བོད་ཀྱི་མཁའ་འགྲུལ་གནམ་གྲུ་ཞིག་ལ་མེ་སྐྱོན་བྱུང་།

བོད་ཀྱི་འགྲུལ་སྐྱེལ་གནམ་གྲུ་ཞིག་ལ་མེ་སྐྱོན་བྱུང་སྟེ་མི་ཁག་ཅིག་ལ་རྨས་སྐྱོན་ཕོག་ཡོད་ཀྱང་སྲོག་སྐྱོན་ཤོར་མཁན་མེད་པ་རེད།

དེ་རིང་སྔ་དྲོ་ས་གནས་ཀྱི་ཆུ་ཚོད་ ༨ དང་སྐར་མ་དགུ་ཙམ་གྱི་སྟེང་། རྒྱ་ནག་གི་གྲོང་ཁྱེར་ཁྲང་ཆིན་ནས་བོད་དབུས་ཁུལ་ཉིང་ཁྲི་བར་འཕུར་སྐྱོད་བྱེད་བཞིན་པའི་འགྲུལ་སྐྱེལ་གནམ་གྲུ་ཞིག ཁྲང་ཆིན་གྲོང་ཁྱེར་གྱི་གནམ་ཐང་ནས་འཕུར་རྩིས་བྱེད་སྐབས། གནམ་གྲུ་དེའི་མདུན་ངོས་ཀྱི་ཕྱོགས་གཡོན་པར་མེ་སྐྱོན་བྱུང་ཡོད་ཀྱང་། གནམ་གྲུའི་ཁ་ལོ་བ་དགུ་གཙོས་པའི་འགྲུལ་བ་ཁྱོན་ ༡༡༣ ཡོད་པ་བཅས་བདེ་འཚམ་མྱུར་སྐྱོབ་བྱེད་ཐུབ་ཡོད་འདུག

ད་ལྟ་རྒྱ་ནག་གི་སྤྱི་ཚོགས་བརྒྱུད་ལམ་ཁག་ཏུ་དེ་འབྲེལ་གྱི་གནས་ཚུལ་དང་བརྙན་མང་དག་ཅིག་ཁྱབ་བརྡལ་འགྲོ་ཡི་ཡོད་པའི་ཁྲོད། འགྲུལ་སྐྱེལ་གནམ་གྲུ་དེར་མེ་སྐྱོན་ཆེན་པོ་ཤོར་ནས་དུ་བ་ཐོན་བཞིན་པའི་ཡུལ་དངོས་ཀྱི་རྣམ་པ་མཐོང་རྒྱུ་འདུག་ལ། བོད་ལྗོངས་མཁའ་འགྲུལ་ལས་ཁུངས་ཀྱིས། གནམ་གྲུའི་ནང་གི་འགྲུལ་བ་ཁག་ཅིག་ལ་རྨས་སྐྱོན་ཅུང་ཕོག་ཡོད་པ་ལས་མི་གཞན་ཚང་མ་བདེ་འཇགས་ཡིན་སྐོར་བསྒྲགས་ཡོད་ཀྱང་། ཁྲང་ཆིན་གྱི་རྒྱལ་སྤྱིའི་གནམ་གྲུ་འབབ་ཚུགས་ལས་ཁུངས་ཀྱིས། བོད་ལྗོངས་མཁའ་འགྲུལ་ཟེར་བའི་གནམ་གྲུ་དེར་མེ་སྐྱོན་བྱུང་བའི་ཁྲོད་མི་གྲངས་ ༤༠ ལ་རྨས་སྐྱོན་ཕོག་པ་ངོས་ལེན་བྱས་ཡོད་འདུག་པ་མ་ཟད། རྨས་སྐྱོན་ཕོག་པའི་མི་རྣམས་ཉེ་འཁྲིས་སྨན་ཁང་དུ་བསྟེན་གཏུག་བྱེད་ཀྱི་ཡོད་སྐོར་སོགས་བརྗོད་འདུག

ད་རེས་བོད་ཀྱི་གནམ་གྲུ་དེར་མེ་སྐྱོན་བྱུང་རྐྱེན་ཅི་ཡིན་ཐད་རྒྱ་ནག་གཞུང་ཤིན་ཧྥ་གསར་ཁང་གི་གནས་ཚུལ་ནང་། གནམ་གྲུ་དེ་འཕུར་སྐྱོད་བྱེད་སྐབས་རྒྱུག་ཤུགས་ཆེ་དྲགས་ཏེ། ལོག་ལམ་དུ་བརྒྱུགས་པ་སོགས་ལ་བརྟེན་ནས་གནམ་གྲུའི་འཕྲུལ་ཆས་ཤིག་ལ་ཆག་སྐྱོན་བྱུང་ཡོད་སྐོར་བརྗོད་འདུག་པ་དང་། བོད་ལྗོངས་མཁའ་འགྲུལ་ལས་ཁུངས་ནི་རྒྱ་ནག་གི་འགྲུལ་སྐྱེལ་གནམ་གྲུ་ལས་ཁུངས་ཀྱི་ཁོངས་གཏོགས་ལས་ཁུངས་ཤིག་ཡིན་པ་དང་། དེ་ནི་བོད་ཀྱི་རྒྱལ་ས་ལྷ་སར་རྟེན་གཞི་བྱས་ཤིང་གནམ་གྲུ་ཁྱོན་ ༣༩ ཡོད་པ་རེད་ལ། རྒྱ་ནག་གཞུང་གིས་གནམ་གྲུ་དེར་བོད་ལྗོངས་མཁའ་འགྲུལ་ཞེས་འབོད་ཀྱི་འདུག

ཐེངས་འདིའི་གནམ་གྲུའི་དོན་རྐྱེན་དེ་ནི་ཉེ་ལམ་རྒྱ་ནག་གི་གནམ་གྲུ་ཞིག་ལ་མེ་སྐྱོན་བྱུང་སྟེ་ཟླ་གཉིས་མ་ཟིན་ཙམ་གྱི་མཚམས་སུ་བྱུང་བ་ཞིག་ཡིན་པ་དང་། ཉེ་སྔོན་ཕྱི་ཟླ་ ༣ ཚེས་ ༢༡ ཉིན་རྒྱ་ནག་གི་ཤར་ཕྱོགས་འགྲུལ་སྐྱེལ་གནམ་གྲུ་ཞིག་རྒྱ་ནག་གི་ལྷོ་ཕྱོགས་གྲོང་ཁྱེར་ཀོང་མིན་ (Kunming) ནས་ཀང་ཀྲུའུ་ (Guangzhou) གྲོང་ཁྱེར་དུ་འཕུར་སྐྱོད་བྱེད་བཞིན་པའི་སྐབས་སུ་མཐོ་ཚད་ཧྥི་ཊུ་ཁྲི་ ༣ གྱི་བར་སྣང་ནས་གློ་བུར་ཆགས་སྐྱོན་བྱུང་སྟེ། ཀཱང་ཤི་ས་ཁུལ་གྱི་ནགས་ཚུལ་ཞིག་ཏུ་ལྷུང་རྗེས་གནམ་གྲུ་དང་གནམ་གྲུའི་ཁ་ལོ་བ་གཙོས་པའི་ཞབས་ཞུ་བ་དང་། འགྲུལ་བ་ཁྱོན་མི་གྲངས་ ༡༣༢ བཅས་མི་ཚང་མ་འདས་གྲོངས་སུ་ཕྱིན་པའི་གནས་ཚུལ་ཐོན་ཡོད།

གསར་འགོད་པ། སྐལ་བཟང་སྦྱིན་པ།