྟོན་སོགས་གནང་སོང་།

ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་མི་གྲངས་ ༦༨༥༩ བྱུང་བའི་ཁྲོད་དྲག་སྐྱེད་ཟིན་པ་ ༦༦༢༣ དང་། རྐྱེན་འདས་སུ་ཕྱིན་པ་ ༡༥༨། ད་ལྟ་ཏོག་ནད་ཀྱིས་མནར་བཞིན་པའི་བོད་མི་  ༧༨  ཡོད་འདུག དེ་བཞིན་རྒྱ་གར་ནང་ཏོག་དབྱིབས་འགོག་ཁབ་གཉིས་ཀ་བརྒྱབ་ཟིན་པའི་མི་གྲངས་ ༤༥༨༠༡ དང་། དང་པོ་བརྒྱབ་ཟིན་པའི་མི་གྲངས་  ༤༥༨༢   ཆགས་ཡོད་པ་དང་། བལ་ཡུལ་ནང་འགོག་ཁབ་གཉིས་ཀ་བརྒྱབ་ཟིན་པའི་མི་  ༦༩༨༠ཡོད་འདུག དང་པོ་བརྒྱབ་ཟིན་པའི་མི་གྲངས་  ༤༨  ཙམ་ཡོད་པ་རེད་འདུག

གསར་འགོད་པ། དཔལ་ལྡན།