དེ་རིང་དྷ་སའི་ཕུན་ཚོགས་ཁང་གསར་དུ་བོད་ཀྱི་བུད་མེད་ལྷན་ཚོགས་བཙན་བྱོལ་དུ་སླར་གསོ་བྱས་ནས་མི་ལོ ༣༨ འཁོར་བའི་དུས་དྲན་སྲུང་གཙི་གནང་སྟེ། བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་སྔར་ལྷག་ཚགས་ཚུད་དང་ཡར་རྒྱས་གཏོང་ཆེད་འདབ་གཤོག་གཉིས་ལྡན་གྱི་གཞོན་སྐྱེས་རྣམས་ཀྱིས་ལྷན་ཚོགས་དེར་ཞུགས་རྒྱུའི་རེ་བ་བྱེད་ཀྱིན་འདུག
དེ་རིང་ཆུ་ཚོད་ ༩།༣༠ ཡས་མས་ཤིག་ལ་དྷ་ས་ས་གནས་མགོ་འཛིན་གྱི་ཕུན་ཚོགས་ཁང་གསར་ཚོགས་ཁང་དུ་བོད་ཀྱི་བུད་མེད་ལྷན་ཚོགས་དབུས་ས་གཉིས་ཀྱི་གོ་སྒྲིག་འོག སྐུ་མགྲོན་གཙོ་བོ་བོད་ཀྱི་བུད་མེད་ལྷན་ཚོགས་ཀྱི་སློབ་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་དང་། དམིགས་བསལ་སྐུ་མགྲོན་དྷ་སའི་ས་གནས་མགོ་འཛིན་དཀོན་མཆོག་མིག་དམར་ལགས་གཙོས་ས་གནས་འཐུས་ཚོགས་ཀྱི་ཚོགས་གཙོ་དང་། རང་བདེན་ཚོགས་ཆུང་གི་ཚོགས་གཙོ། དེ་བཞིན་དབུས་བུད་མེད་ལྷན་ཚོགས་ཀྱི་ཚོགས་གཙོ་དང་རྒྱུན་ལས། གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་གི་འགན་འཛིན་དང་སྐུ་ཚབ་སོགས་ཚང་འཛོམས་ཐོག བོད་ཀྱི་བུད་མེད་ལྷན་ཚོགས་བཙན་བྱོལ་དུ་སླར་གསོ་བྱས་ནས་ལོ་ངོ་ ༣༨ འཁོར་བའི་དུས་ཆེན་སྲུང་གཙི་གནང་སོང་།
ཐོག་མར་དབུས་བོད་ཀྱི་བུད་མེད་ལྷན་ཚོགས་ཀྱི་སྤྱི་ཁྱབ་འགན་འཛིན་བསྟན་འཛིན་སྒྲོལ་མ་ལགས་ཀྱིས་དབུས་སྤྱི་ཁྱབ་རྒྱུན་ལས་ཁང་གི་བསྒྲགས་གཏམ་སྒྲོག་སྦྱངས་གནང་བའི་ནང་། ཕྱི་ལོ་ ༡༩༥༩ ཟླ་ ༣ ཚེས་ ༡༢ ཉིན་བོད་ཀྱི་རྒྱལ་ས་ལྷ་སར་རྒྱ་དམར་གྱིས་ཁྲིམས་འགལ་ཐོག་བོད་ས་ཡོངས་རྗོགས་བཙན་དབང་གིས་བོད་མི་ས་ཡ་གཅིག་ལྷག་དམར་གསོད་བཏང་བ་དང་བོད་ཀྱི་ཆོས་དང་རིག་གཞུང་རྩ་བརླག་ཏུ་གཏོང་བའི་ཆེས་ཛ་དྲག་སྐབས། བོད་ཀྱི་བུད་མེད་རྣམས་ཀྱི་འགན་མཉམ་འཁུར་གྱིས་ཆོལ་གསུམ་བུད་མེད་སྟོང་ཕྲག་མང་པོས་རྒྱ་དམར་གྱི་དྲག་གནོན་དང་བསླུ་བྲིད་ལ་མགོ་བོ་མི་སྒུར་བར་གདོང་ལེན་གྱི་སྙིང་སྟོབས་ཞུམས་པ་མེད་པའི་ཐོག་བོད་ཀྱི་བདེན་པའི་འཐབ་རྩོད་ལ་བོད་ཀྱི་བུད་མེད་ཀྱི་སྒེར་ལངས་བྱས་པའི་ལོ་རྒྱུས་རང་བཞིན་ལྡན་པའི་ཆོལ་གསུམ་བུད་མེད་ཀྱི་སྒྲིག་འཛུགས་གལ་ཆེན་ཞིག་ཆགས་ཡོད། ཕྱི་ལོ་ ༡༩༥༩ ནས་བོད་མི་རྣམས་བཙན་བྱོལ་དུ་སྔ་ཕྱིས་སུ་འབྱོར་བ་དང་བསྟུན་ནས་ཀ་རྡོར་གྱི་བུད་མེད་རྣམས་ནས་ལས་དོན་མཇུག་འཁྱོངས་ཆེད་བགྲོ་གླེང་ཡང་ཡང་གནང་རྗེས་བོད་ནང་བུད་མེད་སྒེར་ལངས་བྱས་ཏེ་ལོ་གཅིག་ཧྲིལ་པོ་འཁོར་བའི་ཉིན་མོ་ཕྱི་ལོ་ ༡༩༦༠ ཟླ་ ༣ ཚེས་ ༡༢ ཉིན་བོད་ཀྱི་བུད་མེད་ཚོགས་པ་བཙུགས་པའི་གསལ་བསྒྲགས་བྱས། བོད་སྤྱི་པའི་རྩ་དོན་དང་སྤྱི་ཚོགས་ཞབས་ཞུའི་ལས་འགུལ་རྒྱ་ཆེ་སྤེལ། ལྷག་པར་དུ་ཕྱི་ལོ་ ༡༩༦༣ ལོ་མགོ་ནས་ཀ་རྡོར་མཉམ་ལས། དྷ་ས་མཉམ་ལས། རཱང་སྤུར་མཉམ་ལས་མགོ་འཛུགས་ཞུས། ཕྱི་ལོ་ ༡༩༦༤ ནས་ཁ་མཐོར་གནས་པའི་ས་གནས་ཁག་ནས་སྤྱི་པའི་རྩ་དོན་ཆེད་བུད་མེད་ཚོགས་པ་བཙུགས་ནས་སྤྱི་དོན་སྨིན་པའི་ལས་དོན་རྒྱ་ཆེ་ཞུས། ཅེས་དང་། ༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བུད་མེད་ཚོགས་པ་ཡར་རྒྱས་གཏོང་དགོས་པའི་བཀའ་གནང་བ་བཞིན། མུ་མཐུད་ས་གནས་ཁག་སོ་སོར་བུད་མེད་ཚོགས་པ་བཙུགས་དགོས་པའི་གྲོས་ཆོད་བཞག་པ་བཞིན། ས་གནས་ཁག་བདུན་ནང་གཅིག་ཕན་གཅིག་གྲོགས་ཀྱིས་ཚོགས་པ་གསར་འཛུགས་ཞུས་ནས་གང་ཐུབ་ཀྱིས་ལས་འགུལ་སྣ་མང་སྤེལ། རིམ་བཞིན་མི་ཡུལ་དུ་འཚོ་གནས་ཀྱི་དཀའ་ངལ་ཆེ་བའི་ཆབ་སྲིད་ཀྱི་འགན་འཁུར་གྱི་གཙོ་བོར་ནུས་པ་ཉམས་སྐབས། ཕྱི་ལོ་ ༡༩༨༤ ཟླ་ ༩ ཚེས་ ༦ ཉིན་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་སློབ་ལས། སྔར་བུད་མེད་ཚོགས་པ་ཞིག་ཡོད་ཀྱང་བར་ལམ་འཇའ་ཡལ་བ་ལྟར་གྱུར། དེང་གི་འཛམ་གླིང་སྤྱི་སྲོལ་ལྟར་བུད་མེད་ཚོགས་པ་ཧྲ་ཐག་ཐག་གཅིག་བྱུང་ན། དགེ་མཚན་ཡོད་ལུགས་བཀའ་སློབ་སྤྱི་ཕེབས་དགོངས་དོན་བཞིན། བཞུགས་སྒར་དུ་གནས་བཞུགས་བུད་མེད་བཅོ་བརྒྱད་ཀྱིས་བཀའ་སློབ་དང་ལེན་ཞུས་ཏེ། ཕྱི་ལོ་ ༡༩༨༤ ཟླ་ ༩ ཚེས་ ༡༠ ཉིན་བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་སླར་གསོ་ཞུས་ཡོད། དེའི་ཉིན་ས་གནས་བུད་མེད་རྣམས་ཀྱིས་འགན་འཛིན་ལྷན་ཚོགས་ཤིག་གོ་སྒྲིག་ཞུས་ཏེ་བུད་མེད་གྲངས་བཅོ་བརྒྱད་ཀྱི་མ་སྐུལ་དང་བླངས་ཀྱིས་འགན་འཁུར་ཞུས། དེའི་ཁོངས་ནས་རྒྱུན་ལས་མི་གྲངས་བདུན་ལ་མང་མོས་འོས་འདེམས་གནང་ནས་ཉིན་དེར་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་སྙན་གསེང་དང་། རང་གཞུང་བཀའ་ཤག སྤྱི་འཐུས་ལྷན་ཁང་བཅས་ལ་སྙན་འབུལ་ཞུས་ཡོད། ས་གནས་བོད་ཀྱི་བུད་མེད་རྒྱུན་ལས་སྐབས་དང་པོའི་ལས་འཁུར་ཞུས་ཏེ། མ་འོངས་བོད་ཀྱི་བུད་མེད་ཡོངས་ཀྱི་མགྲིན་ཚབ་མཚོན་པའི་ཚོགས་པ་ཞིག་བཙུགས། ཞེས་འཁོད་ཡོད་འདུག
བསྒྲགས་གཏམ་ནང་། བོད་ཀྱི་བུད་མེད་ལྷན་ཚོགས་ཀྱི་འདས་པའི་ལོ་ངོ་ ༣༨ རིང་ལ་གཙོ་བོ་༧སྤྱི་ནོར་༧གོང་ས་མཆོག་གི་དབུས་པའི་བཙན་བྱོལ་སྒྲིག་འཛུགས་གོང་བཀུར་ཐོག་བོད་ཀྱི་བུད་མེད་ལྷན་ཚོགས་ཀྱི་སྒྲིག་གཞི་རྩ་འཛིན་འོག་བོད་ཀྱི་རྩ་དོན་ཆེད་ཆབ་སྲིད་ཐོག་གཞིས་བཞུགས་སྤུན་ཟླ་རྣམས་ཀྱི་མགྲིན་ཚབ་མཚོན་ཆེད་གཞིས་ལུས་རྒྱ་ཆེ་མི་མང་གི་ཞུམ་པ་མེད་པའི་རྒྱལ་ཞེན་ལྷག་བསམ་སྙིང་སྟོབས་དང་ཆིག་སྒྲིལ་གྱི་ནུས་པ་དུས་རྟག་ཏུ་ཡིད་བཅངས་ཀྱིས། གཙོ་བོ་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཕྱྭ་དང་ཡང་བསྒོས་བོད་བསྟན་སྲིད་མི་རིགས་ཆེད་བོད་ཀྱི་བདེན་པའི་འཐབ་རྩོད་ཀྱི་ལས་འགུལ་མཐའ་དག་འཚེ་མེད་ཞི་བའི་རྒྱ་ལས་མ་བརྒལ་བར་ལས་འགུལ་ཆེ་ཕྲ་ཆུང་གསུམ་གང་ཐུབ་སྤེལ་དང་སྤེལ་མུས་ཡིན། བཙན་བྱོལ་དུ་སྤྱི་ཚོགས་ཀྱི་ཞབས་ཞུ་ཐད་ས་གནས་ས་ཐོག་ཏུ་རྒྱ་ཆེ་ཤོས་ཞབས་ཞུ་འགྲུབ་མཁན་གྱི་ལྷན་ཚོགས་ཤིག་ཆགས་ཡོད། བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་འདི་ད་བར་མུ་མཐུད་ཚགས་ཚུད་ངང་གནས་ཡོད་པ་དེ་གཙོ་བོ་༧སྤྱི་ནོར་༧གོང་ས་མཆོག་གི་བཀའ་དྲིན་ཉག་ཅིག་དང་ཡང་བསྒོས་དབུས་ས་གཉིས་ཀྱི་རྒྱུན་ལས་གོང་མ་རྣམས་ཀྱི་ལྷག་བསམ་སེམས་ཤུགས་དང་ཚོགས་མི་རྣམས་ཀྱི་རྒྱབ་སྐྱོར་ལ་བརྟེན་ནས་བྱུང་བ་ཞིག་ལ་ངོས་འཛིན་ཞུ་ཡི་ཡོད། བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་འདི་བཞིན་སྔར་ལྷག་ཚགས་ཚུད་དང་ཡར་རྒྱས་ཡོང་ཆེད་འདབ་གཤོག་གཉིས་ལྡན་གྱི་གཞོན་སྐྱེས་རྣམས་ཀྱི་འགན་འཁུར་ཐོག་མུ་མཐུད་དུ་ལྷན་ཚོགས་ནང་ཞབས་འདེགས་བསྒྲུབ་རྒྱུའི་རེ་བ་དུས་ནས་དུས་སུ་ཞུ་ཡི་ཡོད། ལྷག་པར་དུ་གོ་སྐབས་འདིའི་བརྒྱུད་ནས་བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་འདི་ལ་ཆེ་མཐོང་དང་ཡིད་ཆེས་ཀྱི་ཐོག་ནས་རྒྱབ་སྐྱོར་གནང་མཁན་ཡོངས་ལ་བཀའ་དྲིན་ཤིན་ཏུ་ཆེ་ཞུ་རྒྱུ་ཡིན། ཅེས་འཁོད་ཡོད་འདུག
དམིགས་བསལ་སྐུ་མགྲོན་དྷ་སའི་ས་གནས་མགོ་འཛིན་དཀོན་མཆོག་མིག་དམར་ལགས་ཀྱིས། དེ་རིང་ཉིན་མོ་འདི་སྐལ་པ་བཟང་པོ་ཞིག་ངོས་འཛིན་བྱེད་པའི་ཐོག་ནས། ང་རང་ཚོ་འཐབ་རྩོད་ཀྱི་མི་རིགས་ཤིག་ཆགས་ཀྱི་ཡོད་པར་བརྟེན། གཞུང་འབྲེལ་མ་ཡིན་པའི་ཚོགས་པ་ཁག་གིས་བོད་སྤྱི་བའི་འཐབ་རྩོད་ཀྱི་དོན་དུ་ཕྱོགས་གང་སར་ནས་སྐུ་ལས་བསྐྱོན་གྱི་ཡོད་རེད། འདི་ལ་སོ་སོའི་ངོས་ནས་རྗེས་སུ་ཡི་རངས་དང་ཐུགས་རྗེ་ཆེ་གནང་ཞུ་རྒྱུ་ཡིན། དུས་རྒྱུན་དུ་ནས་ཕོ་མོ་འདྲ་མཉམ་གྱི་སྐོར་ལ་ཞུ་ཡི་ཡོད་པ་རེད། དམིགས་བསལ་གྱིས་དྷ་རམ་ས་ལའི་ས་གནས་མགོ་འཛིན་གྱི་ལས་ཁུངས་ལྟ་བུར་མཚོན་ན། ལས་བྱེད་མང་ཆེ་བ་བུད་མེད་ཆགས་ཀྱི་ཡོད། སླར་ཡང་ཚང་མ་ལ་བཀྲ་ཤིས་བདེ་ལེགས་ཞུ་རྒྱུ་ཡིན། ཞེས་འགྲེལ་བརྗོད་གནང་སོང་།
དེའི་རྗེས་སྐུ་མགྲོན་གཙོ་བོ་བོད་ཀྱི་བུད་མེད་ལྷན་ཚོགས་ཀྱི་སློབ་སྟོན་པ་བཀའ་ཟུར་རིན་ཆེན་མཁའ་འགྲོ་ལགས་ཀྱིས། དེ་རིང་བོད་ཀྱི་བུད་མེད་ལྷན་ཚོགས་སླར་གསོ་ཞུས་ཏེ་ལོ་ ༣༨ འཁོར་བའི་དུས་དྲན་ལ་ཕེབས་པའི་སྐུ་མགྲོན་རྣམ་པ་དང་ས་གནས་མགོ་འཛིན་གཙོས་པའི་ཚོགས་པ་མང་པོ་ཞིག་ཕེབས་འདུག དེ་བཞིན་བུད་མེད་མང་པོ་ཞིག་ཕེབས་འདུག ལྷན་རྒྱས་ཚོ་དང་མཇལ་བ་དམིགས་བསལ་གྱིས་དགའ་པོ་བྱུང་ལ། དུས་དྲན་འདིའི་ཐོག་ནས་བཀྲ་ཤིས་བདེ་ལེགས་ཞུ་ཡི་ཡོད། ཕྱི་ལོ་ ༡༩༦༠ ལོར་བཙན་བྱོལ་བོད་གཞུང་གི་འབྱུང་རིམ་དེ་རླབས་ཆེན་གྱི་མཛད་པ་ཞིག་ཆགས་ཀྱི་ཡོད་རེད། ང་ཚོ་བཙན་བྱོལ་བ་རེད། འཛམ་གླིང་འདིའི་ནང་སྐྱབས་བཅོལ་སྤྱི་ཚོགས་མང་པོ་ཡོད་ཀྱང་། ང་ཚོ་ནང་བཞིན་རུབ་རུབ་བྱས་ནས་སོ་སོའི་ཆོས་དང་རིག་གཞུང་། སྐད་ཡིག་བདག་པོ་བརྒྱབ་པ་དེ་འདྲ་ད་ལྟ་འཛམ་གླིང་ནང་ཡོད་པ་ངས་ཤེས་ཀྱི་མེད། དེར་བརྟེན་ང་ཚོ་བཙན་བྱོལ་དུ་འབྱོར་ནས་ཆོས་དང་རིག་གཞུང་། སྐད་ཡིག་སོགས་སྲུང་སྐྱོབ་བྱེད་ཐུབ་པ་དེ་ཧ་ལས་པ་ཞིག་ཡིན་པ་དང་། ང་ཚོས་སྤོབས་པ་བྱེད་དགོས་ཀྱི་རེད། ཅེས་འགྲེལ་བརྗོད་གནང་སོང་།
ཁོང་མོས་མུ་མཐུད་དུ། ༧གོང་ས་མཆོག་གིས་བོད་ཀྱི་རྒྱལ་རབས་ལོ་རྒྱུས་ནང་མེད་པའི་དམངས་གཙོ་གསོལ་རས་གནང་བ་རེད། འོན་ཀྱང་དམངས་གཙོ་ཟེར་དུས་དམངས་གཙོའི་ནང་གཏམ་བརྗོད་ཀྱི་རང་དབང་ཡོད་རེད། དེ་གལ་ཆེན་པོ་ཞེ་དྲགས་ཡིན་སྐོར་དང་། མིའི་མཚན་ཉིད་ནི་སྨྲ་ཤེས་དོན་གོ་བ་རེད། སྨྲ་ཤེས་པ་དེ་སྨྲ་ཆོག་གི་མེད་ན་དོན་དག་མི་འདུག དེར་བརྟེན་སྨྲ་ཤེས་དོན་གོ་བ་དེ་དམངས་གཙོའི་སྒྲིག་འཛུགས་ནང་སོ་སོར་འགན་ཞིག་ཡོད་པ་དེ་འཁྱེར་བའི་ཐོག་ནས་དམངས་གཙོའི་ལམ་ལུགས་བེད་སྤྱོད་གཏོང་བ་ཡིན་ན་རྩ་བ་ཉིད་ནས་ནོར་གྱི་མེད་པ་དང་། འགན་འཁྱེར་སྟངས་དེ་དམངས་ཀྱི་བདེ་བའི་ཐོག་ལ་བསམ་བློ་གཏང་དགོས་སྐོར། དེ་བཞིན་སོ་སོའི་རྒྱལ་ཁབ་ཀྱི་ཐོག་ལ་བསམ་བློ་གཏང་རྒྱུ་གལ་ཆེན་ཡིན་པ་དང་། གཞིས་བྱེས་མཉམ་འཛོམས་དང་རྡོག་རྩ་གཅིག་སྒྲིལ་དགོས་པ་དེ་གལ་ཆེན་ཆགས་ཀྱི་ཡོད་སྐོར། སྐད་ཡིག་བསྲེས་ལྷད་མེད་པར་རང་གི་སྐད་ཡིག་སྲུང་སྐྱོབ་དང་། བོད་ཆས་ཚད་ལྡན་གྱོན་དགོས་ཤིང་། ཡ་རབས་བཟང་སྤྱོད་དགོས་རྒྱུ་གལ་ཆེན་ཡིན་པས། དེ་དག་ལག་བསྟར་བྱ་དགོས་སྐོར་འགྲེལ་བརྗོད་གནང་སོང་།
གསར་འགོད་པ། བསྟན་འཛིན་ཕུར་བུ།
