དེ་རིང་བོད་ཀྱི་ཟློས་གར་ཚོགས་ཁང་དུ་ཕྱི་ལོ་ ༡༩༧༡ ལོར་བོད་ཀྱི་བདེ་ལེགས་སྨན་ཁང་དབུ་བརྙེས་ཏེ་ད་བར་ལོ་ངོ་ ༥༠ འཁོར་བའི་མཛད་སྒོ་འཚོགས་སོང་།
དེ་རིང་ཕྱི་ཚེས་ ༤ ཉིན་བོད་ཀྱི་བདེ་ལེགས་སྨན་ཁང་དབུ་བརྙེས་ཏེ་ལོ་ངོ་ ༥༠ འཁོར་བའི་དུས་དྲན་དེ་བོད་ཀྱི་ཟློས་གར་ཚོགས་ཁང་དུ་ཚོགས་སོང་བ་དང་། མཛད་སྒོའི་སྟེང་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དབུས་པའི་བོད་མི་མང་སྤྱི་འཐུས་རྣམས་དང་དཔལ་ལྡན་དགའ་ལྡན་ཕོ་བྲང་གི་དྲུང་ཆེ་རྣམ་པ་དབུས་པའི་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པ་དང་སྲི་ཞུའི་ལས་བྱེད། བོད་ཀྱི་བདེ་ལེགས་སྨན་ཁང་གི་འགོ་ལས་ཡོངས་ཀྱི་གཙོས་ཕྱོགས་མཐའ་ཁག་ནས་ཆེད་དུ་ཕེབས་པའི་སྨན་པ་དང་སྨན་ལས་ཆེད་མཁས་པ། བོད་མིའི་སྒྲིག་འཛུགས་ཀྱི་མཛད་ཟུར་དང་སྤྱི་ཟུར་ཁག་ཅིག དེ་བཞིན་བདེ་ལེགས་སྨན་ཁང་གི་ལས་བྱེད་ཟུར་བ་དང་གསར་འགོད་པ་དང་མི་མང་བཅས་འཛོམས་འདུག
ཚོགས་ཐོག་ཏུ་སྐུ་མགྲོན་གཙོ་བོ་སྲིད་སྐྱོང་སྤེན་པ་ཚེ་རིང་མཆོག་དང་དམིགས་བསལ་སྐུ་མགྲོན་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དེ་བཞིན་ཚོགས་གཞོན་སྒྲོལ་མ་ཚེ་རིང་སོགས་ནས། བདེ་ལེགས་སྨན་ཁང་གི་ལོ་རྒྱུས་དཔེ་དེབ་ཅིག་དང་ནད་རིགས་བཅོས་ཐབས་ལམ་སྟོན་སྐོར་གྱི་དཔེ་དེབ་གཅིག་བཅས་དབུ་འབྱེད་གནང་ཞིང་། དམིགས་བསལ་བདེ་ལེགས་སྨན་ཁང་གི་སྤྱི་ཁྱབ་སྨན་པ་དང་༧སྐུའི་བླ་སྨན་པ་ཚེ་བརྟན་རྡོ་རྗེ་ལགས་ཀྱིས་འདས་པའི་ལོ་ངོ་ ༤༠ རིང་བཙན་བྱོལ་སྤྱི་ཚོགས་ནང་འཕྲོད་བསྟེན་དང་འབྲེལ་བའི་ཞབས་འདེགས་ཞུས་པར་ཆེ་བསྟོད་སླད་འཇམ་པའི་དབྱངས་ཀྱི་སྐུ་རྟེན་ཞིག་དང་བདེ་ལེགས་སྨན་ཁང་གི་ལས་བྱེད་ཞབས་ལོ་ ༢༠ འཁོར་བ་བཞི་ལ་ཆེ་བསྟོད་གཟེངས་རྟགས་བཅས་ཕུལ་གནང་སོང་།
སྐབས་དེར་བདེ་ལེགས་སྨན་ཁང་གི་འགན་འཛིན་སྤྱི་འཐུས་ཟླ་བ་ཕུན་སྐྱིད་ལགས་ཀྱིས་བདེ་ལེགས་སྨན་ཁང་གི་ལས་བསྡོམས་སྙིང་བསྡུས་ཤིག་སྒྲོག་སྦྱངས་གནང་ཞིང་། སྐུའི་བླ་སྨན་པ་དང་བདེ་ལེགས་སྨན་ཁང་གི་སྤྱི་ཁྱབ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་ཀྱིས། གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་དང་ཡང་སྒོས་རང་གི་དགེ་བའི་བཤེས་གཉེན་དང་ཕ་མ་གཉེན་ཉེ། ལས་རོགས་དང་ནད་པ་རྣམས་ཀྱི་བཀའ་དྲིན་ལ་བརྟེན་ནས་རང་ཉིད་ལ་འདས་པའི་ལོ་ངོ་ ༤༠ ཙམ་གྱི་རིང་སྤྱི་ཚོགས་ཞབས་ཕྱི་ཞུ་རྒྱུའི་གོ་སྐབས་བྱུང་བར་བརྟེན། ཡོད་ཚད་ལ་བཀའ་དྲིན་ཆེ་ཞུས་པ་དང་སྦྲགས། སྨན་པ་ཞིག་ཡིན་པའི་ངོས་ནས་སྨན་སྤྲོད་པ་དང་ཁབ་བརྒྱག་པ། དེ་བཞིན་བརྟག་དཔྱད་གཏོང་བ་ཙམ་མ་ཡིན་པར་ལུས་ངག་ཡིད་གསུམ་གྱི་ཀུན་སྤྱོད་ཐོག་ནས་ནད་པར་ལྟ་སྐྱོང་དང་སྨན་བཅོས་བྱ་རྒྱུ་གལ་ཆེན་ཡིན་སྐོར་གྱི་གཏམ་བཤད་སྤེལ་སོང་།
དམིགས་བསལ་སྐུ་མགྲོན་སྤྱི་འཐུས་མཁན་པོ་བསོད་ནམས་བསྟན་འཕེལ་ལགས་ཀྱིས། སྨན་པ་ཟེར་བའི་ཐ་སྙད་དེ་བོད་ཀྱི་བཙན་པོ་ཁྲི་སྲོང་ལྡེའུ་བཙན་སྐབས་ལྷ་རྗེ་ཞེས་པ་ནས་མཆེད་ཅིང་། འདས་པའི་ལོ་ངོ་ ༥༠ རིང་བདེ་ལེགས་སྨན་ཁང་གི་སྨན་པ་དང་སྨན་ཞབས་པ་ལ་སོགས་པའི་གནས་སྟངས་ཡར་རྒྱས་ཕྱིན་ཡོད་པར་བསྔགས་བརྗོད་དང་འབྲེལ། འདས་པའི་ལོ་ངོ་ ༥༠ རིང་བདེ་ལེགས་སྨན་ཁང་ངོས་ནས་དྷ་སའི་ཁུལ་གཅིག་པུ་མ་ཡིན་པར་བཙན་བྱོལ་བོད་མིའི་གཞིས་ཆགས་ཁག་ཡོངས་ཀྱི་ནང་ནད་གཞི་བརྟག་དཔྱད་དང་འབྲེལ་བའི་ལས་གཞི་སྤེལ་ཞིང་། མ་འོངས་པར་བོད་གཞིས་བྱེས་མཉམ་འཛོམས་བྱུང་སྐབས་བདེ་ལེགས་སྨན་ཁང་གི་ཡན་ལག་མདོ་དབུས་ཁམས་གསུམ་ནང་གཉེར་ཐུབ་པའི་རེ་བ་ཡོད་པའི་གསུང་བཤད་གནང་སོང་།
སྐུ་མགྲོན་གཙོ་བོ་སྲིད་སྐྱོང་སྤེན་པ་ཚེ་རིང་མཆོག་གིས། ཕྱི་ལོ་ ༡༩༧༡ ལོར་བདེ་ལེགས་སྨན་ཁང་དབུ་བརྙེས་པ་ནས་ད་སྔ་བར་གྱི་རྒྱབ་ལྗོངས་ལོ་རྒྱུས་གནད་བསྡུས་ཤིག་གསུངས་པ་དང་འབྲེལ། དེ་སྔ་སྲིད་སྐྱོང་མཆོག་ནས་གྲོས་ཚོགས་དང་འཚམས་གཟིགས་སོགས་ཀྱི་སྐབས་གསུངས་པ་ལྟར། མི་ཞིག་གི་མི་ཚེའི་ནང་དཀའ་ངལ་ཆེ་ཤོས་ནི་ན་བའི་སྐབས་དང་རྒས་པའི་སྐབས་ཡིན་པ་དང་། ན་བའི་སྐབས་ལྟ་རྟོག་བྱེད་མཁན་གཙོ་བོ་སྨན་པ་དང་སྨན་ཞབས། དེ་བཞིན་དེ་འབྲེལ་གྱི་འཛིན་སྐྱོང་ལས་ཀ་བྱེད་མཁན་རྣམས་ཀྱང་ཡིན་སྟབས། འཇིག་རྟེན་འདིའི་ནང་མི་ལ་ཕན་ཐོགས་ཆེ་ཤོས་ནི་སྨན་གྱི་ལས་ཀ་ཡིན་པར་ངོས་འཛིན་བྱེད་ཀྱི་ཡོད་སྐོར་གསུངས་པ་དང་། བདེ་ལེགས་སྨན་ཁང་གི་སྔ་རྗེས་ཀྱི་འགན་འཛིན་རིམ་པ་དང་སྨན་པ་དང་སྨན་ཞབས་པ། ལས་བྱེད་ཡོངས་ནས་བདེ་ལེགས་སྨན་ཁང་ཡར་རྒྱས་གོང་འཕེལ་གྱི་ཆེད་དུ་དངོས་ཤུགས་བརྒྱུད་གསུམ་གྱི་ཐོག་ནས་ཞབས་འདེགས་ཞུས་པར་ཐུགས་རྗེ་ཆེ་ཞུས་སོང་།
གསར་འགོད་པ། སྐལ་བཟང་སྦྱིན་པ།
